Nalernge maiyam ding ye ende Baibel “kangem-nadom,” Ruth nasinal, sindal nam nomlpa erind bar “ombun” paksal panim? (Rut 4:1, 6)

Komna Baibel kunum, ye ende amb sinda ba ngalem namoro gom dal, ki pende min wowo erim. Olom mal ende senda nalmal sinda? Olom pemili kangem porne sikera mo? Moses lo pam pakero ki embe mal pundom ngom.

Ye ende gora mo konbengel molo mal aiem ku bom dal, nawal min wonda? Olom angam mo maiyam ding ende, kaple erim dal mal e topro siyem ninda. Embe enam bar mal e tuwalto pemili pra se pamora.—Wkp. 25:23-28; Nam. 27:8-11.

Ala ye ende gora pemili kangem nalmal pornaninda? Gora ye ambiem angam-sinda pane Lo pam, mambnem embe mal Rut kin min wom. Ye ende gora ambiem kangil angam sinde, nagal kuramble olom kangem pornaninda, ala nolmal na wal ende senda ngal sinda. Johova kanka mem tane lo embe ngom bar, amb kangil pake sinda eri.—Lo 25:5-7; Mat. 22:23-28.

Neomi yu bolom pisamen. Olom ye ende kangem Elimelek bol bolsinjil. Andam na olom ngangem tal gonjip kunum, olom kantawol enam ga ende namonjip. (Rut 1:1-5) Embe pile, olom seyem Juda wom kunum, Neomi wam-Rut nengo, nim pu Boas ki si kenem mal topro siyem ninda panim. Boas, Elimelek gom ye maiyam ding ende. (Rut 2:1, 19, 20; 3:1-4) Ba, Boas pilkane erim maiyam ding mina, Baibel “kangem-nadom” ye ende mom. Mom ye e, olom mal e topro siyem kera mo nakera yero ninda pam.—Rut 3:9, 12, 13.

Maiyam ding Baibel “kangem-nadom” ye pakeronal ne kapim. (Rut 4:1-4) Olom ku na wal ngo mal e topro siyem kera pam, ba pilkane erim Naomi ngal ende kangilde Elimelek mal lem sinda napam, olom tuwa sem. Embe pile, Baibel “kangem-nadom” ye mal e topro siyem ninda ninde, olom mal lem senda pam.

Maiyam ding e mal topronda ro Rut sinda pam, embe pile ma panim. Olom embe nim: “Na mal e ala topro siyem nainal nalenem, nanam bol ombun pakil ninal.” (Rut 4:5, 6) Nalernge olom mal topro siyem nainal panim?

Maiyam ding Baibel “kangem-nadom” e mo ye ende, Rut sinambe ngal ye ngal ende kangim dal, Elimelek mal lem sinda pam. Baibel “kangem-nadom” ye mal “topro siyem” kera, olom bol nalmal ombun paksa pam? Baibel ki pundom kun nangonom, ba mem embe pende panda pam.

• 1. Olom ku ei mal kera pam, Elimelek mal lem olom sinda napam. Rut ngal kangem dal, ngal e mal sinda pam.

• 2. Olom Neomi na Rut mokun aka ngo kantawol enda pam.

• 3. Baibel kangem-nadom ye Rut sinde ngal pende kangra kangre, olom ngalem man bol mal omukronam pam.

• 4. Baibel kangem-nadom ye olom ngalem pende monjip eri, embe pile Rut sinde ngal ye ngal kangim dal, olom mal lem na Elimelek mal lem ai sinda pam, olom ngalem man mal sinam napam. Baibel kangem-nadom ye, kannom wal ei mal ngo Neomi pakeronda kanapim. Embe pile, maiyam ding ende Boas mom, olom mal e topro siyem na nim. Boas mal topro siyem nim nalerim, gom yem “kangem pornaninde mal lem senda nepil erim.”—Rut 4:10.   

Maiyam ding Baibel “kangem-nadom” ye, olom olom kangem na kannom wal kantawol enal nepim. Olom olom nepim bu kerma pam. Baibel “kangem-nadom” ye, olom olom kangem ambilgi ninal ne erim. Ba kombe alamb yu bol meim bar, olom kangem ende pi pande nakanmen. Ala olom wal kawei ende sinda pam wakrom Boas sim. Boas bol wal kawei wei ende min wom e, Jises Krais kopam ende mom.) Baibel kangem-nadom ye wal kawei ende wakrom nalerim, olom olom nepile alamb wandil mal monjip pake narom!—Mat. 1:5; Luk 3:23, 32.