•  Why you need to use your time well?

•  Wetin you fit do

•  Wetin other young people de talk

•   Time be like money. If you waste-am, you no go get-am when you go need-am. But if you use your time well, you go get enough time to do other things wey you de enjoy!

   Bible advice: “Things dey wey lazy person want, but e no get anything. But when person de work hard, e go get all the things wey e want.”—Proverbs 13:4.

   The main point: If you sabi manage your time you go get more freedom, no be small one.

•   To fit manage your time well na better thing wey fit help you now and for future. E fit even help you make you do your work well and them no go sack you from your work. If you open your own workshop, you go allow person wey de always come work late make e de work for you?

   Bible advice: “Person wey them fit trust for small thing na person wey them fit still trust for big thing.”—Luke 16:10.

   The main point: When you sabi manage your time well, e de show the kind person wey you be.

 The truth be say, to manage time no easy. Make we see some problem wey fit make-am hard for you.

 Problem 1: Friends

 “If my friends tell me say make I follow them comot, I de always go with them even if I no really get time. I de think say, ‘when I come back I go rush finish the work.’ But e no de happen as I think, things de spoil no be small.”—Cynthia.

 Problem 2: Things wey fit disturb you

 “TV na one big problem wey fit make-am hard for you to fit manage your time well, because e get plenty program and film wey de chop time.”—Ivy.

 “I fit waste plenty time de press phone. E de pain me say I no de fit stop to press my phone unless the battery die.”—Marie.

 Problem 3: To de push wetin you want do go front

 “I de push my school assignment and everything wey I need to do go front. I de waste time for things wey no get head until I go finally do my assignment, and this one no good at all.”—Beth.

1.   Write the things wey you want do. For example, write your homework and the work wey you want do for house. Write how much time you go need to finish each work for one week.

    Bible advice: “Make sure say una de choose the things wey dey important pass.”—Philippians 1:10.

2.   Write the things wey you de like to do when you dey free. This one concern time wey person spend for social media and wey you use watch TV program. Still write how many hours e de take you to do each one for one week.

    Bible advice: “Make una de use sense do things . . . , de use una time well.”—Colossians 4:5.

3.   Make plan. Check the two list wey you don already make. You don make enough time for each important work wey you want do? You fit reduce the time wey you take de enjoy yourself?

    See wetin you fit do: Write things wey you want do for each day and mark anyone wey you don finish.

    Bible advice: “When people work hard, their plans go surely succeed.”—Proverbs 21:5.

4.   Do wetin you don plan. The truth be say, sometimes, you no go need to accept invitation to go enjoy yourself, so that you go fit do things wey dey important. After everything, you go see say you go get more free time and you go enjoy-am more.

    Bible advice: “De work hard, no play with your work.”—Romans 12:11, footnote.

5.   Take time relax and enjoy yourself—but wait for the right time. One young woman wey e name na Tara talk say: “Sometimes, after I don do two things from the things wey I plan to do, I go think say, ‘Ok I fit watch TV for 15 minutes before I go start my work again.’ But, 15 minutes go turn to 30 minutes and 30 minutes go turn to one hour, and before I go know I don waste two hours de watch TV!”

    The solution? Make you de see to relax and enjoy yourself as something wey you go use pay yourself when you don finish your work, no be something wey you go de do everytime.

    Bible advice: “Nothing better pass for person to . . . enjoy the work wey e de do.”—Ecclesiastes 2:24.