1-2. Nal wusngam pende kenem bol mambnem dulto ernangonam?

 JISES yu ekin erim bar amb kangil ende pane yubol tom, amb e alamb olom kin mambnem napam mal erngonjup, embe pile kunum kunum jas ki si na pakera nim. Weieri, amb kangil e yubolom Jises disaipol aiyem man pake weirom, nalerim, enjep kunum alamb puli mambnem dulto karkar nare, alamb ende erkes erngongo enjip. (Luk 18:​1-5) Yubol e, kenem kunum wal kerma paim, nalenem, kenem porpor mambnem dulto ernangom pilkane esmen. Wusngam pende pra mambnem napaim mal erngom eri.

² Yipe kenem kunum alamb puli, mambnem ding mal karkar nare, mem kanasim, ala enjep enjep nepisim eri. Kenem kin mambnem napaim mal enjip dal, malmal nanamen. (Ekl. 5:8) Ba pilgi ding angjen ambanjen man, kenem bol mambnem napaim mal esim kunum, kumbol ombun wei simen. Pilkane esmen angjen ambanjen man yuwei bol opyem nasim, ba enjep sin nganja paim. Embe pile, Jises na ga pende alamb enjep bol opyem er mambnem dulto ernangonjup kunum nalmal enjip, kenem duwom enamen mal kanamen. Ende kenem bol opyem ere mambnem napaim mal erngom dal, wimuk wamnam ninamen. Pilgi ding ga kin wimuk wamnam nanimen mem nalmal taninamen! Alamb ende kongrikeisena tuwal nameim, na ende kongrikeisena tuwal meim ga, nim bol mambnem napaim mal esim kunum, Johova nal nepisem? Kenem kin wal min wonom olom pilkane enem mo?

3. Johova konganem ga mambnem napaim mal erngonambe ombun kauwum, olom enjep pilngonom nalmal pilkane esmen?

³ Johova, alamb kenem bol mambnem ka enam nepisem, ba alamb kenem kin mambnem napaim mal esim olom pilkane  enem. “Johova mambnem dulto kanka kanem.” (Sng. 37:28) Jises nengondo kenem pilkane esmen, kunum kun sende Johova “mambnem dulto. . . wamnam” simin kera panim. (Luk 18:​7, 8) Mand wei enem olom ya mala ombun duwom na mambnem dulto karkar nasim, to porwei nesikere ombun ala napanda.—Sng. 72:​1, 2.

4. Johova yipe kenem pake nalmal tonom?

⁴ Johova yipe ombun paim to porninda ne kui meimen kunum, pakerondo ende kenem kin mambnem dulto ernangom ombun kaumon. (2 Pita 3:13) Kenem kin mambnem napaim mal erngonam kunum, nalmal ombun kauwo tomene keramen mal duwom ka erngonom eri. Johova Ngangem wusngama, kenem nalmal ere mambnem napaim mal erngonam, ombun kaunamen mal taka nim. Mambnem napaim mal erngonam kunum, bunuman ka karkar ere ombun kaunamen mal, olom Yuwom Baibela meim bar ne kenem ngonom eri.

MAMBNEM DULTO ERNANGONAM KUNUM NALMAL ENDEL KANPOL TONDOL

5. Ende mambnem dulto ernangonam kunum, nalende kanpol wei tonamen?

⁵ Ende kenem bol mambnem napaim mal erngom kunum keswei pile, bu puli kesmen. (Ekl. 7:7) Pilgi dongal pam Johova konganem ye tal, Jop na Abakuk embe ding mal pinjil eri. (Jop 6:​2, 3; Hab. 1:​1-3) Embe pisamen alla napaim, ba kenem kin mambnem napaim mal esim ga, enjep bol mambnem kes erngo yem kele neninamen kanpol wei tonamen.

6. Apsalom mambnem erim bar kenem nawal duwom esmen? (Piksa pra kane.)

⁶ Ende kenem bol mambnem napam mal erngom dal, kenem mambnem kes erngo yem keramen nepisamen. Ba kenem mambnem kes erngo yem kenjin dal, ombun wose kerma wei punda. Ende, King Depit ngangem Apsalom bol wal min wom mal omukro kanamen. Olom ambam Tamar, angam Amnon ngunjum bar popol keswei si mambnem napam mal erim. Mosis Lo pam mal, Amnon mambnem embe erim bar gora kun pam. (Wkp. 20:17) Weieri, Apsalom kumbol mul keswei sim, ba Amnon to gom bar alla erim.—2 Sml. 13:​20-23, 28, 29.

7. Buk song bom ye mambnem dulto karkar nanjip alamb, enjep bol wal min wom kanim kunum nal erim?

⁷ Olom pilkane erim mambnem dulto karkar nanjip ga ombun nasinjip. Embe pile, kunum pende ne kenem mambnem dulto karkar ere wal esmen mem kanapaim nepisamen. Buk song bom ye wal pende pilkane erim,  mambnem dulto karkar enjip ga, alamb enjep erkes erngo mem napam mal enjip, ba mambnem kes enjip ga nomolpa enjip bar kapile monjup. Olom yu pende embe nim, “Mambnem kes enjip alamb, nomolpa enjip bar pesil napam.” (Sng. 73:12) Alamb mambnem dulto karkar nanjip kanim bar kumbol ombun si, Johova lotu enamen mem kanapaim pane, embe nim: “Na wal e bol bunuman puli kele, mem kanpol tonal ne erind, ba pesil paim.” (Sng. 73:​14, 16) Weieri, olom pilkane ere embe nim: “Ba mand wei erim, na boro; wusngam dulto wakrond keru nim.” (Sng. 73:2) Wal embe ding mal, angjen Albeto bol min wom mal omukro kanamen.

8. Mambnem dulto karkar nare yu napam mal ninjip, angjen ende bol nal erim?

⁸ Angjen man pende Albeto kongrikeisen ku, kunumb nonom paninjip. Embe ninjijp erkelnge olom kongrikeisena kongan pende ere mom sikem, ala angam ambam man kongrikeisena monjup olom kunumb kun nom ye nepile, olom bol pilgi naninjip. Olom embe nim, “Na kumbol ombun wei si, kanapinj.” Embe pim erkelnge Johova kin senom mem dongal napange, kongrikeisen make napum. Ala kongar 5-poro pilgi wal dongal namom. Yubol e paim bar pilkane esmen, ende kenem bol mambnem napaim mal erngonam kunum, kumbol ombun sinjin dal, kenem bol wal ding mal min wonda eri.

 MAMBNEM NAPAM MAL ER JISES NGONJUP OMBUN KAUWUM MAL KAUDOL

9. Mambnem napam mal pende enjip bar, Jises nalmal ombun kauwo akilgi nim? (Piksa pra kane.)

⁹ Jises mambnem napam mal erngonjup, ombun kaunamen mal Jises ta kawei nim. Olom pemili na alamb pende mambnem napam mal erngonjup, ombun nalmal kauwum kandpe. Olom maiyam ding ga olom peng kes meim paninjip, ala lotu pengem enjip yira komb olom kipkes dongal ngondo wal porpor enem paninjip. Embe pile enjep olom sip Rom soldia walem angela kele, yukulo to nganj ngimbil kerma weingo, ala sip ond kuna to gonjup. (Mak 3:21, 22; 14:55; 15:​16-20, 35-37) Jises bol mambnem napam mal erngonjup ombun kerma wei kauwum, ba olom sin nare ala mambnem kes ende erngo yem wei nakem. Jises mambnem erim bar nawal duwom esmen?

10. Jises kin mambnem napam mal erngonjup, ombun nalmal kauwum? (1 Pita 2:​21-23)

¹⁰ 1 Pita 2:​21-23 gere. a Ende kenem bol mambnem napam mal erngonam kunum, kenem ombun nalmal kaunamen mal Jises ta kawei nim. Olom nal kunum yu ninda, ala nal kunum yu naninda pilkane erim. (Mat. 26:​62-64) Olom bol yu gend porpor ninjip neyem wei nakem. (Mat. 11:19) Olom to erkes enjip ga bol yu nim kunum, yukes ende enjep bol wei nanim. Jises kunum kunum nal yu-ninda kanpol weirom, nalerim, olom “mambnem dulto karkar ere wal omukronom Ye angela kem.” Ala Jises kin mambnem napam mal enjip, Johova pilkane erim. Embe pile olom pilgi wei nim, Johova kunum kun sende mambnem dulto karkar nanjip ga to porwei nesikera pam.

11. Nal wusngam pende kenem yu ninamen bar kanpol tonamen? (Piksa meim pra kane.)

 ¹¹ Ende kenem bol mambnem napam mal erngonjup dal, Jises mambnem tanim mal karkar enamen. Mambnem napam mal erngonam pende kerei, penema pande pilkane ere kansikeramen. Ba alla kerma erngonam yune yem keramen bar ombun wo kerma punda pamdal, pra kansikeramen. (Ekl. 3:7; Jems 1:​19, 20) Kunum pende ne wal ende napanda mal enam kane yu ninamen, mo yuwei kantawol enamen ne yu ende ninamen eri. (Apo. 6:​1, 2) Kunum embe yu amin ne alamb ende pilngo, yu ninamen.—1 Pita 3:15. b

12. “Mambnem dulto ere wal omukronom Ye,” kin nalmal pilgi ninamen?

¹² Jises mambnem erim mal karkar ere, kenem kenem bol pilgi ne ombun porpor, “mambnem dulto karkar ere wal omukronom Ye” angela keramen. Kunum pende ne alamb kenem erkes erngonam mo mambnem napam mal erngonjup dal, wal min wonom Johova pilkane enem nepisamen. Kunum kun sende Johova ombun e to porninda nepilgi wei ninamen. Johova ombun porpor erkun enda nepilgi ninjin dal, alamb ende bol kumbol mul si kankes nakanamen. Kumbol mul sinamen erkelde mambnem napaim mal ere, wopil meimen mem semene pundo, ala Johova bol senomon mem tokes moksamen eri.—Sng. 37:8.

13. Nawal kenem pakerondo mambnem napam mal erngonam ombun anjngo kauwo, wimuk wamnam naninamen?

¹³ Weieri, kunum pende ne Jises mambnem erim mal, kenem kun wei enamen kaple nanda. (Jems 3:2) Alamb ende kenem bol mambnem napam mal erngonam erkelde keswei pile, kumbol ngimbil kerma wei si, nomolpa esmen bar ombun e anjngo kau moramen. Ombun embe nim bol weieri min wom pamdal, pilgi wei nindel ombun min wonom Johova pilkane enem. Mambnem dulto ernangom ombun kaunon Jises pilkane enem, nalenem, olom ombun embe mal kauwum eri. (Hib. 4:​15, 16) Mambnem pende enamen mal Jises taka nim. Ala mambnem napaim mal erngonam ombun kauwo, wal pende enamen mal Johova Yuwom Baibela meim, kenem pilsinamen yu ka ne pakeronom eri. Baibel buk Rom, wes tal paibel kenem pakeronda mal kanamen.

“ENDE ALLA ERNGONAM ERNGO YEM NAKEREL”

14. “Alla erngonam erngo yem nakeramen” panimen, nalmem pande embe nimen? (Rom 12:19)

¹⁴ Rom 12:19 gere. Aposol Pol Kristen ga nengo embe nim, “alla erngo yem kera,” Johova konganem paim panim. Embe pile kenem ombun pal Johova angela kelpe, olom kapisem mal kunum kun sende ombun pal to porninda. Angjen ende alamb olom kin mambnem napam mal erngonjup ombun kauwum embe nim: “Na kumbol mul sind mem tomene keral pam, ba embe enal amin wei napam. Baibel Rom 12:19 yu paim na pakerongo wimuk nane, Johova kin pilgi ne kui erind.”

15. Nalende Johova ombun erkun enda ne kui moramen? Yubol to.

¹⁵ Kui molpo Johova ombun erkun enda kunum, kenem pake sinamen. Embe enjin dal ombun kerma ende min wondo kes pile, kenem kenem tomene keramen nepismen bu wakronamen, Johova pakeronal ne ernombro meim. Olom kenem nengo embe dom; ‘Enem kui molo mambnem dulto nasim, na angela kerambe erkun enal.’ Alamb kenem kin mambnem napaim mal erngom, “Johova erkun enal padom pilgi ninjin dal,” kumbol mul nasi akilgi nemolo ombun porpor olom angela kelpe, kunum kun sende erkun enda nepisamen. Angjen Jon yero yubol tonjin olom pake sim mal embe nim, “Na kui moro Johova na pakero ombun erkun enda e kapa, nam ombun erkun enal nepinj e ngom.”

 “MAMBNEM KA KUNUM KUNUM ERE MAMBNEM KES TOMENE KEREL”

16-17. Yane kenem nalmal pakerondo, “mambnem ka kunum kunum karkar ere mambnem kes tomene keramen”? (Rom 12:21)

¹⁶ Rom 12:21 gere. Pol Kristen ga nengo “kunum kunum mambnem ka ere mambnem kes tomene keram” panim. Jises min Komngoma molo Yu nim kunum embe nim: “Enem opyem ga anjngo kanka kane, ala enem kin mambnem kes erngom ga yane nengoya,” nim. (Mat. 5:44) Weieri, olom mambnem embe karkar erim. Pilkane esmen Jises ombun keswei kauwum, olom to erkes ere nganj ngimbil kerma weingo, bulto Rom soldia walem olom ond kuna nel tonjup. Jises er keswei erngonjup olom nganj ngimbil kerma wei sim, ba ombun kauwo akilgi nim. Ombun kauwum mal kenem buro pisamen kaple wei nanda.

¹⁷ Jises ombun kerma wei kauwum ba, Johova kin pilgi ne kamom. Soldia ga mambnem kes enjip bar ombun sinam kun pam, ba olom enjep bol yukes ende nanim. Olom yane ne embe nim: “Dana, enjep alla wakro, enjep esim wal kanpolnarom.” (Luk 23:34) Kenem yane ne Johova ngopo, mambnem napam mal er kenem ngom ga pakera ninamen. Embe enamen kenem pakerondo kine molo kumbol mul puli nasinamen, ala enjep bol kes pismen bu wakronamen.

18. Albeto na Jon mambnem napam mal erngonjup, yane ninjil nalmal pakerongo ombun kaujil?

¹⁸ Yu duwom pi esmen bar yero omukro kanjin, yane ninjil angjen tal e pakerongo mambnem napam mal erngonjup ombun kaujil. Albeto embe nim: “Angna man na bol mambnem napam mal erngonjup ga yane nengond. Johova kunum puli ki si, na pakeroni mambnem napam mal erngom kumbol mul nasi, ala buse napisal panind.” Albeto embe erim pakerongo, yipe kawei pile kumbol palngo Johova lotu erngonom. Jon embe nim: “Angna man na bol mambnem napam mal erngonjup, kunum puli na enjep bol yane nengond. Embe erind Johova na pakerongo angna man bol kumbol mul nasi, enjep alla wakrond. Yane embe nind na pakero bunuman amin ngondo kapile mei.”

19. Kenem nawal ende erpu porninda kunum punamen? (1 Pita 3:​8, 9)

¹⁹ Kenem yipe kunum pordom bar meimen, alamb kenem bol mambnem napam mal erngonam. Nawal ende kenem bol min wonda, yane ne Johova pakera nimen mem wak naronamen. Ala Jises bol mambnem napam mal erngonjup ombun kauwum mal kenem karkar ere, anjngo Johova kolta yu Baibela meim karkar enamen. Embe enjin dal, weieri pilkane enamen Johova kenem pakero wal kawei ngonda.— 1 Pita 3:​8, 9 gere.