QUESTIONS WEY YOUNG PEOPLE DE ASK
How I Fit Improve the Way I De Discuss With People?
Why e good to talk with people face-to-face?
Some people talk say to talk with person face-to-face no easy and e de make them tire, especially when them compare-am with to send message.
“When you de talk with person face-to-face, you no go fit change or delete anything wey you don talk like you fit do when you de send message.”—Anna.
“To send person message be like program wey them don record, but to talk with person be like live show. When I de talk to person, everything wey I de think na to dey careful ‘make I no make mistake!’”—Jean.
The truth be say, time go come wey you go need to know how to talk with people face-to-face. For example, you go need to know how to talk with people if you want make new friends, get work and continue to work with people, and to date person when you don ready for marriage.
But you no need to fear to talk with people face-to-face. You fit learn to do-am even if you be person wey de shame.
“Sometimes you fit talk wetin no correct and this one fit make shame catch you. Make you no expect say you go dey perfect.”—Neal.
How to start to talk with person
Ask questions. Think of one topic wey people fit like, and then start to talk about the topic. For example:
“You travel go anywhere this holiday?”
“This website make sense oh!. You don see-am before?”
“You hear about . . . ?”
To fit ask question wey concern the person, think of something wey you and the person like. For example, una de go the same school or de work for the same place? You fit ask question about something wey concern the two of una.
“Think about questions wey you like and wey you really like to hear the answer wey people go give.”—Maritza.
Dey careful: No come de ask plenty question like say you de interview the person. And no ask question wey fit make the person feel somehow. Questions like “Wetin you de fear pass?” or “Why you de always wear blue cloth?” fit make person feel somehow. The second question fit even be like say you de find fault!
Another thing wey you fit do make e no be like say you de interview the person, na for you to talk wetin you think about the question before or after the person talk im answer. This one mean say make e be discussion—no be interview.
The kind questions wey you de ask de make-am be like say you de interview person?
Bible advice: “Wetin person de think be like water wey dey for deep well, but person wey get deep sense fit draw them come out.”—Proverbs 20:5, Good News Bible.
De listen well. To fit succeed to de discuss well with people, you need to de listen well, no be to de talk plenty.
“I de try to learn one new thing about the person wey I de talk with. After, I de do my best to remember some things wey the person talk about so that I fit think of question wey I go use the next time.”—Tamara.
Dey careful: No worry about the next thing wey you go talk. If you listen well, you go fit know the answer wey you go give the person.
Bible advice: “Ready to listen, . . . no de quick talk.”—James 1:19.
Show say you really care. You go enjoy to talk with person more if you care about the person wey you de talk to.
“Even though say sometimes the discussion fit dey somehow, when you let the other person see say you really care about wetin e de talk, the discussion go sweet.”—Marie.
Dey careful: No ask question wey go make the person feel somehow. For example, e no go good to tell the person say “This your dress fine oh! How much you buy-am?”
Bible advice: “No de look for wetin go benefit only unaself, but wetin go still benefit other people.”—Philippians 2:4.
How you fit end the discussion? One young man wey e name na Jordan talk say: “Talk something wey fit make the person happy when you de end the discussion.” “When you talk something like, ‘I really enjoy our discussion’ or ‘Abeg make you enjoy your day’ this one fit make-am easy for you to talk with the person next time.”