1. Jises gora kunum mand wei erim kunum, kunumb kun ye ende olom pambar yemto mand pam, nal yu ende negom? (Luk 23:39-43)

 JISES na kunumb kun ye tal ende olom pambar yemyem to pakjip, nganj ngimbil sinjip goram kunum mand wom. (Luk 23:32, 33) Ye tal aima Jises bol yu kes ninjil, e tadom enjil olom disaipol ende namonjil. (Mat. 27:44; Mak 15:32) Ba ye ende kumbol to akro embe nim: “Jises nim Gapman pengem endel kunum na pilngoi.” Jises yu pundom nengo embe nim: “Yipe na yu weieri ne nim ngond,, nim na kin Paradais a morol.” (Luk 23:39-43 gere.) Kunumb ye e, ‘Got Gapman mand wonom ne yu pilkane erim pane yu ende pande nakanmen. Ala Jises, ye e se min epen pu Got Gapman senda bar mora pananim eri. (Mat. 4:17) Jises yu nim e, akling ya mala Paradais min wonda e pilnim. Nalende kenem embe nimen?

2. Nawal tadom kunumb ye kumbol to akrom e, Juda ye?

² Kunumb ye kumbol to akrom e, Juda ye ende panda pam. Kunumb ye ende pambar embe nim: “Olom kin ombun ding mal sinen, ba Got kin kisnal nagoron kana?” (Luk 23:40) Juda ga Got dingeri lotu erngojip, ba alamb dulom pende got puli pilgi ne lotu erngojip. (Kis. 20:2, 3; 1 Kor. 8:5, 6) Kunumb ye tal Juda ye namorambilnge, ende ki embe sinange nim, “Nim got porpor bol kisal nagoron kana?” Ala ende, Jises alamb dulom pende pakeronda ne nawom, “Israil sipsip tai pu monjip” pakeronda newom. (Mat. 15:24) Got Israil ga bol yu ne penema kele, gonjip paim si aksal panim. Kunumb ye kumbol to akrom ye, yu e pende pilkane enda erim, olom yu nim bar tadom, Johova Jises si akildel Got Gapman a kongan enda nepim. Ala olom pra si aksa ne pilgi nim eri. E tadom olom Juda ye.

3. Jises Paradais panim kunum, kunumb kun ba kumbol to akrom ye, nawal buro pim? Yu bolto. (Stat 2:15)

³ Olom Juda ye pile, Johova Adam na Ip erkem Paradais a monjil paninjip, olom pilkane enda erim. Embe pile, Jises  yu Paradais panim kunum, kunumb ye pilgi nim akling ya mala kulu kawei sende moral nepim.—Stat 2:15 gere.

4. Jises yu ne kunumb ye ende ngom bar, kenem nawal buro pisamen?

⁴ Jises yu ne kunumb ye ngom erkelde, mal wose Paradais punda kunum, kenem nalmal mal moramen mal buro pismen. Solomon King mom pakam, kongan kaernge kumbol amin senge, alamb kapil Paradais a mal monjip kenem pilkane esmen. Ba ende molse minto wei pu, Solomon kongan King erim ngom e, Jises. Olom kongan ding ga bol king kongan enam kunum, mal wose Paradais pundo kulu kawei senda. (Mat. 12:42) Kenem pilkane esmen, “sipsip dulom ende” Paradais senda bar anjanj moram nepinjip dal, wal pende enam.—Jon 10:16.

5. Paradais senda kunum, nim nalmal moral nepisen?

⁵ Kenem yu Paradais panimen kunum, nim bunuman a nawal buro pisen? Nim bunuman a kulu Iden komna kawei wei sem mal buro pisa pisen. (Stt. 2:7-9) Ala propet Mika yu propet ende nekem paim, nim buro pisa pisen, e Got alambem man “dingding ne wain na ond pik mento moram pandom (Mik. 4:3, 4) Ala Baibel mokun puli mora padom, nim buro pisa pisen eri. (Sng. 72:16; Ais. 65:21, 22) Nim buro pisen penegar kawei wei ende sem bar tuwal meimen. Ala tepola amine men bar, mokun kaka pikro moro, murang kawei ngonom. Palwa na ond kanem kanem meim, murang kawei ronom. Ala wal ende, nim pisen gonjip ga akil wonambe,—pemili aijep bol—tapairond, yu ne kapil towol erwom. Yu embe nimen e wurkubanj mal ma. Kenem bunuman tal napaim, wal embe mal weieri ya mala min wonda. Ala Paradais senda kunum kenem kongan puli kapil enamen.

6. Paradais senda kunum, kenem nawal enamen?

⁶ Johova kenem kongan ere kapil moramen ne ersem. (Ekl. 2:24) Karis Jises Kongar Tausen Mal Tawol enda kunum, kenem kongan puli wei mora. Alamb puli ombun kerma tuironam alamb, ala millien puli gonjip paim akil wonam alamb, gar, konkongol na mokun aka ambsik panda. Kenem kongan kaka puli ere enjep ambsik panda wal pakeronamen! Ala Adam na Ip tal kulu Iden, kongan kaka puli eyala nim mal, kenem pra kongan puli ere, erkelpe mal wose Paradais wei punda. Ala kongan ende kenem kawei pil enamen e, alamb millien puli Johova kanpolnaro gonjip alamb na, Jises kunum yero pilgi dongal pam ga gonjip paim, akil wonam wal puli duwom erngonamen eri.

7. Nawal ende wei min wonda ne pisamen, nalende embe pisamen?

⁷ Kenem pilgi wei nimen, bulto Paradais senda kunum, kenem kumbol amin wei moramen, wal porpor enamen wose kapunda ala wose  dulom a kun-punda. Nalende embe nimen? Nalenem Johova kongan king enda kunum kamoramen mal, apal ende tanim pilkane enjin. E Solomon kongan King erim bar olom tanim.

8. King Depit Buk Song 37: 10, 11, 29 a bom yu, bulto nalmal mongom tom? (“Gerem Ga Ki Aijep” Tawolgar ele tuwalto paim kane.)

⁸ King Depit Got mumurlom dongal bunuman ngongo, mi bulto bunuman kapanda sia king a amine molo, kongan king enda mal bol mene kem. (Buk Song 37:10, 11, 29 gere.) Kenem bulto Paradais senda pane yu bolto kunum puli, Buk Song 37:11 gere alamb ngomon. Embe esim kun paim, nalenem Jises Komngoma Yu neori kel alamb ngom bar, yu e pra ne tuwal kem eri. Bulto mongom weironda. (Mat. 5:5) Ba Depit yu nim bar, King Solomon kunum alamb nalmal moram pra nim eri. Solomon king molo Israil alamb kantawol erim kunum, Got alambem man kumbol amin wei monjip, “milk na ani” puli mom kapil nomolpa enjip. Got embe nim: “Enem na lo . . . , anjngo karkar enjip dal, na erkelne enem maljep a kumbol amin moram, ala enem wur panam kunum, wal ende bol kisal nagoram.” (Wkp. 20:24; 26:3, 6) Yu dongal embe mal nemokum, Solomon king mom kunum mongom tom. (1 Sto. 22:9; 29:26-28) Ala Johova yu dongal ende nim, got gend lotu erngom ga ele “namoram” panim. (Sng. 37:10) Embe pile, Buk Song 37:10, 11, 29 ye kunum mongom tom, ala akling kenem kunum mongom tonda eri.

9. Solomon kongan King erim bar, kulu Siba kwin nal panim?

⁹ Solomon king mom kunum, Israil ga wal porpor enjip woka pum, yu bolto kulu Siba kwin pim. Olom kulu kolbar mom ba, se Jersalem wo Solomon ermom mal kanal newom. (1 Kin. 10:1) King Solomon kongan ermom mal kanporo ne, bulto embe nim: “Na yubol. . . . porpor napinjip ba, nim alambnem man kapil moram, ala nim kongan ga dungola akil molo, kunum kunum bunuman ka yu ni pisim ga kapil moram eri!” (1 Kin. 10:6-8) Solomon kongan king erim e, bulto Johova Ngangem Jises kongan king ere alamb tawol enda mal suse pam.

10. Nal wusngam pende Jises molse minro wei pu, Solomon ngonom?

 ¹⁰ Wal porpor kin Jises molse minro wei pu, Solomon ngonom. Solomon sin nganj a pam pile, alla kerma pende ere erkelnge, olom kongan king ere alamb tawol erim bar, Got alambem man kapil namonjip. Ba Jises sin nganj napaim pile, alla ende nanda alamb Tawol ka enda. (Luk 1:32; Hib. 4:14, 15) Satan ombun kerma puli Jises bol pakle tomene keral ne erim, Jises akilgi nim. Embe pile olom kongan King enda bar wal ende tokes namoksa. Olom King kawei wei mora.

11. Jises kongan king enda bar, namal pakeronda?

¹¹ Jises kongan enda bar, 144,000 Got oiro sim ga olom bol kongan ai ere, mala alamb bol wal min wonda ne, Johova kapim wal erkaple wei enam. (Rev. 14:1-3) Jises bol kongan ai enam yira ambra komb e, ombun puli min wom kaujip ga, embe pile, enjep kongan king wandil mem bol enam. Jises bol kongan ai enam ga, nal kongan pende enam?

12. Johova nal kongan ga 144,000 ngonda?

¹² Jises na olom kongan ai enam ga, kongan puli kes ere Solomon kongan erim e ngonam. Israil ga kongan king enjip, alamb millien puli kulu dingeri monjip kantawol enjip. Ba Got Gapman a kongan enam ga, alamb billien puli alamb yem yem pal papum kantawol enam. Weieri, e kongan kawei-ende, Johova ga 144,000 ngom!

13. Jises bol kongan ai enam ga, nal kongan kawei ende enam?

¹³ 144,000 ga, Jises bol aima kongan king na pris enam. (Rev. 5:10) Mosis LO pam pris kongan enam ga, alamb nganj wal kantawol enam, ala pilgi wal kantawol enam eri paninjip. LO e, mi bulto “wal kaka min wonda mal suse” pam, embe pile, Jises bol kongan ai enam ga, Got alambem man pilgi na nganj wal ai kantawol enam. (Hib. 10:1) Kenem yipe kanpolnaromon, ba bulto Jises bol Got Gapman a kongan king na pris ere, ya mal a kantawol enam mal kui mol kanamen. Ala kenem pilgi wei ninamen, ya mal a Paradais senda kunum, Johova wal pende enal nepisem ere, mal a moram ga kolta ne ambsik paim wal ngonda. —Rev. 21:3, 4.

14. Jises angam man na “sipsip dulom kerma,” nawal ende ding mal enam?

¹⁴ Jises olom bol kongan king ai enam ga,“sipsip dulom kerei” panim. (Luk 12:32) Jises yu pende eri ne, na “sipsip dulom” ende meim panim. Ala sipsip dulom tal e, woseding pu, sipsip dulom ding meim panim. (Jon 10:16) Sipsip tal e, yipe kongan ai esbel, ala mi bulto Paradais senda kunum, anjngo kongan ai erpunabel. E “sipsip dulom kerei” min epen moram, ala “sipsip dulom kerma,” ya mal a Paradais senda bar kunum kunum kapil mol punam. Ba enjep nawal pende enam?

15. (a) “Sipsip dulom kerma,” Krais angam man kin, nalmal kongan ai esim? (b) Piksa kanmen, angjen ende stua gar mambnem enem, kenem nalmal karkar enamen? (Piksa kane.)

¹⁵ Kunumb no kumbol to akrom ye Jises bol aito pakjip, olom yero Jises bol pilgi nim neori kele, bulto gom. Olom erim mal, kenem “sipsip dulom kerma” meimen, kenem Jises bol nalmal pismen, taninamen wusngam puli seim. Ende embe mal, olom murmulom-dongal a wusngam a oiro sim angam man bol, mambnem pende enamen bar taninamen. Jises nim, olom angam man bol mambnem enamen mal kane, omukronal panim. (Mat. 25:31-40) Kenem Baibel yu neori kele, alamb pakero erkelpe wo Krais disaipol-moram, kenem olom angam man pakeromon. (Mat. 28:18-20)  Wusngam ende embe enamen, alamb Baibel yu duwom ergonamen ne, buk Kunum Kunum Kaeri Pil Morol! erkenjip konganem ka enamen. Buk e, alamb ende yu duwom ernagon pam dal, yipe ombol er, alamb ende kansi yu duwom erngonal ne endel.

16. Kenem nawal yipe enamen bar pakero kere, Got Gapman menro moramen?

¹⁶ Kenem se Paradais a tuwal pu molo, Got kapisem wal porpor enamen ne napisamen. Kenem yipe meimen bar, yuwei ne, mambnem enamen, wal porpor paim mal enamen. Embe enamen bar, Johova, bolsijin ga, na Pilgi Ding ga bol ka moramen. Yipe ya mala kunum kes wei seim bar, Johova lo aiem karkar enjin dal, Paradais a moramen kunum, karkar enamen onom panda. Kenem mambnem embe enjin dal, kunum kol senda bar moramen, ernombro meimen. Tawolgar pi esmen bar yu pengem ende, Nim “Mal Sinal“ Erkun Ermen Mo? Ne paim kane.

17. Kenem ye sin erwanjin bar buro pile, kumbol ombun sinamen mo? Yu bolto.

¹⁷ Kenem yero mambnem kes erwanjin bar, pilaur ninamen ne enamen pesil panda. Ala wal ende, Jises gom wusngam akro sem ne, kanse “nenem kapisen mambnem karkar ere, sin nandel.” (Hib. 10:26-31) Kenem weieri pilkane enamen, sin kerma wei ende ere, kumbol to ak weiro mambnem kolnga sinjin dal, Johova kenem alla weieri wakro sikeramen nepisamen. (Ais. 55:7; Apo 3:19) Jises Parasi ga monjip bar yu nengo embe nim: “Na alamb dulto wironal ne nawond ma,sin enjip alamb wironal ne wond.” (Mat. 9:13)Jises golo kenem topro sim e dongal kerma wei paim, sin porpor wakronda.

18. Kunumb kun ye ende, Jises bol aito pakjip gom ye, nim olom bol nal yu ninal nepisen?

¹⁸ Jises bol yu nim kunomb ye e, Paradais senda kunum, nim olom bol nal yu nindel mal buro pile. Kenem bu tal napaim, Jises golo kenem topro siyem nim bar, elep talai kapil sangiyo wei ninabel. Ala nim olom ki si, Jises ya mal a mom gora kunum mand wei erim, nawal wei wom mal ne pisal ne endel. Ala olom Jises ki sim, yu pundom ngom nalmal pim mal nepisal  ne endel eri. Ala wal ende, olom nim pra ki si Satan mal tawol erim kunum poronim bar, nim nalmal mon a ninda? Alamb embe mal bol, Baibel yu duwom erngonamen, kawei wei pisamen!—Efe. 4:22-24.

19. Nalende Paradais a moram kunum, wal ende enamen bar wimuk naninda? (Piksa garwom oriro ngimba kane.)

¹⁹ Kenem Paradais a moramen kunum, tarabel ne wimuk wei ninamen. Kenem alamb kaka bol yu ninamen, ala kongan kaka enamen puli mora eri. Wal kawei wei ende paim e, kunum kunum dingding ne, Danjen min epen meim kanpol weironamen, ala wal kaka puli ngonom bar kapisamen eri. Kenem olom bol sape sinamen wal puli mora, ala wal porpor erkem meim, duwom erkanpol tonamen wal puli kes wei mora. Kenem kanan kes moramen e, erkelde Got kankawei wei kanamen. Johova na Jises yu dongal ne kenem, Paradais kunum kunum mol punamen paninbel bar, kenem kawei wei pile, sangiyo kerma nimen!