Yipe kongar tuwalto Tawolgar er kenjip pelpel gere pilmen mo? Ki meim pundom ngondol kaple enem moma kandpe:

“Bunuman kol si mambnem kol endel” e, nalne pilnimen? (Rom 12:2)

E tadom, kenem mambnem ka ipal eri nanamen. Kenem kumbola na bunuman a sem wal kanpolto, erka enamen panda wal ere, Johova kapisem mal enamen. E kunum dingeri ma, kunum kunum enamen.—w23.01, p. 8-9.

Mala wal kerma pende min wonom bar, kenem nalmal bunuman dulto ambramen?

Mala ombun kerma kerma pende min wo, Baibel yu propet ne mokum mongom weironom bar, mem ka pande kenem kapismen. Kenem Baibel buk na nus a yu meim, mongse bolto nepinjin dal, pakerondo kongrikeisen kumbol ding moramen, ala “bunuman ding mal ambramen.” (1 Kor. 1:10)—w23.02, p. 16.

Jises nol pam na olom disaipol aiyem man nol paim, nalmal ding mal napaim?

Jises nol pa olom yane wusngam a Johova bol yu dongal nanim, nalerim, Jises ye dulom ende Johova bol yu dongal ne ka monjup bar tuwal min wom. Jises yane ne, kumbol to akronda konganem napam nalerim, olom sin nganj a napam ala kumbol yu napam eri.—w23.03, p. 5.

Kenem nal ere ga pende pakeropo maka yu pundom ninam?

Kenem yu pundom também ninjil dal, kol apis kere ga pende ninam eri. Ala nim yu pundom tambem nindel kunum, yubol puli narondol. Nim yu pundom ngimba nindal apal ni ga pende ninam eri.—w23.04, p. 23.

Aisaia 35:8 “Mambnem Kuru Wusngam Kerma” padom, nal wusngam pildom?

Aisaia yu ekin ere wusngam kerma ende panim, Juda ga Bablion sikele seyem Jerusalem punam wusngam e pilnim. Yipe kenem kunum, Mambnem Kuru Wusngam Kerma nalmal karkar esmen. Kongar andet puli pende yero wo 1919 wom, Johova bol-kisal gonjip alamb konganem ernge lotu gend sikele seori wonam wusngam er kun enjip—Baibel yu akro si yu jeljel kel printim ersi puli kenjip. Got alambem man komna monjup na pi meim “Mambnem Kuru Wusngam Kerma” karkar er pilgi a paradais a mal meim, bulto Got Gapman menro mol wal kaka sinam.—w23.05, p. 15-19.

Provep sapta 9 amb tal ende, bunuman ka paim ala ende bunuman ka napaim pane yu ekin erim, nalende kenem kanpol tonamen?

Buk Provep dom “bunuman kanapaim amb” wironom karkar er pum ga goram bar “Kipkua” tuwal pum ala “bunuman ka weieri paim amb,” wironom karkar er pum ga “bunuman ka weieri si” ala dongal mem sinam. (Prov. 9:​1, 6, 13, 18)—w23.06, p. 22-24.

Got molmene kele bunuman ka karkar erim, Lot bol nalmal tanim?

Johova, Sodom alamb mambnem kes er monjup to porinal ne erim kunum, molmene kele alamb wandil sim mem tane, Lot ke pu semin kimbem a pundol panim. Ba Lot ma nepil se kulu Jora punal panim. Got, Lot nim yu karkar ere don kulu panim.—w23.07, p. 21.

Ye piksa kes ponogrepi kanim dal, ambiyem nal enda?

Amb embe nepisa, na amb kanamoro andana piksa kes ponogrepi kanem nepisa, ba e bu dulto ma. Ka paim bunuman embe mal sikele, Johova bol senonom mem dongal paim moma kane, ala Baibel a ambra pende ombun kaujup mal, yubol meim gere, gerda yu buro yem kel pisa olom pakrondo ambra komb yane wusngam a se Johova bol mand pu, kumbol amin sinjip mal pilkane enda. Olom adam pakerondo piska kes kanem-sikera eri.—w23.08, p. 14-17.

Kunum pende kenem Baibel yu pilgi nimen bar, ki ngonam kunum bunuman ka karkar enamen nalmal pakerondo kumbol amin moramen?

Kunum puli alamb ki ngonam bar, er kelde enjep bunuman paim mal pilkane enamen. Kenem bol opyem enem ne napisamen, ba mambnem amin karkar ere ki pundom ka ngonamen.—w23.09, p. 17.

Maria dongal kerma sinda ambsik pam bar, kenem nawal duwom esmen?

Maria dongal sinda ambsik pam nalerim, enjol Gebrel wo olom kongan kerma ende ngom e, Mesaia mam mora panim. Embe pile, enjol Gebrel na Elisabet Baibel yu mom ne Maria dongal ngojil. Kenem pra pilgi ding angjen ambajen man wusngam a dongal sinamen eri.—w23.10, p. 15.

Kenem yane nimen Johova pundom nalmal ngonda?

Johova olom kapisem mal karkar ere yane porpor ninamen, olom pisal pane yu dongal nim. (Jer. 29:12) Olom kenem yane ninamen wusngam kanem kanem karkar ere pundom ngonom, ala kunum kunum kenem pakeronal padom.—w23.11, p. 21-22.

Rom 5:2 a, “wal ka pilgi ne kui enamen” padom, ala nalende ding yu wes 4 a pra dom?

Alamb ende Baibel yu ka pisem kunum, pilgi ne mala paradais senda bar moral ne, pilgi ne wal ka kui enem. Ba ombun duwom ende min wondo kauwo akilgi dom kunum, Got olom bol kapisem nepisem, ala olom pilgi ne wal ka kui enem mem wose dongal punom eri.—w23.12, p. 12-13.