1. Kenem nawal ende bol pilgi nimen?

 KENEM JOHOVA alambem man meimen, embe pile pilkane esmen olom kenem kanka kanem, ala kunum kunum kapil moramen nepisem. (Rom 8:35-39) Ala kenem pilgi nimen, Baibel kolta yu meim karkar enamen bar kenem pakeronda. (Ais. 48:17, 18) Ba min wonda ne napismen ombun ende in wonda kunum kenem nal enamen?

2. (a) Kenem nal ombun pende kaunamen? (b) Ombun embe mal erkelde nawal bol bu puli keramen?

² Johova konganem alamb porpor ombun kauwum. Pende embe mal, pemili tuwalto ende erkelde nim kumbol ombun sindel. Kenem kes kerma ende nganja pande, Johova konganem puli enamen kaple nanda. Nolmal bo er tondo ombun ende kaunamen. Mo pilgi nimen wal erkelde kenem to karpos keram. Ombun embe kaunamen kunum embe ne pisamen: ‘Nalende ombun embe mal na bol min wonom? Na alla ende erind mo? E tadom Johova na bol mambnem ka nanem mo?’ Kunum pende ne nim ding mal embe pilpile erin mo? Embe pam dal nim kumbol ombun na sindel. Johova konganem alamb puli, bunuman ding mal embe sise enjip eri.—Sng. 22:1, 2; Hab. 1:2, 3.

3. Buk Song 34:19 yu paim bar, kenem nawal duwom esmen?

³ Buk Song 34:19 gere. Buk Song wes ele wal kerma tal  ende duwom esmen e embe: (1) Alamb dulto ombun kauwum. (2) Ombun min wonom kunum Johova kenem pakeronom. Olom kenem nalmal pakeronom? Wusngam ende, olom kenem pakerondo ya mala nomolpa esmen bar, bunuman dulto ambismen. Johova yu dongal ne, kenem olom konganem enamen bar kapil moramen panim, ba ombun min nawonda pananim (Ais. 66:14) Olom kenem nengonom ngo mibulto—aimanj aimanj kapil nomolpa enam mal buro piya dom. (2 Kor. 4:16-18) Ba yipe kunum ipal eri kenem pakerondo olom konganem esmen.—Kra. 3:22-24.

4. Yu duwom yipe enamen bar nawal omukro kanamen?

⁴ Johova konganem alamb kombe monjip na yipe meim, yu boljop meim omuk manero kane duwom enamen. Yu duwom yipe enamen bar, min wonda ne napismen ombun min wonda mal omukro kanamen. Ba Johova bol pilgi ninjin dal, olom kenem weieri pakeronda. (Sng. 55:22) Pilgi pam ga yu boljop omukro kanamen kunum, nenem ki embe sindel: ‘Ombun ding mal na bol min wom dal, nal enal? Yubol e, na Johova bol pilgi nind mem nalmal er dongal enem? Duwom erind wal, nanam nomolpa erind bar nalmal konganem enal?’

5. Laban nal ombun pende Jekop ngom? (Garwom oriro ngimba piksa paim kane.)

⁵ Johova konganem alamb kombe monjip, min wonda ne napinjip ombun min wowo erim. Wal Jekop bol min wom mal buro pile. Dam olom nengo nim Laban amblem ende sindel panim, e olom maiyam ding ende Got bol pilgi nine erim. Embe endel bar, Johova erkelde nim bol wal ka puli min wonda panim. (Stt. 28:1-4) Embe pile, Jekop dam nim yu karkar erim. Jekop kulu Kenen sikele se Laban garem kol pum. Laban amblem tal monjil—e Lea and Resel. Jekop ambel akling Resel kankawei kanim, embe pile dam Laban kongan kongar 7-poro erngo sinal panim. (Stt. 29:18) Ba Jekop, wal min wonda nepim mal min nawom. Laban mambnem gend ere, amblem komna Lea sip Jekop ngom. Ala Laban Jekop nengo nim wakan ding bulto Resel sindel panim, ba nim ala kongar 7-poro kongan endel panim. (Stt. 29:25-27) Ala Jekop kongan erim bar kunum puli, Laban olom topom ambil min men erngom. Laban Jekop bol mambnem napam mal kongar 20-poro erngom!—Stt. 31:41, 42.

6. Jekop nal ombun pende pra kawum?

⁶ Jekop ombun pende pra kauwum eri. Olom pemili kerma monjip, ba ngangem man ende ende bol kumbol ding namonjip. Enjep angjep Josep ku bolngo nolawol nipye mal mom. Jekop ngangem Simion na Livai wal napam mal ere pemili kangem tokes mokjil, ala Johova kangem tokes mokjil eri. Ala ombun ende, Jekop kanka kanim ambiem Resel ngal ende kangle gom. Jekop tuwa wei sem kunum, enjep monjip bar komb kono kerma wei sem, embe pile enjep se kulu Isip pu moram pam.—Stt. 34:30; 35:16-19; 37:28; 45:9-11, 28.

7. Johova Jekop bol kapim mem nalmal tanim?

⁷ Ombun puli Jekop bol min wom, ba olom Johova na yu dongal nim bol pilgi nim mem wak narom. Embe erim bar, Johova olom bol kapim mem tanim. Ende embe mal, Laban Jekop bol mambnem napam mal erngom, ba Johova Jekop bol mambnem ka tane, nganj wal puli wei ngom. Ala Jekop, ngangem Josep kombe gom nepim ngal—ala kanim kunum Johova bol nalmal kapim mal buro pile! Jekop, Johova bol seno ka mom pakerongo ombun olom bol min wom kauwo akilgi nim. (Stt. 30:43; 32:9, 10; 46:28-30) Kenem pra  kunum kunum Johova bol seno ka monjin dal, napismen ombun ende min wonda kauwo akilgi ninamen.

8. King Devit nawal ende enal ne buro pim?

⁸ King Devit Johova konganem porpor enal nepim mal enda kaple narim. Ende embe mal, olom Got aiem Johova tempol gar ende taunda kawei wei pim. Olom enda kapim wal propet Natan nengom. Kunum ele propet Natan olom nengo embe nim: “Nim nawal ende enal ne ka pisen wal endel, nalenem Got wei nim bol meim.” (1 Sto. 17:1, 2) Weieri, yu e Devit kumbol er dongal wei enda erim. Embe pile, tempol gar taunam mal olom pulnom bolo erkun erim.

9. Devit kanapim yumolom ende ninjip pim kunum, nalerim?

⁹ Kanan wo napungo, Johova propet aiem Devit kanapim yu molom ende nim. “Kunum ele emilpal,” Johova natan nengo Devit tempol gar nataunda, ba olom ngangem ende taunda panim. (1 Sto. 17:3, 4, 11, 12) Devit yu molom e pim kunum nalerim? Olom tempol taunal ne bu dongal pam wakrom. Olom ngangem Solomon tempol gar e taunda, ond ku na wal pende ambsik panda wal si makeronal ne bu dongal pam.—1 Sto. 29:1-5.

10. Johova nalmal er kelnge walka Devit bol min wom?

¹⁰ Johova Devit nengo nim tempol gar nataundol panim kunum bulto, wamnam olom bol yu dongal ende nim. Johova Devit bol yu dongal ende ne, nim ngal kopanem ende min wo king aimanj aimanj mora panim. (2 Sml. 7:16) Kunum kolnga sende Jises Kongar Wan Tausen poro kongan To king enda kunum, Devit duwom ere pilkane enda king e olom pemili aiem a min wom panda kunum, olom ka pisa mal buro pile! Yubol e paim bar taninde pilkane esmen, kunum pende ne kenem Johova kongan enamen ne pismen mal er kaple nanamen. Ba kenem napismen mal Johova wusngam pende erkelde wal ka min wonda.

11. Kristen kombe monjip, Got Gapman mal kantawol enda ne pinjip mal narim, ba nawal ka pende enjep bol min wom? (Apo 6:7)

¹¹ Komna Kristen monjip, enjep wal min wonda ne pinjip mal nawom. Ende embe mal, enjep Got Gapman mal kantawol enda kapinjip, ba nal kunum wal e min wonda kanpol naronjip. (Apo 1:6, 7) Embe pile enjep nal enjip? Enjep kumbol wei ngo Baibel yu neori kenjip. Enjep kulu puli wei Baibel yu neori kel wanjip kunum, Johova enjep nalmal pakerom mal pilkane enjip.—Aposel 6:7 gere.

12. Komna Kristen komb kono kerma sem, kunum nal enjip?

¹² Kunum ende, “mal yem yem poro” komb kono kerma wei sem. (Apo 11:28) Komb kono kerma e, komna Kristen ga monjip ombun ngom. Kono e sem kunum, enjep mokun tambem erim mal buro pile. Weieri kunum ele, pemili pengem enjip ga pemili aijep nalmal kantawol enam mal bu puli kera kenjip. Ala ye amb, gal Baibel yu puli neori keram ne pinjip bar nalmal ombun pakim? Enjep kui molpo kono sem porninde bulto, kongan enamen ne pisa pinjip. Ombun embe min wom ba, komna Kristen ga enam pam wal enjip. Enjep wusngam ende akerom kunum Baibel yu neori kenjip, ala kapil kannojip wal, angjep ambajep man Judia monjip bol omuk ronjip.—Apo 11:29, 30.

13. Komb kono kerma sem ba, Johova nalmal er kelnge Kristen ga bol wal ka min wom?

¹³ Komna kono sem kunum, Kristen ga bol nawal ka pende min wom? Ga pende pilgi ding angjep ambajep man enjep mokun ngo pakeronjip bar, Johova enjep pakerom pilkane enjip. (Mat. 6:31-33) Pilgi ding angjep ambajep man enjep pakeronjip bar, kawei wei pisa pinjip. Ala pilgi ding angjep ambajep man, ku  na wal pende ngonjip mo kongan pakeronjip bar enjep enjep kawei wei pinjip. (Apo 20:35) Ombun puli min wom ba akilgi ne kaujip bar, Johova er kenlge wal ka puli enjep bol min wom.

14. (a) Alamb Pol na Banabas bol nawal enjip? (b) Enjel akilgi ninjil bar nawal ka min wom? (Apo 14:21, 22)

¹⁴ Komna -Kristen monjip, kunum puli enjep to erkes ere, to karpos kel kele enjip, kunum pende ne wal embe min wonda ne napinjip mal min wom. Kunum ende Banabas na aposol Pol, kulu Listra Baibel yu neori kel punjil kunum wal min wom mal buro pile. Yero, yu ninjil komol se pinjip alamb, enjel bol jembinware ne yu ka ne sinjip. Ba ding kunum opyem ga pende “alamb puli yu gend ne ngongo,” ga pende aposol Pol ku togoram ne tonjip. (Apo 14:19) Ba Pol na Banabas, kulu pende Baibel yu anjngo neori kel punjil. Embe enjil bar nawal ka min wom? Enjel kongan enjil bar alamb pende wo “disaipol monjip,” ala yu ne mambnem enjil bar pilgi ding angjen ambanjen man er dongal wei enjil. (Aposel 14:21, 22 gere.) Pol na Banabas, alamb wamnam enjel to erkes ere karpos kenjip kunum, wimuk wamnam naninjil bar ga puli kane pake sinjip. Embe ding mal, Johova kenem eya ne ngonda kongan wimuk ne wak naronjin dal, erkelde wal ka kenem bol min wonda.

15. Angjen A. H. Mekmilen yu bolom paim bar, nim nawal duwom enen?

¹⁵ Kongar 1914 min nawom kunum yero, Johova alambem man wal ende min wonda ne pinjip. Angjen A. H. Mekmilen bol wal min wom mal omukro kanamen. Ga puli pinjip mal, angjen Mekmilen kunum ele se epen pu topom sinal mand wonom nepim. Septemba 1914 kunum make ende pam bar olom yu ende ne embe nim: “Na alamb poro pisam yu nine erind yipe pordom.” Ba olom yu e nim, ne wulom narim. Angjen Mekmilen bulto pepe ende bolo embe nim: “Weieri kin pende wamnam se epen punamen ne bunuman kerma pam.” Olom yu pende embe nim: “Kin wal ende enamen e, kunum puli kele Johova konganem enamen.” Weieri angjen Mekmilen kunum puli kele Johova konganem erim. E, Baibel yu neori kesim kongan kumbol wei ngo erim. Olom kenem pilgi ding angjen man, op nganmal tuwal pu nanjip bar to karpos kenjip panjip, yu ne er dongal erim. Olom kunum kunum kongrikeisen make pam bar kumbol wei ngo pupo erim. Angjen Mekmilen min epen topom ka sinal ne kui mom kunum, olom anj dunglom nalmal konganem ka erim? Olom gora mand erim kunum kongar 1966, pepe ende bolo embe nim: “Na pilgi wal dongal wei mond, kulko narim” Kenem wal ende min wonda ne kanan kui er molpo nawom dal—kenem nal bunuman ambramen mal angjen ta kawei nim, karkar enamen!—Hib. 13:7.

16. Angjen Hebet Jenings na ambiem bol, nal ombun ende napinjjil mal min wom? (Jems 4:14)

¹⁶ Johova alambem man pulikes wei, keswos naronda ne pisim mal tonom. Ende embe mal, angjen Hebet Jenings b wal olom bol min wom mal yubol tom bar, ambiem bol kulu Gahana misinari kongan ere kapil monjil mal nim. Embe pam, ba kunum pende wopungo, angjen Jenings olom peng a kes ende pam. Ombun e min wom kunum olom Jems 4:14 a yu pam buro pile embe nim, “Topla min wonda wal nakanmen.” (Gere.) Ombun e kil bol weieri min wom, embe pile kulu Gahana na seno tapka tonjin ga wakro, se Kanada pu [ausik punambel pam].” Johova angjen Jenings na ambiem bol pakerongo ombun min wom kauwo, konganem anjngo er monjil.

17. Angjen Jenings yu bolom, pilgi ding angam ambam man pende nalmal pakerom?

 ¹⁷ Angjen Jenings nomolpa erim bar wal min wom mal yu bolom, ga puli pake wei sinjip. Ambajen ende embe nim: “Na angjen Jenings yu bolom ger kanj kunum, komna napil pile erind mal pinj. . . . Angjen e olom kes tom kunum, kongan wakro ausik pum bar na pakerongo pilkane erind, nomolpa enal bar wal ende min wonda, bunuman dulto ambral pam.” Angjen ende yu ding mal embe nim: “Na kongar ten poro kongan elda erind, ba kongan e wakro sikeral pam nalerim na kes ende penga pam. Ombun na bol min wom er kelnge, alamb yu boljop mom gerind bar wandil wei sise erind. . . . Ba angjen Jenings’ yu bolom gerind na pake weirom.” E, tanind pilkane esmen, napismen ombun ende kenem bol min wonda kunum, kauwo akilgi ne tomen keramen kaple enem. Embe enamen bar, alamb ende kane dongal sinam.—1 Pita 5:9.

18. Piksa paim kanmen mal, amb kangil ende Naigeria mem, wal olom bol min wom bar nawal duwom esmen?

¹⁸ Kes COVID-19 min wom er kelnge Johova alambem man ombun puli kaujip. Amb kangil ende Naigeria mom, olom mokun na ku tambem wei erim. Kunum ende olom rais kap dingeri mongse sem gam kunum, amblem olom ki si, mi bulto nawal nonambel a nim. Kunum ele amb kangil e olom amblem nengo, kelep mokun na ku ende napaim, ba Sarepat—amb kangil mokun nasem kunum wal erim mal, kelep Johova bol pilgi wei ninambel panim. (1 Kin. 17:8-16) Enjel bele kunum nawal nonambel ne buro pilmonjil kunum, pilgi ding angjel ambajel man mokun puli wei si tujip. Mokun puli tunjip e enjel no punamble, wakan tal mo talende ende punda pam. Ambajen e nim, na yu ne ambilna ngond, Johova mand wei molo pilmom pam panim. Weieri, kenem Johova bol sengse monjin dal, napismen ombun ende min  wonda erkelde se olom bol mand punamen.—1 Pita 5:6, 7.

19. Angjen Aleksi Yersov nalmal ere, olom to karpos kenjip?

¹⁹ Kongar pende pi wopunom, pilgi ding angjen ambajen man to karpos kele erkes enjip, e wal min wonda ne napinjip mal min wom. Angjen Aleksi Yersov, kulu Rasia meim, wal olom bol min wom mal omukro kanamen. Angjen Yersov kongar 1994 kunum nol pam. Johova alambem man kulu Rasia monjip kongar ele, priari molo olom lotu er ngonjip. Kongar pende bulto, Rasia yo sese erim mal nasem. Kongar 2020 kunum, alamb angjen Yersov garem bou ne tuwal pu, kannom wal poro mokum sinjip. Ala oll pende bulto, gapman olom lo tokerem ye pane kot ne ngonjip. Ombun wo kes wei pum e, kongar pende yero ye ende yu gend ne, Baibel yu duwom enal kapis panim ye, vidio ende erim bar taninge olom to ambjip. Ye e, mambnem kes wei eriml!

20. Angjen Yersov Johova bol senom mem nalmal er dongal erim?

²⁰ Angjen Yersov to erkes ere, sip kot er ngonjip bar wal ka pende min wom mo? Weieri min wom. Olom Johova bol senom mem wo dongal wei pum. Olom embe nim: “Na ambina bol yane kunum kunum nine enjil. Pilkane erind ombun min wom Johova na pake naronda, nanam dongal a kaunal kaple nanda pam.” Olom yu pende ne embe nim: “Na nam Baibel yu duwom erind pakerongo, bunuman kes pende min wom tomen kend. Na kombe pilgi dongal pam ga, wal enjip mal buro pilpile erind. Baibel a yubol puli wei meim, kenem nalmal kini wei molo, Johova bol pilgi ninamen wal kerma paim mal tadom.”

21. Yu duwom yipe enjin bar nawal duwom enjin?

²¹ Kenem nawal pende duwom esmen? Kenem nomolpa esmen bar, min wonda ne napismen ombun min wonom. Embe paim ba, Johova konganem alamb olom bol sengse meim, kunum kunum enjep pakerom. Yu duwom yipe esmen bar Baibel yu kerma sinjip dom mal, “mambnem dulto enem alamb ombun puli olom bol min wonom, ba Johova olom pakerondo ombun e olom tomen nakerem.” (Sng. 34:19) Kenem kunum kunum ombun min wonom mal buro napisamen, Johova dongal kerma paim mal buro pisamen. Embe enjin dal, kenem aposol Pol pim mal ding mal pisamen. Olom embe nim: “Na wal porpor enal dongal paim, nalenem dongal ngongo erim ye na dongal ngonom.”—Fili. 4:13.