Your friends invite you to one party this weekend. But when you ask your papa and mama whether them go allow you go, them talk say, “No.” E no surprise you because na the same answer them give you the last time wey you ask them the same thing.

For this article

•  Why my papa and mama no de always allow me do wetin I want?

•  Wetin I go do so that my papa and mama fit allow me do wetin I want?

•  Wetin some young people talk

 Why my papa and mama no de always allow me do wetin I want?

 If your papa and mama no de ever allow you to do the things wey you like to do, e fit make you feel say them no want make you enjoy yourself.

 One young woman wey im name na Marie feel like this when e get im first phone. E talk say: “My papa give me plenty rules about the kind app wey I fit download, the people wey I fit talk with for phone, and when I go stop to talk with them everyday. But my friends fit do anything wey them like with their phone!”

 Think about this question: You think say Marie papa no really want make Marie enjoy imself? Which things you think say Marie papa fit don de worry about?

 Try this one: Think-am say you be papa or mama and your pikin wey dey around 13 to 19 years just get one smart phone. Wetin be some things wey you fit de worry about? Which rule you go give your pikin to protect-am? Wetin you go talk if your pikin talk say you no want make e enjoy imself?

 “My papa de always talk say, ‘Put yourself for my situation.’ When I think-am like that, this one de help me value the rules wey them give me and the reason why them give the rules. If I get children, I go like make them follow the same rules wey my papa want make I follow.”​—Tanya.

 Wetin I go do so that my papa and mama go allow me do wetin I want?

 “Your papa and mama always get better reason why them give you rules. No be because my papa and mama no want make I enjoy myself make them de give me rules, but na because them no want make I enter problem.”​—Ivy.

 Bible advice: “Na everything wey de vex person wey no get sense e de talk come out, but person wey get sense de control imself.”​—Proverbs 29:11.

 “Dey patient. E fit take time before your papa and mama go adjust the rule wey them give you, but if them see say you de obey the rules wey them give you, e go easy for them to comot some rules for you.”​—Melinda.

 Bible advice: “Make una de obey una papa and mama for everything.”​—Colossians 3:20.

 “Your papa and mama want see say you sabi make better decision. So when I de talk with my papa and mama, I de try to explanin wetin I de talk well instead of to show them how I de feel. When I do like this, e fit make my papa and mama allow me do wetin I tell them say I want do.”​—Joseph.

 Bible advice: “Respect your papa and mama.”​—Ephesians 6:2.