YU KARIS-panimen e, Baibel Nupela Taim Trenslesen a sinjip, e “karis” kanem kanem kar mal konganem enjip e pildom. (Apo. 8:28, 29, 38) Itiopia ye karis kar a wom panim e kerma pa, ami walem si nganmal ere ere enjip na, resis ere ere enjip karis kerei kerei e ngom. Nalmem pande yu embe nimen, mem pende meim omukro kanamen.

Itiopia ye kerma e kulu kolbar wei mol wom. “Olom ye kerma, Itiopia kwin Kandasi mento molo, ku na wal pal kantawol ere ere erim.” (Apo. 8:27) Komna Itiopia-ga monjup na yipe-kunum kulu Sudan na Saut Isip ga meim, karis konganem ding mal nasim. Embe pile Itiopia ye kerma, kulu kolbar wei molo karis konganem er wom e, karis jeljel konganem er wom mal paim. Ala olom wombar, bonogane bol ai wonda wom. Komna kongar andet C.E tuwalto, karis kar mal konganem enjip, simbem 4-poro pange, alamb bulto molngo kong os kankul sipsipe erim. “Wal embe weieri min wom mal, buk Aposol—Omukro kanim ye ende embe nim, karis embe mal bonogane puli simin keram kaple ere ere erim, bolla mol punjup ga kapile mol pupo enjip, ala se kulu kolbar wei punda kaple erim eri.” E, buk Aposol yubol tonom bol woseding punom.

Itiopia ye Aisaia skrol ger wom kunum, Pilip olom wombar mand pum. Yubol paim embe dom, “Pilip muko ne mand pupim, Itiopia ye kerma e, propet Aisaia yu ende boll pakim, numun simin kele gerim.” (Apo. 8:30) Karis embe mal, kikine pupo enjip, embe pile Itiopia ye nom e Aisaia yu mane gernda kaple erim. Ala Pilip mala pu olom ambilsi yu ninda kaple erim eri.

Itiopia ye kerma e Pilip ki si, “semin karis a woi ai amine morambel panim.” (Apo. 8:31) Karis si resis a muko nim akle molo pum, ba Itiopia ye kerma na Pilip karis si punjil, dumam senge ami ne mol punjil.

Got murmulom dongal bu ngongo bonjup yu Aposol sapta 8 a paim, ye wal pende weieri min wom mal omukro kanjip ga yu neau nijip, ala kenem buk na nus a piksa meim bar kanmen Itiopia ye kerma karis si pum kerma pa ye ami sip nganmal ere ere enjip, na resis ere ere enjip karis e ngonom.