BAIBEL buk Esta Juda ye Modokaia wal kerma pende erim mal tonom. Olom Juda ye pu kulu jel, Persia king gar kongan ermom. Kongar 500 B.C.E. pulnombom pakam pu ele mom, “e Aasuerus” [King] mom kunum.” (Alamb puli yipe King e Xerxes I panim.) Alamb pende king to goram ne enjip Mordokaia wal pende ere koltungum. King kapil alamb poro dungola Modokaia kangem kerma ngom. Bulto Modokaia kin opyem erim ye, Anan gom kunum, king Modokaia praim minista kongan ngom. Modokaia kongan kerma embe sim erkelnge elim namba pam konganem ere Juda ga Pesia tuwalto monjip togoram paninjip bar tawol erim.—Esta 1:1; 2:5, 21-23; 8:1, 2; 9:16.

Kongar 20 andret tuwalto wal min wom mal omuk to kankane enjip ga embe ninjip, Baibel buk Esta Modokaia pane yubol tonim e, e yubol kisi, Modokaia weieri namoipum. Embe ninjip ba kongar 1941 kunum, akiologist wal pende mom kansinjip tane penem a kem Baibel Modokaia mom padom yu weieri pam. Enjep nawal kansinjip?

Wal kurjip ga Pesia alamb kangem ende bol pakjip kansinjip e ye ende kangem bol pakjip Maduka (Iglisa Mordekai paninjip). Olom kulu Susan alamb tawol ere akaudent kongan erim. Ata Yuganda, kombe wal min wom mal kanpol weirom ye, olom Pesia ga kangem bol pakjip kansinjip e “mongse Baibel Modokaia pandom yu” bol woseding pum panim.

Yuganda yu embe nim kunum bulto, yu akroro enjip ga Pesia yu bol mokjip tausen puli kes akronjip. Akronjip bar Pesia na Polis ga bonjip wal mom, e taun gul pasipok erim jeknema ku kantawol ere enjip gar sese erim bar mom kansinjip. E Xerxes I king mom kunum bol mokjip wal mom. Bol mokjip wal Elam yu a mom, kangem pende yipe buk Esta meim eri. a

Persiapolis kangem bol mokjip bar Marduka, kangem bol mokjip eri. King Xerxes I mom kunum Maduka kulu Susan king garem kol kongan ermom. Yu bol mokjip bar ende Maduka yu akroro erim ye panim. E Baibel Modokaia bol nim yu kun wei paim. Olom King Aasuerus mo (Xerxes I) mom kunum kot gar kongan ere ere erim, olom yu jeljel tal pile nine erim. Modokaia kunum puli kulu Susan king gar geit a molmolo erim. (Esta 2:19, 21; 3:3) Geit a gar e kerma senge, king bol kongan enjip alamb ele molmolo enjip.

Wal bol mokjip bar kangem Maduka pam Baibel Modokaia pane, yubol tonim bol kunum puli wose ding punom. Enjel kunum ding, kulu ding, ala gapman kongan kulu ding enjil. Akiologist wal kansinjip bar wal puli embe ding mal min wom tane penem a, kerem buk Esta Modokaia mom padom e yu weieri.