When you look inside Bible, you go see many-many word. No let that one discourage you make you no read Bible! Instead, think of Bible as table wey get plenty different food wey person fit eat. You no go fit eat everything wey you see. But you fit select the one wey go dey enough for you.

 To fit gain well-well from the “food” wey dey Bible, you go really need to put mind for wetin you de read. This article go help you do that one.

For this article

•  Why e good to really put mind for wetin you de read for Bible?

•  How you fit really gain from your Bible reading?

•  Wetin other young people de talk

 The more we de try our best to put mind for wetin we de read, the more we go de gain. Make we use this example talk-am: You fit dip tea bag inside hot water for short time, and get small taste. But you go get more taste, if you allow the tea bag stay for the hot water for long time.

 Na so e be with Bible reading. Instead make we just de rush de read Bible, e good make we really put our mind for wetin we de read and de take some time think deep as we de read. Na wetin the person wey write Psalm 119 do be that. When e de talk about God law, e say: “I de think deep about-am the whole day.”—Psalm 119:97.

 That one no mean say we go spend the whole day de read and think about Bible. See the point: The person wey write Psalm take e time think about God Word. And that one help-am to fit make good decision.—Psalm 119:98-100.

 “My mama tell me one time say, ‘you get seven days for one week and you de use that seven days do many things for yourself. Why you no give Jehovah some time? Na the correct thing be that!’ ”—Melanie.

 When you de think about the advice wey dey Bible, you go fit de make better decision—for example, when you de choose people wey go be your friend or when temptation to do bad thing come.

•   Get plan. One young person wey e name na Julia talk say “e good to get program wey you go de follow to do your Bible reading.” E sill talk say e good to “know wetin you want read, the time wey you go read, and where you go for read.”

•   Arrange Better Place. One young woman wey e name na Gianna talk say “e good to arrange quiet place to de read.” E still talk say “e good make you tell your family members about your Bible reading program so that them no go de disturb you.”

   If you de use phone or computer, set-am for way wey any message or call no go disturb you. You fit even try to use the Bible wey them print for book. In fact, research don show say if person use book wey them print, e dey easy for the person to understand the thing wey e de read. But e fit hard to really put mind for wetin person de read when e de use phone or computer.

   “E de hard to put mind for wetin I de read when I de use phone. The phone de always get plenty message or the battery go low or internet no go dey. But when I de use the one wey them print for book, the only thing wey I go worry about na to get enough light wey I go use see wetin I de read.”—Elena.

•   Pray first. Beg Jehovah to help you understand, remember, and gain from the things wey you want read for Bible.—James 1:5.

   To show Jehovah say you really want the things wey you pray for, do deep research for the place wey you de read. How you fit do this one? If you de use JW Library app or the Bible wey dey online, you fit click any verse to see more research and articles wey talk about-am.

•   Ask questions. ‘For example, wetin this place teach me about Jehovah? E de talk about any of Jehovah character wey I fit copy?’ (Ephesians 5:1) ‘Wetin I learn for this place wey I read wey I fit use for my life?’ (Psalm 119:105) ‘E get any way wey I fit use wetin I learn take help other people?’—Romans 1:11.

   Still ask yourself say, ‘How the thing wey I read take connect to the main message for Bible?’ This question really dey important. Why? Because e get how everything wey dey inside Bible—from Genesis to Revelation—take connect to the main message for Bible wey be: How Jehovah go take use e Kingdom for heaven to make e name dey holy and show say na im get the right to rule and say na the way e de rule be the best.