JOHOVA wal kaka puli nim ngonom si, nalmal konganem ere kapil morol bar piriari mein. Baibel nol wain Got wal ka ende kenem ngom padom, ala yu pende embe dom: “Ye ende bret nonom bar kapisem, ala nol wain nonom erkelde nomolpa enem bar kapil meim.” (Ekl. 10:19; Sng. 104:15) Ala nim pilkane enda enen, alamb puli nol nom bar erkelde ombun puli min wondo kauwum. Ala alamb mal yemyem papum nol nom bar, bunuman jeljel karkar esim. Kristen walem nol bia nonam kunum, nawal pakerondo bunuman ka karkar enam?

Kenem nol bia nonamen ne pisamen kunum, Got bunuman paim mal karkar enamen, kulu nal kulu meimen mo alamb bunuman paim mal karkar nanamen. Embe enjin dal kunum kunum kapil moramen.

Alamb puli mal tambem yemyem mol pum, kunum kunum nol pulikes nonam kapisim. Alamb pende kapil moramen ne nol nom. Ala pende ombun paim buro napisamen nepil nom. Ala kulu pende se punom bar, alamb nol pulikes nom alamb dongal kerma paim nepisam nepisim.   

Ba Kristen meim, danjep enjep kanka kane Ersem Ye, bunuman ka karkar enam mal nengonom. E embe mal, kenem nol pulikes no spak enamen kunum, ombun pende min wonda mal nengonom. Provep 23:​29-35 a yu paim bar ger kanmen, nol puli no spak enem alamb ombun pende min wondo kaunom mal, yubol monkel tonom. a Angjen elda ende kangem Deniel, Irop meim, Kristen wei ende namom kunum yero wal pende erim mal buro pile embe nim, “Na nol bia pulikes wei nono erind pile, e er kelnge bunuman ka karkar narind. Embe erind bar wal kes pende na bol min wom. Ala yipe buro yem kelpis kunum kespis eri.”

Kristen wal enam bar piriari meim, ba nalmal bunuman ka karkar ere nol bia puli nonambe enjep erkes enda panda, kane tuironam. Kenem mambnem na wal porpor enamen bar, Got bunuman paim mal kane karkar enamen.

Pi kenem nol bia nonamen bar Baibel nal padom, ala alamb nal bunuman pende pande, nol bia nom mal omukro kanamen.

Got Yuwom Baibel a meim, nol bia apal eri nonamen bar, mapanadom. Ala Baibel, nim nol wain nondol bar kapil morol padom. Yu ende kenem ger kanmen embe dom: “Nim pu mokun no kapisel, ala wain no kumbol a kawei pisel.” (Ekl. 9:7) Jises kunum pende ne nol wain nom, ala pilgi dongal pange Johova konganem enjip ga kunum pende ne nol wain pra nonjup eri.—Mat. 26:​27-29; Luk 7:34; 1 Tim. 5:23.

Embe pile, Got Yuwom Baibel a meim nol nonam padom, ba no spak nanam padom. Baibel yu ende embe dom: “Enem nol wain puli no spak nanam.” (Efe. 5:18) Ala yu pende dom “nol no spak esim ga . . . Got Kingdom tuwal napunam.” (1 Kor. 6:10) Weieri, nol pulikes no spak esim mem, Johova yu dongal ne mapadom. Embe pile kenem nol bia nonamen kunum, nomolpa esmen bar alamb mambnem esim karkar nanamen, Got kapisem mambnem karkar enamen.

Alamb pende pisim nol pulikes wei nonamen, ba spak nanamen ne pisim. E bunuman ka ma, ombun kerma enjep bol min wonda. Baibel dom, ye (mo amb) ende nol wain olom “karpos erim dal, “ alla kerma ere Johova bol senonom mem tokes moksa. (Taitus 2:3; Prov. 20:1) Jises pilsinamen yu ende embe nim, “nol pulikes nom ga” Got kunum kol erkelde min wonda bar tuwal napunam. (Luk 21: 34-36) Nawal pakero kere, Kristen ga nol puli nonambe ombun min wonom bar kanpolto tuironam?

Kenem nol nonamen ne pinjin dal, nomolpa esmen bar alamb puli karkar esim mambnem enjin dal, ombun min wonda. Kristen mokun na nolnom bar, mambnem paim mal karkar enambe Johova kapisa ne esim. Kenem pilsinamen yu ende Baibel embe dom: “Embe pile, enem nol nonam mo mokun nonam mo wal porpor enam bar, Got kangem kerma ngonam.” (1 Kor. 10:31) Pi Baibel kolta yu na ki pende meim omukro kanamen.

Na nol nono ga pende na kanka kanam ne erind mo? Kisim Bek 23:2 embe dom: “Nim alamb puli mambnem esim karkar nandel.” Israil ga kanpol tonam yu Johova nim, olom lotu ernango mambnem enambe kanapisem alamb mambnem aijep karkar nanam ne pilnim. Olom nim yu Kristen yipe meim pakeronda eri. Kenem nol bia nonamen kunum, kanpolnaro alamb ende bunuman paim mal karkar enjin dal, Johova lo paksem karkar nare olom bol senomon mem wakronamen eri.—Rom 12:2.

Na nol nond kunum, dongal kerma paim tanine alamb kanam ne erind mo? Kulu pende se punom bar alamb mambnem aijep paim, nol kunum kunum no pulikes nonam kapisim. (1 Pita 4:3) Ba Baibel 1 Korin 16:​13, yu ne kenem dongal ngo embe dom: “Enem kanpolto molo, pilgi a akilgi ne molo, ye wei mal molo, ala dongal moram.” Nol bia nom pakero kelde alamb dongal kerma paim mo? Ma embe napaim. Nol bia nom erkelde alamb bunuman kanapaim, wal omuk kanarom, ala wal napaim mal esim eri. Embe pile, nol bia pulikes nom bar alamb dongal kerma napaim ma, ala tanim enjep bunuman ka karkar nasim. Asaia 28:7 dom, nol bia puli nom alamb erkelde bunuman kanapaim pile, wusngam dulto karkar nare borom.

Dongal wei Johova bol wonom erkelde, ‘alamb akilgi ne pilgi a dongal meim.’ (Sng. 18:32) Kristen ka ende meim olom wal poro enam bar omukro kanpolto, bunuman ka karkar ere Johova bol senonom mem tokes moksa bar tuironom. Jises ya mala mom kunum, dam Johova bol senom mem dongal pam. Ala kumbol dongal pange kunum kunum mambnem dulto karkar erim bar, alamb olom bol molmene kenjip.

 Ombun duwom ende na bol min wonom kunum, nol bia no buro napisal ne erind mo? Buk Song bom ye Johova murmulom wusngam a bunuman ka ngongo, embe nim: “Wari si bunuman puli ker kunum, nim [Johova] na dongal ngo kumbol erkeli amin seim.” (Sng. 94:19) Embe pile, ombun duwom nim bol min wo tomene kera kunum, Johova bol pu pake sindel, nol bia nim pakenaronda ma. Wusngam ka ende nim pakeronda ne kunum kunum yane ne Johova ngondol. Ala ga pende omukro kanjip, kongrikeisen a pilgi ding ga dongal monjup wal pende enam mal yu ne pakerojup eri. Alamb ende ombun kauda kunum nol bia noromene keral ne erim dal erkelde, mambnem dulto karkar nanda. (Hos. 4:11) Deniel, yero yubol tonjin angjen embe nim: “Na bunuman puli kele nganjil gond eri. Ombun duwom na bol min wom tomene keral ne nol nond, ba e er kelnge na ombun puli kauwund. Ala senond alamb na wakronjip, nanam bol kanapinj eri.” Ba nawal Deniel pakerom? “Na pilkane erind Johova bol pu pake sinal pam, nol bia ma. Ala yu ende embe nim, Johova na pakerongo ombun min wom kauwo tomene kend.” Weieri ombun duwom min wondo kenem kanapisamen kunum, Johova kunum kunum kenem pakeronal ne ernombro meim.—Fili. 4:​6, 7; 1 Pita 5:7.

Nim kunum pende ne nol nondol kunum, ki embe mal pende nenem ngondol: ‘Na pemili aina mo meibar mand meim alamb, na nol nond bar kanapisim mo?’ Embe pam dal, nim ombun ngonda wal pende enen ba, nenem pilkane nanen. ‘Na nol nono erind mal sikele yipe puli nond mo?’ Nim pisel na nol puli nanond ne pisel, ba embe no pundol erkelde nim mambnem ainem mal pande, nol puli nondol. ‘Na kunum pende ne nol bia nanonal bar pesil paim mo?’ Embe pam dal, nim nol nonon mambnem ainem ende mal panda wakrondol kaple nanda. Ala nim pu dokta mo alamb ende kani pakeronambe, nol puli nonon mem wakrondol.

Nol bia nom bar ombun puli min wonom. Embe pile Kristen ga pende, nol kanem kanem nanonamen mapane sikesim. Ala ga pende nol nonam kanapisim nalenem, murang kanaronom dun kanapaim eri. Nim tapronon ga ende nol sikenjip  dal, embe esim bar kapane enjep bol yukes nanindel.

Mo ga pende nol apal eri nonjup bar, wal ka pende min wom nim kanja kanin. Kristen ende nol nalnal nonda mal olom buro pisa. Mo kunum nalnal nonda olom nepaksa mal karkar enda. E wakan tuwalto kunum dingeri nonda mo mokun nonda, kunum apal ne pende nonda. Ala ga pende, nol nal nol nonam enjep enjep omukrom. E nol wain mo bia pende nonam, ba nol dongal ma nepisim, ala nol jeljel pende sinding kel moksim pra. Alamb ende nol nalnal nonda yu ne paksa mal, kunum kunum karkar enda onom panda. Ala Kristen dongal ende mora, nol nonda bar ende nal nepisam ne bunuman puli nakera. Nalenem, olom nol nalnal no kaple mora mal, yero nesikem pile nepakim yu karkar enem.

Kenem nol nonamen bar alamb ende nal nepisam buro pisamen eri. Rom 14:21 embe dom: “Nim wal minjem nondol, nol wain nondol, mo wal ende endel bar erkei angnem boronda kanapaim.” Yu e paim nim nalmal karkar endel? Angnem ende kanka kanen mem tanindel. Nim pilkane eri nol bia nondol bar er kelni angnem ende boronda pam dal, nondol bar alla napaim ba wakro sikerel. Nim embe enen bar ga ende pilngo nenem ne napisen, enjep bunuman paim mal karkar enen.—1 Kor. 10:24.

Ala wal ende pisamen, nol bia nom bar gapman lo pende paksa, Kristen ga karkar enam enjep pakeronda eri. Pende embe mal, ngal kongar nalnal mol nol bia nonam, kar ambram kunum nol nanonam, mo pektori a masin bol kongan enam kunum nol nanonam paninda.—Rom 13:​1-5.

Johova kenem wal kaka puli ngom, piriari mol wal enamen mem pra. Ende embe mal, kenem nol nonamen mo mokun nonamen piriari meimen pile, kapismen mal nonamen. Ba, kenem wal porpor enamen bar, priari meimen mem konganem ka ere er kelpe Danjen min epen meim kapisa.