1-2. Nal ombun pende Johova bol kamolo, konganem esim ga bol min wonda?

 KENEM nomolpa esmen bar ombun kes mal pende, wamnam min wonda. Pende embe mal, pilgi dongal pam angjen Luis  a kes kenja sim. Dokta oll apal pende molo gorol panim. Monika, adam bol Johova konganem kumbol ngo, kunum puli kele er monjil. Monika pilkane erim, adam elda ende mom okul ere, mambnem kes kongar puli ermom pam. Olivia, ambajen komjil ende mom, garem sikele sepa nijip nalerim, nolkomb kerma kes ende min wonda erim. Olom kepu yem wo kanim, garem tokes mokul sikem. Luis, Olivia na Monika nomolpa enjip bar ombun kes mal wamnam min wom. Nim bol ombun kes mal embe ende, wamnam min wom mo? Johova konganem alamb kameimen ba, alamb porpor bol min wonom wal kenem bol wonom eri. E, ombun duwom kaumon keswos simen eri.

² Ala Got alambem man bol opyem esim alamb, kenem to erkes ere ombun ngonam kauwo, akilgi ninamen eri. Weieri, ombun duwom kaumon Johova kolnarungda, ba kenem pakeronal pane yu dongal dom. (Ais. 41:10) Olom kenem pakerondo kapile meimen mem ambilgi ninamen, wal omuk karonamen, ala ombun kes mal min wonda kunum, Johova bol kameimen mem wak naronamen. Yu duwom pi enamen bar, wusngam 4-poro ombun kenem bol min wonom kunum, Johova kenem pakeronom mal kanamen. Ala kenem nawal pende ere, pakeronda wal ngonom bar pake wei sinamen mal kanamen eri.

JOHOVA NIM KANTAWOL ENDA

3. Ombun kerma ende kenem bol min wonda kunum, nawal pende enamen amin napanda?

³ Ombun kerma ende kenem bol min wonom kunum, bunuman ka  karkar ere, wal omuk karonamen nepismen amin napaim. Nalende amin napaim? Nalenem, ombun kaumon erkelde kumbol ombun keswei si, ngimbil kerma sinamen. Kenem kespil bunuman puli keramen kenem tomene kera. Ala kombkupo kerma ende to emil er pande, kol punamen bar kanpolnaro pumon mal embe panda. Pilgi ding ambajen tal yero yubol tonjin, ombun enjel bol min wom kunum, nalmal pinjil omukro kanamen. Olivia embe nim, “Nolkomb kerma ere na gar toporne sikem kunum, enal wal kanpolnaro bunuman puli kend na tomene wei kem.” Monika, adam olom bol kanamom ambajen embe nim: “Andana na bol kanamom bar keswei pinj, ala kumbol ombun kerma sind. Na kunum dingding ne kongan ere ere erind mal, enal kaple narim. Wal embe mal na bol min nawonda nepinj mal wom. Pilgi ninal kaple narim.” Ombun ende kaupo kenem tomene kerem kunum, Johova nalmal kenem pakeronal pane yu dongal nim?

4. Filipai 4:6, 7 yu paim, Johova nawal kenem ngonal pane yu dongal nim?

⁴ Johova kenem pake nalmal tonda? Olom kenem ngonal pane yu dongal dom wal, Baibel “Got kumbol Amin,” padom. (Filipai 4:6, 7 gere.) Kumbol amin mem panimen e, ombun wonda kunum kumbol na bunuman kine sende, Johova bol seno yero ka monjin mal moramen. Kumbol amin mem Got ngonom pase minto wei pu, alamb bunuman ngonom. Ala kumbol amin mem e, “pase minro punom” kenem pilpol tonamen kaple nanem. Nim kumbol a pile yane ne Johova ngonon kunum bulto, kumbol amin wei sise erin mo? Kumbol amin mem sinen e, “Got bol wonom.”

5. Kumbol amin mem Got bol wonom, kenem bunuman na kumbol nalmal kantawol enem?

⁵ Ding Baibel Filipai 4:7 dom, kumbol amin mem Got bol wonom enem “kumbol na bunuman kantawol enda.” Yu “kantawol” panimen e, ami wal pende ere ere enjip mal pilnijip. E, taun kerma sembar solida walem duwa molo, opyem ga tuwal woninam ne tawol molmolo enjip e, pilnijip. Tawol monjup er kelnge taun tuwalto monjup ga, wur ka papa enjip ala enjep buning meimen ne pilkane enjip nalerim, ami walem taun duwa tawol monjup. Embe ding mal, Got kumbol amin mem kenem kantawol erim dal, kenem kumbol na bunuman kine senda ala buning meimen ne pilkane enamen eri. (Sng. 4:8) Ana bol wal min wom mal, kenem kapismen wal wamnam min nawom dal, kumbol amin moramen kaple enda eri. (1 Sml. 1:16-18) Kumbol amin monjin dal, bunuman ka karkar ere wal omuk karonamen onom panda.

6. Got kumbol amin mem ngonom kenem pakeronda nepinjin dal, nawal pende enamen? (Piksa pra kane.)

⁶ Kenem nawal pende enamen? Ombun ende min wonom kunum, taun a meim alamb ki sinambe geit a meim ye enjep “kantawol” enem mal, kenem pra ki sipe Johova kenem pakero kantawol ka enda. Nalmal kantawol ka enda? Yane  kunum kunum nindel bar Got nim kumbol amin ngonda. (Luk 11:9; 1 Tes. 5:17) Luis, yero yubol tonjin angjen, ambiyem Ana bol pilkane enjil Luis gora oll ipal pende pam kunum, wal pende enambel pam wal ere ombun e, kaujil. Luis embe nim: “Kunum embe mal seim kunum, bunuman ka karkar ere marasin sinamen mo, wal pende enamen amin napaim. Ba yane kunum kunum nijil wal kerma kes pa, kil pakerongo kumbol na bunuman amin sinjil.” Luis ambiyem bol embe nijil, kil yane kumbol a wei pile ne, Johova ki sinjil Johova pile kumbol na bunuman, amin ngongo wal omuk karojil. Weieri enjel pakerom pilkane enjil. Nim ombun ende kauwun dal, yane kunum kunum neJohova ngondol. Embe erin dal, Johova nim kumbol amin mem ngonda erkelde, kumbol na bunuman amin senda.​—Rom12:12.

JOHOVA ERKELDE NIM AKILGI NINDEL

7. Ombun kes mal ende kenem bol min wonda kunum, kenem nalmal pisamen?

⁷ Ombun kerma ende kenem bol min wonom kunum, bunuman ka karkar ere wal omuk karonamen nepismen, amin napaim. Apnol all to woeri paim bar, sip pundo tosi yemyem enem mal, ombun ende wonda kauwo tomene keramen ende wonda eri. Ambajen Ana, yero yubol tonjin embe nim, olom adam Luis gom kunum bulto, bunuman kanem kanem sim. Olom embe nim: “Kunum pende ne nanam wal ei mal kane, alamb ende na pakeronam alamb nameim ne, bunuman puli kele nanam bol wandil sind. Ala adana gol pu sepim bar popol sind eri.” Ala wal ende, Ana nam opinj mei andana Luis wal ere ere erim mal, enal kaple nanem ne popol sim eri. Kunum pende ne, apnol to paim bar tuwal mei nepim eri. Kenem bunuman embe mal sinamen kunum, Johova nalmal pakeronda?

8. Aisaia 33:6 yu paim, Johova nawal kenem bol weieri enal padom?

⁸ Johova wal pende enem. Olom kenem dongal ngondo akilgi ne moramen padom. (Aisaia 33:6 gere.) Sip ende pu apnol kerma tonom bar tuwal pumdal, to kelde boll pel yemyem enda, ombun min wonda mal panda. Embe enda kunum sip ambilgi ne panda ne, pin tal ende er kenjip sip damnem yemyem, se nol menro pu paimbel. Pin tal paimbel e, sip to yemyem enda bar ambilgi nimbel. Embe pile, alamb pasida sip a pum buning pumon ne kapile pum. Embe paim ba, sip kun punom kunum er kenjip paim wal, konganem ka enem. Embe ding mal, kenem bol ombun min wonda kunum, Johova bol pilgi dongal pande kanyem nakele kun punjin dal, olom kenem pakero dongal ngonda.

9. Baibel buk na nus meim kurkane sape sindel, nalmal pakerondo ombun wonda kauwo akilgi nindel? (Piksa pra kane.)

⁹ Kenem wal pende enamen. Nim morol bar ombun kerma ende wonda kunum, pilgi wal enen wakwei narondol, kunum kunum yane ne, kongrikeisen make pu, ala Baibel yu neori kerel. Weieri,  nim komna wal pende ere ere erin mal, endel kaple nanda, ba pilkane endel kenem enamen kaple nanem wal, Johova eiya nadom. (Luk 21:1-4 omukro kane.) Wal ende endel e, pilgi wal dongal morol enge erse, nenem Baibel yu duwom ere, duwom endel yu mane buro yem kel pisel. Nalende embe endel? Johova olom okanaiseisen wusngam a, Baibel yu kaka puli si ombun wonda kunum, kenem kauwo akilgi ninamen ne wal puli er kem meim. Nim yu pende kurkane pake sinal nepin dal, research tools a pu, wal pende er kenjip meim omukro kanjel. Pende embe mal, JW Library^® app, Watch Tower Publications Index, na Research Guide for Jehovah’s Witnesses. Monika, yero yubol tonjin ambajen embe nim, na kumbol ombun si ngimbil sind mem wose kerma punal ne erim kunum, punombolo research tools a wal pende mom omukro kane, bunuman ka sinal ne erind. Ende embe mal, olom yu “popol” sim pane pam omukro kurkanim. Ala kunum pende ne, ende bol “kanamom” pane pam yu omukro kanim. Yu mom kansi pakle kanan ger molo, kumbol amin sise erim. Olom embe nim: “Na yu pulnombolo ger kanal ne erind bar bunuman puli kend, ba kunum puli gerind er kelnge pilkane erind, Johova na wandil si ngunj kangim mal embe pam. Na yu mom gerind kunum pilkane erind, Johova na bunuman jeljel pam mal pilkane ere, pakerom mal pam.” Wusngam embe mal Johova nim pakeronom er kelde, ombun min wonda kunum akilgi ne kumbol amin morol.​—Sng. 119:143, 144.

JOHOVA NIM PAKERONDA

10. Ombun ende kenem bol kanan pamdal, nalmal pisamen?

¹⁰ Ombun kerma ende kenem bol min wonom kunum, bunuman ka karkar ere wal omuk karonamen nepismen amin napaim, ala wimuk ne tomene wei kerem eri. Ye ende resis a muko takma nine erim, ba yipe simbem kes moro muko ninda kaple nanem ye bol ding mal pisamen. Kenem kongan pende onom pange kapile ere ere enjin mal, enamen pesil panda, mo komna kongan pende ere kapil monjin mal kongan enamen ne bunuman dongal napanda eri. Elaija erim mal, kenem akil min wo kolwan punamen pesil pande, wur mongse pamoramen nepisamen. (1 Kin. 19:5-7) Kenem dongal porninda kunum, Johova yu dongal ne nal enal padom?

11. Nal wusngam ende Johova kenem pakeronom? (Buk Song 94:18)

¹¹ Johova wal pende enem. Olom kenem pakeronal pane yu dongal ne kem meim. (Buk Song 94:18 gere.) Resis a muko dom ye simbem kes meim kunum, kipilapil ambilnde pakerondo kol wanem mal, kenem pake si Johova konganem anjngo er punamen. Yipe meimen kunum,  Johova kenem yu weieri nengo embe dom: “Na, Johova nim Gotnom, na nim angel weiro ambir, Na nim nengond, ‘Nim kisal nagoli. Na nim pakeronal.’” (Ais. 41:13) King Depit, Johova bol pake embe mal sim, olom bol ombun pende min wom alamb olom tonam ne enjip kunum, Johova bol embe nim: “Nim angel weiro na pakeronom.” (Sng. 18:35) Johova pake nalmal tonom?

12. Kenem dongal porninda kunum, Johova namal wusngam a kenem pakeronda?

¹² Kunum puli Johova ga pende bunuman si akse, kenem pakerom. Ende embe mal, Depit dongal poringe tomene wei kem kunum, olom senom ye Jonatan wo olom kane, yu ka ne pakero dongal ngom. (1 Sml. 23:16, 17) Embe ding mal, Johova, Elisa wusngam a wal pende ere Elaija pakerom. (1 Kin. 19:16, 21; 2 Kin. 2:2) Yipe kunum, Johova er kelde maiyam ding ga, senomon ga, mo elda walem kenem pakeronam eri. Embe enam ba, kunum pende ne ombun pende min wo erkelde kenem kes pisamen kunum, ga pende bol tapnaro opinj moramen ne pisamen eri. E, alamb porpor mambnem embe esim mal. Pi kenem nal erpe, Johova kenem pakeronda?

13. Kenem kenem nawal pende erpe, Johova pakeronda? (Piksa pra kane.)

¹³ Kenem kenem wal pende enamen. Kenem ombol ere opinj moramen nepismen mem, tomene keramen. Kenem opinj monjin dal, kenem kenem nepile ombun wonom bar mongse buro pisamen, ga pende ne napisamen. Kenem bunuman embe mal ambjin dal, wal pende omukro enamen woka napunda. (Prov. 18:1) Weieri, kunum pende ne, kenem kenem akda moramen nepisamen, e ombun kerma wei ende kenem bol min wonda kunum. Ba, kenem kunum kanan kes akda monjin dal, Johova alamb wusngam a kenem pake sinam ne wusngam erkun erim bar, kenem pake nasinamen. Embe pile, kunum pende ne ombun kes mal min wonda kunum amin napanda, ba nim maiyam ding ga, senonon ga, na elda walem wusngam a, pakeronam bar kapisel. Nim weieri pilkane endel​—Johova ga e, wusngam a nim pakeronom.​—Prov. 17:17; Ais. 32:1, 2.

JOHOVA NIM PAKERO KUMBOL AMIN NGONDA

14. Nal ombun pende min wo erkelde, kenem kisal kes goramen?

¹⁴ Ombun kerma ende kenem bol min wonom kunum. Bunuman ka karkar ere, wal omuk karonamen nepismen amin napaim. Kunum pende ne ombun min wonda er kelde mundmong to kisal kes goramen. Baibel a yubol pende meim, Johova bol kamolo konganem er monjup ga, kunum pende ne alamb enjep bol opyem enjip mo bunuman puli kenjip kunum, kisal golo kanapilpil enjip. (Sng. 18:4; 55:1, 5) Embe ding mal, kunum  pende ne sukul gar, kongan dumam, pemili aijen, mo gapman kenem bol opyem er, erkerambe kisal goramen eri. Mo kes kerma ende min wonda kunum, kenem goramen bar kisal goramen eri. Ombun embe mal kenem bol min wonda kunum, ngal kerei ende pakeronam alamb nameim nepisem mal, embe pisamen. Ba, Johova kenem nalmal pakeronda?

15. Buk Song 94:19 dom, Johova kenem bol nal enal pane yu dongal dom?

¹⁵ Johova wal pende enem. Olom kenem er dongal ere kumbol amin ngonom. (Buk Song 94:19 gere.) Buk Song yu ele paim bar, kenem bu embe mal sinamen, ambel kerei ende emilpal nolkomb kes mal er tonom kunum, mundmong tondo kisal kes golo wur panda kaple nanem. Kenem bu embe mal to pisamen, olom dam galwo olom si kanan kangle semoro wur paim. Nolkomb kerma er tom pornadom, ba dam olom si kanan kangle semeim bar kapile, buning mei ne pisem. Kenem bol ombun kerma ende min wo erkelde mundmong to kisal goramen kunum, Danjen min epen meim ambel kerei dam mambnem enem mal, kenem bol ding mal enda nepisamen. Kenem nalmal erpe, Johova pakero kumbol amin ngonda?

16. Kenem nawal pende erpe, Johova kumbol mem ngonom kenem pakeronda? (Piksa pra kane.)

¹⁶ Kenem wal pende enamen. Kunum puli kele Johova bol se mand punamen​—e, yane ninamen mo Got Yuwom Baibel a meim gernamen. (Sng. 77:1, 12-14) Embe er monjin dal, ombun ende min wonda kunum bunuman yero sinamen, se Danjen min epen meim bar pupo pakeronda nepisamen. Kisal goramen mo bunuman to pisamen wal kun ne, Johova ngonamen. Ala olom Yuwom Baibel a meim nim gerdel bar, pilsindel yu nengondo kumbol amin sindel. (Sng. 119:28) Baibel yu tambem pende meim nim gerdel bar, kumbol amin wei si kisal nagorol. Pende embe mal, nim dongal sindel yu, buk Jop, Buk Song na Provep a meim, ala Jises yu pende Matyu sapta 6 a meim eri. Nim yane ne Johova ngo, Yuwom Baibel a meim gerdel kunum, olom kumbol amin mem wei ngonom pilkane endel.

17. Kenem nawal bol pilgi wei ninamen?

¹⁷ Kenem nomolpa esmen bar ombun kes mal ende min wonda kunum, Johova kenem bol molo, pakeronda ne pilgi wei ninamen. Pilkane enamen kenem opinj ombun nakaumon. (Sng. 23:4; 94:14) Johova yu dongal ne, kenem kantawol enal, dongal ngonal, pakeronal, ala kumbol amin ngonal eri padom. Johova wal pende enem mal, Aisaia 26:3 embe dom: “Alamb nim bol mongse kanim alamb, nim enjep gul enen; kunum kunum enjep kumbol amin ngondol nalenem, enjep nim bol pilgi nim.” Embe pile, Johova bol pilgi ne, endel panda wal porpor eri, olom nim pakeronda. Nim embe erin dal, ombun ende nim bol min wonda kunum, dongal kerma pande kauwo akilgi nindel.