QUESTIONS WEY YOUNG PEOPLE DE ASK
Make I Baptize?—Part 3: Wetin De Hold Me?
Fear de catch you anytime you think-am say make you give your life to Jehovah and baptize? If na so, this article fit help you.
For this article
What if I make serious mistake after I baptize?
Why you fit de worry: E fit be say you know person wey don commit serious sin and them come disfellowship-am. (1 Corinthians 5:11-13) You fit de worry say this kind thing fit happen to you.
“When e first come my mind say make I baptize, I come really de fear say I go commit serious sin after I baptize. I come de think about the kind shame wey this one go bring to my papa and mama.”—Rebekah.
Bible verse: “Make the wicked person leave e wicked way . . . Make e come back to Jehovah, e go pity-am, make e come back to our God, because e go open hand to forgive.”—Isaiah 55:7.
Think about-am: Even though say them de disfellowship people wey no gree repent after them commit serious sin, Jehovah de show mercy to people wey humble theirself, repent, and accept correction.—Psalm 103:13, 14; 2 Corinthians 7:11.
The truth na say, with help from God we fit fight temptation. (1 Corinthians 10:13) Who de decide wetin you go do? You? Or another person?
“I fear say I go make serious mistake after I baptize, but later I come see say na mistake I de make if I no gree baptize. I come see say I no need to let wetin go happen tomorrow hold me make I no do wetin I suppose do today.”—Karen.
The main point na say: If I want, I fit choose to run from serious sin, just as many of Jehovah people de do-am.—Philippians 2:12.
You need more help? Check “How Can I Resist Temptation?”
What if I de fear the work wey go come after I baptize?
Why you fit de worry: For example, you fit know some young people wey leave their family and friend go where them need more people to preach and do more for Jehovah work. You fit come de worry say people go de expect make you do the same thing
“Christian wey don baptize qualify to get more privilege for Jehovah organization, but some no just ready for this privilege or their condition no allow them do-am.”—Marie.
Bible verse: “Make each person check the things wey e de do, and then e go get reason to de happy with wetin e don do, and no be to compare imself with another person.”—Galatians 6:4.
Think about-am: Instead make you de compare yourself with other people, put mind for the things wey de Mark 12:30: “You must love Jehovah your God with all your heart.”
Know say na your whole heart you go use serve Jehovah—no be another person own. If you really love Jehovah, you go find ways to give-am your best.
“Na true say to baptize na serious matter, but no be something wey de make life hard for person. If you choose better friends, them go always ready to help you. As you de put body for congregation work small-small, you go de happy pass before. If you no gree baptize, you go de deny yourself the joy wey you for get from the different privileges wey dey the congregation.”—Julia.
The main point na say: Continue to de show say you de thank Jehovah for the love wey E don show you. That one go move you to fit give Jehovah your best.—1 John 4:19.
You need more help? Check “How Responsible Am I?”
What if I de feel say I no qualify to serve Jehovah?
Why you fit de worry: Na Jehovah big pass for the whole world, human being no be anything compare to-am! You fit de wonder whether Jehovah even know you at all.
“Because my papa and mama na Jehovah witness, I come de worry say the friendship wey I get with Jehovah na something wey I just inherit, and say Jehovah no draw me to imself.”—Natalie.
Bible verse: “Nobody fit come meet me, unless say the Papa wey send me draw-am come.”—John 6:44.
Think about-am: As you de think about to baptize, e show say Jehovah de draw you near im side and e want make you be im friend. E no go make sense to accept that invitation?
Still remember say na Jehovah—no be you or another person—de set rule for people wey e go draw come im side. And im Word for Bible promise you say if you “come near God, . . . e go come near una.”—James 4:8.
Say you know Jehovah and e don draw you come im side show say e love you. So when your mind tell you say you no qualify to serve Jehovah, remember say Jehovah no agree with that one. And Jehovah de always dey correct.”—Selina.
The main point na say: If you meet up with the things wey Bible talk say e fit qualify person to baptize, then you qualify to worship Jehovah. The one way pass that one be say, Jehovah deserve your worship.—Revelation 4:11.
You need more help? Check “Why I Need to Pray?”