YU DUWOM 5
GOLANG 108 Got Kanka Mem
Johova Kenem Kanka Kanem bar Wal Kaka Puli Sinamen
“Krais Jises alamb monjup bar tuwal wo sin alamb siyem ninal ne wom.”—1 TIM. 1:15.
DUWOM ENAMEN YU KERMA
Jises golo opa erim bar kenem pake nalmal simen, ala Johova bol kapile sangiyo nimen nalmal taninamen.
1. Kenem nawal pende erkelpe Johova kapisa?
NIM KANKA kanen alamb ende presen kawei wei ngonon, ala ngonon wal konganem kapaim enda mal buro pile. Presen ngonon sip boksa tuwal kelse apis nakane konganem narim dal, nim keswei pisel! Ba presen ngonon si kapile sangiyo ne konganem ka erim dal, nim kawei wei pisel. Yu ekin e, Johova Ngangem wal kawei wei mal kem wo kenem nepil gom bar, dingmal paim. Johova presen kawei wei ende kenem ngom e, olom Ngangem kelnge wo golo opa erim bar kenem olom kanka kane, kapile sangiyo ninjin dal erkelpe olom kawei pisa!—Jon 3:16; Rom 5:7, 8.
2. Yu duwom pi enamen bar nawal omukro kanamen?
2 Kongar pende wopunda pundo Johova, Jises presen kawei ende ngom, golo opa erim bar kapile sangiyo nimen mem auwur ninde si wal kerma mal napaksamen. Ba Jises golo kenem toprom bar kapile sangiyo nimen mem pende auro mal ninal ne erim dal, Got presen ka ngom sip boksa tuwal kel pakismen, e kanamen kaple nanem, ala presen ngom konganem ka enamen mal kanpolnaromon eri. Kenem kin wal embe min nawonda nepinjin dal, Got na Krais Jises mambnem ka enjil bar kunum kunum buro pisamen. Yu duwom pi enamen pakerondo mambnem embe karkar enamen. Jises opa erim yipe kenem nalmal pakeronom, ala mibulto pakeronda mal omukro kanamen. Yipe Memoriel min wonda kunum, wakan pende yero na Memoriel porninda kunum wakan bulto, Johova kanka kane sangiyo ninamen mal wal pende enamen mal omukro kanamen eri.
YIPE PAKE NALMAL SIMEN
3. Nal wusngam ende Jises opa erim bar pake yipe simen?
3 Kenem porpor Jises golo opa erim bar yipe pake simen. Ende embe mal, Jises golo opa erim bar, Johova kenem sin porpor wakro sikerem. Lo ende pa olom kenem sin wakronda panadom, ba olom kapile kenem sin wakronom. Buk Song bom ye kapile sangiyo ne golang ende embe bom: “O Johova, nim ye kawei erkun ermolo kin sin wakronon.”—Sng. 86:5; 103:3, 10-13.
4. Alamb namal pile Johova, Jises kelnge wo gom? (Luk 5:32; 1 Timoti 1:15)
4 Alamb pende Johova kin sin wakronda kaple nanem nepisim. Weieri, kenem porpor sin alamb bu embe sinam kun wei paim. Aposol Pol na ye kun namei, alamb “na aposol paninam kaple nanem nepim” eri. Pol yu pende embe nim: “Ba Got kanka mem kerma wusngama erkelde na kongan e sind.” (1 Kor. 15:9, 10) Kenem kumbol to akronjin dal, Johova kenem sin wakronda. Nalende embe enda? Olom kenem kin mambnem embe nanda, ba kenem kanka kane embe erim. Nim pisel na sin alamb mei, Johova na sin wakronda kaple nanem nenapisel, ba Johova Ngangnem Jises kelnge wo golo sin alamb siyem kera ne kem, mambnem dulto enjip alamb siyem keral ne nakem ma. Johova sin alamb siyem keral ne Ngangem kem wo gom.—Luk 5:32; 1 Timoti 1:15 gere.
5. Johova kenem sin wakronda kun paim paninamen mo? Yu bolto.
5 Kenem kongar puli Johova konganem enjin, kenem wandil golo sin wakronda kun paim paninamen kaple nanem. Weieri, Johova kin kamolo olom konganem porpor esmen pilkane ere kapisem. (Hib. 6:10) Olom Ngangem kem wo gom bar kenem presen kawei wei ende ei ngom, kenem Johova konganem enjin bar topum mal nangom ma. Kenem Johova konganem puli esmen bar sin wakronda nepinjin dal, e bu dulto napaim ambsimen, nalenem, Jises golo kenem topro siyem kem wal kerma mal napakle, wal ei mal kanmen embe panda.—Galesia 2:21 yu bol omukro kanjel.
6. Nalernge Pol, Johova konganem kumbol weingo ombol ere erim?
6 Pol Johova kongan kumbol weingo ombol ere erim, ba Johova olom sin wakronda kaple nanem nepim. Embe pamba, nalernge Johova konganem kumbol weingo erim? Johova, Pol sin wakronda ne konganem narim, ba Johova, Pol kin mambnem ka na wandil mem tanim bar sangiyo kerma tane Johova konganem erim. (Efe. 3:7) Pol erim mal, kenem Johova konganem kumbol weingo esmen bar sin wakronda nepil nasmen, olom mambnem ka erim bar kanka kane sangiyo mem tane ne Johova kongnem esmen.
7. Jises golo opa erim bar nal wusngam ende kenem yipe pake simen? (Rom 5:1; Jems 2:23)
7 Wusngam ende kenem yipe pake simen e, Johova bol senon semand wei pumon. a Yero yu duwom enjin bar nim mal, kenem manjin kangim kunum Got kin senanonjin. Ba Jises golo opa erim bar kenem se Johova bol mand pu, kapile “olom bol kumbol amin meimen.”—Rom 5:1; Jems 2:23 gere.
8. Kenem yane ne Johova ngonamen kaple enem bar, nalende kapile sangiyo kerma ne olom ngonamen?
8 Wusngam kawei wei ende kenem Johova bol senon semand punamen e yane wusngama—embe enamen mal wusngam ende omukro kanamen. Johova alambem man kin kongrikeisen maka mo ga pende kin molo yane nimen Johova mongse napisem, ba kenem kenem molo yane nimen pisem eri. Yane erkelde kenem kumbol na bunuman amin senda, ba e mongse ma, yane nimen wal pende enem eri. Wal ende Johova bol senomon mem erdongal wei enem eri. (Sng. 65:2; Jems 4:8; 1 Jon 5:14) Jises ya mala mom kunum yane kunum kunum nim, nalerim, olom pilkane erim yane nim Dam komol sepim, ala Dam bol senom mem erdongal erim. (Luk 5:16) Jises golo opa erim bar kenem kawei pile sangiyo kerma wei nimen, nalenem, kenem Johova bol senon yane wusngama Olom bol yu nimen!
MIBULTO KENEM PAKE NALMAL SINAMEN
9. Jises golo opa erim bar pilgi ne Johova lotu erngom ga, mibulto pake nalmal sinam?
9 Jises golo opa erim bar pilgi ne Johova lotu erngom alamb, bulto pake nalmal sinam? Johova enjep kol aimanj mem ngonda. Alamb puli yu e pilgi ninam kaple nanem, nalenem, kongar tausen tuwalto alamb puli kunum kunum gosum. Ba Johova kenem alamb kol aimanj aimanj moramen ne ersem. Adam sin nanange dal, alamb porpor kol aimanj aimanj morange. Yipe kunum kol aimanj aimanj moramen kaple nanem paninamen, nalenem, Johova topum kerma wei paim wal kawei wei ende kenem ngo topro siyem kem—e Ngangem Jises kolmem ngo gom bar kolapise kem pile, kenem weieri kol aimanj aimanj mem sinamen kaple wei enem.—Rom 8:32.
10. Got oiro sim ga na sipsip dulom ende nawal ende sinamen ne, kui esim?
10 Weieri, kol aimanj aimanj mem mibulto sinamen, bar Johova yipe kunum kenem buro pilkane enamen nepisem. Got oiro sim ga semin epen pu Jises bol kongan king ere, mal tawol enam ne kawei wei pile kui esim. (Rev. 20:6) Sipsip dulom ende ombun duwom na nganj ngimbil paim porninde, mal wose Paradais pundo kawei wei pilmoramen ne kui esim. (Rev. 21:3, 4) Sipsip dulom ende ya mala kol aimanj aimanj moram bar, nim pra tuwal ele moral ne kui enen mo? Epen punam ga na ya mala moramen ga, kenem topum dingmal wei sinamen! Johova kenem alamb ya mala kol aimanj aimanj moramen ne ersem, embe pile kunum kunum kaeri pilmoramen.
11-12. Mala Paradais senda bar nim nawal kawei wei pende sinal ne, kui enen? (Piksa meim pra kane.)
11 Mala Paradais sende morol mal buro pile. Kunum ele keswos si gosmon mem bunuman min nawonda, porwei nesikera. (Ais. 25:8; 33:24) Wal kaka ende sinamen ne buro pismen, Johova weieri ngo kaple enda. Kunum ele nim nawal duwom ere sape si kanpoltonal nepisen? Tukong na koika mambnem aijep duwom erkanal nepisen mo? Tambal musik tom mal duwom erkanal nepisen mo? Wal dro esim mal duwom erkanal nepisen mo? Pilkane esmen, Paradais senda bar gar dro enam ga, taunam ga, na penegar nalmal taramen duwom erngonam. Weieri, ende pakeronambe wal erkun enamen, pende embe, mokun erkun enamen, kongan wal erkun enamen, ala nomolpa enamen bar wal ombom ere erkelpe kulu kawei senda. (Ais. 35:1; 65:21) Kol aimanj aimanj kunum kanan wei morol erkelde wal embe endel, ba endel kongan puli keswei mol spenda!
12 Gonjup alamb paim akil wonambe, kawei wei pile jebenware nesinamen! (Apo. 24:15) Johova wal puli wei erkem min kupula na ya mala meim, duwom erkane olom bol kawei wei pisel mal buro pile. (Sng. 104:24; Ais. 11:9) Ba wal kerma wei ende paim, kunum ele kenem sin nanamen, embe pile Johova na sin wakra ninamen konganem napanda, olom kin kamolo konganem enamen! Embe pile Paradaisa, kol aimanj morol si wal eimal pakle, mambnem kes ere “kunum apal eri kapisam” ne esim mal endel mo? (Hib. 11:25) Mawei! Mibulto topum kaka sinamen pase minro wei pu, yipe kunum wal simen e ngonom. Pilkane endel Paradais mibulto min wonda ne kui mongse nasmen, ba yipe kunum meimen bar Paradaisa weieri tuwal mei nepisel. Johova kenem kanka kane Ngangem kem wo gom bar, kol apise kerem pile kenem wal kaka embe sinamen!
Paradais senda bar nim wal kaka pende enal ne kui enen? (Paragrap 11-12 paibel kane)
JOHOVA KANKA MEM TANIM BAR KAPILE SANGIYO NINDEL
13. Johova kenem kanka mem tanim bar kapile sangiyo mem, nalmal taninamen? (2 Korin 6:1)
13 Johova Ngangem kem wo golo opa erim bar, kenem kapile sangiyo mem nalmal taninamen? Nomolpa esmen bar olom konganem si ngimba kele, enamen wal kerma wei paim. (Mat. 6:33) Nalenem, Jises alamb porpor pakeronal negom, “embe pile alamb enjep enjep kapisim mal karkar nanam, ma. Enjep dumam si golo ala akim ye kapisem mal karkar enam.” (2 Kor. 5:15) Johova kenem kin mambnem ka ere sin wakrom. Embe pile kenem enamen pande wal porpor ere, olom kenem kin wal kerma wei erim kanpolto, weieri pilngo sangiyo mem tane olom konganem kapile kumbol weingo enamen.—2 Korin 6:1 gere.
14. Kenem pilgi ne Johova wal eiya ne kolta dom, nalmal karkar enamen?
14 Johova kenem kanka kanem pile, olom kolta dom bar pilgi ne karkar enamen. Nalmal embe enamen? Kenem wal pende enamen nepismen bar omuk karonamen, pende embe, kenem sukul nepu jebar wulom enamen, ala nal ku kongan ende kansi enamen, na wal kerma wei ende Johova kenem nal enamen nepisem pra omukro kanamen eri. (1 Kor. 10:31; 2 Kor. 5:7) Kenem wal omuk karo Johova kin pilgi paim mal konganem enjin dal—Johova kin pilgi ne senomon mem dongal wei panda. Kol aimanj mem sinamen ne kui esmen dongal pande, weieri sinamen nepisamen.—Rom 5:3-5; Jems 2:21, 22.
15. Memoriel panda kunum kapile sangiyo nimen mem, nalmal taninamen?
15 Johova kenem kanka kanem bar kapile sangiyo nimen mem, wusngam ende taninamen eri. Jises golo kenem toprom bar kapile sangiyo mem taninamen e, Memoriel yipe min wonda bar taninamen. Memoriel punamen ne erkun enamen kunum, alamb pende wiropo wonam ne enamen. (1 Tim. 2:4) Memoriel wonam ne wironon alamb, wal ele min wonda mal yero nengopo pilkane enam. Jw.org a vidio ende kangem Jises nalernge Gom? na Jises Gom Kunum Min Wonda Buro Pisamen pane paibel keli kanam. Elda walem pilgia wal dongal nameim ga, pra wironambe wonam eri. Johova sipsip aiyem setai pujup ala seyem wom kunum, ya mala na min epen kapisim mal buro pile! (Luk 15:4-7) Memoriel kunum pilgi ding angjen ambanjen man mongse jebenware nenasinamen, ba alamb kolnga na make kanan wei nawonjup ga wonam pra jebenware nesinamen eri. Erkelpe kapile moram!—Rom 12:13.
16. Nalende Memoriel min wonda kunum, Baibel yu neori kesmen kongan puli enamen?
16 Memoriel min wonda mand enda kunum yero na porninda kunum bulto, Baibel yu neori kele Johova konganem pende puli enal nepisen mo? Embe enamen e wusngam kawei ende, nalenem, Got Johova na Krais Jises kenem bol mambnem ka enjil bar kapile sangiyo tanimen. Johova konganem puli enamen erkelde, olom kenem pake nalmal tonom pilkane enamen, ala olom kin pilgi nimen mem wose dongal punda. (1 Kor. 3:9) Memoriel Kunum Baibel Gernamen ne Dei Teksa mo Kristen Baibel yu neori kesim kongan na make buka kenjip meim ger kanamen. Wal pende duwom erkanjel mal Baibel wes kenjip meim, nem Baibel gere duwom mane ere omukro kanjel.
17. Nawal erkelde Johova kapisem? (Boksa “ Johova Kin Kapile Sangiyo Mem Wusngam Pende Tanindel” pane paim kanjel.)
17 Weieri, nomolpa esmen bar wal pende erkelde, Johova konganem puli enamen ne yubol tomon mal erkaple nanamen. Pilkane endel, Johova nim kongan enen ga ende esim bol omuk naronom; ba nim olom kanka kane konganem enal nepisen mal olom pilkane enem. Johova, Jises presen kawei wei ende ngom golo opa erim bar nim kumbola weieri pilngo kapile sangiyo don, olom pilkane ere kapisem.—1 Sml. 16:7; Mak 12:41-44.
18. Nalende kenem Johova na Jises Krais kin kapile sangiyo mem taninamen?
18 Jises golo opa erim bar kenem sin wakronom, Johova bol senon semand pu, ala kol aimanj aimanj mem sinamen kaple enem eri. Johova kenem kanka kane wal kaka puli kenem kin enda bar, kapile sangiyo mem kerma wei kunum kunum taninamen. (1 Jon 4:19) Jises kin pra kapile sangiyo mem kerma wei taninamen, nalenem, olom kenem kankawei wei kane kolmem ngo golo kenem topro siyem kem!—Jon 15:13.
GOLANG 154 Kanka Mem Porwei Naninda
a Johova Kristen-komna monjup Jises wo golo opa narim kunum, enjep sin enjip Johova yero wakrom. Johova embe erim, nalerim, Ngangem olom bol kamol pu gora pam pilkane erim. Embe pile Got dungola Jises golo opa enda mal, yero wei opa ere sikele sin enjip ga, enjep sin wakrom mal embe kanim.—Rom 3:25.
