1. Ombun wonda kunum bunuman ka karkar enamen padom, nalne pildom? (2 Timoti 4:5)

 OMBUN kenem bol min wonda kunum, Johova na olom okanaiseisen aiem bol ka meimen mem erkanal ne enda. Ombun embe min wonda kenem nalmal ere tomene keramen? Kenem bunuman ka konganem ere, pilgi dongal pande pilkane ere moramen. (2 Timoti 4:5 gere.) Kenem bunuman ka karkar ere kumbol amin moramen, bunuman au ninde Johova wal omukronom mal tonamen. Kenem embe enjin dal, kumbola na bunumana pismen wal kenem tawol naenda.

2. Yipe yu duwom enamen bar nawal omukro kanamen?

² Kenem yu duwom yero enjin bar ombun talende kongrikesen oriro alamb ngonam mal kanjin. Yipe yu duwom enamen bar ombun talende kongrikesen tuwalto min wo, Johova bol ka meimen erkanal ne enda mal kanamen. E embe (1)  Pilgi ding ende kenem bol mambnem ka nanim ne pisamen kunum, (2) Kenem erkun ere pilsinamen yu nengonam kunum, ala (3) okanaiseisen a wal kol ende min wondo, kenem karkar enamen amin napanda kunum. Ombun embe mal min wonda kunum, kenem nalmal ere Johova na olom okanaiseisen aiem bol ka meimen mem ambilgi ninamen?

3. Pilgi ding ende mambnem napaim mal erngonda kunum, kenem nal enamen?

³ Pilgi ding ende mambnem napam mal ernim ngom mo? E elda mo ende kongrikesen a kongan pengem enem alamb, olom nim bol mambnem kes erngonal ne kanse naenda erim.  (Ro. 3:23; Jem. 3:2) Ba olom wal ende erim bar nim kumbol ombun sinda sin. Nim wurpa pilaur ninal ne erin kaple narim. Nim bunuman puli kele ‘pilgi ding mambnem embe enim bar, Got okanaiseisen wei seim bar tuwal meimen mo ma nepisen?’ Satan kenem bunuman embe mal sinamen nepisem. (2 Kor. 2:11) Nim bunuman embe mal sindal, erkelnde Johova na olom okanaiseisen aiem wakrondol. Embe pile kenem kandpe, angjen mo ambajen ende kenem bol mambnem napaim mal erim dal, bunuman ka karkar ere bunuman kes tuitonamen.

4. (a)Josep mambnem kes erngojip kunum olom nalmal bunuman ka karkar erim? (b) Olom mambnem erim bar kenem nawal duwom esmen? (Stat 50:19-21)

⁴ Kumbol mul nasindel. Josep ngang barel mom kunum angaman olom kin mambnem kes enjip. Olom kankes wei kane togoram ne pinjip eri. (Stt. 37:4, 18-22) Bulto olom alamb ngo ku simnge olom pu kongan nipye mom. Embe enjip bar Josep kongar 13 tuwalto ombun kerma puli kawum. Johova weieri na kanka kanem mo ma ne bu puli kera kem. Ala na pake sinal ambsik paim kunum Johova na wakro sikerem mone pisa pim. Ba Josep kumbol mul nasim. Olom bunuman ka karkar ere kumbol amin mom. Olom angaman bol mambnem kes erngo yem kera kol apis kem kunum embe narim, enjep bol kanka mem tane alla wakrom. (Stt. 45:4, 5) Josep mambnem embe erim, nalerim olom bunuman au ninge wal omuk karom. Olom ombun pam mal mongse buro napim, wal karma pilkane erim—Johova kapim mal enal ne erim. (Stat 50:19-21 gere.) Mambnem embe erim bar kenem nawal duwom esmen? Mambnem kes erngonambe kumbol mul sindal, Johova na wakronom ne kes napisel. Olom nim pakerondo ombun min wondo akilgi dom mal buro pisel. Ala wal ende, nim mambnem kes erngonam kunum kanka mem tanindel.—1 Pi. 4:8.

5. Mekuis olom bol mambnem kes erngojip nepim kunum, nalmal bunuman ka karkar erim?

⁵ Angjen elda ende kangem Mekuis Saut Amerika meim, olom bol wal min wom mal omukro kanamen. b Johova okanaiseisen tuwalto angjen man pende kongan pengem enjip, olom bol mambnem kanajip mal buro pile embe nim: “Na komna bunuman puli embe mal nakeipi. Na kisal gol wur kanapand. Pakeronam alamb ende namol nim ne pile ke nind.” Ba Mekuis, bunuman ka karkar ere kumbola na bunumana pim wal tawol kaerim. Olom yane kunum puli ne, Johova ki si nim murmulom dongal wusngama na pakeroi ombun kawo akilgi ninal panim. Ala kenem buk na nus a olom pakeronda yu mom omukro kanim. Embe erim bar kenem nawal duwom esmen? Pilgi ding angnem mo ambanem ende nim bol mambnem kes ere ngom dal, kine molo bunuman kes ende sindel kanpolto tui tondol. Nalmem pange olom mambnem kes nim bol erim kanpol naronon. Embe pile nim yane ne Johova ngo ki si, na pakeroi nim wal omuk tonon mal tonal panindel. Embe endel bar Johova nim pakerondo angnem mo ambanem alla erim kanpol naro erim ne olom alla wakrondol. (Pro. 19:11) Nim ombun paim Johova pilkane enem. Embe pile ambsik paim dongal ngondo akilgi nindel.—2 Sto. 16:9; Ekl. 5:8.

6. Johova kanka mem tane, kenem kangnip ngo erkun enem bar nalende wal kerma paim nepisamen? (Hibru 12:5, 6, 11)

⁶ Johova kenem yu nengo erkun enem kunum kumbola na bunumana kes wei pismen.  Kenem kes pismen wal mongse buro pinjin dal, pilsinamen yu ka nengom pilsi karkar nanamen, yu omblom bol nim kun napaim nepisamen. Embe enjin dal—Johova kenem bol kanka mem tadom pilkane nasmen. (Hibru 12:5, 6, 11 gere.) Kenem pakero yu kawei nengonam ba kes pismen wal kumbola anjngo pilmojin dal Satan kol apis kesmen, olom kapisem pilsinamen yu nengom sikele Johova na kongrikesen bulngo se kolbar wei punamen nepisem. Nim pisindal yu nengo erkun enjip dal, bunuman ka nalmal karkar endel?

7. (a) Pita pilsinda yu nengojip pilsi karkar erim, Johova olom wusngama nalmal konganem erim? (b) Pita mambnem erim bar kenem nawal duwom esmen?

⁷ Pilsindel yu nengonam pilsi, erkun endel wal panda endel. Jises kunum puli disaipol puli monjip bar dungola Pita pilsinda yu nengo erkun erim. (Mak 8:33; Luk 22:31-34) Embe erim bar Pita ngajil goragom! Ba olom Jises bol kamom mem waknarom. Olom erkun ere pilsinda yu nengojip pilsi, olom alla erim bar erkun erim. Embe erim bar Johova wal ka puli Pita ngom. Olom kongan kerma pende kongrikesen tuwalto erim. (Jo. 21:15-17; Apo 10:24-33; 1 Pi. 1:1) Pita mambnem erim bar kenem nawal duwom esmen? Kenem pilsinamen yu nengo erkun esim kes pismen ba, kenem kenem pakeronom ala alamb ende pakeronom eri. Kenem embe esmen kunum, Johova na pilgi ding angjen man bol ka meimen.

8-9. (a) Benado pilsinda yu nengo erkun enjip kunum olom nalerim? (b) Nawal olom pakrongo bunuman dulto napam erkun erim?

⁸ Angjen Benado, kulu Mosambik meim olom bol nawal min wom omukro kanamen. Olom kongan elda topor ninjip kunum nal nepim? Olom embe nim, “Na kumbol mul kes wei sind nalerim pilsinal yu nengo erkun enjip bar kawei napinj.” Ala kongrikesena ga monjip olom bol nalne pisam mal buro pim. Olom embe nim, “Oll pende wopungo Johova na olom okanaiseisen aiem bol bunuman dulto sind.” Nawal pakerongo Benado bunuman dulto sim?

⁹ Benado bunuman dulto si embe nim: “Na elda kongan erind kunum Hibru 12:7 konganem ere ga pende pakerono Johova kenem yu nengo pilsinamen ne enem bar bunuman dulto ambram ne ere erind. Ala nam ki embe ngond, ‘Baibel yu e namal karkar enda?’ Johova konganem alamb porpor karkar enem —nam pra.” Bulto Benado Johova na Olom okanaiseisen aiem bol pilgi mambnem ala siyem nim. Olom Baibel gere, gerim wal buro pilyem kele pilgi erdongal wei erim. Ala olom enjep bol Baibel yu neori kele kongrikesen make pum eri. Embe erim ba pilgi ding angam ambam man olom bol nalne pisim, ne bunuman puli kem. Kunum pende wopungo, Benado ala elda kongan ngojip. Olom erim mal nim erkun ere pilsindel yu nengojip dal bunuman puli kele kisal nagorol, nengonam yu pilsi erkun endel panda wal endel. c (Pro. 8:33; 22:4) Nim embe erindal, pilkane endel Johova na okanaiseisen aiem bol kamen bar topom ka sindel.

10. Okanaiseisen a wal kol ende min wom, Israil yera komb nalmal erkanal ne erim?

¹⁰ Okanaiseisen tuwalto wal kol pende min wonda wo Johova bol ka meimen mem erkanal ne enda. Kenem kanpol natojin dal, wal min wonda wo Johova bol ka meimen mem si jeljel kera. Israil ga Mosis lo karkar ere erjip ba, okanaiseisen a wal kol ende min wom bar enjep bol nalerim? Johova lo nangom kunum yero pemili pengem enjip ga pris enam kongan ere erjip. Enjep pemili aijep kangem a alta tawo sipsip meme tosip opa ere Johova ngongojip. (Stt. 8:20, 21; 12:7; 26:25; 35:1, 6, 7; Jop 1:5) Ba lo kolnga pakjip pemili pengem enjip ga kongan e nanam paninjip. Johova Aron pemili a pris makrom ga kongan e enam paninjip. Bulto lo e pakjip konganem erim kunum pemili pengem ende Aron pemili nawonda pris kongan erim dal olom togoram paninjip. d (Wkp. 17:3-6, 8, 9) Lo kol embe pakjip erkelnge Kora, Datan, Abiram, na 250 namba pam ga Aron na Mosis kongan pengem enjil bar opyem enda enjip. (Nam. 16:1-3) Nalmem pange embe enjip kenem weieri kanpol naromon. Ba Kora bol tap tonjip ga Johova bol kanamonjip. Okanaiseisen a wal kolnga ende min wo, Johova bol kamen mem erkanal ne erim dal nim nalendel?

11. Kowat ga wal pende enjip bar kenem nawal duwom esmen?

¹¹ Okanaiseisen bol wal kolnga ende min wonda karkar wei endel. Israil ga kulu kesi sembar wonjip kunum, Kowat ga kongan kawei wei ende kunum kunum enjip. E Israil ga monjip dumam sikele se dumam kolnga ende punam ne enjip kunum, Kowat ga boks kontrak kausi ngimba pupojip. (Nam. 3:29, 31; 10:33; Jos. 3:2-4) E kongan kawei wei ende enjip! Embe enjip ba Israil ga pu, Got ngonal pane Yu Dongal Nim Mal sinjip kunum mambnem kol karkar enjip. Boks Kontrak kunum puli kausi kulu ende ende punam napam. Embe pile Solomon king mom kunum, Kowat ga kongan jeljel ngojip. Pende golang kenjip, pende geit kantawol enjip ala pende wal bonoro mokjip gar tawol enjip. (1 Sto. 6:31-33; 26:1, 24) Ba Kowat ga komna kongan ka ere erjin pane yu puli ninjip pane Baibel a ende pande nakanmen. Embe enjip bar kenem nawal duwom esmen? Johova okanaiseisen a wal kol ende min wonda kunum, kumbol wei ngo karkar endel e nim kongan ere mein bar walkol ende min wonda pra. Nal kongan ende ngonam kapil endel. Pilkane endel nim kongan enen erkelde Johova dungol a kawei wei namen ma. Johova nim yu  karkar enen wal karma wei mal kane kongan enen ngonom.—1 Sml. 15:22.

12. Jina Betel kongan ermom, sikele seori wo Baibel yu neori kera paninjip kunum olom nal nepim?

¹² Jina, ambajen ende Midel Is meim. Wal olom bol min wom mal omukro kandpe. Olom kongar 23 poro Betel kongan ere kapil mom, sikele seori wo kongan ende endel paninjip. E Baibel yu neori kera paninjip. Olom embe nim: “Na kongan embe enal paninjip bar na malmal wei erind. Nanam wal ei mal pile anjngo ki embe ngond, ‘Na nal alla ende erind’” Ala wandil wei, kongrikesen angam ambam man monjip olom ngimbil sim bar yu ende embe ninjip: “Nim kamorange okanaiseisen nim ori kerem nakerange.” Embe ninjip bar Jina keswei pile kunum puli emilpal ke ninerim. Ba olom embe nim: “Na Johova kanka mem na olom okanaiseisen bol bunuman tal nasind.” Jina bunuman ka nalmal karkar erim?

13. Jina nalmal ere bunuman dulto nasim tomene kem?

¹³ Jina bunuman dulto nasim tomene kera kaple erim. Nalmal kaple erim? Kenem buk na nus a olom ombun pam mal yubol mom puli ger kanim. (Ende Februeri 1, 2001, Wastaua yu pengem, “Yu Inap Daunim Bel Hevi!” Yu ele mom Baibel bom ye Mak, kongan kol sim kunum ombun embe ding mal kauwom eri. Jina embe nim, “Mak kin wal min wom mal na ger kanj kunum, pakerongo kumbol ombun sind tomene kend.” Jina senom ga bol mand mom. Olom olom wasim a moral ne napim, ala nam wandil mal mei nenapim eri. Olom yu ne pornim bar Johova murmulom dongal olom okanaiseisen a kongan ka ende, mol se ngimbro pu kongan esmen ga olom wei pilngojip panim. Ala wal ende olom pilkane erim, Got okanaiseisen wal porpor erkelde Johova konganem woka punda nenem.

14. Waldo okanaiseisen tuwalto wal kol ende min wom bar karkar enda amin napam, ba nawal olom pakerom?

¹⁴ Angjen Waldo olom kongar 73, elda ende kulu Solwenia meim. Olom kongrikesen koltungo, se kongrikesen ende bol ding punam paninjip bar olom ombun ende pam. Olom embe nim: “Nalmem pange make gar kawei koltung namen paninjip na kanpol narond. Na kumbol ngimbil sind nalerim make gar pimand wei erka enjin. Na kapenta mond pile bolsia na wal kol pende er mokinj. Ala wal kol embe min wom bar wal puli erkun enamen  pam. E kin tuwa ga bol amin wei napam.” Nawal Waldo pakerongo ninjip yu karkar erim? Olom embe nim: “Johova okanaiseisen wal kol enda eya dom esmen bar walka min woworim. Yipe wal kol pende min wo, wose ka punda ne esim karkar esmen bar mi bulto wal kol puli min wonda bar, erkun ermeimen.” Kongrikesen wose ding punam panim mo, nim kongan kol ende ngom kunum nim bol pesil paim mo? Nim nalmal pisen Johova pilkane enem. Wal kolnga ende Johova okanaiseisen a min wonda bar, nim karkar ere Johova bol ka mondal, weieri nim bol walka min wonda.—Buk Song 18:25.

15. Kongrikesen tuwalto kenem ende ombun ngojip dal, bunuman ka nalmal karkar enamen?

¹⁵ Kenem porninda kunum mand wei wom bar meimen kunum, kongrikesen a tuwal meim ga kenem ombun ngonam eri nepisamen. Ombun ngonam kenem Johova bol ka meimen erkanal ne enda. Embe pile kenem bunuman ka kunum kunum karkar enamen. Kristen ende nim bol mambnem kes erngonom ne pindal kumbol mul nasindel. Nim pilsindel yu ende nengo erkun enjip dal kes napisel, nengonam yu pilsi erkun endel panda wal endel. Ala Johova okanaiseisen a wal kolnga ende min wo nim ombun pakim dal, ninam wal kumbol pel ngo karkar endel.

16. Nim Johova na olom na olom okanaiseisen bol pilgi don mem, nalmal ambilgi nindel?

¹⁶ Ombun pende min wo nim Johova na olom okanaiseisen aiem bol pilgi dom mem erkanal ne enda kunum, akilgi nindel kaple enem. Ba nim embe enal nepin dal bunuman ka karkar endel, e kine molo, bunuman pep ninde, wal Johova omuk tonom mal tondol. Embe enal nepim dal, Baibel a ga pende nim ombun paim mal ding mal kaujip ga yu boljop mem ger kane, buro pile enjep mambnem enjip mal karkar endel. Ala yane wusngama Johova na pakera nindel. Kongrikesen sikele se kolbar wei napundol. Embe erin dal ombun nal ombun ende min wonda Johova na Olom okanaiseisen aiem kin ka mein mem, Satan ersi jeljel kera kaple wei nanda.—Jem. 4:7.