1-2. (a) Nawal Pol bol min wom kunum pepe bollo, Epesis ga ngom nalernge bollo enjep ngom? (b) Nal ki pende kenem omukro kanamen?

 APOSOL Pol Rom gara karpos pa mom kunum, pilgi ding angam ambam man kumbol er dongal enal nepim. Olom pu enjep kanja kaple narim pile, pepe boll ngom. Pepe ende kongar 60 mo 61 C.E. kunum bollo Epesis ga ngom.—Efe. 1:1; 4:1.

² Kongar 10 yero, Pol Epesis pu kunum pende kele, Baibel yu neori kele, yu ka duwom ere alamb ngom. (Apo. 19:​1, 8-10; 20:​20, 21) Olom angam ambam man kankawei kanim pile, pakerondo Johova bol pilgi ne kamoram ne erim. Kristen Got oiro sim monjup bar, nalernge emil mem na au mem pane pepe boll ngom? Pilsinam yu boll ngom bar Kristen porpor, nawal duwom enam? Ki embe mal pundom omukro kandpe.

EMIL MEM SIKELE SE AU MEM TUWAL WONJUP

 3. Pol pepe bollo Epesis ga ngom bar, nal yu tal ende konganem erim?

³ Pol pepe bollo Epesis Kristen ngom bar embe nim: “Komna enem emil erim bar monjup, ba yipe aunim bar meim panim.” (Efe. 5:8) Pol yu emil mem na au mem pane bom bar, Epesis ga komna mambnem er monjup sikele mambnem kol sinjip e pilnim. Nalernge Pol Epesis ga “komna emil erim bar tuwalto monjup,” panim yu omukro kanamen.”

 4. Nal wusngam pende Epesis ga lotu wal, emil tuwalto mal monjup?

⁴ Lotu gend emil tuwalto monjup. Pol pepe bollo Epesis ngom ga, yuwei ende duwom er nakane Kristen ende namojup kunum, Epesis ga lotu gend enjep karpos ernge, mambnem gend karkar ere kujoman enjip. Epesis taun kerma sembar alamb porpor monjup, tempol tau se amb got gend Artemis lotu  erngojup, alamb porpor ele monjup got kerma 7-poro mal yemyem mol punjup dongal kerma pam, ende amb got e nepinjip. Alamb tempol a pu got gend er mokjup lotu ere ngojup. Amb got Artemis na got pende enjip alamb, er moklo kubollo ku kerma sinjip. (Apo. 19:​23-27) Ala, Epesis taun tuwalto-kujoman enjip, kangem pam alamb porpor pilkane enjip.—Apo. 19:19.

 5. Nal wusngam pende Epesis ga, pilgi wal emil tuwalto monjup?

⁵ Mambnem dulto karkar nare emil tuwalto monjup. Epesis ga mambnem kes enjip kangem pam alamb poro pilkane enjip, ba enjep kisal wei nagonjup. Enjep tiyata sembar wal er kapisam ne enjip bar na, lotu gar makerojup bar kunum kunum yu jengimb pasdia enam yu simin kel nine enjip. (Efe. 5:3) Alamb puli Epesis monjup, “enjep mambnem kes pambar tuwal pu,” yu tokele kisal nagonjup, “ala mambnem kes ere ngimbil sinsam bar, tuiro sikeram kanapinjip.” (Efe. 4:​17-19) Epesis ga yero yuwei duwom nare kunpam na napam wal pilkane nanjip kunum, alla enjip bar kumbol yu napam mambnem pende enjip bar Johova kapisa mo kanapisa pilkane nanjip. Mem embe pange Pol nim, “enjep bunuman a emil tuwalto molo, kolmem Got kin wombar kolbar monjup.”

 6. Nalernge aposol Pol Epesis ga monjup bar, enem pi “audom” bar meim panim?

⁶ Epesis ga pende, emil erim bar monjup sikele seori wonjup. Aposol Pol pepe bollo enjep ngom bar embe nim “komna enem emil er sem bar monjup, ba yipe enem aune seim bar meim.” (Efe. 5:8) Yipe Johova Yuwom Baibel a meim karkar esim bar, dop mal do aune enjep kolta dom. (Sng. 119:105) Epesis ga e lotu gend tuwal molo, mambnem kes jengimb tom karkar ere ere enjip sikenjip. Enjep “Got mambnem karkar ere,” ombol wei ere Johova lotu erngo kerambe kapisa ne enjip.—Efe. 5:1.

 7. Epesis Kristen enjip mal, kenem nal wusngam wal pende ding mal enjin?

⁷ Kenem yuwei duwom ere na kanjin kunum, Epesis ga enjip mal lotu gend karkar ere, emil ersem bar tuwalto monjin. Kenem pende lotu gend kunum kerma korsi, makerojup bar tuwal  punjin, ala mambnem kes enjip bar tuwal pupo enjin eri. Ba kenem Johova lo dulto karkar ere, kes na kapam wal kanjin kunum mambnem kol sinjin. Kenem nomolpa esmen bar, olom kapisem karkar esmen. Embe esmen bar, wal ka puli si kapil meimen. (Ais. 48:17) Ba ombun pende anjngo kaumon eri. Kenem kulu emil erim bar bulngo sikejin weieri wakro sikele, “kunum kunum kol wanamen bar au mem ngalem mal moramen.” Nalmal embe enamen?

EMIL MEM TUIRONDOL

 8. Efesus 5:​3-5, paim bar kanmen, Epesis ga nal mambnem tuironam pam?

⁸ Efesus 5:​3-5 gere. Epesis Kristen ga emil erim mal tuwal molo, mambnem kes enjip weieri tuiro sikerem pamdal, kunum kunum Got kapisem mambnem ombol ere karkar enam pam. E pasdia mem tuwal pu enjip mongse e ma, yu jengimb nine enjip pra wakro sikeram pam. Embe pile, aposol Pol Epesis ga nengom, mambnem embe karkar esim ga, “Krais na Got Kingdom a tuwal napunam panim.”

 9. Nalende wal ende erkelde kenem pasdia mem tuwal punamen panda, kane tuironamen?

⁹ Kenem pra wal ende erkelde mambnem kes tuwal punam panda wal kane, ombol ere tuironamen. “Kenem enjep bol tapro emil enem bar molo, kongan kes esim bar tuwal napunamen ma.” (Efe. 5:11) Kunum puli, wal pende min wombar weieri pilkane esmen, alamb ende dungol a wal kanem, komol a pisem, mo olom mambnem kes enda yu jengimb dom erkelde, onom mal boro mambnem kes enda. (Stt. 3:6; Jems 1:​14, 15) Kantri ende, anjgen man puli intanet a pu sosol midia wusngam a,“ende ende bol tex mesis bollo yemyem er yu ninjip.” Yero enjep pilgi er dongal enda yu ninjip. Ba kunum pende wopungo, kikine Johova kanapisa yu ninjip. Enjep yu puli ninjip, pasdia mem yubol tonjup. Gurup ele tuwal monjup ga pende bulto embe ninjip, yu jengimb embe mal ninjin erkelnge pasdia mem tuwal punjin.

10. Seten yu gend ne kelde kenem nal enamen nepisem? (Efesus 5:6)

¹⁰ Seten mal pal kantawol enem pile, erkelde kenem yu gend pilgi ninamen ne enem, Johova jengimb meim, alla paim padom wal alla napaim nepisamen ne enem. (2 Pita 2:19) Mambnem embe enem bar, kenem malmal nasmen! Kipkes Seten-mambnem ende kombe erwo piwonom e, erkelde alamb alla paim na alla napaim kanpol naronam ne enem. (Ais. 5:20; 2 Kor. 4:4) Mupi puli kesim bar, televisen, na websait wusngam a erkelde Johova lo ma padom wal, alla napaim nepisam ne enem! Seten erkelde ya mal mambnem kes porpor esim, kenem enamen bar alla napaim, ombun nasinamen, er kapil moramen ne enamen nepisem.—Efesus 5:6 gere.

11. Enjela bol wal min wom kenem nalmal taninde, pilsinamen yu Efesus 5:7 a paim, konganem enamen? (Piksa pra kane.)

¹¹ Seten kapisem alamb erkerambe kenem Johova lo karkar enamen pesil panda alamb, bol tapronamen nepisem. Embe pam pile, Pol Epesis ga bol embe nim: “Embe pile, enem enjep bol tapnaronam,” e, Got dungola mambnem dulto karkar nasim alamb. (Efe. 5:7) Kenem pilkane enamen kunum dingding ne anj dunglom kele, alamb puli bol tapromon. Ende, intanet a pu sosol midia wusngam a tapromon, e komna Epesis ga wusngam e karkar nanjip, embe pile kenem kanpol weironamen. Pilgi ding ambajen Enjela, a Esia meim, sosol midia tuwal pu omukro pilkane erim, e wal keswei kenem ombun ngonda wal pam, olom embe nim: “E kilmal ende okul erpaim, kikine erpu nim bunuman tokes moksa, na omukro kanj wusngam ele, Baibel yu dom bol  molmene nakesim alamb bol ‘senonal’ kanapam. Na pulnombol nomolpa erind bar, wal erkelne Johova kanapisa wal KAPLE pam er nepinj.” Sangiyo wei ninamen, kanka mem sem elda walem, Enjela pakerongo bunuman kol sim. Olom embe nim: “Na yipe Johova bunuman paim mal karkar ere, sosol midia konganem enal kanapinj.”

12. Nawal kenem pakerondo alla paim na alla napaim wal kanpolto, Johova lo karkar ka enamen?

¹² Kenem ombol wei ere, mala alamb mambnem kes porpor kapaim nepisim, bunuman tuironamen. (Efe. 4:​19, 20) Kenem kes na kapaim wal kanpol weiromon: ‘Embe pile, kenem kenem ki embe ngonamen, na kanpol weiro kongan ding ga, sukul ding ga, mo ga pende Johova lo paim bar molmene nakesim ga bol, tapnaronal ne erind mo? Kunum pende ne na alamb mambnem kes era nim kunum, kumbol dongal pande Johova lo karkar erind mo?’ Ala 2 Timoti 2:​20-22, dom mal, kongrikeisen Kristen tuwalto kenem pilgi ding ga bol tapronamen bar, kanpol weironamen. Kenem pilkane enamen ga pende erkerambe, kenem Johova konganem ere olom bol ka namoramen.

KOL WANJEL BAR “AU MEM NGALEM MAL WANJEL”

13. “Kol wanjel bar au mem, ngalem mal wanjel” panimen e, yu mem nalmal paim? (Efesus 5:​7-9)

¹³ Pol Epesis Kristen yu ne dongal ngom bar, emil mem mongse bulngonam pananim, anjngo “au mem ngalem mal kolwanam panim eri.” (Efesus 5:​7-9 gere.) Pol yu embe nim mem nalmal paim? Mem embe, kunum kunum kolwane nomolpa enamen bar, Kristen wei mal moramen nepilnim. Wusngam ende embe enamen, Baibel gere Yuwom duwom ere, Baibel-buk na nus meim mak pakle mane omukro kanamen ne enamen. Ala wal kerma wei paim, Jises Krais mambnem ere, alamb yu duwom erngom mal mane omukro kanamen, nalenem, olom ya “mala alamb porpor au mem meim.”—Jon 8:12; Prov. 6:23.

14. Got murmulom dongal mo oli spirit kenem nalmal pakeronda?

¹⁴ Got murmulom dongal mo oli spirit pakerondo, “kenem au mem ngalem mal moramen.” Nalende embe nimen? Nalenem, yipe mala mambnem kes pik weironom bar, kenem Got bol kamoramen amin napaim.  (1 Tes. 4:​3-5, 7, 8) Murmulom dongal kenem pakerondo, mala alamb sape na bunuman aijep, Johova wal omukronom mal ding mal narom kenem karkar nanamen. Murmulom dongal kenem pakerondo, “mambnem ka porpor na mambnem dulto karkar enamen.”—Efe. 5:9.

15. Nal wusngam pende kenem Johova murmulom dongal mo, oli spirit sinamen? (Efesus 5:​19, 20)

¹⁵ Wusngam ende kenem oli spirit sinamen, yane ne Johova ki sinamen. Jises embe nim, “alamb Johova ki sinam murmulom dongal ngonda panim.” (Luk 11:13) Ala kenem kongrikeisen Kristen make paim bar pu, Johova kangem min kesmen kunum, murmulom dongal simen eri. (Efesus 5:​19, 20 gere.) Embe pile, Johova murmulom dongal kenem pakerondo, nomolpa esmen bar kunum kunum Johova kapisem mambnem karkar enamen.

16. Nawal kenem pakerondo bunuman karkar ere, wal omuk karonamen? (Efesus 5:​10, 17)

¹⁶ Kenem nomolpa esmen bar wal kerma ende omukro enamen pamdal, “kunum kunum Johova kapisem mal karkar ere wal erpe,” olom kapisa. (Efesus 5:​10, 17 gere.) Kenem Baibel kolta yu meim karkar ere wal enjin dal, Got bunuman paim mal karkar ere wal esmen. Kenem mambnem embe karkar enjin dal, wal omuk kawei ronamen.

17. Kenem nalmal anj dunglom konganem kawei enamen? (Efesus 5:​15, 16) (Piksa pra kane.)

¹⁷ Epesis Kristen ga Pol pilsinam yu ende nengo, enem anj dunglom konganem kawei eiya nim. (Efesus 5:​15, 16 gere.) “Kenem opyem ye kes,” Seten kapisem mala wal ersi non moramen bar anj dunglom puli kele, Johova konganem nanamen nepisem. (1 Jon 5:19) Kristen ende nomolpa enem bar wal, sukul kerma, mo ku kongan si ngimba kele, Johova konganem kumbol wei ngo nanda onom wei paim. Olom wal embe mal si ngimba kemdal, e taninde pilkane esmen mala wal si ngimba kerem. Wal embe mal sinamen alla napaim, ba nomolpa esmen bar si ngimba wei nakeramen. Kenem kol wanamen bar “au mem ngalem mal  moramen” nepinjin dal, “[kenem] anj dunglom konganem kawei enamen,” e embe mal, wal kerma paim wal si ngimba wei keramen.

18. Pilgi ding angjen Donol, nawal pende ere anj dunglom konganem ka enal ne erim?

¹⁸ Wusngam pende kansi Johova konganem kumbol ngo, puli enal ne endel. Donol, Saut Aprika meim embe erim. Olom embe nim: “Na nomolpa erind bar omukro kane, kumbol a wei pile yane ne Johova ngo, pakeroi nim konganem puli enal panind. Na ku kongan ende kansi enal anj dunglom sende, Baibel yu neori pra keral ne yane nind. Yane nind bar Johova na pakerongo, kongan embe ende kansind. Bulto, na ambina bol Johova konganem kunum-kunum enambel ne pulnombol enjil.”

19. Kenem nalmal ere anjngo “au mem ngalem mal kol wanamen”?

¹⁹ Aposol Pol pepe bollo Epesis Kristen ga ngom, enjep weieri pakerongo Johova dungol a Kristen ka monjup. Ala Johova murmulom dongal bu ngongo pilsinam yu nengom, kenem pra pakeronom eri. Yu omukronjin bar pilkane esmen, wal erka pisamen esmen bar na tapromon alamb bol bunuman ka karkar ere kanpolronamen. Kenem Baibel yu duwom kunum kunum enamen pakerondo, au mem yuwei bol wonom karkar erpe, kunum kunum wal enamen bar kolta ninda. Ala wal kerma wei paim, Johova murmulom dongal mo oli spirit kenem pakerondo mambnem ka embe mal karkar enamen. Pol pepe bollo Epesis ga ngom kenem karkar enjin dal, wal porpor enamen bar, Johova bunuman paim mal karkar ere wal omukropo olom kapisa. Kenem mambnem embe mal enamen pakerondo, ya mala emil mem bulwei ngo sikele, au mem tuwal anjngo punamen!