YU DUWOM 4
Kenem Ombol ere Memorial Pumon bar, Johova Wal Ka Ngonom
“Enem kunum kunum embe ere, na nepisam.”—LUK 22:19.
GOLANG 19 Kerma Mokun
DUWOM ENAMEN YU KERMA a
1-2. Nalende kongar dingding ne, Memorial paim bar pumon?
JISES golo kenem pakerondo kolnga moramen ne erim, kongar 2,000 mal wopunom. Jises goral ne erim kunum emilpal, disaipol aiem man nengo, enem makro bret na wain ambram kunum na pilgonam panim.—1 Kor. 11:23-26.
2 Kenem Jises kanka kamen pile, olom nim yu karkar esmen. (Jo. 14:15) Kongar dingding ne kenem Memorial punmon bar, nalmem pange olom gom, yane ne buro pismen. Kenem Baibel yu neori kele, alamb puli wiropo, make e paim bar wonam ne esmen. Ala kenem kenem wal ende kankelpe kolnatungnom, Memorial womon eri.
3. Kenem yipe yu duwom enamen bar, nawal omukro kanamen?
3 Yipe yu duwom enamen bar, Johova alambem man, Jises gom bar ombol ere, wusngam talende, pilngom mal omukro kanamen: (1) Jises erim mambnem karkar esim, (2) alamb pende wiro Memorial paim bar, woya nim ala (3) ombun pende min wo koltungnal enem ba, ombol ere Memorial wom.
JISES ERIM MAMBNEM KARKAR ESMEN
4. (a) Nal yu wei kerma pende Memorial paim bar, ninambe pismen? (b) Nalende ninambe pismen yu, kenem bol wal kerma wei paim? (Luk 22:19, 20)
4 Kongar ding ne Memorial yu pismen bar, ki kerma pende meim Baibel pundom ngonom. Nalernge ye dingeri golo, alamb porpor sin paim topro siyem kenem pilkane esmen. Ala bret na wain nawal suse paim, namal si nonda pilkane esmen eri. (Luk 22:19, 20 gere.) Ala mala moram ga wal kaka sinam ne, pilgi nim mal buro pismen eri. (Ais. 35:5, 6; 65:17, 21-23) Yu wei embe mal pismen, ei mal pilyas nakeramen. Alamb billien puli, Jises nalmem pange gom wal kerma wei paim kanpolnarom. Ala Jises gom kunum Memorial ere pilngoya nim naesim eri. Nalende embe esim?
5. Jises aposol puli gonjip kunum bulto, na erind mambnem enem karkar eya nim bar, nawal min wom?
5 Jises aposol puli gonjip kunum bulto, Kristen gend se kongrikeisen a tuwal wonjip. (Mat. 13:24-27, 37-39) Ala ga pende “yu napam” mal ne erkerambe disaipol ga enjep karkar enam ne enjip” (Apo 20:29, 30) “Yu napaim mal” ende, Kristen gend ne alamb ngojip embe, “Jises kunum dingeri golo alamb porpor sin wakronom” pane Baibel dom, yu e kun napaim paninjip, olom gom kunum kunum pilngonamen kun paim paninjip. (Hib. 9:27, 28) Yipe alamb puli yu gend e pilgi, ne se lotu gar jeljel—pu Jises “Opa erim Misa” pane kunum— kunum lotu esim. b Ala lotu pende meim, Jises gom kunum pilnangom nalenem, lotu aijep alamb meim Jises nalmem pange gom kanpolnarom. Alamb pende, ‘Jises gom, na sin weieri wakronom mo ne bu puli kesim?’ Nalende enjep ki embe paim? Nalenem Jises gom kenem sin wakronda kaple nanem nepisim, bu enjep sim. Ba, Jises karkar wei esim ga, bu nalmal sim?
6. Kongar 1872 kunum, Baibel yu omuk karojip ga nal yu ende ninjip?
6 Kongar 1900 kunum, Charles Taze Russell, ga grup kerei ende bol Baibel yu omuk kaweiro yu mem kanpol tonjip. Enjep Jises nalmem pange gom, na nim yu karkar enamen kanpol tonamen ne enjip. Kongar 1872 kunum, enjep Jises nalmem pange, alamb porpor sin wakrom kanpol tonjip. Enjep omukro kanpolrojip wal, nuspepa, buk na nus wusngam a ne alamb porpor ngojip. Ala komna-Kristen enjip mal, enjep pulnombol kongar ding tuwalto, kunum ding ne makro Memorial enjip.
7. Ga e, Baibel yu omukarojip kenem nalmal pakeronom?
7 Kristen dulom kerei, komna kumbol ngo Baibel yu omukarojip bar, kenem yipe pake simen. Pake nalmal simen? Johova kenem pakerondo, Jises gom yu wei e kanpolro, ala kenem alamb bol nawal enal nepim kanmen eri. (1 Jo. 2:1, 2) Wal tal ende, kanpol tomon e, ga pende se min epen—pu kolnga aimanj moram, ala alamb millien puli ya mala paradais senda bar moram kanmen eri. Johova kenem kanka kane Jises kem wo gom, pilkane esmen pakerondo, se olom bol mand wei pumon. (1 Pi. 3:18; Jo. 4:9) Komna pilgi dongal pam angjen man, Jises nim yu karkar enjip mal, kenem alamb puli wiropo Memorial paim bar, wonam ne esmen.
ALAMB WIROI MEMORIAL WONAM
Nim nalmal ere, Memorial panda bar, alamb puli wiro woya nindel? (Paragrap 8-10 kane) e
8. Johova alambem nalere, alamb wironambe Memorial wonam ne esim? (Piksa kane.)
8 Johova alambem man kombe moipum, alamb wiro Memorial woya nine enjip. Kongar 1881 kunum, Tawolgar wusngam a anjgen man Amerika tuwalto monjip, wiro si angjen ende garem Allegheny, Pennsylvania sem bar make kawei e tonam paninjip. Bulto, kongrikeisen dingding ne Memorial enjip. Kongar 1940 Mas kunum, pablisa enjep monjip bar, alamb ende make wonam ne kapisam, alamb wiroya ninjip. Kongar 1960 kunum, Betel ga pepe pulnombol bolo, alamb wironambe Memorial wonam pane kongrikeisen a ngojip. Kunum ele pulnombol wonjip, alamb Memorial wonam ne pepe billien puli kes ngo ori kenjip. Nalmem pande kenem anj dunglom na dongal kele make e paim bar, wonam ne esmen?
9-10. Kenem ombol ere alamb wiropo, Memorial wonam ne esmen bar, namal pake sinem? (Jo. 3:16)
9 Mem kerma ende pande, alamb wiropo Memorial wonam ne esmen e, Johova na Jises kenem alamb porpor bol mambnem ka ende enjil, wo duwom er kannam esmen. (Jon 3:16 gere.) Kenem kapismen enjep Memorial wo, yu ninam pisam erkelde, yu puli duwom ere Johova kongan alamb ende moram nepismen. E, Memorial komna kunum wom ga bol embe pismen, ba ga pende pake sim eri.
10 E, Johova komna lotu erngojip, ba pi ernangom ga pra wiro woya nimen eri. Kenem embe esmen bar, Johova enjep anjngo kanka kanem nepisim, ala wom bar kenem kapismen. Enjep make paim bar wom wo, yo Johova konganem ere kapil monjip mal buro pisim. Ambajen Monika bol wal min wom mal omukro kanamen. c Olom kes KOWET-19 tom kunum, pablisa kongan ala enda paninjip. Olom kongar 2021 Memorial pam bar wo, bulto embe nim: “Memorial e na bol wal kerma wei paim. Kongar 20 bulto, na ala pulnombol yu neori kele, alamb wiro, Memorial paim bar woya nind. Na kongan e, kumbol wei ngo erind nalerim, Johova na Jises na bol mambnem ka enjil.” (Sng. 103:1-4) Kenem wiromon alamb Memorial paim bar wonam mo nawonam, ba kenem kongan pesil ere, enjep wiromon bar Johova kenem bol kawei wei pisem.
11. Kenem ombol ere alamb wiropo Memorial wonam ne esmen bar, Johova pakerondo, nawal ka min wonom? (Hagai 2:7)
11 Kenem ombol ere, alamb wiropo Memorial wonam ne esmen bar, Johova erkelde wal ka min wonom. Kongar 2021, kes KOWET-19 tom ba, wal kawei min wom, alamb puli kes wei 21,367,603 poro Memorial wonjip. Namba e, Witnis ga mal yem yem mol pum, namba aijep kunum tal mal semin pum! Ba Johova alamb namba kerma wom bar napisem, alamb nal alamb wom pilkane enem. (Luk 15:7; 1 Tim. 2:3, 4) Kenem weieri pilkane esmen, alamb wiromon bar Johova pakerondo, kumbol kasem alamb kansimen.—Hagai 2:7 gere.
OMBUN MIN WO KOLTUNGNAL NE ENEM, BA MEMORIAL PUMON
Kenem ombol ere Memorial pumon bar, Johova erkelde wal ka min wonom (Paragrap12 kane) f
12. Nal ombun pende min wonda erkelde, Memorial punamen ne enamen bar, pesil panda? (Piksa kane.)
12 Jises kunum porninal ne enda bar, ombun kanem kanem min wonda panim, pende embe mal, —pemili kenem bol opyem enam, to karpos keram, nganmal puli panda, kes kanem kanem min wonda, ala ombun puli min wonda panim. (Mat. 10:36; Mak 13:9; Luk 21:10, 11) Kunum pende ne, ombun min wonom wo erkelde, Jises gom kunum pile ngo make paim bar punamen pesil paim. Kenem angjen ambajen man nalmal ere, ombun embe mal tomene kenjip, ala Johova enjep nalmal pakerom?
13. Angjen Artem, karpos pam kunum, kumbol dongal pange, Memorial enal ne erim bar, Johova pakerongo nawal ka min wom?
13 Karpos paim kunum. Angjen man pilgi dongal paim ga karpos paim kunum, enam paim wal ere Jises gom kunum pilngom. Angjen Artem wal erim mal pisamen. Olom kongar 2020 Memorial kunum, alamb 5-poro karpos panjip bar pam. Olom karpos pamba wal kerei kerei kansi, bret na wain mal ere, Memorial enal nepim. Ala Memorial yu ne olom olom pakeronal eri nepim. Olom bol karpos ding panjip ga irr no yusep ninjip, ba olom nalerim erim? Kaple ende, 1- aua tuwalto enem irr no, yusep nim sikeya nim. Artem wal ende kane malmal erim, Memorial erim kunum, enjep irr no yusep ninjip sikenjip. Artem embe nim, “na Memorial yu ninal pisam manind, enjep napisam mapaninjip panim.” Ba olom Memorial er sikem kunum bulto, ki puli ngo yu pende ne nepisamen ne enjip.
14. Kes KOWET-19 tom kunum, Johova alambem man nalmal ombol ere, Memorial enjip?
14 Kes KOWET-19. KOWET-19 tom kunum, Johova alambem man woding pu Memorial enam kaple narim, ba e kol wei natungum. d Kongrikeisen dingding ne se Intanet a pu, vidio konprens na Zoom wusngam a make e tonjip. Ba alamb puli Intanet konganem enam kaple narim, alamb nal enjip? Kantri pende wusngam erkun ere, TV mo redio wusngam a Memorial yu pinjip. Ala kulu molpin wei sem bar, brens opis alamb yujop 500 jeljel paim bar, Memorial yu rekot er mokjip, angjen man sip ngomngo pinjip.
15. Baibel yu duwom erim ambajen Su bol, kenem nawal duwom esmen?
15 Pemili opyem Esim kunum. Ga pende Memorial wonam ne esim bar, pemili opyem kesmal esim. Baibel yu duwom erim ambajen Su bol, wal min wom mal omukro kanpe. Kongar 2021 kunum, Su Baibel yu duwom erngom alamb nengo, pemili opyem esim pile, na Memorial wonal kaple nanem panim. Olom Baibel tisa, Luk 22:44 gere olom ngom. Ala yu ende ne olom ngom, alamb kenem ombun ngonam kunum, Jises mambnem karkar ere, Johova bol pilgi ne, yane ne ombun porpor olom angela keramen panim. Tangdero, Su bret na wain erkun ere, Kinimba Lotu enjip bar, jw.org a tuwal pum. Ala ponimbar olom se wur papa erim bar, kulo a tuwal pu, pon wusngam a Memorial yu pel pim. Bulto, Su pepe bol Baibel tisa ngo embe nim: “Nim taming yu ka ne na dongal ngon, embe pile na enal pam wal ernge, Johova pakerongo Memorial paim bar tuwal wond. Na kumbol a kawei nalmal pis, nim nengonal kaple nanem!” Embe pile, nim ombun embe mal kaunda dal, Johova weieri pakeronda ne pilgi don mo?
16. Kenem Memorial punamen ne ombol esmen bar, Johova pakerondo nawal ka min wonda ne, pilgi nimen? (Rom 8:31, 32)
16 Kenem Jises gom kunum pilngo, make punamen ne ombol esmen, Johova kawei wei pisem. Olom kenem bol mambnem ka erim bar, pilkane ere, sangiyo tanimen bar, pakerondo wal ka min wonda. (Rom 8:31, 32 gere.) Kenem yipe kongar Memorial panda bar tuwal punamen ne erkun enamen, ala Memorial min wonda kunum, Baibel yu neori kesmen kongan puli ere, alamb puli pakeronamen.
GOLANG 18 Kenem Topro Siyem Kem bar Kapisamen
a Tunde Eprel 4, 2023 kunum, alamb millien puli mal yem yem mol pum, Krais Gom kunum pilngonam. Alamb kolnga puli wonam, pende komna Witnis ka ende monjip ba, sikele sepjip kongar puli wopum ga wonam eri. Ala ga pende, wal pende koltungnal ne enem ba ombol ere wom bar, Johova enjep bol kapisem.
b Lotu embe esim ga pilgi nim, enjep bret na wain wose Jises nganjem na maiyam wei punom nepisim, ala nom ga pake kerma tonda ne pilgi nim. Enjep Jises gom pilngomon pane kunum kunum mambnem e karkar esim.
c Kangjep wei ma, jel.
d Kenem, jw.org a pu kongar “2021 atikol pende kangem Bung Bilong Memorial” pane paim kane.
