Ga pende mol yauwo min wonjup bar, mambnem aijep ende pam e, amb wal kisi mal kanjip. Seket tawol ende kangem Anj, Bolivia meim embe nim: “Ye pende molmin wonjup bar mambnem ende pam e, ye mongse kangjep ambil min kele amb wal ei-mal kanjip.” b Shengxian, elda ende Taiwan meim embe nim: “Na mei kulu, ye bisnis enam bar amb yu ne tuwal nakeram nepisim. Amb ende yu ninda, ye pil karkar erim dal, ye pende olom wal ei mal kanam.” Ye pende, ambra kanka nakanim wusngam pende tanim eri. Ende embe mal, enjep ambra komb pilnango yubol kes mal to, yukulo towol enam yu nim.

Kenem kapismen, ye ende mol yauwo min wom kulu, mambnem sikele mambnem kol sinda kaple enem. Olom ye molse minro pu, amb ngom nepisim mambnem wakro sikera eri. (Efe. 4:22-24) Johova ambra komb bol enem mambnem karkar enda. Pi Johova ambra bol mambnem enem mal omukro kanamen, angjen man Johova ambra komb bol mambnem enem mal, duwom enam mal kanamen. Ala elda walem, molse ngimba pu ambra komb wei pilngo, mambnem ka enam mal omukro kanamen eri.

JOHOVA AMBRA KIN MAMBNEM NALMAL ENEM?

Kenem ambra komb bol mambnem nalmal enamen, Johova ta kawei dom. Danjen Johova kanka na wandil mem sem pile, ngalem man weieri pilngonom. (Jon 3:16) Pilgi dongal paim ambajen man, olom amblem man kawei wei man kanem. Johova wusngam pende ambra komb wei pilngo, kanka mem tadom mal omukro kanamen.

Johova ye na amb kin mambnem ding mal enem. Johova ye na amb olom mom mal, ersem. (Stt. 1:27) Olom ye ersem sape kerma pa, amb  nangonom, ye na amb kanka ding mal kanem. (2 Sto. 19:7) Olom ye na amb ersem bunuman ding mal paim, Baibel yuwei sape ka ding mal si, Johova mambnem ka ding mal karkar enambel. Johova ye na amb ai olom bol pilgi nimbel bar kapisem​—ye na amb ai pilgi nimbel ya mala paradais senda bar morambel. Ala pende semin epen pu kongan king na pris ai enam. (2 Pita 1:1, ftn.) Mambnem embe enem bar, taninde pilkane esmen Johova ye na amb ding mal kanem.

Yu nim Johova komol kase pisem. Ambra komb ombun ende panda kumbol a nalmal pisim, Johova pilkane enem. Resel na Ana ombun pange yane nijil Johova komol kase pile, yane pundom ngom. (Stt. 30:22; 1 Sml. 1:10, 11, 19, 20) Ala Johova bu ngongo yira pende Baibel bonjup bar, yira pende ambra yu nijip komol se pinjip ga, yu boljop boll kenjip meim eri. Ende Abram, Johova yu nim karkar ere, ambiyem Sara yu nim komol kase pim. (Stt. 21:12-14) King Depit Abigel yu nim komol se pim eri. Depit embe nepim, Johova erkelde Abigel wo na bol yu dom nepim.(1 Sml. 25:32-35) Jises Dam mambnem porpor karkar kawei erim ye, mam Maria yu nim komol kase pim eri. (Jon 2:3-10) Yubol embe mal tomon bar pilkane esmen, wusngam ende Johova ambra komb wei pilngom, yu nim komol kase pisem.

Johova enjep bol pilgi dom. Johova pilgi nim amb Iv, adam pakerondo mal pel kantawol ka enambel nepim. (Stt. 1:28) Olom embe erim, Iv molse miro pu adam ngonom ne napim. Olom Adam, pakerondo kongan pal enambel kaple enem nepim. Ala Johova amb propet Debora na Hulda bol pilgi ne, olom alambem man wal enam mal, yu ne ngonambel panim, e king na pris monjup pra. (Het. 4:4-9; 2 Kin. 22:14-20) Yipe Kristen ambajen man meim Johova pilgi ne konganem enam ne, pisim eri. Pilgi dongal paim ambajen man paplisa, painia, na misinari kongan esim. Ambajen man gar disain esim bar pakerom, gar tauwum, Kingdom Gar kes meim bar erka esim, ala brens tuwalto kongan pende meim esim eri. Pende Betel na RTO kongan esim. Ambajen man e, Johova ami dulom kerma ende molo, olom kapisem kongan er kaple wei esim. (Sng. 68:11) Weieri pilkane esmen, Johova ambra komb dongal kerma napaim, kongan er kaple nanam ne napisem.

JOHOVA AMBRA KIN MAMBNEM ENEM, ANGJEN NALMAL DUWOM ERE ENAM?

Angjen man, Johova ambra bol mambnem enem mal, kenem ding mal esmen moma kanamen nepinjin dal, Kristen ambra bol yu ne mambnem esmen mane omukro kanamen. Ende pakeronambe embe enamen. X-rey masin, kes ende alamb kumbol tuwalto paim taninde kanim mal, Got Yuwom Baibel a meim na senomon ga pakeronambe, ambra komb bol bunuman nalmal ambsimen pilkane enamen. Johova kapisim mambnem esmen moma, kanpol tonamen. Kenem nalmal ere pake e, sinamen?

Seno tap karonon ga ki sindel. (Prov. 18:17) Kenem senon pilgi nimen, ala enjep yu weieri nim ga ki embe mal ngonamen: “Ambajen man bol na mambnem nalmal erind ne nim pisen? Na enjep weieri pilngond nepisim mo? Na wal pende ere, enjep bol mambnem ka taninal mo?” Nim ambra komb bol mambnem pende enen er keli woka punda mal nengom dal, ninda yu karkar ere to nakerel. Wal embe eri woka punda mal nengonda, kapile karkar endel.

Got Yuwom Baibel a meim duwom endel. Kenem ambajen man bol, mambnem ka erngomon moma omukro kanamen nepinjin dal, Got Yuwom Baibel a meim duwom er kanamen. (Hib. 4:12) Baibel a yu meim omukro kanamen, yira komb pende ambra komb bol mambnem ka na kes enjip mal yubol meim. Duwom er kane kenem ambra komb bol, mambnem nalmal esmen kanamen. Ala wal ende, angjen man Baibel wes ding ende, ambra komb bol yukes ninda omukro kane, mambnem napaim mal nanam. Enjep Baibel wes puli ger kane, Got ambra komb bol nal bunuman ambrem kanpol tonam. 1 Pita 3:7, a yu paim embe dom, ambra komb “dongal kerma napaim pile enem enjep pilngonam” c E, tadom olom sape napaim​—ye kongan esim mal​—olom enda kaple nanem mo? Ma, embe pisamen kun napaim! Pita yu miro nim omukro kanjin na, Galesia 3:26-29 yu paim omukro pilkane esmen, yira na ambra ai Jises bol min epen kongan king ai enam, padom. Got Yuwom Baibel a meim  mane duwom er kane, ala seno tap karomon ga ambajen man kin mambnem kes mo ka esmen a ne ki sinamen pakeronambe, ambajen man wei pilngo mambnem ka er ngonamen.

ELDA WALEM AMBAJEN MAN PILNGOM MEM NALMAL TANINAM?

Kanka mem seim elda walem, ambajen man weieri pilngom mem taninam, kongrikeisen a angjen man pakerondo karkar ere, ambajen man pilngonam eri. Elda walem ambajen man kongan esim bar, kapane ngom. Elda walem ambajen man pilgnonamen, nalmal taka ninam? Embe enamen wusngam pende omukro kandpe.

Ambajen man kongan esim bar kapane ngom. Elda walem mambnem enam mal aposol Pol taka nim, kane karkar enam. Olom pepe boll kongrikeisen Rom ngom bar, ambajen man pende kongan ka enjip mal, alamb poro monjup bar kapane ngom. (Rom 16:12) Aposol Pol pepe boll kem kongrikeisen a gerjip kunum, ambajen man kawei nalmal pinjip nim pilkane enen mo? Embe ding mal, elda walem ambajen man mambnem ka ere, Johova konganem ka esim bar kapane ngom eri. Yu embe nim bar, ambajen man kongrikeisen kin weieri pilngom ne kapile sangiyo nim. Elda ende yu ka embe mal ne, ambajen man dongal ngonda erkelde pilgi a dongal molo, Johova konganem anjngo enam.​—Prov. 15:23.

Elda walem ambajen man kongan ka pende esim bar, kapane ngonam kunum wal pende esim mal kun nengonam. Nalende embe enam? Ambajen ende kangem Jesika embe nim: “Angjen man, ambajen ende ‘kongan ka erin panim, e yu ka’ nim. Kongan ka ende esmen mal, kun nengom kawei pismen. E embe mal, ngaljen man duwom er ngopo kongrikeisen make paim bar, ami ne kine nemeim mo anj dunglom kele Baibel yu duwom erngom ga, pusi make tumon bar kapane ngom.” Elda walem kongan ka esim mal kun nengom kunum, enjep kongrikeisen tuwalto wal ka ende meimen, kongan ka enam kaple enem nepisim.

 Ambajen man yu nim komol kase pisim. Molmene mem sem elda walem, enjep enjep bunuman ka paim mongse ne napisim. Elda embe mal ambajen man bu paim mal niya nim, ala yu nim kunum komol kase pisim. Embe esim bar, ambajep man kumbol er dongal ere, enjep enjep pake sim eri. Pake nalmal sim? Angjen elda ende kangem Gerando, Betel kongan er meim embe nim: “Na ambajen man ki singe bunuman paim mal neori kenjip, na pakerongo kongan erind woka pum. Ambra komb kongar puli kongan ere, yira komb puli kongan enjip e, ngojup.” Kongrikeisen a ambajen man puli kongan painia enjip, embe pile alamb enjep monjup kulu mand monjup alamb kanpol weironjup. Angjen elda ende kangem Bran embe nim: “Ambajen man mambnem ka na sape pam, kongan puli ere okanaiseisen pakerom. Embe pile, enjep yu boljop meim omukro kane pake sindel!”

Bunuman kapaim elda walem, ambajen man bunuman paim mal yu nim, wamnam komol kase pisim. Nalende embe esim? Elda ende kangem Edward embe nim, “ambajen ende bunuman panda mal yu ninda, angjen ende pakerondo wal min wonom mal kanpol tonda, ala alamb ende pilngo yu ninda. Mambnem embe enda pakero kelde, alamb wandil gosum mem sinda.” (Prov. 1:5) Kunum pende ne elda ambajen bu paim mal ninda karkar nanda, ba olom ambajen e nim bu pam mal neori keren sangiyo, nind paninda.

Ambajen man kongan enam mal duwom erngom. Bunuman kapaim elda walem ambajen man kongan enam mal, duwom ka erngom. Ende embe, Baibel yu neori keram ne makerom bar, nol pam angjen ende namora, ambajen man make kantawol enam mal duwom erngom. Ala ende duwom er ngonambe masin konganem enam mo, kongan enam bar konganem wal meim, nalmal konganem enam mal nengom eri. Embe esim bar kenem okanaiseisen tuwalto tiokretik kongan, gar kolnga tauwum mo gar erka esim bar pakero kongan esim. Ala Betel tuwalto kongan pengem esim angjen man, ambajen man puli duwom er ngonambe kongan jeljel meim enam ne esim. Pende embe mal, kes meim wal erka esim, wal toprom, ku kantawol esim, kompita progrem er tuwal kesim, ala kongan pende esim eri. Elda walem ambajen man kongan duwom erngom bar tanim, ambajen man bol pilgi ne kongan enam kaple enem nepisim.

Ambajen man puli duwom ere sape sim, alamb ende pakerom eri. Ende embe, ambajen man pende konstraksen kongan enam mal duwom er sape sinjip, sip ga pende garjep nolkomb kerma erto kes mokum, ala tauwo erka erngom. Ambajen man pende, alamb puli puwo esim bar, Baibel yu neori keram mal duwom er sape sinjip, ga pende pakerom eri. Elda walem ambajen man kongan enam mal duwom ka erngom bar, enjep nalmal pisim? Ambajen ende kangem Jenipa embe nim: “Na konstraksen ga, Kingdom Gar ende taujup bar kongan erind kunum, kongan tawol erim ye anj dungol kele na duwom ka erngom. Na kongan erind bar pilkane ere, kongan ka enen panim. Na olom bol kongan ai enal kapinj nalerim, olom na kongan enal kaple enem nepim.”

AMBRA KOMB PEMILI AIJEN MAL KANAMEN WAL KA MIN WONDA

Pilgi dongal pam ambra komb kongrikeisen a meim, Johova enjep kanka kanem mal, kenem enjep kanka kanamen! Embe pile, kenem pemili aijep bol mambnem esmen mal, enjep bol enamen. (1 Tim. 5:1, 2) Enjep bol kongan ai esmen bar, kapile kangem kerma simen. Ala enjep kanka kane pakeromon pilkane esim, kawei pismen. Ambajen ende kangem Wenesa embe nim: “Na Johova okanaiseisen a tuwal meibar kapile, sangiyo nind nalenem, pilgi ding angna man yu ka ne, na pakerom bar pilgi wal dongal kolnga sind.” Ambajen ende Taiwan meim embe nim: “Na Johova na olom okanaiseisen sangiyo nind nalenem, ambra komb bunuman paim mal wei pilngo wal kawei mal kanim. Mambnem embe esim bar na pilgi dongal paim, ala Johova okanaisensen a meibar kawei pis eri.”

Pilgi dongal paim Kristen angjen man ambra komb bol, Johova mambnem enem mal esim kunum, olom kawei wei pisa pisem! (Prov. 27:11) Angjen elda ende kangem Benjamen, Skotlen meim embe nim, “mal yemyem porpor yira komb molpum, ambra komb pilngo mambnem ka ernangom. “Embe pile, ambajen man Kingdom Gar a wonam kunum, enjep kanka kane, wei pilngomon nepisam.” Kenem porpor Johova mambnem karkar ere, ambajen man weieri pilngo kanka mem taninamen, embe enamen enjep kapisim.​—Rom 12:10.