Johova Adam Ip tal nengom ngo, ngal kangle “mol pune mal porpor puya” nim. Yu e nim tadom, mal pal paradais senda nepil nim. (Stt 1:28) Paradais a moram ga yu e pra karkar enem. Komna gaden Iden sem mal yipe nasem pile,—moram ga kongan puli enambe mal wose paradais punda. Amagedon bulto, mal tabem puli yipe tokes mokul kenjip seim, kongan puli erpe wose ka punda. E kongan kerma wei panda!

Yu embe nimen kenem bunuman si akse, Israil ga komna Babilon karpos porninge yem wo, kongan kerma enjip mal pismen. Enjep maljep, kongar 70-poro ei sem. Ba Aisaia yu propet nim, Johova enjep pakerondo ala erka enam panim. Olom embe nim: “Elim erkere kulu ei seim wose Iden mal punda, ala mal kulman er ei seim, erkere Iden Johova kulu wam mal senda.” (Ais. 51:3) Israil  ga enjip mal, yipe mal sinam ga Johova pakerondo, erkerambe wose kawei wei punda. Nim wal pende yipe endel bar, bulto kongan kerma min wonda pakeronal ne erkun ermen.

Wusngam ende embe endel e, nim yipe nomolpa enen bar erkeli kawei wei senda. Alamb yipe embe nasem, ba nim endel. Ala Kibung esim dumam na Kongrikeisen Make tom dumam, pra erka endel eri. Nim endel kaple erim dal, nolmal bo mo ombun kerma ende min wonom bar pakerondol. Nem ki embe sindel, ‘Bulto na mal si moral kunum, kongan enal mal wal pende yipe duwom erind mo?’

Jises Jairus amblem si akim kunum bulto, wamnam mokun ende ngonambe nonda nim. (Mak 5:42, 43) Kongar 12 mom ambel e, mokun ngo kantawol enam ombun puli napam. Ba Jises yu dongal nepakim min wonda e buro pile, “alamb porpor kipku a meim ngalem numun pile seori wonam.” (Jon 5:28, 29) Weieri, Baibel yu puli pende nadom, ba pilkane esmen, gonjip paim akil wonam ga, mokun, gar na konkongol sinam ambsik panda. Nim wal pende yipe endel bar, enjep pakeronal ne erkun men tanindel. Pi wal pende enamen mal, ki meim omukro kanamen.

Seket tawol ye nim kongrikeisen a wonom kunum, mokun ai nonamen wa don mo? Johova konganem kunum-kunum Betel ermeim kongan kol ngom ga, mo seket tawol ye kongan pordom kunum, enjep pakeroni gar ende kansinam ne enen mo? Riginol make kerma ende nim kulu min wom dal, yero mo bulto kongan mora pakero, alamb wom kapane se enen mo?

Aposol 24:15 dom pilkane esmen, alamb billien puli kes gonjip paim, akil wonam. E ga puli yero Johova ye nalmal pilkane najip, ba  kunum ele Johova kin duwom ere, sape si kanpol tonam. Got konganem ga yipe a kameim, golo paim ga wonam yu duwom erngonam. (Ais. 11:9) Ambajen ende kangem Saloti, kulu Irop, Saut Amerika na Aprika, yu neori kel wanim, olom kongan embe ende kapisem. Elim wopile embe nim: “Alamb ende kombe mom, yu bolom Baibel a pam gerind kunum, embe ne pilpil erind: ‘Alamb nomolpa erim bar Johova kanpol tonange, olom jel mal morange.’ Embe pile, akil wonam ga, duwom erngon Johova sape si nomolpa enam bar, mem kapanda.”

Yero Jises ya mala nawom kunum, Johova konganem ga olom bol ka monjip, wal puli duwom erkanam. Dainel yu propet bol mokum, yu mem kanpolnarom, ba nim olom nengondol kaple enem e, wal kawei wei ende. Ala Rut na Nomi pakero, enjel pemili aijel a Mesaia min wo pane ngondol, mal pile. Alamb yu duwom erngonam bar, nim pra erngondol e wal kawei, kunum ele yipe ombun duwom paim, wei napanda!

Nim yipe nalmal ernombro molo, gonjip wonam alamb yu duwom erngondol? Wusngam ende embe endel e, alamb yu duwom erngondol mal yipe erkeli wose ka punda, ala kunum kunum Baibel yu neori kerel. (Mat. 24:14) Nim kongar semin punom mo, ombun ende erkelde, yu neori kongan puli naenen, ba yipe kumbol ngo enen kongan e, nim pakerondo mi bulto gonjip paim akil wonam, erkun ermolo yu duwom erngondol.

Ki kerma ende paim buro pisamen e, Nim mal sinal ne erkun ermen mo? Ala gonjip paim alamb akil wonam, gar ngo, yu duwom erngo, ala mal erkelni paradais senda ne ka pisen mo? Nim yipe kongan embe ding mal, kumbol ngo erindal, mi bulto mal si kunum kunum morol bar, kongan e endel mal tadon!