1-2. (a) Alamb nol paim kunum nawal min wonom? (b) Yipe yu duwom enamen bar, nawal pende omukro kanamen?

 NIM ga pende nol panam ne erkun ermonjip, kankane erin mo? Enjep nol panam ki tal ende ngom bar, pilgi nim mal neori kele, pundom ngom bar weieri pilgi nimen panim. Pemili aijep na senom ga enjep bol kawei pisim. Enjep nol a mene pu semin wom kunum, alamb puli angel taronambe kawei pisim. Wakan dingding ne alamb tausen puli, yane wusngam a Johova bol yu dongal ne, wo nol pa Witnis ende meim.

² Nim nol panal ne bunuman pam dal, e, bunuman kawei ende sinen. Yipe ya mal mambnem kes paim bar, nim “Johova kansinal ne kurnon.” (Sng. 14:1, 2) Yipe yu duwom enamen, kenem alamb gal mo tuwa pel pakeronda. Ala nol pa sikenjip ga, Johova bol ka meim mambnem er dongal ere olom konganem anjngo er punam. Mem puli pande kenem Johova konganem esmen, ba pi mem talende omukro kanamen.

3. Nalende Johova konganem ga, yuwei na mambnem dulto kanka kanim? (Sng. 119:128, 163)

³ Johova alambem man nengo, “yuwei kanka” kanya nim. (Sek. 8:19) Jises disaipol walem nengo, mambnem dulto karkar eya nim. (Mat. 5:6) Yu ninjil bar tadom, kenem ombol ere Johova dungola ka na kun paim wal kunum kunum enamen. Nim yuwei na mambnem dulto kanka kanen mo? Kin pilkane esmen kanka kanen. Alamb mambnem kes, kun paim wal, na yu gend nim, nim kanapisen. (Buk Song 119:128, 163 gere.) Yu gend nim e, Satan mal tawol enem ye olom mambnem aiem. (Jon 8:44; 12:31) Satan bu kerma ende paim e, Got kangem ka tokes moksal nepisem. Satan kenem Gotjon bol  yu gend, kulu Iden tuwalto pulnombol nim. Olom yu gend ne erkelde Johova, olom olom ne pile, Kongan Pengem kanare, alamb sinam wal nangom nepisam ne erim. (Stt. 3:1, 4, 5) Satan, Johova bol yu gend nim e marasin kes mal ende pa, alamb kumbol na bunuman tokes moksom. Embe pile, alamb “yuwei kanka” nakanjip dal, Satan erkelde alamb mambnem kes kanem kanem enam.—Rom 1:25-31.   

4. Johova nalmal mambnem “weieri enem Got” paninamen?

⁴ Johova mambnem “weieri enem Got,” ala olom kanka kanem alamb mambnem wei duwom er ngonom. (Sng. 31:5) Embe enem bar pakero kelde Satan yu gend dom bar tuirom. Ala Johova konganem alamb, yuwei ne mambnem dulto enam ne duwom er ngonom. Embe enem pakerondo, enjep enjep bol pilgi ne kumbol amin sende meim. (Snd. 13:5, 6) Nim Baibel yu duwom erin kunum, Johova mambnem embe mal nim duwom erngom. Johova mambnem aiem alamb porpor karkar enam kapaim, ala kenem dingding ne pra karkar enamen eri. (Sng. 77:13) Embe pile, nim Got mambnem dulto karkar enal ne kapisen mo? (Mat. 6:33) Nim yuwei ambilgi ne, Satan Got bol yu gend nim tane penema keral nepisen mo? Nalmal embe endel?

5. Nim yuwei na mambnem dulto kanka kanen, nalmal tane penem kerel?

⁵ Nim Satan yu gend dom tuiro, yu wei na mambnem dulto karkar enen, nomolpa endel bar wal pende endel bar tane penem kerel. Embe enen bar, “Johova Kongan Pengem enem bar mento molo, olom mambnem aiem dulto karkar enal padon.” Yu embe don, nalmal tane penem kerel? Embe endel, yane wusngam a yu dongal ne Johova ngo, na nim konganem kunum kunum enal panindel. Ala nol pandel bar, yu dongal don tane penema keli alamb poro pilkane enam. Yuwei na mambnem dulto kanka kanen, dongal kerma pa erkelde nim nol pain.

6. Nalmem pande nim Jises Karis kanka kanen, Buk Song 45:4 neori kerem?

⁶ Nalende nim Krais Jises kanka kanen? Mem ka pende pande nim kanka kanen, Buk Song 45:4 neori kerem. (Gere.) Jises, molmene mem, yuwei na mambnem dulto kanka kane karkar erim. Nim yuwei na mambnem dulto kanka kandal, pilkane esmen Krais Jises kanka kanen eri. Jises kumbol dongal  pange, yuwei na mambnem dulto kanka kane wal pende erim mal pile. (Jon 18:37) Jises molmene mem nalmal tanim?

7. Jises molmene mem erim bar, nim nalende kapisen?

⁷ Jises wal porpor erim bar molmene mem tanim. Olom wal porpor erim bar Dam kangem kerma ngom, olom kangem kerma sinal ne narim. (Mak 10:17, 18; Jon 5:19) Molmene wei kem bar nim nalne pisen? E, erkelde nim Got Ngangem kanka kane, mambnem aiem karkar enal ne pisen mo? Embe enamen kawei pismen. Nalernge Jises molmene mem karkar erim? Nalerim, olom Dam kanka kane mambnem aiem karkar erim. (Sng. 18:35; Hib. 1:3) Jises Dam Johova mambnem ka karkar erim. Nim ding mal ere se, Jises bol mand punal nepisen mo?

8. Nalende Jises kenem King meim bar kapisamen?

⁸ Kenem Jises kanka kanamen nalenem, olom King kawei wei. Johova olom makro, Ngangem kongan King enda mal duwom ka erngom. (Ais. 50:4, 5) Ala pilkane esmen, olom kenem kanka kane kenem ne pilgom. (Jon 13:1) Jises nim King ainem meim pile, olom kanka kanjel nepisem. Embe pile, olom weieri kanka kanem alamb—na— senond pandom ga, olom lo aiem kanka kane karkar esim panim. (Jon 14:15; 15:14, 15) Johova Ngangem Jises bol senomon e wal kawei wei!

9. Kristen yipe nol paim, komna Jises pam bol nalmal ding mal paim?

⁹ Jises, olom disaipol moram nepisam ga, nol panam panim. (Mat. 28:19, 20) Nol panam mal olom tanim, ba olom nol pam e jelmal pa, olom disaipol aiem man nol paim e ngonom. (Boks a paim yu Pengem, “ Jises Nol Pam na Olom Disaipol Aiem Man Nol Paim—Nalmal Ding mal Napaim” a ne paim kanjel.) Ba wal pende ding mal paim, Jises nol pa Dam konganem kunum kunum enal ne erim. (Hib. 10:7) Embe ding mal, Krais disaipol walem yipe nol paim, yane wusngam a Got Johova konganem alamb moramen pane yu dongal ninjip, tane penem a kesim. Yipe enjep nomolpa esim bar, enjep enjep kapisim mambnem nasim, Johova kapisim mal esim. E, Jises mambnem karkar esim.

10. Nalende Jises kanka kanen mem erkelde nol pandel?

¹⁰ Nim Jises, Got kanka kanem Nangem-dingeri ne pile, ala kongan King ngom ere kenem kantawol enda ne pilgi don. Jises, olom Dam molmene kem mambnem ta kawei nim. Kenem duwom er pilkane esmen, konorom ga mokun aka ngom, kes tom ga ersi kol kem, ala kumbol ombun sinjip ga yu ne dongal ngom. (Mat. 14:14-21) Yipe olom olom kongrikeisen kantawol ere, nalmal kolta dom mal nim kanen. (Mat. 23:10) Ala mibulto Got Gapman a olom kongan King enda kunum, wal kaka puli ere kenem pakeronda. Embe pile, nim olom kanka kanen mem nalmal tanindel? Olom mambnem erim mal kenem karkar enamen. (Jon 14:21) E, Johova bol yu dongal ne nol panamen.

11. Nalmem kerma ende pande kenem nol paimen? Ala nalende embe esmen?

¹¹ Nalmem kerma ende pande kenem nol panamen? Jises Got lo kerma ende pam ne penem kele embe nim: “Nim Gotnom Johova kumbol pel ngo, kolmem pel ngo, bunuman pel ngo ala dongal pel ngo kanka kanjel.” (Mak 12:30) Yu embe dom bar, nim Got kanka kanjel mal dom mo?

12. Nalende nim Johova kanka kanen? (Piksa pra kane.)

¹² Mem puli pande kenem Johova kanka kanmen. Ende embe mal, nim duwom erkan olom “kolmem” ala “wal kaka kenem simen na wal kaka pase ngimba punom, min olom bol wonom.” (Sng. 36:9; Jems 1:17) Wal porpor  kenem si kapil meimen, kanka mem sem Got kenem ngonom.

13. Jises golo kenem topro siyem kem, nalende wal kawei wei paninamen?

¹³ Jises golo kenem topro siyem kem e, Johova wal kawei wei ende kenem bol erim. Nalende embe nimen? Nalenem, Johova na Jises senojil mem dongal wei pam. Embe pile, Jises embe nim: “Dana na kanka kanim” ala na “Dana kanka kanj.” (Jon 10:17; 14:31) Ala kongar billien puli enjel senonjil mem dongal wei pam. (Snd. 8:22, 23, 30) Dam kankelnge Ngangem wo kenem pilgolo ngnaj ngimbil kerma sim kunum, Got olom kumbol ngimbil wei si nalmal pim mal pile. Johova kenem kankawei wei kanem—e nim pra—embe pile, olom kapil Ngangem dingeri ngo kem wo golo kenem topro siyem nim. Nim na alamb pende pakero kelde kunum kunum kol moram. (Jon 3:16; Gal. 2:20) Mem kerma embe pande, kenem Got kankawei wei kanmen.

14. Nim kol men kunum nawal kawei ende endel?

¹⁴ Johova Ye nalmal nim duwom er kanpolton kunum, olom kanka kanen mem wose kerma pum. Nim kunum kunum olom bol mand mol punal nepisen, ala embe endel kaple enem. Olom yu ne nim dongal ngo, wal erkeli na kapisal padom. (Snd. 23:15, 16) E yu nindel bar mongse ma, mambnem endel bar pra. Nim Johova weieri kanka kanen, nomolpa  enen bar wal pende endel taninda. (1 Jon 5:3) Nim kol men bar mambnem embe endel e kawei.

15. Nim Johova kanka kanen nalmal tanindel?

¹⁵ Johova kanka kanen nalmal tanindel? Yero, yane wusngam a nim Got wei bol yu dongal ne, olom kongan ye moral padon. (Sng. 40:8)Ala nol pain kunum, olom bol yu dongal nin tane penem keren. Yero yubol tonjin mal, nim nol pain e wal kawei ende nim bol min wonom, ala nem kapisen. Nim nomolpa enen bar pulnom bolo Johova kapisim wal enen, nenem kapisen wal naenen. (Rom 14:8; 1 Pita 4:1, 2) E wal kerma ende enen, embe enen bar kol apis kere kawei morol. Ba nalmal ka morol?

16. Buk Song 41:12 dom, alamb enjep kolmem Johova ngo konganem esim, nal topum ka ende ngonda?

¹⁶ Johova mambnem ka paim, alamb wei pilngo wal ngonom Ye. Nim wal ende olom ngon dal, olom kunum kunum puli kes nim ngo yem kera. (Mak 10:29, 30) Yipe ya mala mambnem kes wo kerma punom kunum, olom wal puli nim ngo erkelde kapil morol. Nim nol pain kunum wal ka e ipal pulnombol sinen, ba bulto anjngo si pundol. Embe pile, nim kanka kanen Danem konganem anjngo er pundol. Nim Danem Johova kanka kanen mem wose kerma pundo, olom meim mal aimanj aimanj mol pundol.—Buk Song 41:12 gere.

17. Johova nawal ende tambem enem, nim olom ngondol?

¹⁷ Nim yane wusngam a yu dongal ne, wal kawei ende Danem Johova ngondol. Nim wal kaka puli si kapil men mem olom nim ngonom. Kupul na mal Ersem Ye wal ende tambem enem nim ngondol e, kumbol wei ngo olom konganem endel. (Jop 1:8; 41:11; Snd. 27:11) Nim kol men kunum kongan embe endel e kawei wei. Nim Johova kanka kane olom konganem enal ne pile nol pain.   

18. Nenem nal ki pende ngondol?

¹⁸ Nim nol pandel ma ne ki sim kunum, nim yu pundom nalmal ngonon? Nenem mongse  ki e pundom ngondol. Nenem ki ngo ‘Na nalende nol napai a nindel’ bar nim pakeronda. (Apo. 8:36) Mem talende kenem yero yubol tonjin buro pisel. 1. Nim yuwei na mambnem dulto kanka kanen. Nimnem ki embe ngondol, ‘Kunum ende sende alamb porpor, yuwei ne mambnem dulto enam na kanal nepis mo?’ 2. Nim Jises Krais kanka kanen. Nenem kin embe ngondol, ‘Got Ngangem na King aina moro olom mambnem aiem na karkar enal kapis mo?’ Ala 3. Wal kerma wei ende pase ngimba punom, nim Johova kanka kanen. Nenem ki embe ngondol, ‘Na Gotna Johova konganem ere, erkelne olom kapisa nepis mo?’ Ki porpor e pundom, kaple enem na enal panindal, nalende nol napain? Nalende kui enen?—Apo. 16:33.

19. Nalende nim nol kamkam napa pira enen? Yu eken ende pile (Jon 4:34)

¹⁹ Nim nol kamkam napa pira erin dal, Jises yu ekin ende erim e pile. (Jon 4:34 gere.) Jises Dam kapim mambnem enal ne pim e, mokun nonamen ne kapismen bol ding mal panim. Nalernge embe nim? Nalenem mokun kenem pakeronom. Jises pilkane erim, Johova kenem wal ende eya dom kapaim kenem pakeronda. Wal ende kenem erkes enda panda Johova kenem eya naninda. Wal ende kenem enamen Johova kapisem, nol paiya dom. (Apo. 2:38) Weieri, dom yu nim karkar ere nol pandal, pakerondo wal kaka nim bol min wonda. Nim mokun ka ende gal ngom pira naere wamnam nondal, nalende nol wamnam napa pira enen?

20. Yu duwom miro enamen bar, nal yu ende boltonamen?

²⁰ Nalende ga pende pira ere nol napaim? Ga puli ki e pundom ngo embe ninam, “Na nol panal erkun er namei.” Ki e pundom weieri embe ngonam nalenem, nem yane ne Johova ngo nol panal padon e, wal kerma wei ende enen. Embe pile, enjep kunum pende kele bunuman manero pile, wal pende erkun enam. Yipe nim nol panal nepin dal, nawal pende ere erkun endel? Ki e yu duwom miro enamen bar pundom sinamen?