•   How you de feel when you hear other people de use bad words as them de talk?

  •  I no de even notice-am​—na normal thing for me.

  •  E de worry me small​—but I no de tell them to stop.

  •  I no de like-am when people talk like that​—I no fit just accept-am.

•   How many times you de use bad words when you de talk?

  •  I no de ever use bad words

  •  I de use bad words sometimes

  •  I de use bad words everytime

•   You think say to use bad words when we de talk na big problem?

  •  No

  •  Yes

 To use bad words na really big problem? Maybe you fit talk say, ‘No be problem. After all, we get problems for this world to worry about wey big pass that one. And, everybody de use bad words!’ That one na true?

 The truth na say, plenty people today no de use bad language. And they get good reasons why they no de use bad language wey other people never think about. For example:

•  When you use bad words, e de show the kind person wey you really be. Wetin you de talk de show the kind person wey you be. If you de use bad words, e de show say you no de care about people. Na that kind person you be?

   Bible talk say: “Anything wey comot from the mouth come from the heart.”​—Matthew 15:18.

•  When you de use bad words, e fit make people to see you as bad person. The book wey the title na Cuss Control talk say: “The way we de talk go show whether people for our family and people wey we de work with go respect us, or whether we go get work or big position for work, and wetin strangers go think about us.” The book still talk say: “Ask yourself whether your life or your friendship with other people go better if you stop to use bad words.”

   Bible talk say: “Make wuna stop . . . curse-curse.”​—Ephesians 4:⁠31.

•  When you de use bad words people no go respect you as you de think. Dr.  Alex Packer talk for e book wey the title na How Rude! say: “E de tire people to listen to person wey de use bad words when e de talk.” The doctor still talk say, to people wey de listen to person wey de use bad words, the things wey e de talk “no dey funny, no make sense, and no de show love. If you de use the same bad words all the time, e no go make you better person.”

   Bible talk say: “Make rotten word no come out of wuna mouth.”​—Ephesians 4:​29.

•  Plan wetin you want do. Try to stop to use bad language for one month? Each day, use calendar or paper write wetin you don do as you plan for that day. But if you really want stop to use bad language when you de talk, you go need to do other things. For example:

•  No de watch films or listen to music wey them de use bad language. Bible talk say: “Bad friends de spoil fine character.” (1 Corinthians 15:33, footnote) “Friends” wey this Bible verse use no be only people​—e fit still be the films wey you de watch, the video games wey you de play, and the music wey you de listen to. Kenneth, wey be 17 years, talk say: “E dey easy to sing the song wey you like and you no even notice say they use bad words for the song​—just because the sound of the music sweet.”

•  Show say you be mature person. Some people de use bad language because they think say e go make people see them as people wey don grow. But that one no be true. Bible talk say mature people “don train their sense well as them de use-am everytime, so that they go know the difference between good and bad.” (Hebrews 5:​14) They no de use bad words so that people go “respect” them.

 The truth na say, when we use bad language we de spoil our mind and the mind of the people around us. Plenty people for the world don already de think about dirty things! The book Cuss Control talk say, “No add to the dirty things wey them de think about.” The book still talk say, “Do everything wey you fit do to make sure say you de use good words when you de talk to people. You go feel good about yourself, and people go like to dey around you.”