1. Johova kenem bol mand moral nepisem, kenem nalmal pilkane esmen?

 JOHOVA kenem se olom bol mand woya dom. (Jem. 4:8) Olom kenem Gotjon, Danjen na Senojin ye mora kapisem. Kenem yane nimen pile, ombun duwom paim kunum pakeronom. Ala olom okanaiseisen wusnagam a kenem yu duwom erngo kantawol enem. Ba kenem nawal wei ere se olom bol mand punamen?

2. Kenem Johova bol nalmal se mand punamen?

² Kenem Johova bol se mand punamen, yane ne, Yuwom Baibel a meim gere, germen wal buro pisamen. Kenem embe enjin dal, olom kanka kane sangiyo nimen. Ala olom yu karkar ere kangem ambil min kesmen. (Rev. 4:11) Kenem Johova kanpol tojin dal, olom na okanaiseisen aiem kenem pakeronda ne kem seim bar pilgi ninamen.

3. (a) Satan nalmal ere kenem Johova bol meimen mem si jeljel keral enem? (b) Ba kenem nawal pakerondo Johova na olom okanaiseisen aiem wak naronamen? (Buk Song 31:13, 14)

³ Ombun kenem bol min wonom kunum, Satan kenem Johova bol meimen tosi jeljel keral ne enem. Olom nalmal embe enem? Olom kikine ere kere Johova na olom okanaiseisen bol ka meimen pilgi naninamen ne enem. Olom wal embe enem bar kenem tuironamen kaple enem. Kenem Johova bol pilgi nimen mem dongal wei pa kulko naerim dal, olom na okanaiseisen aiem bol ka molo wak naronamen.—Buk Song 31:13, 14 gere.

4. Yu duwom pi enamen bar, nawal yu pende omukro kanamen?

 ⁴ Yu duwom pi enamen bar a kongrikesen a tuwal nameim alamb ombun talende ngonam mal, omukro kanamen. Ombun dingding ne kenem Johova na olom okanaiseisen aiem bol pilgi ne ka meimen tokes moksam ne enam mal kanamen. Ombun talende kenem Johova bol ka meimen mem nalmal se jeljel kera? Ala kenem nalmal ere Satan mambnem embe enem tomene keramen?

5. Ombun min wonda nalmal erkerlde, kenem Johova na okanaiseisen aiem bol pilgi naninamen?

⁵ Kunum pende ne ombun kenem bol min wonom—embe mal maiyam ding ga kenem bol opoyem esim, mo ku kongan esmen bar topornim. Ombun embe min wonda wo kenem Johova okanaiseisen aiem kin pilgi nimen mem nalmal si jeljel kera? Ombun embe mal kunum puli min womdal, erkelde kumbol kes moro kenem kenem wal ei mal kanamen. Wal embe mal min wonom bar Satan erkelde, Johova kenem kanka nakanem ne pisamen ne enem. Ombun duwom min wonom kunum Satan erkelde Johova na Olom okanaiseisen mem pande ombun e min wonom ne pisamen ne enem. Wal embe ding mal Israil ga pende Isip monjip bar min wom. Yero enjep pilgi ninjip Johova, Mosis na Aron kongan ngom, enjep kongan nip alamb monjip si seori punabel ne pinjip. (Kis. 4:29-31) Ba bulto Pero wal pende erkelnge enjep nomolpa enjip bar wose pesil wei pum kunum, Mosis na Aron elep erkerable ombun e min wonom pane embe ninjip: “Elep ere kerable Pero kongan ga bol kin kankes wei kanem. Ala elep bainat sip enjep angel a paksable kin to goram ne enjil.” (Kis. 5:19-21) Enjep Got konganem ye tal alla paim paninjip. E yu kes ninjip! Johova na olom okanaiseisen kin kamen mem nalmal ambilgi nindel?

6. Ombun min wondo kauwo akilgi ninamen mal, propet Abakuk bol nawal duwom esmen? (Habakuk 3:17-19)

⁶ Kumbol a pisen wal yane wusngam a ne Johova ngo, olom nim pakero nepisel. Propet Habakuk ombun puli kauwom. Kunum ende Johova na kantawol enem mo nanem ne bunuman tal kem. Embe pile, olom bunuman a pim wal yane wusngama ne Johova ngo embe nim: “ Johova, kunum nalnal na nim wiro pakera nind? . . . Ba nim napisen?” (Hab. 1:2, 3) Johova propet aiem olom bol kamom kumbol a wei pile yane nim olom pim. (Hab. 2:2, 3) Johova alambem man pakero siyem kem mal Abakuk buro pim kunum, erkelnge olom kawei pilmom. Olom weieri pilgi nim Johova pakerondo ombun nal ombun ende min wonda akilgi ne kaunal nepim. (Habakuk 3:17-19 gere.) Kenem nawal duwom esmen? Ombun ende nim bol min wonda kunum nalmal pisen, yane ne Johova ngondol. Ala olom bol pake sinal nepisel. Nim embe erin dal pilgi wei nindel, Johova nim dongal sindel paim ngondo akilgi nindel. Ala olom pakeronom mal nim pilkane endel kunum, olom bol pilgi don mem dongal wei panda.

7. (a) Seli olom maiyam ding ga olom nalenda enjep? (b) Nawal pakerongo Johova bol pilgi nim mem wak narom?

⁷ Pilgi kongan anjngo endel. Ambajen Seli Papua Niu Guinea meim olom bol wal min wom mal omukro kanamen. b Seli pemili aiem bol kongbeleng monjip. Kunum pende ne mokun puli nasem. Olom maiyam ding ende erkelde Johova bol pilgi naninda ne ere embe nim: “Got murmulom dongal nim pakeronda padon ba pake nanje bar tonom? Pemili konbengel pra meim. Nim anj dunglom ei mal kele  Baibel yu neori kel wanen.” Seli embe nim: “Na nanam ki embe sind: ‘Got kin weieri kantawol enim mo ma?’ Embe ne pile wamnam bunuman a sem wal porpor yane ne Jehova ngond. Ala kenem buk nus na Baibel anjngo gerind, Baibel yu neori kend, make pund eri.” Kanan napungo olom pilkane erim Johova olom pemili aiem kantawol erim. Enjep kono nagojip kapil monjip. Seli embe nim: “Na pilkane erind Johova na yane pundom ngom.” (1 Tim. 6:6-8) Ala nim pra, pilgi kongan waknaron dal ombun ende min wonda kunum Johova bol ka meim mem si jeljel nakera.

8. Johova okanaiseisen tuwalto angjen man kongan pengem esim, ga bol nawal min wonda?

⁸ Angjen man Johova okanaisesen kongan molse ngimba pu esim ga, kenem bol opoyem esim ga intanet a mo nus a enjep bol yu gend puli ne waninam. (Sng. 31:13) Angjen man pende mambnem kes ere kunib nojip alamb pane to kantom. Komna Kristen monjip wal embe ding mal enjep bol min wom, aposol Pol yu gend nengo to sip karpos kenjip eri. Embe enjip kunum kristen ga nal enjip?

9. Aposol Pol to karpos kenjip kunum, Kristen pende nal enjip?

⁹ Komna Kristen monjip aposol Pol Rom karpos pam kunum, olom pakerojip mem sikenjip. (2 Tim. 1:8, 15) Nalernge embe enjip? Alamb porpor Pol ye kes kunibkun ye ne pinjip bar, enjep ngajil gol embe enjip mo? (2 Tim. 2:8, 9) Mo enjep pra to erkes enambe pe ne kisal gol embe enjip? Nalmem pange embe enjip kenem nakanmen, ba Pol pim mal pile. Olom ombun puli kes kawo kol meim wakro enjep er sinal ne erim. (Apo 20:18-21; 2 Kor. 1:8) Pol pake sinda ambsik pam kunum enjep pake narojip mal kenem embe nanamen! Angjen man kongan mol se ngimba pum ga ere kes erngonam kunum, kenem nawal enamen ne bu dongal panda?

10. Kenem angjen man mol se ngimba pu kongan esim ga, to erkes erngonam kunum, kenem nawal buro pisamen? Nalende embe pisamen?

¹⁰ Nalende kenem to erkes esim, ala namal erkelde embe esim buro pisamen. 2 Timoti  3:12 embe dom: “Alamb porpor Got kumbol wei ngo Krais Jises disaipol aiem man mambnem enjip mal karkar enamen ne enam, alamb enjep erkes enem eri.” Embe pile angjen man mol se ngimba pu kongan esim, Satan tomene keral ne enem bar kenem malmal nasmen. Olom kapisem angjen man mol se ngimba pu Johova konganem esim wak ronambe kenem pra kisal goramen ne pisem.—1 Pi. 5:8.

11. Onesiporus bol wal min wom bar kenem nawal duwom esmen? (2 Timoti 1:16-18)

¹¹ Pilgi ding angnem man bol ka molo anjngo pakerodol. (2 Timoti 1:16-18 gere.) Aposol kunum Kristen monjip Pol karpos pum kunum, Onesiporus mambnem jelmal erim. “Olom [Pol] to karpos kenjip bar ngajil nagom.” Onesiporus Pol anjngo kurpum, ala kansim kunum wal pende ere Pol pakeronal ne erim. Onesiporus embe erim bar olom kolmem wakronange eri. Embe erim bar kenem nawal duwom esmen? Kenem alamb bol kisal gosum mem, kankelpe angjen man pende erkes erngom pakeronamen bar koltungo ninda. Kenem enamen kaple enda wal porpor ere enjep pakeronamen. (Pro. 17:17) Kenem enjep kanka kane pakeronamen kapisim.

12. Pilgi angjen ambajen man Raisa meim, kenem nawal enjep bol duwom esmen?

¹² Rasia tuwalto angjen ambanjen man pende karpos punjup kunum, ei monjip ga enjep nalmal pakerojip mal kanamen. Ga pende tosip kot a kenjip kunum angjen ambajen man puli wo enjep bol molo pakerojip. Embe enjip bar kenem nawal duwom esmen? Angjen man kongan mol se ngimba pum ga to erkes erngonam, mo to karpos keram kunum kenem kisal nagoramen. Enjep yane ne ngondol, pemili aijep kantawol endel, mo wusngam pende kansi pakeronal ne endel.—Apo 12:5; 2 Kor. 1:10, 11.

13. Alamb kenem bol yu kes ne yu kuram kunum, Johova na olom okanaiseisen bol pilgi nimen nalmal to kes moksa?

¹³ Maiyam ding, kongan ding mo sukul ding pilgi nanim ga, kenem Johova lo karkar ere Baibel yu neori kesmen bar, kenem bol yu kes ne yu kuram. (1 Pi. 4:4) Enjep embe ninam: “Na nim kanka kanj, ba nim lotu lo dongal paim. Yipe mambnem pende karkar esmen bar tuwal nawom.” Ala ga pende kongrikesen a to ori kesmen bar yu kulo embe ninam: “Mambnem embe esim bar enem kanka mem nasim paninam.” Yu embe ninam erkelde kenem bunuman tal sinamen: ‘Johova na mambnem dulto eri enal nepisem mo? Olom okanaiseisen lo dongal kes paksim mo? Nim bunuman embe mal sindal, Johova na olom okanaiseisen aiem bol nalmal ka morol?

14. Johova kapisem mambnem karkar esmen bar, alamb kenem yu kujup dal kenem nal enamen? (Buk Song 119:50-52)

¹⁴ Johova kapisem mambnem ambilgi ne anjngo enamen. Jop mambnem dulto erim bar olom yu kujup, ba waknarom anjngo erim. Jop senond panim ye ende yu ne erkere Jop, mem dulto erim bar Got olom pilngo kantawol nanem ne pisa ne erim. (Jop 4:17, 18; 22:3) Ba yu gend embe mal nim Jop pilgi nanim. Olom Johova mambnem aiem dulto paim, dom yu pilgi ne karkar enal nepim. Olom Johova bol ka mom mambnem kankere alamb ende tokes moksam ne napim. (Jop 27:5, 6) Embe erim bar kenem nawal duwom esmen? Alamb yu kuram erkelde Johova lo dulto bol butal nasindel. Nenem bol wal min wom mal buro pile. Johova lo dulto karkar erin bar kunum puli pakerom mal pisen mo? Kunum kunum Johova okanaiseisen aiem, mambnem dulto karkar enim bar tuwal  moral ne bu dongal panda. Embe enjin dal, alamb kenem bol yu kuram ba Jehova bol ka meimen mem wak naronamen.—Buk Song 119:50-52 gere.

15. Nalernge ambajen Brigit to yu kujup?

¹⁵ Ambajen Britgit India meim, olom bol wal min wom omukro kanpe. Olom pilgi pam bar pemili aiem olom to yu kujup. Kongar 1997 kunum olom nol pange bulto andam yuwei a namom ku kongan toporo ninjip. Embe pile, Brigit andam enjel ambiljep man bol pu ye dam mam taun ende monjip bar moramen nepim. Ba Brigit ombun kerma pende kauda pam. Nalerim andam ku kongan poronim, olom anj dunglom puli kele ku kongan ere pemili kantawol enda pam. Ala wal ende, kongrikesen make punda 350 kilomita kolbar sem. Wandil wei, andam pemili aiem olom yu wei pilgi nim bar opyem enjip. Ombun e wo kerma pum pile, Brigit pemili aiem kulu e wakro ala se dumam ende punam pam. Ala napinjip wal ende min wom, amdam gom. Amblem kongar 12 mom kes kensa si gom eri. Olom maiyam ding ga Brigit nim alla pande wal embe min wonom paninjip. Ala yu pende ninjip, nim Johova Witnis men bar ombun embe mal puli min wonom paninjip. Embe ninjip ba olom Johova bol pilgi ne okanaiseisen aiem kin mand mom.

16. Brigit Johova na olom okanaiseisen aiem, wak narom bar nawal ka min wom?

¹⁶ Brigit mom bar kongrikesen kolbar wei sem pile, seket tawol ye nem min bar Baibel yu neori kele gar nim kol make roya nim. Yero olom embe enal amin wei napaim nepim. Ba bulto nim yu karkar erim. Olom mom bar Baibel yu neori kem, make olom garem kol pakim, ala anj dunglom erkun se amblem man bol pemili lotu enjip eri. Embe erim bar nawal min wom? Brigit Baibel yu duwom ere ngonda ga puli kansim, ala pende pakero kelnge wo nol panjip eri. Kongar 2005 kunum olom kongan painia pulnombol erim. Olom Jehova bol pilgi ne okanaiseisen aiem a kamom bar wal ka min wom. Olom alambem man kumbol ngo Johova konganem esim, ala olom mom kulu yipe kongrikesen tal seim! Brigit pilgi wei nim Johova olom pakerongo pemili aiem olom yu  kujup na olom kin ombun min wom kawo akilgi nim.

17. Kenem nawal enamen ne bunuman dongal panda?

¹⁷ Kenem Johova okanaiseisen tuwalto meimen ombun, min wonda kunum Johova kenem pake naronda nepisamen ne Satan pisem. Ala wal ende angjen man mol se ngimba pum to erkes ere sip karpos kesim kunum, Satan kenem kisal goramen nepisem. Ala alamb kenem bol yu kusum kunum, Johova lo dulto na okanaiseisen aiem bol ka namoramen nepisem. Embe enem ba olom kil kurom bar kenem pilkane esmen, dall nameimen. (2 Kor. 2:11) Bunuman dongal pande Satan wal gend enem bar tuiro  Johova na Olom okanaiseisen bol ka morol. Pilkane esmen Johova kenem bulngo wak wei naronda. (Sng. 28:7) Embe pile, nim kankeli Johova bol ka meimen mem wal ende si jeljel wei nakera!—Ro. 8:35-39.

18. Yu duwom miro enamen bar, nawal yubol tonamen?

¹⁸ Yipe yu duwom enjin bar, kongrikesen a tuwal nameim ga ombun ngonam mal omukrojin. Ba kenem Johova na olom okanaiseisen aiem bol ka meimen bar kongrikesen a tuwal meim ga pra ombun ngonam eri. Ombun embe ngonam kenem nalmal akilgi ne mol kaunamen? Yu duwom bulto enamen bar ki e omukro kanamen.