1. Nim Baibel pulnombol duwom erin kunum, nal yuwei pende duwom erin kanin?

 NIM BAIBEL yu pulnombol duwom erin kunum pilmen mo? Got kangem pilkane erin kunum, malmal enda erin. Ala Got alamb to dop nagarem pilkane erin kunum, kapisa pin. Wal ende kanka kanin alamb gonjip paim, akil wonambe mala Paradais sende moram, duwom ere kanin bar kawei pisa pin eri.

2. Nim Baibel yuwei mom duwom er kanin kunum, nalwal pende erin? (Efesus 5:1, 2)

² Nim Got Yuwom er kanse mur pun kunum, Johova kanka kanin mem wose kerma pum. Kanka mem er kelnge nim duwom er kanin wal konganem erin. Ala wal pende erin bar, Baibel kolta yu mom karkar ka erin. Wal porpor erin bar mambnem ka karkar ere erin nalerim, Got kapisa ne erin. Ngal ende dam mam kanka mem esbel kane karkar enem mal, nim Danem Johova min epen meim kanka mem e, karkar enen.—Efesus 5:1, 2 gere.

3. Nal ki pende kenem kenem ngonamen?

³ Kenem kenem ki embe mal ngonamen: ‘Na komna pulnombol Kristen molo, Johova kanka kanj mem yipe embe dongal pameim mo? Na nol pand kunum wo pi wonom, Johova bunuman pande wal enem mal anjngo karkar ere mei mo?—Ala wal kerma paim, pilgi ding angna ambana man kanka kanj mo?’ Nim “kanka mem komna pange” Johova na pilgi ding angnem ambanem man, kanka kanin mem yipe pende semene pum dal, kumbol ombun nasindel. Kristen komna monjip, wal embe ding mal min wom eri. Ba, Jises enjep bulngo nasikem, ala kenem pra bulngo nasikera eri. (Rev. 2:4, 7) Olom pilkane enem nim komna yuwei  duwom er kanin kunum, kanka mem dongal pam ala siyem nindel kaple enem.

4. Yu duwom yipe enamen bar nawal omukro kanamen?

⁴ Yu duwom pi enamen bar, Johova na alamb ende kanka kanmen mem nalmal er kelpe wose dongal punda mal kanamen. Ala Johova na pilgi ding angjen ambajen man, kanka kanmen mem er kelpe wo dongal punda bar, wal kaka pende min wonda mal omukro kanamen eri.

5-6. (a) Aposol Pol Baibel yu neori kel wanim mal, nal ombun pende kauwum? (b) Nawal er kelnge Johova konganem anjngo erim?

⁵ Aposol Pol Johova konganem kumbol wei ngo erim, ba, ombun puli min wom kauwum eri. Olom se kulu kolbar wei sembar pupo erim, ala komna kunum kolwan punjup bar amin napam. Aposol Pol kulu wan pum bar kunum pende ne, “nola ombun sinda pam” ala “kunumb ga” olom tonam pam eri. Olom bol opyem enjip ga, kunum pende ne olom tororo enjip eri. (2 Kor. 11:23-27) Ala Pilgi Ding angam man ombol ere, enjep pakeronal ne erim bar kapile sangiyo nanine enjip.—2 Kor. 10:10; Fili. 4:15.

⁶ Ba, nawal Pol pakerongo Johova konganem anjngo erim? Johova mambnem aiem pam mal, Pol Baibel a duwom er kanpol weirom, ala wal pende olom bol min wom bar duwom erim eri. Pol, Got Johova olom kanka kanem ne pilgi wei nim. (Rom 8:38, 39; Efe. 2:4, 5) Embe pile, olom pra Got Johova kankawei wei kanim. Pol, Johova kanka kanim mem tanim, “olom Johova bol ka monjip alamb pakerom, ala anjngo pakero mom.”—Hib. 6:10.

7. Nal wusngam ende kenem Johova kanka kanamen mem, er dongal enamen?

⁷ Kenem olom kanka kanmen mem er dongal enamen, Yuwom Baibel a meim mane duwom er kanamen. Nim Baibel gerdel kunum, gerin yu Johova bol nal padom yu mane omukro kanjel. Nenem ki embe ngondol: ‘Baibel yu gerind e, Johova na kanka kanem mem nalmal tadom? Ala Baibel gerind bar nalmem pande, na Johova kanka kanal padom?’

8. Yane nimen mem kenem nalmal pakerondo, Got kanka kanmen mem er dongal enamen?

⁸ Wusngam ende Got kanka kanmen mem er dongal enamen e, kunum kunum kumbola sem wal yane ne Johova ngonamen. (Sng. 25:4, 5) Ala Johova kenem yane porpor ninamen Johova pundom ngonda. (1 Jon 3:21, 22) Pilgi ding ambajen ende Esia meim, kangem Ka embe nim: “Yero na Baibel duwom ere sape sind bar, Johova kanka kanj. Ba, na yane porpor nind olom pundom ngom kunum, olom kanka kanj mem wose dongal wei pum. E, er kelnge wal porpor ene Johova kapisa wal erind.” b

9. Timoti pilgi ding angam ambam man kanka kanim mem, er dongal erim nalmal tanim?

⁹ Pol wo Kristen mom kongar pende wopungo bulto, ye gal Timoti, kansim. Timoti, Johova na alamb kanka kanim. Pol Pilipai ga monjip bar embe nim: “Ye ende olom [Timoti] mambnem paim mal ding mal napaim, enem weieri pilngonda.” (Fili. 2:20) Pol yu nim, Timoti wal er kun ka ere, yu ka ne alamb ngonda pam bar e, pilnanim. Pol nim, Timoti pilgi ding angam ambam man kankawei kanim bar e, pilnim. Kenem pilkane esmen Timoti, kongrikeisen pende pu kanim bar, enjep olom kanam kapinjip.—1 Kor. 4:17.

10. Ana, adam bol pilgi ding angjel ambajel man kanka kanjil mem, nalmal tanijil?

¹⁰ Kenem pra wusngam ende kansi Kristen pilgi ding angjen ambajen man, pakeronamen ne esmen. (Hib. 13:16) Pilgi ding ambajen Ana  wal pende erim mal, yu duwom yero enjin bar omukrojin, pi wal ende erim mal omukro kanamen. Nol komb kes mal wei ende er tom kunum bulto, Ana olom adam kil pu Witnis pemili ende kanjil, enjep garjep miro to kes mokum. Ombun min wom er kelnge enjep konkongol porpor jengimb romom. Ana embe nim: “Kil enjep konkongol porpor sip was kawei ere, ainim ere kimbir tu ngojil. E, kil kongan kerma ende nanjil, ba mambnem ka enjil er kelnge, kin senojil mem dongal pawom pi wonom.” Ana, adam bol pilgi ding angjel ambajel man kanka kanjil mem er kelnge, wal pende ere pakeronjil.—1 Jon 3:17, 18.

11. (a) Kenem ombol ere ende bol kanka mem tanimen bar, enjep nal ne pisim? (b) Provep 19:17 dom mal, kenem ende bol kanka mem taninmen, Johova nal ne pisem?

¹¹ Kenem mambnem ka ere, ende bol kanka mem tanimen kunum, enjep pilkane esim kenem ombol ere, Johova bunuman paim mal karkar enamen ne esmen. Ala mambnem ka embe esmen bar enjep kawei pisim, kenem pilkane enamen kaple nanem. Pilgi ding ambajen Ka yero yu bol ronjin, ga pende olom pakerojip mal pilmolo embe nim: “Pilgi ding ambana man pende wo na simnge, Baibel yu neori kel wanjin bar kawei pinj. Enjep kar si wo na sijip mokun bele ai nojin, ala sip yem gara kenjip eri. Na yipe pilkane erind pesil pam ba, enjep ombol wei ere embe enjip. Kanka mem er kelnge enjep kapile embe enjip.” Weieri, mambnem ka enamen ba, ga porpor sangiyo naninam. Pilgi ding ambajen Ka, olom pakerojip ga pilngo embe nim: “Na enjep bol mambnem ka erngo yem keral ne pinj ba, enjep dingding nomolpa enjep bar, kanpolnarondo. Ba, Johova enjep dingding ne meim bar kanem, embe pile, na yane nind mambnem ka na bol enjip, olom enjep erngo yem kera.” Ka yu nim e, kun paim. Kenem mambnem ka kembis ende, ende bol esmen Johova pilkane enem. Olom kenem opa kawei ende esmen mal embe kanem, ala olom  bol dina mal paim topum ngo yem kera.—Provep 19:17 gere.

12. Pilgi ding angjen man kongrikeisen kanka kanim mem, nalmal taninam? (Piksa meim pra kane.)

¹² Nim pilgi ding angjen ende mon dal, ende kanka kanen mem nalmal tane, pakeronal ne endel? Pilgi ding angjen ye gal ende kangem Joden, elda ki si na nawal pende ere kongrikeisen pakeronala nim? Elda, olom mambnem ka pende erim mal sangiyo nengom, ala wal pende er min wonda mal nengom eri. Wal pende enda mal nengom embe mal, Joden kongrikeisen Kingdom Gara yero wo molo, ga wonam yu ka ne sindel panim, make panda bar yu pundom nindel, Baibel yu neori kunum kunum kerel, ala pake sinam panda ga wal pende ere pakerondol. Elda yu nim, Joden karkar erim kunum, olom wal enda mal duwom mongse narim, pilgi ding angam ambam man kanka kanim, mem wose kerma pum eri. Joden duwom er pilkane erim, angjen ende kongrikeisen sepent kongan sinem kunum, olom pulnombol alamb pake naronom ma, yero pakero wom mal anjngo ronom.—1 Tim. 3:8-10, 13.

13. Kanka mem nalmal er kelnge pilgi ding angjen ende kangem Kris, elda kongan ala erim?

¹³ Nim yero kongrikeisen sepent elda mo kongan erin pam dal, nal endel? Kanka mem er kelnge nim kongan e, kankane yero erin Johova pilkane enem, ala kanka mem anjngo tadon pilkane enem eri. (1 Kor. 15:58) Pilgi ding angjen Kris, olom kongan elda to porinjip kunum, kes wei pim. Olom embe nim, “Na Johova kanka kane, enal kaple erim kongan enal ne pinj—e, elda moral mo namoral kunum pra.” Kunum pende wopungo olom kongan elda ala ngo yem kenjip. Kris embe nim: “Na kongan elda ala enal bar pende kisal gond. Ba, Johova na bol wandil mem tane, kongan elda ala enal ne pim pam dal, na kongan e, ala enal nalenem,  olom kankanj ala pilgi ding angna na ambana man kanka kanj eri.”

14. Pilgi ding ambajen ende kulu, Jojiya meim yu nim bar, kenem nawal duwom esmen?

¹⁴ Johova konganem alamb nomolpa esim bar, mand meim alamb bol kanka mem tanim eri. (Mat. 22:37-39) Ende embe mal, pilgi ding ambajen ende kangem Elena, kulu Jojiya meim embe nim: “Yero Johova kankanj mem er kelnge na Baibel yu neori kend. Ba, na Dana min epen meim, Johova kanka kanj mem wose kerma pum kunum, alamb kanka kanj mem wose kerma pum eri. Na enjep ombun pende kaujup mal omukro kane, nal yu wei ne kelni enjep kumbola wei pisam mal, pinjin eri. Na enjep bol bunuman embe mal sind er kelnge, enjep pakeronal bunuman kerma pam.”—Rom 10:13-15.

15-16. Piksa pende meim kanmen, ende bol kanka mem tanimen bar nawal ka min wonom?

¹⁵ Kenem pilgi ding angjen man bol kanka mem tanimen bar, enjep mongse pake nasim. Kes COVID-19 pulnombol tom kunum bulto, pilgi ding angjen ende kangem Polo, olom ambiyem bol pilgi ding ambajen tuwa walem puli, enjep Baibel yu pona, na tablet a nalmal neori keram mal duwom er ngojil. Pilgi ding ambajen tuwa ende embe enda amin napam, ba, bulto er kansim. Ala olom, pona konganem ere, maiyam ding wirondo Memorial wonam kaple erim. Maiyam ding 60-poro vidiyo konprens wusngam a Memorial pam bar tuwal pujip! Pilgi ding angjen Polo ambiyem bol pake ka ronjil  bar, pilgi ding ambajen pemili aiem bol pake kerma sijip. Bulto, pilgi ding ambajen e, pepe bol Polo ngo embe nim: “Tuwa ga pakero pon konganem enamen mal duwom ka erin ngon bar, sangiyo nind. Johova kenem weieri pilngonom, ala nim wimuk nane duwom kawei er ngon bar, na auro ninda kaple nanem.”

¹⁶ Yu kawei embe nim bar, Polo wal kerma ende duwom erim. Olom pilkane erim kanka mem taninamen e, wal kerma wei pa kenem sape paim mo wal enamen kaple enem e, ngonom. Olom pilyem kel pile embe nim: “Na seket tawol kongan ere ere erind, yipe na pilkane erind na yu nind pabilsa walem pinjip auro nim, ba, wal ende ere pakerond anjngo pilmeim.”

17. Kenem kanka mem tanimen kunum, ende nalmal pake sim?

¹⁷ Kenem ende bol kanka mem tanimen kunum, kenem kenem pake sinamen ne napismen mal simen. Pilgi ding angjen Jonatan kulu Nu Julend meim, olom bol wal embe weieri min wom. Kunum ende Sare kunum mul kes wei erim, ponimbar kanim painia ende wusngama Baibel yu neori kel wopu. Olom kunum kunum Sare kunum poninda bar, painia e, bol Baibel yu neori ai kerambel ne pim. “Kunum ele Jonatan nomolpa erim bar yu weieri neori kele embe,” “Na Baibel yu neori keral bar kanapil pilerind. Ba, painia wusngam pende karkar ere, alamb yu nengom na komol se pinj na kongan erim bar mongom karom er kelnge, kongan e, kapile kumbol wei ngo enal ne pinj. Pilgi ding angna senond ye e, pakero er kelnge pilgi wal er wose dongal pund, Baibel yu neori keral bar kawei pinj, ala se Johova bol mand wei pund eri.”

18. Johova kenem nal enamen ne ka pisem?

¹⁸ Johova ka pisem kenem olom na alamb ende kanka kanamen ne pisem. Kenem duwom er kanjin Johova kanka kanmen mem er dongal enamen, olom Yuwom Baibel a meim kunum kunum gere, germen yu kunum kunum buro yem kel pile, ala yane wusngama olom bol yu kunum kunum ninamen. Pilgi ding angjen ambajen man kanka kanmen mem er dongal enamen e, wal pende ere enjep pakeronamen. Kenem kanka kanmen mem wose kerma punda kunum, se Johova na pilgi ding angjen na ambajen bol mand punamen. Embe enamen bar, seno kapil meimen mem aimanj aimanj papunda!