1-2. Nal wusngam Kristen ende, gar stori puli kes tause mi kupula pu kerambe paim mal embe mora? (1 Korin 15:58)

 KONGAR 1978 kunum,Tokyo Jepen tuwalto gar ende stori 60-poro mom tause epne min kupula wei punjip. Gar e, kanjip alamb komb kopo kerma tonda kunum, nalmal akilgi ne panda ne pinjip? Ba, wal ende okul pam enjep pilkane najip, gar e, disain enjip ga komb kopo tonda kunum olop enda ba, akilgi ne panda ne kane enjip. Kristen ga yipe meim gar olwal tause epne kupula pum bol ding mal embe meim. Nalmal embe meim?

² E, Kristen ende mora bar ombun min wonda, ba kauwo akilgi ne bonaronda. Olom kunum kunum akilgi ne Johova bol ka molo, lo aiem karkar enda wal kerma paim. (1 Korin 15:58 gere.) Olom “er kun er molo yu karkar ere,” to nakerem. Ala “mem ka” pande olom er kun er molo, ende bunuman paim mal karkar enem. (Jems 3:17) Kristen ende bunuman ka paim, wal paim mal kun enem olom olom ka pisem mal nanem, ala ende ka pisam ne nanem eri. Yu duwom pi enamen bar, nal kunum kenem akilgi ne moramen mal kanamen. Kenem Johova bol akilgi ne ka meimen bar Satan wusngam 5-poro karkar ere, to kes moksal ne enem mal omukro kanamen.

3. Aposel 15:28, 29 a, Molse Ngimba pu Lo Ngom Ye, nal lo pende ngom meim kenem karkar enamen?

³ Johova Molse Ngimba punom ye Lo Ngonom kun paim, ala olom alambem man pilpolto karkar enam. (Ais. 33:22) Ende embe mal, komna-Kristen kunum gapening-bodi monjip wusngam talende Kristen walem kanpolto akilgi ne moram mal neori kenjip: (1) got gend lotu er nango, Johova mongse lotu er ngonam panijip, (2) Johova lo ngom maiyam wal kerma paim kanpol tonam panijip, ala (3) Baibel yu dom karkar ere, pasdia esim mem tuironam panijip. (Aposel 15:28, 29 gere.) Kristen  yipe meim wusngam talende nalmal akilgi ne karkar enam?

4. Kenem nalmal ere Johova dingeri lotu er ngonamen? (Revelesen 4:11)

⁴ Kenem got gend lotu er nango, Johova dingeri lotu er ngonamen. Olom Israil ga nengo na dingeri lotu er ngonam panim. (Lo 5:6-10) Ala Kip Kes Satan, Jises na lotu ernga nim kunum, Jises ne penema kem kenem Johova ding eri lotu er ngonamen panim. (Mat. 4:8-10) Embe pile, lotu ga pende ond ku na wal pende er moklo got pane lotu er ngom, kenem embe nasmen. Ala alamb got mal lotu er nangomon eri—e, alamb embe mal, lotu pengem esim alamb, polotik ye nom walem, spot enambe kangem kerma paim ga, mupi ekta walem, ala tambal musik tonambe kangem kerma—paim ga pra. Kenem Johova bol ka molo “wal porpor ersem ye” mongse lotu er ngomon.—Revelesen 4:11 gere.

5. Nalende Johova lo ngo maiyam kenem kol meimen bar, wal kerma paim panim yu karkar esmen?

⁵ Johova lo ngo maiyam kenem kol meimen bar, wal kerma paim panim yu karkar esmen. Nalende embe esmen? Nalenem, Johova nim maiyam kenem kolmem e, wal kawei ende olom ngom. (Wkp. 17:14) Ala komna kunum Johova alamb, tu kong tokoi nonam kunum maiyam wei nanoya nim. (Stt. 9:4) Ala Mosis wusngama Israil ga Lo ngom bar, yu embe ding mal nim eri. (Wkp. 17:10) Ala Komna gapening-bodi wusngama Kristen walem kanpolto “maiyam . . .tuironam” panim eri. (Apo. 15:28, 29) Kenem kes tondo ausik pumon kunum lo e, karkar ere alikgi ne maiyam nasinamen panimen. b

6. Kenem nalmal er Johova lo kerma pende kem meim, nomolpa esmen bar ombol ere karkar enamen?

⁶ Kenem nomolpa esmen bar, Johova lo kerma pende kem meim kunum kunum karkar wei enamen. (Hib. 13:4) Aposol Pol kenem alamb poro pilkane esmen yu ende konganem ere, enem mambnem kes enam nganj tambem ende panda porpor “to golo” si keiya nim—e, kenem mambnem kes enamen bu ende min wonda to porne sikeramen e, pilnim. Kenem wal ende enamen mo kanamen bar, pasida enamen mambnem si tuwal punda kane, tuironamen. (Kol. 3:5; Jop 31:1) Kenem mambnem kes enamen bunuman ende min wom dal, wamnam tuiro, Johova bol seno ka meimen mem to kes namoksamen.

7. Kenem nawal ende enamen ne, bunuman dongal panda, ala nalende embe enamen?

⁷ Johova ka pisem olom yuwom kem paim bar enem menro meim, “kumbol ngo karkar enam.” (Rom 6:17) Olom kunum kunum wal ende eiya dom kapaim, kenem pakeronda nepil dom, embe pile, olom lo meim to nakeramen. (Ais. 48:17, 18; 1 Kor. 6:9, 10) Buk Song bom ye erim mal, kenem ombol wei ere, er kelpe Johova ka pisa ne esmen. Buk Song bom ye embe nim: “Na yu dongal ne nim lo kunum kunum karkar er pu golno, porninda panind.” (Sng. 119:112) Ba, Satan er kelde kenem akilgi ne mambnem embe karkar enamen kaple nanda ne enem. Ba olom nal wusngam embe enda?

8. Kenem Johova bol akilgi ne ka moramen ne esmen bar, Satan nalmal er kelde alamb kenem to er kes esim?

⁸ Kenem to er kes enam. Kip Kes Satan er kelde alamb kenem tonam mo yu omblombol ninam bar, Johova bol akilgi ne ka meimen mem wakro sikeramen ne enem. Olom tu laion ende wi kerma ro, alamb “to nonal” ne kurnom mal embe enem. (1 Pita 5:8) Kristen komna Jises gom kunum bulto monjip, alamb enjep yu ngojip, tonjip, pende to gonjip nalerim, enjep  Johova bol akilgi ne ka monjip bar embe enjip. (Apo. 5:27, 28, 40; 7:54-60) Yipe kenem kunum alamb to er kes mambnem, Satan anjngo konganem enem eri. Ombun embe mal yipe weieri min wonom e, kenem pilgi ding angjen ambajen man kantri Rasiya meim, to er kes wei esim. Ala angjen ambajen kantri pende mol pum bar, wusngam kanem kanem karkar ere, to er kes esim eri.

9. Wal ende okul er pa er kelde Johova bol ka meimen mem, to kes moksa mal yu bolto.

⁹ Wal ende okul er pa Johova bol kameimen mem to kes moksa. Satan “mambnem gend” pende karkar ere kenem to kes moksal ne enem. Ba, wal pende penema er kelde kenem tom eri. (Efe. 6:11) Pilgi ding angjen ende kangem Bob bol wal min wom mal, omukro kanamen. Olom pu ausik pande nganjsa kerma kopisnam pam. Olom dokta aiem man nengo na maiyam weieri nasinal panim. Olom kopisnam dokta kaple panijip. Ba kinimba kopisnam kunum emilpal pemili aiem se gar pu sepjip kunum, dokta ende wo Bob kane embe nim, kin nim maiyam nangonamen ba, ei tu mand senamen, nalenem, ende ambsik wei panda nakanamen. Dokta embe nepim, Bob pemili aiem mand nameim kunum, olom bunuman kol si maiyam kaple paninda nepim. Ba Bob, Johova bol ka mom mem ambilgi ne, wal nawal ende min wonda maiyam kembis wei ende nasinal panim.

10. Nalende alamb ka paim ne esim wal kenem ombun ngonda? (1 Korin 3:19, 20)

¹⁰ Johova lo karkar nasim alamb bunuman aijep. Kenem alamb wal omukrom mal tonjin dal, Johova lo aiem karkar nanamen olom wakronamen eri. (1 Korin 3:19, 20 gere.) “Mala sape Got dungola wal dall mal embe paim,” embe pile kunum puli karkar esim ga kunum puli Got yu to kesim. Kristen ipal pende kongrikeisen Taiataria na Pergamum monjip got gend lotu er ngo pasdia mem tuwal punjip bar, enjep pra tuwal punjip. Embe pile, enjep pilsinam yu ombolombol Jises ne kongrikeisen tal e, ngom. (Rev. 2:14, 20) Yipe kenem kunum pra, alamb kenem bol mand meim alamb er kerambe mambnem kes karkar enamen ne enam eri. Pemili ga mo tapromon ga, kenem Johova lo karkar esmen to keramen ne enam. Pende embe ninam, Baibel kombe bonjip buk Yuwom yipe karkar endel wal kerma napaim paninam.

11. Kenem Got bol akilgi ne ka meimen kunum, nawal ende kanpol tonamen?

¹¹ Kunum pende Johova kenem wal eiya ninda kun napaim ne pisamen. Ala wal pende min wo kenem pilgi er kanal ne enda er kelde, “Baibel yu to nakeiya dom to keramen ne pisamen.” (1 Kor. 4:6) Lotu pengem enjip ga Jises kunum monjip, Got Lo mom bar enjep-lo pende bol tuwal kenjip. Embe enjip bar alamb ombun kerma ngonjip eri. E, sin enjip pile enjep kisal gonjip. (Mat. 23:4) Johova Yuwom Baibel a meim na olom okanaiseisen wusngama, kenem wal enamen mal yu kun wei ne ngonom. (Prov. 3:5-7) Embe pile, olom yu ne ngonom bar, kenem kenem yu pende ne tuwal keramen kun napaim, ala Baibel yu meim bar kenem kenem-yujon pende ne tuwal nakeramen mo alamb enjep enjep omukronam wal lo napaksamen eri.   

12. Satan nalmal er kelde “mala sape paim alamb yu gend nim, pilgi ninam ne enem”?

¹² Alamb sape na bunuman gend. Satan er kere “mala sape” na “alamb bunuman gend kerma” paim karkar ere, kumbol ding namoram ne enem. (Kol. 2:8) Komna Kristen monjip kunum Juda alamb enjep enjep sape pam mal, duwom er alamb ngo Baibel yu to kenjip. Ala Kristen Mosis Lo karkar enam pane paim yu to kenjip eri. Mambnem gend embe enjip er kelnge alamb yu gend karkar ere, Johova bunuman ka weieri pam Ye bol yu wom to  kenjip. Satan yipe kenem kunum, nus na intanet wusngama, gapman polotik ye nom walem alamb pakeronam pane yu gend ne waidom. Kes COVID-19 tom kunum, kenem yu embe mal puli pinjin. c Yu gend embe mal pile karkar enjip ga ombun puli kaujup, ba, Johova Witnis ga kenem okanaiseisena yu kaka wom, pile karkar enjip enjep pakerongo ombun tuirojip.—Mat. 24:45.

13. Nalende anj dunglom puli sinda wal kanpol tonamen?

¹³ Bunuman kanem kura wal. Kenem “wal kerma paim wal” kanpol tonamen. (Fili. 1:9, 10) Wal ende kenem bunuman kankum dal, anj dunglom puli keramen, pakeronda wal kerma paim nanamen. Nomolpa esmen bar kunum kunum esmen wal embe mal—mokun nomon, nol nomon, kapisamen wal pende esmen ala kongan esmen eri—wal embe mal nomolpa esmen bar si kerma pakjin dal, kenem bunuman kankura. (Luk 21:34, 35) Ala wal pende kunum dingding ne, alamb gapman bol opyem esim, polotik bol wal min wonom mal nus pismen eri, yu embe pismen bar kankelpe kenem bunuman kannem nakura. Kannem komdal, kumbola na bunumana ende bol kapisamen, ende bol kanapisamen. Satan wal porpor e, konganem ere kenem Johova bol akilgi ne, ka meimen mem to kes moksal ne enem. Kenem nalmal ere Satan mambnem embe enem, tuiro akilgi ne moramen mal omukro kanamen.

14. Nawal ende kenem pakerondo akilgi ne, Johova bol anjngo ka mol punamen?

¹⁴ Johova bol yu dongal ne nol panin buro pisel. Nim embe erin nalerim, Johova bol ka moral nepil erin. Ala nawal nim pakerongo yero yu wei kansind ne pin mal pisel. Nim sape dulto sin pakerongo, Danem Johova min epen meim bol kanpolto, kanka kane olom bol molmene ken. Ala nim pilgi er dongal ernge, nim kumbol to akron eri. Nim kumbol er kelnge mambnem kes porpor tuiro, Got kapim mambnem karkar erin. Ala Got nim alla wakrom pilkane erin kunum, nem kawei wei pin. (Sng. 32:1, 2) Nim pulnombol Kongrikeisen make won, ala wal  kaka duwom er kanin, yu bolto alamb ende ngonon eri. Pi nim Kristen ende Johova bol yu dongal ne nol pa siken pile, kolmem aimanj sindel wusngam karkar er punon. Bunuman dongal pande karkar er punon wusngam, wak wei narondol.—Mat. 7:13, 14.

15. Nalende Baibel yu duwom ka ere, buro yem kel pisamen bar pakeronda?

¹⁵ Got Yuwom Baibel a meim duwom ka ere, ala buro yem kel pisamen. Ond ende dumblom se mur wei pum dal, akilgi ne dongal panda. Embe ding mal, kenem Baibel yu duwom ere, Johova bol pilgi nimen mem kumbola dongal pam dal, olom bol akilgi ne dongal moramen. Ond bol kerma wei enem kunum, dumblom se mal menro wei pu, se yemyem punom. Kenem Baibel yu duwom ere buro yem kel pismen pakero, pilgi er dongal ende, Got wal ende eiya dom kun paim ne pismen. (Kol. 2:6, 7) Johova alambem man komna monjip wal enam mal yu nengo, kangip ka ngo, kantawol ere pakerom mal buro pisel. Ende embe mal, Esikel wur kubanj mal kanim bar, tempol gar taunam mal enjol ende su kawei sem kanim. Wur kubanj mal kanim Esikel dongal wei ngom, ala kenem pra duwom esmen mambnem dulto karkar ere, Johova lotu er ngonamen mal pilkane esmen. d (Ese. 40:1-4; 43:10-12) Kenem anj dungol kele Got Yuwom dongal meim, mane duwom ere pilyem kele pismen bar, pake kerma simen eri.   

16. Bob kumbol dongal pange akilgi nim mem, olom nalmal kantawol erim? (Buk Song 112:7)

¹⁶ Kumbol dongal mem sindel. King Depit, Johova kanka kanim mem dongal pange, golang embe kem: “O,  Got na kumbola nim bol pilgi dongal paim.” (Sng. 57:7) Kenem pra Johova bol pilgi wei nijin dal, kumbol dongal panda eri. (Buk Song 112:7 gere.) Yero yu bol tonjin bar pilgi ding angjen Bob, mambnem embe karkar erim bar, olom nalmal pakerom omukro kanamen. Dokta olom nengo nim maiyam nangonamen ba, ei tu mand senamen nalenem, ende ambsik wei panda panim. Embe nim kunum olom embe enam pam dal, na ausik sikele wamnam sepnal panim. Bulto Bob embe, “Na maiyam nasinal panind bar akilgi ne molo, nawal min wonda bunuman puli nakend.”

17. Bob mambnem erim bar kenem nawal duwom esmen?

 ¹⁷ Bob akilgi wei nim nalerim, yero wei olom maiyam nasinal ne bunuman dongal pange, bulto kes min wongo ausik pum. Mem talende pange olom akilgi nim. (1) Er kelne Johova ka pisa ne pim. (2) Kenem kol meimen bar maiyam nalmal wal kerma pam, Baibel na Baibel-buk na nus a yu mom, mane ne duwom er kanim. Ala (3) Johova yu dom na lo paksim karkar enal bar, topum kaka puli sinal ne pim. Kenem pra nal ombun ende min wonda, kumbol dongal pande akilgi ne Johova bol ka moramen kaple enem.

18. Barak bol wal min wom, kenem nalmal duwom er ngondo Johova bol pilgi ninamen? (Garwom oriro ngimba piksa kane.)

¹⁸ Johova kin pilgi nindel. Barak Johova bol pilgi ne nim yu karkar erim bar, wal ka min wom omukro kanamen. Kunum ele Israil ga opnganmal enam ne er kun er namonjip, opnganmal wal nasem eri. Ba, Johova Barak nengo, pu Kenen ami ye nom Sisera opnganmal wal puli-kannom ami aiem man bol nganmal endel panim. (Het. 5:8) Amb propet Debora Barak nengo semene tupam sembar pu, Sisera 900 karis bol wonom kansi nganmal endel panim. Mal tupam sembar karis puli muko ne wo, Israil ga bol opo enam enjep to yem keram kaple narim. Barak e, pilkane erim ba, nim yu pile karkar er pum. Barak ami walem bol min Komngom Tabo monjip mene punjip kunum, Johova er kelnge komb kerma weirom. Sisera ami bol karis si muko ne wonjip, sibem nolrol dange punam kaple narim. E, Johova er kelnge Barak opnganmal karongo win erim. (Het. 4:1-7, 10, 13-16) Embe ding mal, Johova okanaiseisen wusngama kenem wal enamen mal yu ne ngonom pile karkar enjin dal, pilgi dongal pande ombun min wonda kauwo akilgi ne, tomene keramen.—Lo 31:6.

19. Nalende nim anjngo akilgi ne moral ne pisen?

¹⁹ Yipe mambnem kes pikrom bar meimen kunum, akilgi ne Johova bol ka moramen ne pismen mem, opnganmal mal, ere anjngo ambilgi ninamen. (1 Tim. 6:11, 12; 2 Pita 3:17) Alamb kenem to er kes enam kunum, wal ende okul pa Johova bol ka meimen mem to kes moksal ne enda kunum, Johova lo karkar nasim alamb bunuman aijep, alamb sape na bunuman gend, ala bunuman kannem kura wal. (Efe. 4:14) Wal embe kenem bol min wom dal, Johova bol ka meimen mem waknaro akilgi ne moramen. Olom lotu erngo kanka kane, lo aiem karkar esmen ambilgi wei ninamen. Ala bunuman ka karkar enamen wal kerma paim eri. Yu duwom bulto enamen bar, Johova na Jises bunuman ka nalmal karkar esbel mal omukro kanamen.