Got wei wal porpor Ersem. Olom separim ye pile, kunum kunum mol punda. (Song 90:2) Yu kawei Baibel a meim e, olom Mem wei. (1Timoti 1:11) Got kenem ersem pile, olom mongse kangim mine keramen.​—Revelesen 4:11 gerdel.

Ya mala alamb ende Got na kanjip nalerim, olom Kipe meim. Yu e mem embe mal, olom ya mala alamb na wal porpor meim bol ding mal na meim, olom mol tuluk wei tonom. (Jon 1:18; 4:24) Wusngam ende kenem Got mambnem aiem kanamen e, olom wal erkem meim bar kanamen. Olom plawa na ond mongom kanem kanem erkem meim e, tadom olom kanka mem na bunuman kapam ye. Kupulmal tamban aban sepunum e tadom, olom omblom dongal pa tuluk wei tonom.​—Rom 1:20 gerdel.

Wusngam ende, kenem Baibel gernamen bar Got mambnem aiem pende meim kanamen. Embe mal, Got ka kanim na ka nakanim wal kenem nengonom, ala olom wusngam jeljel alamb bol mambnem enem mal pra dom.​—Buk Song 103:7-10 gerdel.

Jises embe nim: “Kin Danjen nim min kupula mein, nim kangem kei kuru wei senda.” (Matyu 6:9) Got kangim kerma pulikes mem ba, olom kangim wei ding eri paim. Alamb yujep jeljel paim mal Got kangem dasim. Iglis a “Jehovah’’ panim. Ala alamb pende “Yawe” panim.​—Mak 12:29 gerdel.

Baibel puli Got kangim mom si sikele, dumam a Got mo Ye kerma pane bonjip. Ba Baibel komna wei bonjip kunum, Got kangem wei 7,000 pel mom. Jises ya mala mom kunum, Got kangim negom alamb kanjip.​—Jon 17:26 gerdel.

Ombun duwom kanem kanem mine wonom e, tadom Got kenem ne napisim mo? Alamb pende nim ne ombun duwom  mine wonom e, Got kenem kaunamen mo ma kanal ne ngonom panim, ba e yu wei ma.​—Jems 1:13 gerdel.

Got alamb wal embe embe eya nadom, ba kankelnde alamb enjep ka pisim mal esim. Got kenem embe embe eya nadom bar, kapile olom konganem enamen mo? (Josua 24:15) Ba alamb puli, alamb ende bol mambnem kes erngom, embe pile mambnem kes wose kerma punum. Mambnem dulto naesim bar, Jova kane kumbol ombun wei sinem.​—Stat 6:5, 6 gerdel.

Got Jova kenem ne wei pilngonom ye. Olom kenem kawei wei moramen ne pisim. Ombun duwom ya mala paim e na, alamb mol erkerambe mine wonom alamb, topor ninda mand enem. Mem ka ende pande, Got kankelnde ombun duwom kunum ipal eri paim. Yu duwom 8 a akling pu, yu mem e kanamen.​—Read 2 Pita 2:9; 3:7, 13 gerdel.

Jova kenem wiro, enem yane ne nakin yune se mand wonam padom. Kenem alamb ding dingne olom pilngonom. (Song 65:2; 145:18) Olom kapile molo kenem jingdang wakronom. Kenem ombol ere olom bol ka moramen ne esmen ba, kunum pende kaple naenem olom kanem. Kenem alamb dune nameimen, ba kenem Got bol mol mand pu ka moramen kaple enem.​—Song 103:12-14; Jems 4:8 gerdel.

Kenem kol meimen mem Jova olom ngom, embe pile wal ende ende kanka kanamen e papunda, olom eri kankawei kanamen. (Mak 12:30) Kenem Got kankawei wei kane yuwom duwom ere, wal eya dom wal enjin dal olom bol molmand wei punamen.​—1 Timoti 2:4; 1 Jon 5:3 gerdel.