1. Kristen walem nal wusngam karkar er ond mal moram? (Piksa pra kane.)

 “OND ende ek ninda kaple enem ond, pop ro buko ninda kaple nanem.” Yu embe nimen bar mambnem kerma ende taninde pilkane esmen, ek ninda kaple enem ond pop kerma ronda kunum, to buko naninda. Kristen pilgi wal ka moramen ne pinjin dal, ond ek dom mal embe molo, nomolpa esmen bar ombun duwom ende min wonda kunum, kauwo Johova konganem kapile anjngo enamen. Nalmal embe moramen? Kenem nomolpa esmen bar wal ende min wonda kunum, bunuman ka karkar ere, ala ende bunuman panda mal, wal enam paninam bar molmene keramen eri.

2. (a) Nal mambnem kenem pakerondo, nomolpa esmen bar wal ende min wonda er kun enamen? (b) Yipe yu duwom enamen bar nawal omukro kanamen?

² Johova konganem alamb meimen pile, bunuman ka karkar enamen. Ala molmene kele ende bol wandil mem taninamen. Yipe yu duwom enamen bar mambnem embe mal, Kristen pende nalmal pakerongo nomolpa enjip bar, wal pende min wongo er kun enjip mal kanamen. Ala mambnem ka embe mal kenem nalmal pakeronda mal kanamen eri. Ba, yero Johova na Jises bunuman ka karkar kawei esbel mal duwom er kanamen.

3. Johova bunuman ka karkar enem nawal taninde pilkane esmen?

³ Johova “Komb Ku Kerma” panimen nalenem, olom akilgi ne dongal meim kulko nanem. (Lo 32:4) Embe meim ba bunuman ka karkar enem eri. Yipe ya mala mambnem wose kes punom kunum, kenem Gotjon akilgi ne molo, olom enal panim wal weieri er kelde min wonda ne pisem. Johova olom mom mal kenem alamb ersem, embe pile, kenem nomolpa esmen bar wal pende min wonom kunum, olom mambnem enem mal kenem enamen kaple enem. Olom kolta ninda yu Baibel kem meim kenem pakerondo  nal ombun ende kenem bol min wonda, bunuman ka karkar er ombun kaunamen kaple enem. Johova olom mambnem enem bar na, kenem kolta ninda yu Baibel a kem meim, taninde pilkane esmen, Johova “Komb Ku Kerma” mal meim ala bunuman ka karkar enem eri.

4. Johova bunuman ka karkar enem mal yubol ende to. (Wok Pris 5:7, 11)

⁴ Johova wal enem bar mambnem dulto na bunuman ka karkar enem. Olom alamb kin mambnem amin ere, enam kaple nanem wal eiya nadom. Johova Israil alamb bol mambnem ka karkar ere, wal erim mal omukro kanamen. Enjep opa enam bar konbelnge moram mo wal kannonam opa ding mal ngonam pananim. Kunum pende ne alamb opa ngonam kaple enem wal ngoya nine erim.—Wok Pris 5:7, 11 gere.

5. Johova molmene na alamb wandil mem tanim mal yubol to.

⁵ Johova molmene kele alamb wandil si mem er kelnge, bunuman ka karkar erim. Ende embe mal, Sodom alamb mambnem kes er monjip to porinal ne erim kunum, molmene kele alamb wandil sim mem tanim. Enjol walem wusngama mambnem dulto karkar erim ye Lot nengo, ke pu semin kimbema panim. Lot se ele punda kisal golo, na pemili aina bol se tawun Jora sem bar punamen kaple ma nim? E, tawun kerei ende Johova tokes moksal ne pim tawun. Johova, Lot na nind yu mongse karkar endel paninda kaple erim. Ba, olom embe narim Lot bunuman pam mal karkar ere, se tawun Jora pane to kes namokum. (Stt. 19:18-22) Kongar andet pende bulto, Johova wandil mem tawun Ninipe alamb bol tanim. Olom propet Jona kelnge pu, Ninipe alamb mambnem kes er monjip na tawun aijep to porninda pa neori kem. Ba, Ninipe alamb kumbol to akrojip kunum, Johova enjep bol wandil si tawun aijep to kes namokum.—Jona 3:1, 10; 4:10, 11.

6. Jises dam Johova bunuman ka karkar ere, wal pende erim mal yubol to.

⁶ Jises dam Johova bunuman ka karkar erim. Got olom kelnge ya mala wom, “Israil ga sipsip mal tai pu monjip” yu ne ngonal ne wom. Ba, olom wo kongan erim bar bunuman ka karkar erim kunum ende Israil amb-ma, amb jel ende wo Jises ki si, na ambilna “kip kes ende tuwal pu tawol erinde kanameim” pakera nim. Jises wandil kerma sim tane amb e, amblem pakerom. (Mat. 15:21-28) Pi wal ende min wom mal omukro kand pe. Jises ya mala kongan ere wanim kunum, embe nim: “Ye ende alamb dungola na bulngom dal,. . . , na olom pra bul ngonal.” (Mat. 10:33) Ba, Pita olom yu gend kunum talende nim ye, bul nangom. Pita pilgi dongal pange alla erim wal pilkane ere kumbol to akrom Jises kanim. Olom akil seyem wom kunum bulto, Pita mom bar pum Pita kanka kane alla erim wakrom ne ngonda ngom.—Luk 24:33, 34.

7. Filipai 4:5 dom mal, kenem nal mambnem ende kanka kane, karkar enamen?

⁷ Kenem pilkane esmen Got Johova na Jises Krais, bunuman ka karkar esbel. Kenem bunuman ka karkar esmen mo? Kenem bunuman ka  karkar enamen ne Johova ka pisem. (Filipai 4:5 gere.) Baibel ende akrojip bar wes e, embe dom: “Nim mambnem enen bar tani alamb bunuman ka karkar enen ne, alamb pilkane enam.” Kenem kenem ki embe ngonamen: ‘Alamb pilkane esim na molmene kele enjep bunuman paim mal karkar erind mo? Mo na peng ku mal pande nam kapis mal mongse enam ne pis? Ala ga pende yu nim komol se pisen kun paim ba, yu gelpi ne yem keren mo?’ Kenem bunuman ka kunum kunum karkar enjin dal, Johova na Jises esbel mambnem karkar esmen. Pi wal tal ende enamen bar, bunuman ka karkar enamen mal omukro kand pe (1) kenem dingding ne nomolpa esmen bar wal ende min wonda kunum—(2) wal ende enamen paninamen bar, ga pende bol kenem bunuman ding mal napanda kunum.

8. Nomolpa esmen bar wal ende jel mal min wonda kunum, nawal pakerondo bunuman ka karkar enamen? (Putnout pra kane.)

⁸ Kenem nomolpa esmen bar wal ende min wonda kunum, bunuman ka karkar enamen. Napismen wal pende min wonda wo er kelde, nomolpa esmen bar pesil panda. Ende embe mal, kes ende nganja panda, ku dongal porininda, polotik enam bar wal ende min wo kenem nomolpa esmen bar tokes moksodo pesil wei panda. (Ekl. 9:11; 1 Kor. 7:31) Johova okanaiseisen tuwalto er meimen kongan sikele, kongan kol ende ngonam kunum, enamen pesil pam dal, kenem pilgi er kanal ne enda. Wal kol ende min wo, kenem ombun paksa kunum wusngam 4-poro e, karkar enjin dal akilgi ne kapile moramen: (1) pilkane endel yipe wal wose jel punom, (2) mibulto wal min wonda bar buro pisel, (3) wal kaka nim bol min wom mal buro pisel, ala (4) alamb ende pakerondol wal endel. b Pilgi ding ga pende wusngam embe mal karkar enjip, enjep pakerom mal omukro kanamen.

9. Minisari adam ambiyem tal ende, pilkane nanjil ombun pende enjel bol min wom kunum, nalmal er kaujil?

⁹ Pilkane endel yipe wal wose jel mal punom. Imanuwel na Prensiska Misnari kongan ere se kantri jel ende punjil. Enjel kongrikeisen kol punjil bar alamb yujop duwom ere wal er kun er monjil kunum, kes COVID-19 tom. Embe pile, enjil pilgi angjel ambajel bol tapronam napaim. Ala kanan napungo Prensiska mam gom. Prensiska pu pemili aina kanal ne pim ba, kes COVID-19 tom olom punda bar koltungum. Ombun embe mal min wom, nawal pakerongo olom kauwo akilgi ne mom? (1) Imanuwel na Prensiska yane Johova ngo bunuman ka ngoi, kunum dingding ne ombun wonom kauwo bunuman puli nakerambel panijil. Johova pilgi mokun kunum kun ngom bar, enjel yane pundom sijil. Ende embe mal, pilgi ding angjen ende wal olom bol min wom mal, vidiyo a ki sijip olom embe nim. “Wal kolnga ende kenem bol min wonom kunum, er kun kamkam esmen mem er kelde wopile meimen mem ambilgi nimen, kongan kol ende simen kumbol wei ngo esmen.”  c (2) Enjel pona Baibel yu neori kerambel mal er kenjil wo se kawei pum, ala ga pende bol pona Baibel yu duwom enjip eri. (3) mal dam pilgi ding angjen man monjip, enjel yu ka nengo er dongal enjip. Bunuman ka paim pilgi ding ambajen ende enjel bol mesis bol kem bar, kunum kunum Baibel wes ding bol kel pungo, kongar ende wopum. Kenem bol wal kol ende min wonda kunum, wal enamen kaple enem wal ere kapil moramen.

10. Pilgi ding ambajen ende olom nomolpa erim bar wal kolnga jel mal ende min wom kunum, olom nal erim?

 ¹⁰ Wal kaka nim bol min wom mal na, mibulto min wonda mal buro pisel. Pilgi ding ambajen Kristina Jepen meim, olom kulu Romaniya amb Inglis kongrikeisen sem bar make pupo erim, poro min kunum olom kes wei pim. Ba, wal min wom bar olom bunuman puli nakem, Jepen-yu nijip bar kongrikeisen sem bar ombol er punal ne pim. Ala Baibel yu neori kera bar ombol er kongan kawei enal ne pim eri. Olom amb ende, enjel yero kongan ai ere ere enjil ki si, na Jepen yu ka nalmal ninal duwom ernga nim. Amb e, kaple pane Baibel na buklet Kunum Kunum Kaeri Pil moramen! Jepen yu a si Kristina duwom erngom. Embe enjel bar, Kristina mongse Jepen yu ka ninda mal duwom narim ba, amb e, pulnombol Baibel yu wei kanka kanim eri. Kenem ye ka monjin mal buro napinjin dal, wal ka jel mal pilkane nasmen wal min wonda eri.

11. Adam, ambiyem tal enjel bol ku ombun pam kunum, nawal pakerongo ombun e, kaujil?

¹¹ Alamb ende pakerondol wal endel. Pilgi ding adam ambiyem tal ende, kenem kongan to koltungjip bar meibel, kantri e, ku ombun kerma pam pile enjel ku kongan pornim. Ombun pam e nalmal ere kaujil? Yero enjil nomolpa enjil bar, wal puli topro nasinambel ne pinjil, ala wal ende enjel enjel ombun pam bar mongse nakanjil. Alamb ende pra pakeronambel kumbol wei ngo, Baibel yu neori kenjil. (Apo. 20:35) Ambajen e, adam embe nim, “Baibel yu kumbol ngo neori kenjil bar, er kelnge kenjel kenjel ombun pam mal, buro napinjil Got ka pim kongan kumbol ngojil.” Kenem nomolpa enamen bar wal ende min wom dal, wal kerma wei paim, Baibel yu neori kele alamb ende pakronamen mal kanamen.

12. Aposol Pol Baibel yu neori kem kunum, alamb kanem kanem monjip bar mambnem erim mal, kenem karkar enamen nalmal pakeronda?

¹² Kenem Baibel yu neori kesmen bar, alamb porpor bol mambnem ka enamen eri. Kenem Baibel yu neori kesmen bar alamb meim, pilgi jeljel paim, mambnem aijep jeljel paim, ala nomolpa esim bar ding mal naseim, kulu jeljel wom eri. Aposol Pol alamb porpor bol yu ka nim, kenem olom mambnem karkar enamen. Jises, aposol Pol “makro kelnge alamb dulom jel monjip bar pum.” (Rom 11:13) Embe pile, Pol, Juda alamb, Grik alamb, sape pam alamb, gara alamb, na gapman kongan alamb monjip bar Baibel yu neori kem. Alamb kanem kanem embe monjip bar, Pol yu neori kelde, enjep kumbola wei pisam nalerim, “Pol alamb porpor mambnem aijep pam mal karkar ere alamb pende siyem ninal ne erim.” (1 Kor. 9:19-23) Pol alamb nalmal nomolpa enjip na, pilgi pam mal pilkane ere, yu ne pakrondo pende se Got bol wonam ne erim. Kenem Baibel yu neori kesmen bar, Pol erim mambnem karkar enjin dal, alamb pende pakeropo yu wei sinam eri.   

13. 1 Korin 8:9, ombun ende min wonda padom kenem alamb ende bunuman paim mal pilngojin dal, nalmal tuironamen?

¹³ Bunuman ka karkar enamen kenem pakerondo, alamb ende bunuman paim pilngonamen. E, embe mal, pilgi ding ambajen man pende nganj beu ka enamen ne pisim, ba pende embe enamen kun napaim ne pisim. Ala Kristen pende nol bia apal pende no kapisamen ne pisim, ba pende weieri nanonamen ne pisim. Kristen porpor enjep kantawol ka ere, kes kanasinamen ne pisim, ba, wusngam jeljel karkar ere embe esim. Ba, kenem enamen ne pismen wal kun paim, pilgi ding angjen ambajen man karkar enam ne pinjin dal, e, er kelpe pende kes pisam ala kongrikeisena kumbol ding nasenda eri. Kenem er kelpe kumbol ding nasenda kawei napismen!  (1 Korin 8:9 gere; 10:23, 24) Kenem Baibel kolta yu meim karkar erpe pilgi ding angjen ambanjen man bol, kumbol amin moramen mal wal ende min wom mal omukro kanamen.

14. Kenem konkongol kele peng bare enamen mal, nal kolta yu ende Baibel a meim kane karkar enamen?

¹⁴ Konkongol kele peng barnamen. Johova kenem konkongol embe embe keram panadom ba, wal keramen mal kolta yu Baibel a pende kem meim karkar enamen. Kenem Got kongan alamb meimen pile, bunuman ka karkar ere konkongol paim mal keramen, ala molmene kele “bunuman ka taninamen.”(1 Tim. 2:9, 10; 1 Pita 3:3) Embe pile, kenem konkongol kelpe alamb kenem kangjen ambil min keram bar napismen. Baibel kolta yu meim elda walem pakerondo, kenem konkongol nalmal keramen na peng nalmal baranamen lo napaksim. Ende embe mal, kongrikeisen ende elda walem, pilgi ding angjen ye gal walem pende peng barjip bar yu nengonamen ne pinjip. Enjep mal alamb puli peng barim mal barjip, elda walem lo ende napaksam ba, nalmal enjep pakeronam? Seket tawol ye, elda walem yu nengo pilgi ding angjen man e, yu embe ne ngoya nim. “Alamb puli moram bar nim pletpom akil molo yu ne ngondol, ba, nim yu nindel komol kase napile nim eri kane nijip dal, nim konkongol keren bar na peng barne bar alla ende panda paim.” Elda walem lo ende napakle yu apal embe ninam, pilgi ding angjen man pakerondo alla esim wal er kun enam. d

15. Kenem kes tonda kunum nal Baibel kolta yu na lo meim, kenem pakeronda? (Rom 14:5)

¹⁵ Kes tonda kunum nganjjen kantawol enamen. Kristen dingding ne nganjjep kantawol ka enam enjep bol sem. (Gal. 6:5) Baibel lo apal pende meim, kenem kes tondo enamen mal kun dom. E, maiyam na kujoman wal tuiroya dom. (Apo. 15:20; Gal. 5:19, 20) Ba, nal marasin  pende sinam enjep enjep bol sem. Ga pende ausik gar mongse pu marasin sinamen ne pisim, ala ga pende wusngam jeljel karkar ere sim. Kenem kenem nal wusngam karkar ere marasin-sinamen, pilgi ding angjen ambajen man bunuman paim pilngonamen eri. Kenem embe enamen ne pinjil dal, wal 4-poro buro pisamen: (1) Got Gapman mongse kenem kes kanem kanem to porne sikera. (Ais. 33:24) (2) Kristen dingding ne kes tonom kunum “enjep pake sinam paim wal kun” esim. (Rom 14:5 gere.) (3) Kenem ende wal enam bar kolnarungmon, ala embe embe eiya nanimen eri. (Rom 14:13) Ala (4) Kristen ende ende kanka kane, kongrikeisen kumbol ding sende meim si wal kerma wei pakle, enjep dingding wal omukrom e, ngom. (Rom 14:15, 19, 20) Kenem wal 4-poro nimen bunuman ro pinjin dal, pilgi ding angjen ambajen man bol tapka ronamen, ala kongrikeisena kumbol amin sende moramen.   

16. Elda ende bunuman ka karkar enem, elda pende bol nalmal taninda?

¹⁶ Elda walem moram bunuman ka karkar enamen mal ta, ka ninam. (1 Tim. 3:2, 3) Ende embe mal, elda ende nanam kongan kanan er mond, bunuman paim mal elda pende karkar enam ne napisa. Olom pilkane enda Johova murmulom dongal, elda porpor bunuman ngondo, yu ne bunuman ding kele wal esim. Ala elda puli yu ninam bar Baibel lo ende to nakenjip dal, olom bunuman jel mal panda ba, puli ninam yu karkar enda.

17. Kristen ga bunuman ka karkar esim bar, nawal ka enjep bol min wonom?

¹⁷ Kristen bunuman ka karkar esim kunum, wal ka puli enjep bol min wonom. Pilgi ding angjen ambajen man bol seno tapromon mem dongal paim, kongrikeisen tuwalto kumbol ding sende meimen. Ala Johova alambem man mambnem ka jeljel kannom na, nomolpa esim jeljel ding mal naseim ga, pemili ding mal ende molo Johova lotu er ngomon bar kapile meimen. Ala wal kerma wei paim kenem pilkane esmen, Gotjon Johova bunuman ka paim Got mambnem aiem karkar esmen.