Nalernge embe enjel Baibel yu bol naronom. Ba nalmem pange enjel kamkam seyem napunjil yu bol meim.

Josep na Maria komna kulu Nasaret monjil kunum, enjol ende wo, Maria nengo nim ngal ende mokul kangrel panim. E, Josep kulwam Galili tuwalto. Bulto, enjep Isip sikele se wonjip kunum se Nasaret punjup. (Luk 1:26-31; 2:4) Jises ele mol yawo mal dam mom. (Mat. 2:19-23) Embe pile, kenem—Jises, Josep na Maria kangjep pismen kunum, ga talende e—Nasaret ga ne pismen.

Maria maiyam ding ende kulu Juda mom, kangem Elisabet. Olom andam Sekeraia, ala Jon alamb nol pakil ngom ye mam mom. (Luk 1:5, 9, 13, 36) Maria pungo Elisabet bol oll talende Juda monjil. Bulto, Maria seyem Nasaret wom. (Luk 1:39, 40, 56) Embe pile, Maria kulu Juda sem bar pende kanpol tom.

Kunum ele Josep gapman yu karkar ere, “alamb kangjep gapman buk a mom bar bol tuwal keral ne pum.” Josep Nasaret mol se Betliem pum, e, “Depit tawun” aiem. Ala Mesaia ele kangram pane yu propet pam. (Luk 2:3, 4; 1 Sml. 17:15; 20:6; Mai. 5:2) Maria, Jises kulu ele kangim kunum bulto, Josep, Maria ngal kolnga kangil sinde kulu kanan sem mal seyem Nasaret punambel kanapim. Enjep kulu Betliem monjip, e Jerusalem sem bar 9 kilomita kolbar sem. Enjel lo pam karkar ere ngal kumlamb se tempol a pu, opa pende enambel kun pam.—Wkp. 12:2, 6-8; Luk 2:22-24.

Got enjol ende yero wo Maria ne ngom, nim kangrel ngal “Depit sia King” a molo “King kongan” enda panim. Embe pile, Josep na Maria, Jises, Depit tawun aiem a kangjil bar wal kerma pam ne pile, kawei pisa pinjil. (Luk 1:32, 33; 2:11, 17) Ala enjel ele kui er mol punamble, bulto Got nal yu ende ninda karkar enambel nepisa pinjil.

Enjep kunum nalnal Betliem molngo, kanjip omukro kane, wal min wonom mal kankane enjip ga, wo enjep kanjip kenem kanpol naromon. Kunum ele enjep gar ende seim bar pa monjip, ala enjel ngaljil Jises ngal kumblamb napam pende “ngal dongal” mom. (Mat. 2:11) Kenem pilkane esmen enjep kamkam seyem Nasaret napu, Betliem garjep kol mal kanan monjip.

Erot, “ye ngal pelpel Betliem . . .tuwalto meim, kongar tal molse mene wom ngal” porpor to goya nim. (Mat. 2:16) Erot yu embe ninge, Maria na Josep pilkane enjel kunum, enjel ngal Jises si ke pu kulu Isip, mol pungo Erot gom. Nalernge enjep seyem Betliem napunjip? Nalerim, Erot ngangem Akilus mambnem kes pam Juda kantawol erim tuironamen ne enjip, ala Got enjol ende kem wo Josep nengo, ele punam ombun panda panim pile, Josep amb, ngal si se Nasaret pum. Ele pu buning molo Jises er si yaungo, Got kongan ye wei mom.—Mat. 2:19-22; 13:55; Luk 2:39, 52.

Ala kenem pilkane esmen Josep yero golngo, bulto, Jises ga se min epen pu kol aimanj mem sinam wusngam apis kem. Bulto Josep akil seyem wo ya mala mora. Ga puli wo olom ki si, nalernge elep Jises kangil sijil kunum bulto, seyem napu Betliem anjngo molpa monjil a ninambe, pundom ngonda?