1-2. Alamb kumbol ngo Johova lotu erngo meim alamb, wiro nalenam padom?

 NIM nomolpa enen bar Johova bol nal nepisen? Nim ki e, pundom embe ngondol, ‘Johova na Dana, Gotna mo Senond ye panindel.’ Ba olom ye nalmal kangem pende ngondol meim eri. E weieri, ba Johova nim wirondo garem kol pu mei nepisen mo?

² King Depit, Johova bol seno kamolo Olom lotu erngonjup alamb, wirondo olom garem kol pu meim mal embe kanim. Ala ki embe sim: “ Johova, namal nim sel gar wo mora? Namal nim kimbem kuru seim bar wo, mora?” (Sng. 15:1) Yu embe mal meim bar kenem duwom er pilkane esmen, Johova bol seno—olom garem kol moramen kaple enem. Johova wiro garna kol woya dom wal kerma wei.

JOHOVA GAREM KOL MORAMEN NEPISEM

3. Johova garem kol namal yero wei wo mom, ala wo mom alamb enjel ende ende bol nalmal pinjil?

³ Johova wal poro ernasem kunum olom mongse mom. Bulto olom Ngangem komna ersem, ersem ngal ne si olom sel gar tuwal kem bar kawei wei pim. Baibel ninde pilkane esmen, “kunum kunum dingding ne Johova olom Ngnangem bol kapim.” Ala yero wei pu olom garem kol mom ngangem, “Dam [Johova] bol kunum kunum kapim eri.”—Prov. 8:30.

4. Bulto Johova alamb namal wiro wo olom sel gar moram panim?

 ⁴ Johova enjol walem erse, wo olom garwom kol moram panim eri. Baibel dom, enjol walem “Got ngangem man” padom ala Johova bol taprom bar kapil meim padom. (Jop 38:7; Dan. 7:10) Kongar puli keswei, min epen monjup ga mongse Got bol seno wo olom garwom kol monjup. Bulto mala alamb erse olom sel gar moram eri panim. Kunum pende wo pungo, Inok, Noa, Abram na Jop, Johova garwom kol kapil monjup bar tuwal punjup. Baibel dom, enjep Got bol seno yu karkar ere “Got wei bol kol ai wanjip pile, Johova na senond ga panim.”—Stt. 5:24; 6:9; Jop 29:4; Ais. 41:8.

5. Yu propet Esekiel 37:​26, 27 a paim bar, kenem nawal duwom esmen?

⁵ Kongar andet puli tuwalto, Johova senom ga anjngo wiro olom garem kol woya nim. (Esekiel 37:​26, 27 gere.) Esekiel yu propet nim bar pilkane esmen, Got bol kamolo olom lotu erngom ga olom bol weieri senonam nepisem. Olom yu dongal nim, “na enjep bol kontrak ene kumbol amin moram panim.” Yu propet e Got oiro sim ga na, ya mala moramen ne pilgi ne kui esim ga bulto woseding pu olom sel gar “sipsip dulom ding,” mal moram e, pilnim. (Jon 10:16) Ne pakim yu yipe weieri min wonom!

NAL KULU ENDE MEIMEN GOT KENEM TAWOL ENEM

6. Johova sel gar seim bar alamb nalmal tuwal pum, ala olom sel gar kulu dumam dingeri seim mo?

⁶ Baibel bonjup kunum sel gar alamb mol kapil sise enjip, ala nol komb er tonda bar buning monjup eri, alamb gulka ende wo sel gar mora gardam olom kantawol ka enda nepisem. Kenem Johova bol yu dongal ne nol paimen kunum, olom sel gar tuwal meimen. (Sng. 61:4) Olom pilgi mokun pulikes ngonom si ala ga pende wo, sel gar tuwal meim bol senomon eri. Johova sel gar panimen kulu dumam dingeri nasem. Kulu jeljel alamb wo tuwal moram kaple enem eri. Kantri jel spesel kibung ende panda bar pundol, ele pundol bar alamb pende Got sel gar kapile tuwal meim alamb wonam kansindel eri. Embe pile, Johova sel gar olom bol molmene kele lotu erngom alamb meim bar kulu porpor se punom.—Rev. 21:3.

7. Nalende Johova bol pilgi ne kamol gonjup alamb, sel gar tuwal meim eri paninamen? (Piksa pra kane.)

⁷ Johova bol pilgi ne kamol gonjup alamb, nawal enjep bol min wonom? Enjep pra Johova sel gar tuwal meim paninamen kun paim mo? Kun paim! Nalende embe nimen? Nalenem, ga embe mal Johova bunumana kol meim nepisem. Jises yu ne aune embe nim: “Gonjup paim alamb akil se wonam Mosis pra,  alamb gonjup paim aksam eri panim. Olom ond kerei kanglem mom ond pane yubol tom bar Johova kin embe nim ‘olom Abram, Gottom, Aisak Gottom na Jekop Gottom eri panim.’ Olom alamb gonjup Got aijep ma. Olom kol meim alamb Got aijep, nalenem, olom bunumana gonjup alamb porpor kol meim.”—Luk 20:​37, 38.

KENEM PAKE SINAMEN ALA WAL PENDE ENAMEN

8. Johova sel gar wo meim alamb pake nalmal sim?

⁸ Sel gar wei ende sende, ombun min wonda enem kunum kenem pu okul ere buning meimen mal, Johova sel gar pumeim alamb, enjep pilgi wal tokes moksa kantawol enem. Ala mibulto wal ka min wonda ne, pilgi ne kui esim eri. Kenem Johova bol mand meimen waknarojin dal, Seten wal ende ere kenem aimanj aimanj tokes moksa kaple nanda. (Sng. 31:23; 1 Jon 3:8) Kunum kol senda bar, Johova bol pilgi ne seno ka meim ga pilgi wal mongse kantawol nanda, gosum mem to porninda eri.—Rev. 21:4.

9. Johova garem kol pu meim alamb, nal mambnem pende enam nepisem?

⁹ Weieri, kenem Johova garem—kol meimen bar kawei wei pisamen. Nalenem, olom bol senomon mem aimanj aimanj papunda. Olom garem kol anjngo mol punamen nepinjin dal, nal mambnem pende enamen? Alamb ende nim wirondo garwom kol pundal, nal mambnem pende karkar endel mal nengonda nepisel. Ende embe mal, nim simb su gul sikele sel gal pundol nepisa, ala pisem mal nim karkar endel. Embe ding mal, Johova sel gar seim bar anjngo mol punam nepisam ga, olom enjep wal pende enam nepisem pilkane enam. Johova kanka kanmen mem erkelde, enamen kaple enem wal porpor “erkelpe olom kawei pisa.” (Kol. 1:10) Ala Johova Senojin ye mal kanmen erkelde, olom Gotjon na Danjen mal kanmen, olom bol molmene wei keramen kapisem. (Sng. 25:14) Olom bol molmene keramen erkelde, wal ende erkelpe olom kespisa wal nanamen, kunum kunum molmene kele “Gotjon bol kol ai wanamen.”—Mai. 6:8.

JOHOVA, ISRAIL GA PORPOR BOL MAMBNEM DING MAL ERIM

10-11. Kulu Sainai ei sembar Johova Israil ga bol mambnem ding mal erim, nalmal tanim?

¹⁰ Johova garwom kol wo meim alamb porpor kin, mambnem ding mal enem. (Rom 2:11) Olom Israil ga kulu Sainai ei sem bar punjup kunum, mambnem ding mal erim bar taninde pilkane esmen.

¹¹ Olom alambem man Isip karpos monjup siori tum kunum, pris ga pende makro kelnge molo sel gar kongan enjip. Liwai ga kongan ngongo sel gar kuru sembar mol kongan enjip. Ala kongan pende pra enjip eri, Johova olom sel gar kongan enjip ga na, sel gar sembar mand monjup ga mongse kantawol ka erim mo? Ma! Johova alamb porpor bol mambnem ding mal erim.

12. Johova Israil ga kulu ei sembar nanam talap kolnga ende moram pane simin kem kunum, enjep bol mambnem ding mal erim nalmal tanim? (Kisim Bek 40:38) (Piksa pra kane.)

¹² Sel gar kongan enjip ga na enjep porpor woseding pu Johova bol seno monjup, mambnem ding mal ernge kapil monjup. Ende embe mal, Johova jep wusngama erkelnge Israil ga ye dulom pel, kupo wo lotu sel gar sembar minro pam kanjip. (Kisim Bek 40:38 gere.) Kupo sel gar min pam sikele se kulu kol ende punal nepum kunum, mand monjup na kolbar monjup ga porpor kane lotu sel gar na, enjep pemili dingding ne sel gar tau panjip sekilsi pumbar karkar er punjup. (Nam. 9:​15-23) Enjep porpor trabet tal silpa si enjip pup kerma kes tonjup pile, pulnombolo pupo enjip. (Nam. 10:2)  Penema wei paim pilkane esmen, lotu sel gar sembar mand monjup ga mongse Johova bol seno kamonjup ne napisamen, kolbar monjup ga Johova pilngom eri. Embe pile Johova, Israil ga ye dulom kol simin kem, Olom garwom kol moram panim ga porpor kolta ne kantawol erim. Yipe kunum ding mal, kenem mal tambem jeljel papumon, Johova kenem kanka kane kantawol ka enem bar, kenem pake si buning meimen.

YIPE KUNUM JOHOVA ALAMB PORPOR BOL MAMBNEM DING MAL ENEM

13. Yipe kunum Johova alamb porpor bol mambnem ding mal enem, nalmal tadom?

¹³ Johova alambem man yipe mal yemyem molpum, pende Johova Witnis etkota mo brens opis seim bar mand meim. Ga pende tuwal ele kongan er meim. Embe pile, lotu wal puli pende esim bar tuwal pum, ala molse ngimba pu kongan esim ga bol taprom eri. Ga pende seket tawol kongan esim, mo Johova konganem kunum kunum-pende meim esim eri. Ga puli kongan embe mal nasim, nim pra narin pamdal pilkane endel kenem porpor Johova garem kol meimen, olom kakanem. Kenem dingding ne kanpolto kantawol ka enem. (1 Pita 5:7) Johova alambem man pilgi mokun ngo, kolta ne, enjep kantawol ka enem.

14. Nal wusngam ende Johova alamb porpor bol, yipe kunum mambnem ding mal enem tadom?

¹⁴ Wusngam ende Johova alamb porpor bol mambnem ding mal enem e, wusngam erkun ende mala alamb porpor yipe meim Yuwom Baibel a meim si ger kanim. Komna alamb yujop talende pam bar mongse Baibel bonjup, e Ibru, Arameik na Grik. Embe pile, yu talende pinjip ga Baibel gere Johova bol seno semand punjup, yu napinjip ga Baibel gere se Johova bol seno mand punam kaple narim mo? Ma, se Johova bol mand punam kaple erim.—Mat. 11:25.

15. Nal wusngam Johova alamb porpor bol mambnem ding mal enem tadom? (Piksa pra kane.)

¹⁵ Alamb sape kerma paim, yu talende komna  Baibel bonjup gernam kaple enem ga mongse bol senonal panadom. Johova bunuman kapaim sape kerma paim ga mongse tanine kanam ne nanem, mala alamb porpor papum tanine kanam ne enem. Olom murmulom dongal bu ngongo Baibel yu boll kenjip meim, akro si alamb yujop jeljel tausen puli pambar kesim; embe esim, pakero kere alamb porpor mal yemyem papum, duwom er kane pakesi Johova bol nalmal senonam kanpol tom.—2 Tim. 3:​16, 17.

JOHOVA “GAREM KOLMEN WAKWEI NARONDOL”

16. Aposel 10:​34, 35 dom, kenem nawal anjngo erpe Jehova kenem bol kapisa?

¹⁶ Johova olom sel gar kenem wo moramen pane wiro sinem bar, kawei wei pisamen. Olom mambnem kapaim, kanka mem seim, ala wiro si garem kol kele mambnem ka enem. Ala wal ende, kenem porpor kulu nenja bar meimen, nomolpa esmen bar nalmal seim, sape paim mo napaim, nganj kala nalmal paim, nal ye dulom meimen, kongar nalnal meimen, mo ye mo amb meimen, kenem porpor bol mambnem ding mal enem. Olom lo na kapisem mal karkar esim ga wiro si garem kol kerem.— Aposel 10:​34, 35 gere.

17. Kenem nalmal ere Johova sel gar tuwal moramen, yu pende nanja pu kansinamen?

¹⁷ Buk Song 15:1 yu kanmen, Depit ki embe pende ngom: “ Johova, namal nim sel gar mora kaple enem? Ala, namal nim kimbem kuru seim bar mora kaple enem?” Buk Song bom ye Johova murmulom dongal bu ngongo, ki embe mal pundom ngom. Yu duwom bulto enamen bar kenem wal pende erpe, Johova kenem bol kapise, seno olom garem kol moramen mal kanamen.