1. Pilgi a paradais panimen e nawal, kenem nal enamen nepisamen?

 PARADAIS ende yipe ya mala seim bar, wal kaka min wonda alamb kapile meim. Alamb puli tuwal ele kumbol amin wei meim. Paradais a tuwal ele punjip meim ga, ala seori wonam kanapisim. Enjep kapisim alamb puli se tuwal wo enjep kolngo, kulu kaseim bar moram nepisim. E nal kulu? E, pilgi a paradais! a

2. Pilgi paradais a nawal kawei jel mal, pende min wonom?

² Wal jel mal ende min wonom e, yipe ya mala Seten erkelde alamb kumbol ding sende-nameim bar, Johova alambem man kumbol ding sende kapil meim. (1 Jon 5:19; Rev. 12:12) Mala wal pende min wonom erkelde alamb kapil nameim, ba Johova pakero erkelde olom konganem alamb, buning molo kapil meim. Olom Yuwom Baibel a meim pilgi paradais panimen bar, embe dom, “okul dumam” na “penegar ende nol-puli paim mal padom.” (Ais. 4:6; 58:11) Pilgi paradais a tuwal meim alamb, yipe kunum kes seim bar Johova enjep wal kaka puli ngondo, si akilgi ne kapil meim.—Ais. 54:14; 2 Tim. 3:1.

3. Aisaia sapta 65 yu propet mom, komna Israil kunum nalmal mongom to min wom?

 ³ Propet Aisaia wusngam a, pilgi paradais a alamb nalmal moram mal Johova nengom. Aisaia sapta 65 a, nim yu meim kanjel, nim yu pende 537 B.C.E kunum, mongom to min wom. Kunum ele, Juda ga Babilon karpos pamonjup sikele seyem garjep kol punjup. Johova olom alambem man pakero wal ka ngongo, taun aijep Jerusalem kes mol sem erkenjip wose kawei pungo, ala lotu wei pulnombol er simin kenjip eri.—Ais. 51:11; Sek. 8:3.

4. Aisaia sapta 65 yu meim yipe-kunum nalmal mongom tonom?

⁴ Kongar 1919 C.E. kunum, Aisaia yu propet nim ende mongom tom, yipe-kunum Johova lotu erngom ga Lotu Gend mo Babilon Kerma tuwalto monjup sikele seori wonjup. Ala pilgi a paradais se kerma pu, se mal yemyem pum. Got Gapman yu neori kele kongan kumbol ngo enjip bar, kongrikeisen puli min wom. Ala Kristen mambnem karkar ka enjip. Yeamb puli komna tu kong mambnem karkar ere, mambnem kes er monjup “mambnem kol Got kapim mambnem sinjip.” (Efe. 4:24) Weieri, Aisaia wal kaka puli yubol tom, kunum kol senda kunum min wonda. Ba yipe kunum wal kaka puli si kapil meimen eri. Pi, pilgi paradais kenem bol nal enem, ala nalende si nakeramen mal omukro kanamen.

PILGI PARADAIS A TUWAL MEIM GA NALMAL PISIM

5. Aisaia 65:13 yu dongal dom mal, kenem pilgi paradais a tuwal meimen nawal ende si kapile meimen?

⁵ Nganj dongal pande kapile moram. Aisaia yu propet nim bar, pilgi paradais a tuwal meim ga nalmal moram, ala tuwal nameim ga nalmal moram nim eri. (Aisaia 65:13 gere.) Johova lotu erngom alamb, pilgi wal puli ngondo si kapil meim. Olom murmulom dongal kenem bol meim, Baibel ngom, pilgi mokun puli ngonom, “mokun nomon . . . nol nomon, . . . [ala] kapil meimen.” (Revelesen 22: 17 omukro kane) Ba pilgi paradais a tuwal nameim alamb, “kono gosum . . . , nol nonam numun asipronom . . . , [ala] ngajil gosum.” Enjep pilgi mokun tambem wei enem.—Amo. 8:11.

6. Kenem pilgi mokun nalmal simen, ala nalmal pakeronom Joel 2:​21-24 nalmal yubol tonom?

⁶ Joel yu propet nim bar, kenem mokun pende si kol meimen yubol tom, e rais, wain na olip oil panim, e tadom Johova alambnem man ambsik paim wal ngo kaple enem. Pilgi mokun pra ngonom. (Joel 2:​21-24) Olom wusngam pende karkar er wal ngonom, Baibel, Baibel-buk na nus, kenem websait, kongrikisen a make paim bar, na kibung seket na riginol paim bar. Ala kunum dingding ne pilgi mokun ngonom eri, wusngam embe mal ngonom si dongal pande kapil meimen.

7. Nawal erkelde “kenem kumbol karondo meimen”? (Aisaia 65:14)

⁷ Wal si kaple ere kapismen. Got alambem man kapil “wironam,” nalenem, enjep kumboljop a Got bol kawei pisem. (Aisaia 65:14 gere.) Yuwei kenem pilgi er dongal enem, Got wal kaka enal panim Baibel a meim na Jises Krais opa ere kenem topro siyem nim bar pilgi nimen, erkelde “kumbol karondo meimen.” Wal embe mal pilgi ding angjen ambajen man bol yubol tomon erkelde, kawei pile meimen!—Sng. 34:8; 133:​1-3.

8. Pilgi paradis a nawal tal kerma ende paimbel?

⁸ Johova alambem man pilgi paradais a meim bar, kanka na kumbol ding mem wal kerma tal paimbel. “Kumbol ding sende meimen” bar pilkane esmen, kunum kol senda kunum embe moram, Johova konganem alamb  yipe kapil meim mal ma, kunum ele kumbol ding sende kawei wei pilmoram. (Kol. 3:14) Pilgi ding ambajen ende komna kunum wo, Johova Witnis ga bol taprom kunum nalmal nepim mal neori kele, embe nim: “Na kapil moral mal kanpol narond, pemili aina bol pra. Na pulnombol kanka mem taninjip kanj e, Johova Witnis ga.” Weieri, alamb ende kawei pilmoram nepinjip dal, se kenem pilgi paradais a meimen bar tuwal wonam. Mala alamb Johova konganem alamb bol nal nepisim kenem nakanmen, ba enjep kangem kapande, Johova pemili aiyem mal yemyem mol pum bar mambnem ka karkar esim.—Ais. 65:15.

9. Yipe ombun duwom erkelde kapil nameimen, ba Aisaia 65:​16, 17 nal yu dongal ende dom?

⁹ Kapil kumbol amin moramen. Pilgi paradais a tuwal moram kanapisim ga, Asiaia 65:14 enjep bol embe dom, “kumbol ombun si kumbol kes moro ngimbil [golo] ke ninam.” Ba wal porpor erkelnge Got alambem man, kes pile ngimbil sise enjip nalwal min wonda? Kikine ere pu “ombun embe mal porninde, [Got] dungola [ala] nakanja.” (Aisaia 65:​16, 17 gere.) Johova erkelde ombun duwom kenem bol min wonom porninda, ala kunum pende wopundo bunuman weiro napisamen eri.

10. Pilgi ding angjen ambajen man bol tapromon e, nalende wal kawei ende nepisamen? (Piksa pra kane.)

¹⁰ Yipe kunum, pilgi ding angjen ambajen man bol Kristen make paim bar tapromon kunum, kapil meimen. Mala wal pende minwo erkelde bu puli kesmen, auro dom. Kenem makero pilgi wal omukro kanmen erkelde kumbol amin meimen. Ala pilgi ding angjen ambajen man pakeropo, kumbol amin sende kapil meim, molmene kele mambnem ka ere, kanka mem tanim, e, Got murmulom dongal mambnem aiyem. (Gal. 5:​22, 23) Got okanaiseisen a tuwal meimen bar, wal ka puli simen! Pilgi paradais anjngo mol punjin dal, Got yu dongal ne “kupul kolnga na mal kolnga enal panim kanamen.”

11. Aisaia 65:​18, 19 dom, Johova pilgi paradais erkem seim kenem bol nal enem, nalende embe enem?

¹¹ Kumbol a kapile, kapil meimen. Aisaia yu pende ne embe nim, pilgi paradais a tuwal moramen bar “kumbol karondo, kapil moramen,” pilgi paradais panimen e, Johova olom erkem seim. (Aisaia 65:​18, 19 gere.) Olom kenem wusngam a alamb pakerondo, mala okanaiseisen seim bar tuwal meim sikele, se pilgi paradais ka seim bar tuwal wonam ne enem! Kenem yuwei a tuwal molo wal kaka puli simen bar kawei pismen, ala kenem kumbol  akse ga pende pra nengopo kanamen ne esmen.—Jer. 31:12.

12. Got yu dongal ende nim Aisaia 65:​20-24 paim bar, nim nal nepisen, nalende embe pisen?

¹² Kenem Got bol seno kumbol amin sende, pilgi paradais a tuwal moramen nepismen e kawei. Got kunum kol semin kera kunum, wal pende kane enamen mal pile! Baibel yu dongal pende ne embe dom: “Ngal kumblam kangram kunum apal eri mol nagoram . . . tuwa seim alamb kunum apal eri mol nagoram.” “Gar taunam enjep nopanam, [ala] wain taram enjep mongom tang sinonam,” “enjep kongan omblombol ei mal nanam, nalenem, Johova enjep wal ka ngonda.” Olom yu dongal dom kenem kantawol ka ene, nomolpa enam bar kapil mol punam padom. “Enjep na wironam kunum yero,” na, enem ambsik paim wal pilkane ere, “kol meim wal poropor ambsik paim wal ngo kaple enal.”—Ais. 65:​20-24; Sng. 145:16.

13. Alamb mambnem yo enjip sikele, pulnombol Johova lotu esim kunum, nal mambnem kol sim pane Aisaia 65:25 dom?

¹³ Kumbol amin sende buning meim. Alamb puli Got murmulom dongal enjep pakerondo, yero tukong mambnem karkar enjip sikele, nomolpa esim bar mambnem kol karkar esim. (Aisaia 65:25 gere.) Enjep ombol ere komna mambnem kes ere wanjip sikesim. (Rom 12:2; Efe. 4:​22-24) Got alambem man porpor sin nganj a paim, embe pile alla enam eri. Embe paim ba, Johova mambnem kanem kanem pam alamb, “siding kere” mambnem amin na kanka mem karkar esim. (Tai. 2:11) E, jep mal ende paim, Got Dongal Kerma paim ye mongse enda kaple enem!

14. Pilgi ding angjen ende Aisaia 65:25 yu paim, olom bol nalmal weieri min wom?

¹⁴ Alamb ye mambnem sikele, mambnem kol sinam kaple enem mo? Wal ende min wom mal omukro kandpe. Ye gal ende alamb to, mambnem kes ere ere erim ye, kongar 20 mom kunum, kunum puli karpos pupa ori wo ere ere erim. Olom kar kunumb si, gar to boune wal si, ala mambnem kes kerma pende erim bar to karpos kenjip. Olom alamb kanem kanem bol nganmal erim eri. Olom yuwei Baibel a mom pulnombol kane, Johova Witnis ga bol makerojup bar wom kunum, pake kerma rongo—pilgi paradais a tuwal moral nepim. Bulto nol pam kunum, Aisaia 65:25 yu olom pakerom mal buro pim. Olom tu laion mal molo alamb tororo erim sikele, wose kong sipsip mal pu, mambnem amin karkar erim.

15. Nalende kenem alamb ende wiropo, pilgi paradais a tuwal wonam kapismen, nalmal wironamen?

¹⁵ Aisaia 65:13 yu pulnomborom bar, yu ende neori kerem: “Ye Kerma Johova molse ngimba punom ye,” yu embe dom. Ala wes 25 porninda enem bar, yu embe dom: “Johova yu e dom.” Olom yu dom weieri mongom toro erim. (Ais. 55:​10, 11) Pilgi paradais panimen yipe weieri seim. Johova erkelde kenem alamb porpor olom lotu erngomon e, jel mal wei. Olom alambem man meim bar tuwal moramen, yipe mala mambnem kes pikrondo alamb kapil nameim kunum, kenem kapil moramen. (Sng. 72:7) Mem embe pande, kenem alamb puli pakeropo wo kenem kolngo, Kristen moramen ne esmen. Embe pile, alamb erkelpe wo disaipol moram kongan kumbol ngo enamen.—Mat. 28:​19, 20.

ALAMB NALMAL PAKEROPO SE PILGI PARADAIS A TUWAL WONAM

16. Nawal erkelde alamb se pilgi paradais a tuwal wom?

¹⁶ Kenem dingding ne kongan kerma ende paim, alamb pakeropo se pilgi paradais a tuwal wonam. Kenem embe enjin dal, Johova mambnem aiyem karkar esmen. Olom  alamb nipnape ne, na okanaiseisen a tuwal woya nadom. Olom mambnem amin karkar ere erkelde, alamb “se” olom meim bar wom. (Jon 6:44; Jer. 31:3) Kumbol ka seim alamb-kanka mem na mambnem aiyem ka pende paim, duwom er kane se olom meim bar wom. Kenem nalmal, mambnem ka tanipe alamb kane, se pilgi paradais a tuwal wonam?

17. Kenem nalmal alamb pende erkelpe, se pilgi paradais a tuwal wonam?

¹⁷ Wusngam ende alamb pakeropo se pilgi paradais a tuwal wonam e, pilgi ding angjen ambajen man bol mambnem ka ere, kanka mem taninamen. Alamb kolnga ende kenem kongrikeisen a wonam kunum, kenem kapismen enjep komna Korin kongrikeisen sem bar alamb make wo, kapinjip mal pisam nepismen. Make wonjup alamb embe ninjip: Weieri, “Got enem bol tuwal meim.” (1 Kor. 14:​24, 25; Sek. 8:23) Embe pile, kanem anjngo ende ende bol “kumbol ding mem er dongal enamen.”—1 Tes. 5:13.

18. Nawal erkelde alamb se kenem okanaiseisen a tuwal wonam?

¹⁸ Kenem kunum kunum pilgi ding angjen ambajen man, Johova enjep kanem mal kanamen. Kenem embe enamen nepinjin dal, mambnem ka esim bar mongse kane mambnem kes esim bar nakanamen, e, kanan pa namora mambnem. Kenem ende ende bol kumbol kes tonjin dal, kanka mem erkelde “ende ende bol pake mem tane, enjep wandel wei si, alla ernombro molo ende ende alla wakronam.” (Efe. 4:32) Kenem embe enjin dal, alamb mambnem embe mal kapisim alamb se, pilgi paradais a tuwal wonam. b

 PILGI PARADAIS A TUWAL ANJNGO MOROL

19. (a) “ Seori Pu Ala Yem Wonjup,” pane yu boks a paim, pilgi paradais a, ala yem wonjup ga nal paninjip? (b) Kenem nal enamen ne bu dongal panda? (Piksa pra kane.)

¹⁹ Kenem pilgi paradais a tuwal meim bar kawei pismen! Yipe wose kawei pu komna sem ngonom, yipe Johova lotu erngo kangem ambil min kesim ga puli keswei molo, komna monjup ngonom. Johova pilgi paradais ersem tuwal meimen bar kawei pile, kunum kunum sangiyo ninamen. Ende se pilgi paradais a tuwal wo, kumbol amin sende, buning molo, kapil moral nepim dal, ala seori wei napunda! Pilkane endel, Seten ombol er kenem to seori keral ne enem. (1 Pita 5:8; Rev. 12:9) Kenem kankelpe olom er win nanda. Embe pile, kenem ombol ere pilgi paradais erkelpe kuru se, ka sende kumbol amin bol moramen.