Plenty students no de go their school to learn now, instead them de learn from another kind of “classroom”​—their house. If na that kind arrangement you de use, how you fit really succeed to learn? See some things wey fit help you. a

•  Five points wey fit help you succeed

•  Wetin other young people de talk

•   Plan how you want de do-am. Try get program or plan wey you go de follow every day, just as e be when you de go school. Know the time wey you go de use for schoolwork, housework, and other important things. If you need to change the way you plan some things, no problem.

   Advice for Bible: “Make wuna do everything . . . make e arrange well.”​—1 Corinthians 14:40.

   “Plan your day make e be the same as if you still de go school. You need to do some things for some particular time.”​—Katie.

   Think about this question: Why e good to write your plan for paper and put-am for place wey you go quick de see-am?

•   Train yourself to do the correct thing. One sign wey go show say you don de mature na when you know say sometimes you must finish your work, even when the work no de sweet you to do. No talk say you go do-am later.

   Advice for Bible: “Make you de work hard, no take your work play.”​—Romans 12:11, footnote.

   “Wetin dey hard pass na to train yourself to do the correct thing. E dey easy to just tell yourself say, ‘I go do my schoolwork later.’ And you no go do-am later. For the end, you no go even do-am at all.”​—Alexandra.

   Think about this question: If you de do your schoolwork for the same place and for the same time every day, how that one fit help you train yourself?

•   Get place wey you go de stay to learn. Put all the things wey you go need near your side. Make the place wey you de stay to learn dey comfortable. But make e no too dey comfortable sotey e go make you de sleep. Na work you want de do for there, no be sleep! If you no fit get one particular place wey you go de stay to do your schoolwork, maybe for school period, you fit use kitchen or bedroom as your study place.

   Advice for Bible: “When people work hard, their plans go surely succeed.”​—Proverbs 21:⁠5.

   “Make basketball and video games no dey near you. Silent your phone, and put the guitar inside e bag. No put anything for your side wey go make-am hard to put your mind for wetin you de learn.”​—Elizabeth

   Think about this question: Which things you fit adjust for the place wey you de stay to learn so that you go fit de focus more for wetin you de learn?

•   Learn to focus. Think about wetin you de learn and no try to de do plenty things for the same time. If you de try do plenty things for the same time, e dey very possible say you go make mistake and spend even more time to finish your work.

   Advice for Bible: “Make wuna de use wuna time well.”​—Ephesians 5:16.

   “When my phone dey near me, e de hard me to focus for wetin I de learn. I de waste plenty time to do things wey no really benefit me.”​—Olivia.

   Think about this question: You fit increase the amount of time wey you de use to focus for one work?

•   De go break. You fit go stroll, ride bicycle or do other exercise. Do something wey you de enjoy to do. “But first finish your work,” na so one book wey them de call School Power talk. E still talk say, “You go really feel free for free time if you no get work wey de wait for you.”

   Advice for Bible: “E better make person rest small than make e overdo hard work and de pursue breeze,”​—Ecclesiastes 4:6.

   “For school, them de teach us how to play music instrument or design something. Na now wey those things no dey again, I come see say I really de miss-am. E good make you de add things wey you de enjoy to do join other schoolwork.”​—Taylor.

   Think about this question: Which kind break go help you get more power to continue your schoolwork?