QUESTIONS WEY YOUNG PEOPLE DE ASK
Sex Wey Them De Use Mouth Do Na Really Sex?
As the U.S. Centers for Disease Control and Prevention talk for one report, about half of the young people wey they interview from 15 years go reach 19 years don put hand for sex wey them de use mouth do. Sharlene Azam, wey write the book wey the title na Oral Sex Is the New Goodnight Kiss, talk say, “If you talk to young people about sex wey them de use mouth do, they go tell you say that one no be problem.” E still talk say, “The truth na say, they no de even see that one as sex.”
How you go answer this questions about sex wey them de use mouth do?
Answer yes or no to this questions for under.
Girl fit get belle if they use mouth do sex?
Yes
No
Person fit catch sickness if e use mouth do sex?
Yes
No
Sex wey them de use mouth do na really sex?
Yes
No
Wetin be the correct answers?
Check your answers with the ones wey we give for down
Girl fit get belle if they use mouth do sex?
Answer: No. Na this one make plenty people de think say bad thing no fit happen if person use mouth do sex, but that one no be true.
Person fit catch sickness if e use mouth do sex?
Answer: Yes. Person wey use mouth do sex fit catch sickness like hepatitis (A or B), genital warts, gonorrhea, herpes, HIV, and syphilis.
Sex wey them de use mouth do na really sex?
Answer: Yes. Any time wey person touch the private part of another person—whether na sex wey them de use mouth, sex wey them de use anus, and to rub the private part of another person make e de sweet the person—all this things na the same as the normal sex wey man and woman de do.
Why e dey important to know wetin God think?
Make we see some verses for Bible wey fit help us understand how God de feel about sex wey them de use mouth do.
Bible talk say: “Wetin God want, na make wuna dey holy and make wuna no de do any sex wey e hate.”—1 Thessalonians 4:3.
The word wey they translate as “sex wey [God] hate,” na all kinds of sex wey person de touch the private part of another person wey no be e wife or husband. Person wey de put hand for sex wey God hate fit get serious problems, and the one wey bad pass na say e fit spoil e friendship with God.—1 Peter 3:12.
Bible talk say: “Any person wey de put hand for sex wey no clean de sin against e own body.”—1 Corinthians 6:18.
Person wey use mouth do sex fit catch sickness and spoil e relationship with God. E fit still make person de feel bad. The book wey the title na Talking Sex With Your Kids talk say, “Sometimes people wey de do sex before they marry de regret-am and they fit feel say the person wey they do the sex with no care about them. And na the same way people de feel when they do any other kind of sex. Any other kind of sex fit bring this problems.”
Bible talk say: “Na me, Jehovah, be your God. Na me be the Person wey de teach you for your own good.”—Isaiah 48:17.
You believe say the laws wey God give us about sex de help you? Or you think say the laws de disturb you make you no enjoy your life? To help you answer this questions, think about one busy road wey get speed limit, traffic signs, and stop signs. You de see say this signs de disturb you or them de protect you? Wetin go happen if you and other drivers no gree obey this signs?
The laws wey they give about how to drive for road fit make you no get the freedom wey you want, but this laws de protect you. Na so the laws wey God give us fit make you no get all the freedom wey you want, but them de protect you
Na the same thing too with the laws wey God de give us. If you no obey them, you go bring trouble to yourself. (Galatians 6:7) “If you continue to leave the correct things wey you believe and de do the things wey you know say they no correct, you no go dey happy with yourself,” na so the book wey the title na Sex Smart talk. But if you follow the laws wey God don give us, you go dey happy with the way you de live your life. And the one wey dey important pass na say, you go get clean conscience.—1 Peter 3:16.