1. Buk Song 15:1-5 yu paim omukro kanamen kenem nalmal pakeronda?

 YU DUWOM yero enjin bar omukro kanjin, Johova bol seno yu dongal ne nol pa olom konganem esim ga, olom sel gar seim bar moram kaple enem panijin. Ba kenem nalmal ere olom bol seno, sel gar seim bar tuwal moramen? Buk Song 15 wal pende enamen mal yubol tonom. (Buk Song 15:​1-5 gere.) Buk Song kenem wal pende erpe pakerondo, se Got bol mand punamen mal dom.

2. Nawal erkelnge buk song bom ye Depit, Johova sel gar pane yubol tom?

² Buk Song sapta 15 yu pulnombol embe dom: “ Johova, namal nim sel gar mora kaple enem? Ala namal nim kimbem kuru sembar, mora kaple enem?” (Sng. 15:1) Buk Song bom ye Depit, Johova “sel” gar panim kunum, lotu sel gar kulu Gibeon sem buro pisapim. Ala Depit, “Got kimbem kuru sem kimbem” panim eri, e Jerusalem komngom Saion sel gar sem pilninda nim. Kulu Gibeon sembar yemro saut, Depit sel gar ende tauwo boks kontrak tuwal kel pakim, ele papungo tempol gar dongal ende taunda taujup.—2 Sml. 6:17.

3. Nalende Buk Song 15, yumem kenem kanpol tonamen nepismen? (Piksa pra kane.)

³ Israil ga puli, boks kontrak pambar tuwal pu kongan narere enjip, apal eri pupo enjip. Ba Johova seno pilgi ne konganem enjip ga porpor, lotu sel gar sembar tuwal anjngo moram nepim. Kenem porpor ele tuwal moramen kapismen. Buk Song 15, kenem nal mambnem pende ere, Johova bol seno anjngo mol punamen Depit ne aunim.

 KOLWANJEL BAR ALLA NARE MAMBNEM DULTO KARKAR ENDEL

4. Johova kenem nol mongse panamen ne napisem, wal pende enamen nepisem nalmal pilkane esmen? (Aisaia 48:1)

⁴ Buk Song 15:2 dom, alamb ende Johova bol senonom “kolwanja bar alla ende napande, wal enda bar mambnem dulto karkar enda.” Yu “kolwanja bar ala” ende napanda, “wal enda bar” mambnem dulto karkar enda panimen anjngo enda. Ba kenem ‘kol wanamen bar alla’ ende wei nanamen mo? Weieri, nanamen kaple enem. Ba kenem porpor sin nganja paim, Johova yu dom ombol ere karkar enjin dal, kolwanamen bar alla napaim alamb paninda. Kenem Johova bol yane wusngama yu dongal ne nol paimen kunum, pulnombol Got bol kolpumon. Kenem pilkane esmen komna Baibel bonjup kunum, alamb ende Israil ye dulom tuwal mom bar wamnam Got bol seno Johova lotu sel gar tuwal mora kaple narim. Alamb pende olom Israil ende meim nepinjip ba, “mambnem wei na mambnem dulto” karkar narim. (Aisaia 48:1 gere.) Israil ga Johova kumbol ngo konganem enjip ga, olom kapim mambnem duwom erkane, karkar enam pam. Embe ding mal, yipe kunum Johova kenem bol kapisa nepinjin dal, nol pa kangem Johova Witnis mongse nasinamen, wal pende enamen eri. Kunum kunum ombol ere, “wal enamen bar mambnem dulto karkar” enamen. Nalmal embe enamen?

5. Wal porpor enamen bar Johova yu karkar enamen panimen, mem nalmal paim?

⁵ Johova dungola “kolwanamen bar alla ende” napande wal porpor enamen bar “mambnem dulto karkar” enamen panimen e, kongrikeisen make paim bar kunum kunum pu pilgi kongan pende esmen mongse pilnadom, wal pende pra enamen eri. (1 Sml. 15:22) Kenem ombol kes ere, nomolpa esmen bar Johova Yuwom kunum kunum karkar enamen, kenem kenem opinj moramen kunum pra. (Prov. 3:6; Ekl.  12:​13, 14) Wal kerei kerei pende enamen bar Johova Yuwom pra karkar enamen wal kerma paim. Embe enjin dal, Johova kanka kanmen mem weieri tanimen.—Jon 14:23; 1 Jon 5:3.

6. Hibru 6:​10-12 yu paim bar pilkane esmen, nawal ende kerma wei pa mambnem ka pende komna enjin e, ngonom?

⁶ Johova konganem pende komna enjin weieri pilngo kapisem, ba komna mambnem ka pende enjin mongse erkelde Johova sel gar moramen kaple nanem. Hibru 6:​10-12 yu paim bar taninde pilkane esmen. (Gere.) Kenem kongan ka pende komna enjin Johova auro nadom. Ba olom kapisem, kenem kumbol-wei ngo olom lotu anjngo erpu “porninda kunum punamen nepisem.” Olom konganem ka esmen “wimuk ne nasikenjin dal,” topum ka ende ngonda olom bol senomon mem aimanj aimanj papunda.—Gal. 6:9.

YUWEI KUMBOLA SEIM NEORI KEREL

7. Yuwei kumbola seim neori kerel panimen, nalne pilnimen?

⁷ Alamb ende Johova sel gar moral nepim dal, Johova kapisem olom “kumbola kunum kunum yu weieri ninda.” (Sng. 15:2) Yuwei mongse naninda, mambnem pende karkar enda eri. Johova kapisem kenem wal porpor enamen bar yu weieri ninamen. (Hib. 13:18) E, wal kerma wei paim nalenem, Johova mambnem gend esim alamb kanakanem, ba “mambnem dulto esim alamb bol tapronda kapisem.”—Prov. 3:32.

8. Nal mambnem pende kenem tuironamen?

⁸ ‘Kumbola kunum kunum yu weieri nim alamb,’ alamb pende, alamb puli meim bar Got yu karkar esim mal molo, akda meim kunum Got lo to kesim mal embe nasim. (Ais. 29:13) Enjep mambnem gend kanpolto tuirom. Ba bunuman gend karkar enem alamb, Johova bunuman ka yu na lo ngonom bar bunuman tal sinem, bunuman embe sinem erkelde lo pende kerma napaim nepile to kerem. (Jems 1:​5-8) Ala to kerem bar ombun nasim dal, alla kerma pende enda, embe ere Johova lotu erngo mora, ba, Johova olom bol kanapisem. (Ekl. 8:11) Embe pile, kenem wal porpor enamen bar, mambnem weieri karkar enamen.

9. Jises pulnombol Nataniel bol yu nim bar, kenem nawal duwom esmen? (Piksa pra kane.)

⁹ Alamb ende kumbola yuwei kunum kunum  ninda wal kerma paim nalenem, Pilip senom ye Nataniel wiro wo Jises kanjel panim bar, wal kerma pende min wom bar kenem pilkane esmen. Jises komna Nataniel bol tapai naroro erim, ba olom kane embe nim: “Kandya, Israil ye kawei ende mambnem gend olom bol naseim.” (Jon 1:47) Jises pilkane erim olom disaipol aiyem walem mambnem wei karkar enjip, ba Nataniel mambnem wei karkar kawei erim. Kenem porpor sin nganja paim mal Nataniel pam, ba olom wal porpor erim bar mambnem weieri karkar erim. Nataniel mambnem embe erim bar, Jises kanka kane yu ka nengom. Weieri, kenem porpor Jises yu embe mal ninda kapismen!

10. Nalende kenem yu nimen Johova wal kawei ende ngom, kanpolto konganem ka enamen? (Jems 1:26)

¹⁰ Kenem alamb pende bol nal mambnem enamen mal, Buk Song 15 yu puli nekem meim. Buk Song 15:​3, Johova sel gar meim alamb mambnem embe karkar nanem padom, “olom alamb ende kangem ka to kes moksa paim yu nadom, ala alamb ende erkes nanem, olom yu ei mal ne senonom alamb kisal ngo tomene keral ne nanem.” Kenem yu ninamen bar alamb ende kangem ka to kes mokjin dal, ombun kerma min wondo Johova sel gar namoramen.—Jems 1:26 gere.

11. Yu ne alamb ende kangem to kes moksum panimen nawal, ala mambnem embe esim kumbol to akro sinakenjip dal, nawal enjep bol min wonda?

¹¹ Buk Song bom ye, alamb ende kangem ka to kes moksum mal yu kun neori kem. Yu ne alamb ende kangem ka to kes moksum panimen e, nawal? E, yu gend ne alamb ende kangem ka to kes moksum e pildom. Kristen ende yu gend ne, alamb ende kangem ka to kes moksum mem kumbol to akro sinakem dal, kongrikeisena to ori kerambe olom Johova Witnis ende namora.—Jer. 17:10.

12-13. Nawal pende min wonda bar kenem kanpolnaro yu ne, senomon ga kangem ka to kes moksamen? (Piksa pra kane.)

¹² Buk Song 15:3 dom, Johova sel gar meim alamb yu ne alamb ende erkes nanem, ala yu  auliauli ne senonom alamb tomene nakerem. Kenem nawal pende enamen bar senomon alamb kangjep ka to kes moksamen?

¹³ Kenem kanpolnaro ga pende yu gend ninam bar pilgi ne, yu auliauli ne ga ende kangjep ka to kes moksamen. Pende embe mal: (1) ambanjen ende kongan painia-oltaim enem sikera, (2) bolsinjil yeamb tal Betel kongan porninda, ala (3) angjen ende kongrikeisen elda mo sepent kongan enem porninda. Nalmem pande kongan pordom mem kanpolnarojin dal, alla ende enambe to ori kerakesim pane kenem numan aijen paim mal, yu auliauli ne alamb ende ngonamen mo? Mem pende pande enjep kongan porninda dom, ba kenem kanpolnaromon. Wal kerma paim Johova sel gar “meim alamb, alamb ende bol mambnem kes ernangonom, ala yu ei auliauli ne senonom alamb tomene nakerem.”

JOHOVA BOL KISAL GOLO MOLMENE KESIM ALAMB KANGJEP AMBIL MIN KERAMEN

14. Johova sel gar meim alamb, “mambnem kes esim alamb nalmal bulngom,” yubol to.

¹⁴ Buk Song 15:4 dom, Johova senonom “alamb mambnem kes esim alamb bulngom.” Nalende embe nimen? Kenem nalmal embe enamen? Kenem sin nangja paim pile kapismen alamb bol tapro, wal ende erkerambe kumbol ombun simen alamb bol tapronamen kanapismen. Ba, Johova mambnem kes esim padom alamb mongse kenem “bulngonamen.” (1 Kor. 5:11) E, ga pende mambnem kes esim ba, kumbol to aknaro anjngo ermeim e, pra pilnimen. Kenem pilgi nimen wal enjep kanapile, Johova bol seno kameimen mem to kes moksam ne esim.—Prov. 13:20.

15. Nal wusngam ende “Johova bol kisal golo molmene kesim alamb” kangjep ambil min keramen”?

¹⁵ Buk Song 15:4 dom, “Johova bol kisal golo molmene kesim alamb” kangjep ambil min keiya dom. Embe pile, kenem ombol ere wusngam pende kansi, Johova bol seno molmene kesim alamb mambnem pende taninamen ne esmen. (Rom 12:10) Wusngam ende Buk Song 15:4 dom, Johova sel gar meim alamb “yu dongal nepaksim karkar erkaple esim, e wal kerma ende min wo enjep ombun ngonom kunum pra.” Yu dongal nepakil karkar nasim, erkelde alamb ende kumbol ombun sim. (Mat. 5:37) Ende embe mal, Johova garem kol meim bolsinjip ga, ende ende bol yu dongal nepaksim mal karkar ka enam nepisem. Ngal danjep manjep, ngaljep bol yu dongal nepaksim ombol ere karkar ka esim kunum, Johova enjep bol kapisem. Kenem Got na alamb kanka kanmen erkelde, wal ende enamen pane yu dongal nepakismen mal, karkar kawei esmen.

16. Johova senonom alamb nal wusngam ende, kangjep ambil min keramen?

¹⁶ Wusngam ende Got senonom alamb kangjep ambil min keramen e, wiro si garjen kol kele mambnem ka enamen. (Rom 12:13) Anj dungol kele pilgi ding angjen ambanjen bol tapromon erkelde, enjep na Johova bol senomon mem er dongal esmen. Angjen ambanjen wiro si garjen kol kele, mambnem ka esmen e, Johova mambnem karkar esmen.

KU KANKA KANIM MEM TUIRONDOL

17. Nalende Buk Song 15 ku pane yubol tonom?

¹⁷ Buk Song 15:5 paim bar ger kanmen, Johova garem kol meim “alamb ku paksim, alamb wo dina ersim ala ngoyem kesim kunum ku pende pakil min kel ngoya nadom, ala olom kot enem bar alamb ku braibri ngonambe si alla napaim alamb, alla paim panadom.” (Sng. 15:5) Nalernge buk song bom ye ku pane, yu tambem e nim. Kenem ku bol bunuman dulto nasi ku kanka kanjin dal, erkelpe alamb ende kes pisam ala Got bol senomon mem tokes moksamen eri. (1 Tim. 6:10) Komna Baibel bonjup kunum ga pende, angjen man konbengel monjup ku  dina ngo pakle ala siyem ninjip kunum, ku pende pakle min kel ngoya ninjip. Ala, ga pende jas mol kot pinjip alamb ku braibri ngojup si, alla napam alamb, alla paim paninjip. Mambnem embe karkar esim alamb Johova enjep kanka nakanem.—Ese. 22:12.

18. Nal ki pende kenem kenem ngonamen pakerondo, ku bol bunuman dulto ambramen? (Hirbu 13:5)

¹⁸ Kenem ku bol bunuman nalmal ambismen, omukro kanamen kapaim. Nenem ki embe pende ngondol: ‘Na kunum kunum ku sende wal topro sinal bar, buro pis mo? Na ku ende dina er sindal, wamnam ngoyem keral kaple nanem mo? Ala ku ngonom alamb ku konganem enda ambsik napaim mo? Ku sem erkelde na molsino alamb ende ngond, ala ende kin mambnem ka enal pesil paim mo? Pilgi ding angna ambana man ku kannom bar, na enjep omukro ku na bunogane kanka kanim ga nepis mo? Na ku puli kannom ga bol seno tapro, konbengel meim ga kankanakanj mo?’ Ki embe mal ngonamen wal kerma paim nalenem, kenem Johova bol seno garem kol meimen e, wal kawei ende. Embe pile, Johova garem kol anjngo moramen nepinjin dal, ku kanka nakanamen. Kenem ku kanka nakanjin dal, Johova kenem bulngo nasikera!—Hibru 13:5 gere.

JOHOVA SENONOM ALAMB KANKA KANEM

19. Nalende Johova Buk Song 15 yu paim porpor karkar enamen nepisem?

¹⁹ Buk Song 15 yu ne pordom bar, yu dongal ende ne embe dom: “Ye ende mambnem embe mal enem bowei naronda.” (Sng. 15:5) Buk Song bom ye Got kapim mambnem kerma pende enamen nepim ne penema kerem. Got kenem kapil moramen nepisem. Embe pile, yu dom karkar enjin dal, wal kaka sinamen ala kantawol ende buning moramen eri.—Ais. 48:17.

20. Johova bol seno olom garem kol meim alamb, nawal ka kui esim?

²⁰ Johova garem kol meim kakanem alamb, mibulto wal kaka sinam. Got oiro sim ga se epen pu Jises “dumam puli erkun erkem seim bar moram.” (Jon 14:2) Ya mala moram ga Revelesen 21:3 yu dongal nekem paim wal, min wonda ne kui esim. Weieri, Johova kenem kakane wiro olom bol seno, sel gar aimanj aimanj mol punamen padom bar, kenem kawei wei pismen!