Pol embe nim: Kil kawei wei pinjil! E Novemba 1985 kunum, kil misinari kongan pulnombol enambel ne punjil—e Liberia, West Aprika tuwalto. Kil punjil balus pu kulu Sinegal pam. Enni embe nim, “anj dunglom wan auwa wopundo,” “Liberia tuwal punambel!” Ba yu mulom embe ninjip: “Liberia punam newonjup alamb balus sikele semen puya ninjip. Alamb pende gapman tomene keram ne enjip bar ombun pam.” Kin Liberia tuwal punamen kaple narim, kunum 10-poro kil misinari walem kulu Sinegal monjup bar monjil. Nusa pinjin Liberia alamb pulikes gonjup, ala kepyu pakle yu to keram alamb gapman opo-gan to goram paninjip.

Enni embe nim: Kil alamb ende kulu kanka kane wanam nepum mal embe napunjil. Na ngal kerei mol yaumin wond kunum, alamb na kisal goron amb paninjip. Na malma yemto molse yemto punal bar kisal golgolo erind! Liberia ombun kerma pam ba kil punambel bar kapinjil.

Pol embe nim: Kil Enni bol Inglend yemto west 8-kilomita jeljel monjil. Ele kil kangjip bar monjil. Kil sukul pornim kunum bulto kongan painia ai enjil, na dana mana na Enni mam yune kil dongal ngonjup. Kil Johova konganem kunum-kunum enambel ne kapinjil bar enjep kil pake weironjup. Na kongar 19-mond kunum wusngam akrongo se Betel pund. Kongar 1982, kil Enni bol bolsinjil kunum bulto, olom wo na kolngongo kongan ai enjil.

Enni embe nim: Kil Betel kapinjil, ba kulu ende kongan alamb puli namoram bar pu pakeronambel bunuman kerma pam. Betel tuwalto komna misinari kongan erwanjip ga bol yu ninjil erkelnge, kongan embe enambel nepinjil bu wose dongal pum. Kongar talende tuwalto kunum kunum emilpal kil bunuman pam mal yane ne Johova ngonjil. Embe pile kongar 1985 kunum, kil sukul Giliet klas 79 punambel paninjip kunum kawei pinjil! Sukul porninge kil se Liberia, West Aprika punambel paninjip.

Pol embe nim: Ombun pange balus Liberia napunjup, ba ende komna kunum punda erim bar kil punjil. Alamb kisal golo piriari nawanjip, kepyu pam eri. Maketa kar ende gur kerma wei nimninge alamb kalngan si ke punjup! Kil kisal mem tomene kerambel ne kunum kunum emilpal, Buk Song tambem pende ger  kanjil. Ba kil kongan sinjil weieri kanka kanjil. Enni misinari kongan erim, alamb garjep kol wan yu neori kem, na Betel John Charuk a bol kongan ai enjil. Olom kongan sape pam na pilgi ding angam ambam man nomolpa enjip bar kanpoltom olom pakerongo, na wal duwom ka erngom.

Enni embe nim: Nalernge kil kamkam se Liberia punambel ne kapinjil? Nalerim, pilgi ding angjel ambanjel man pilngo embe enjil. Enjep mambnem kapam, alamb ende bol tapronam kapinjip, ala pilgi dongal pam eri. Kil enjep bol tapkaronjil; pemili kol mal monjin. Ala pilsinambel yune ngonjup kil pilgi erdongal erim. Baibel yu neori kongan enjin wo kawei pum. Gardam nim kamkam enjep sikele sepndel kanapinjip! Alamb puli pilgi wal ki pam, malma jeknema yubol to nepisam ne enjip. Kin enjep monjup bar tuwal pu yu ninamen onom pam. Kin yu duwom erngonamen alamb pulikes wei monjup, porpor bol erkaple enamen amin napam. Kulu ele Baibel yu pisam kapinjip alamb pulikes wei monjup!

Pol embe nim: Kongar 4-poro kantri ele kumbol amin sem, ba kongar 1989, kunum ombun kerma ende min wom—kantri ele opnganmal pam. Kongar 1990, Julai 2, kunum gapman bol nganmal enjip alamb Betel sembar mand sem kulu puli tosi kantawol enjip. Oll talende pel kin pemili aijen, wol etkota, na alamb ende bol yune napinjin. Mambnem kes puli min wom, mokun aka tambem erim, ala amb puli ngunj pasdia enjip eri. Ombun kes mal kongar 14-poro pam, kantri ele monjup alamb porpor ombun kaujup.

Enni embe nim: Ye dulom pende enjep enjep nganmal ere ende ende to gonjup. Malma porpor sembar nganmal alamb na ami walem konkongol jel mal kele, opnganmal wal puli ambil si gar pel sem tobou ne sinam nepinjip wal sinjip. Embe erwonjup ga pende, alamb to goram “kakulkul to gosum mal embe kanjip.” Nganmal erwonjup alamb malma koltungo, ende wo yemto punam ne enjip alamb to golo bilbol mokjup. Pilgi dongal pam Witnis ga pende to gonjup, misinari tal pra to gonjup eri.

Witnis ga pende enjep to goram kisal nagolo, to goram ne kurwonjup ye dulom, alamb pende sip okul ermokjup. Misinari walem na Betel kongan enjip ga, pilgi ding angjep ambanjep man bol embe ding mal enjip eri. Betel tuwalto Witnis ga pende ke wonjup pende gar menro sembar panjip, pende kin minto panjin. Kil panjil gar kulo pemili 7-poro wonjup panjin.

Pol embe nim: Kunum dingding ne opnganmal alamb kin alamb ende sip okul er moksom mo ne kanamen ne wowo enjip. Kin ga 4-poro kenjin sikiriti  molmol enjip: tal gar winduwa sembar kane monjil, ala tal se geit oriro sembar pu opnganmal alamb bol yu nine enjil. Geit oriro sembar monjil ye tal angel si ngimba kel monjil kunum, ombun ende min nawonda ne pilpile enjin. Ba enjel angel si bulto kenjil kunum kin pilkane enjin, opnganmal ga enjel bol yu omblombol ninjip, embe pile winduwa kanmonjil ye tal muko nepu senonjin ga sip okul ere ere enjil.

Enni embe nim: Wakan puli wopungo bulto, opnganmal ga kunum ende popol si ombol ere se tuwal wonjup. Na pilgi ding ambana ende bol nol was gar lokro, rum kerei ende kapod a sembar okul erpanjil. Ambanjen tuwalto wei dakre pam. Opnganmal ga masin gan ambilsi na se gar minro pund bar, karkar erwonjup. Enjep popol keswei si wo kil gar duwa kerma weironjup. Pol enjep segal nawonam nepil embe nim, “Na ambina nol was enem.” Ala wal gend mal pende ere sel na mom ambilnge yurange, enjep bunuman talsi pe gal nawonjup. Na nganj pel purpur nim. Na gar duwa nalmal apisnal nepile yane bunumana ne Johova ngo, na pakera nind. Bulto na gar duwa apise enjep bol yu ka nengond. Ende na ambil pupro yem kele kapod sembar kun pu, apise wal pelpel mom kongun yemyem erim. Kurum alamb ende kannasim bar pilgi ninda kaple narim. Olom na ai wonjup ga kulo pende sembar kurjup, gar silinga pra. Ba alamb ende kannasinjip eri.

Pol embe nim: Oll pende tuwalto kin mokun aka tambem erim ba pilgi mokun kin tambem wei narim. Betel kinimba lotu enjin, “kinimba mokun nonamen mal nonjin,” kin porpor kumbol na bunuman erdongal erim bar kawei wei pinjin.

Kin nol na mokun kurori punamen pupo, Betel tuwalto okul ermonjup ga kansi to goram pam. Kunum puli kin tambem erim wal Johova jep wusngama mal erkelnge, kunum kun sise enjin! Johova kin tambem erim wal ngo pakerongo kumbol amin monjin.

Kantri ele ombun wose kerma wei pum, ba yuwei kin pakerongo dongal molo wal ka kui enjin. Pilgi ding angjen ambanjen man enjep kolmem pile kunum puli kepunjup, ba enjep pilgi dongal pange ombun wom kau akilgi ninjip. Ga pende embe ninjip, ombun kau akilgi nimen “ombun kerma wei bulto wondo akilgi ninamen mal duwom esmen.” Elda walem na angjen man pende kumbol dongal pange, enam kaple erim wal porpor ere pilgi ding angjep ambanjep man pakeronjup. Angjen ambanjen man kepu se kulu jel punjup ga tapro ding molo, alamb kol kansi Baibel yu neori kele, molpin ond na wal mom si Kingdom Gar tauwo, lotu enjip eri. Ombun pam kunum angjen ambanjen man tapro Baibel yu neori kele, kongrikeisen makeronjup bar yu min wom pinjip enjep erdongal wei erim. Ombun pam kunum mokun aka na konkongol ngonjin kunum, Baibel buk na nus kontosi yu neori keramen konngoya ninjip, embe ninjip kin kumbola wei pinjin! Alamb pulikes opnganmal pam kunum wal kes mal min wom kanjip erkelnge, Baibel yu kapisamen nepinjip. Johova Witnis ga bunuman dulto pange kapile monjup bar; enjep kane malmal enjip. Witnis ga kulu emil erim bar dop do audom mal  embe monjup! (Mat. 5:​14-16) Angjen man yuwei ambilgi ne dongal monjup erkelnge, opnganmal erwanjip ga pende wo yuwei sinjip.

Pol embe nim: Kunum pende ne kin kantri sikele seori wonjin, kunum talende kunum apal pende wane yem punjin, kunum tal kongar pel wane yem punjin. Kin kantri sikele seori wonjin kunum nalmal wei pinjin misinari ambanjen ende yubol to embe nim: “Sukul Giliet punjin bar kongan sim kumbol weingo enam paninjip, weieri kin embe enjin. Embe pile ombun minwongo angjen ambanjen man wakronjin kunum, kin kumbol keswei mom!” Ba sangiyo wei nimen, kin kantri pende mand sembar molo Liberia kongan pakeronjin.

Enni embe nim: Mei 1996, kunum, kin 4-poro brens kar si brens kongan erim mal ripot omblombol pende mokjup si seori punjin. 16-kilomita mal pu taun yemto buning sembar punamen nepunjin. Kin puori punjin kunum opnganmal ga wo kulu e to erkes enjip. Opnganmal ga opro min kele kin paiya ninjip, panjin kunum kin talende ambil puro ori kele Pol kara molngo kar si sipjip. Kin keswei pile nal enamen nepinjin. Apal pende mol kanjin Pol alamb puli monjup bar tuwal wom, ba min mambela maiyam kulupro men wom. Kin kanpolnaro gan tonjip bom nepinjin, ba ala pilkane enjip opronamnge ne embe nawonange nepinjin! Opnganmal ye ende olom to kara pupro ori kem. Kin sangiyo wei ninjin nalerim olom wal kerma ende nabom.

Ala ami kar ende mand pambar kisal gonjup alamb kara silwei nemonjup. Kin pu kar oriro ambil duine papunjin. Draipa kar kerma wei sipim, kin boronjin mal enjin. Kin olom ki si kar paiya ninjin, ba olom kisal keswei golo ninjin yu napim. Kin ombol ere ambilgi nepamnge kar pupam, kin simb angel minjem ngimbil erim, ala kisal gonjin erkelnge nganj purpur nim.

Pol embe nim: Kin konkongol balnim mongse nganja pam, kil ende ende ngumbdala kane nalmal kol meibel nepinjil. Monjil bar mand lekopta ende bulet-puli bol arbil-nim pam, lekopta e tangero kil sise Siera Leone pum. Kil kolmem waknaronjil bar kapinjil, ba Kristen angjen ambanjen man bol wandil wei sinjil.

Anne embe nim: Kil se Siera Leone Betel, Pritaun sembar punjil kil kantawol ka enjip buning monjil. Ba pilkane narind wal kes mal ende kanj e, Liberia ombun pam mal bunuman to pinj. Kunum kunum tangaling, ombun ding mal embe min wondo penepil kisal keswei gond. Ala emilpal akil min wo wal kes mal ende min wondo penepil kisal gond, nganj purpur nine erim. Pin tonal kaple narim. Pol na kangil situwal ninge yane ai nine enjil. Kil Kingdom golang kel pumbulngo nganj purpur nim pornine erim. Na bunuman kongan kananem misinari kongan ala enal napandom nepinj.

Ba wal ende bulto min wom na auwur ninda kaple nanem. Ding wakan tuwalto kil mekejin tal sinjil. Ende Jun 8, 1996, Kirap! Mekejin e tuwalto yu ende, “Tingting Bilong Yu Inap Kamap Gutpela Mo,” pane kanjel. Na bol wal min wom yipe pilkane erind. Ende Mei 15, 1996, Wastaua, yu pengem ende “Ol i Kisim Strong Bilong Ol Long We?” Tawolgar e tuwalto kumkaim ende purbam to buko ninjip piksa pam. Tawolgar e embe nim, kumkaim e burbam binjik nim ba olom anjngo burne wana wal kansi nonom. Embe ding mal, ombun pende min wo kenem erkes enda ba Johova murmulom dongal kenem pakerondo anjngo olom konganem ere alamb ende pakeronamen. E pilgi mokun kawei ende Johova kunum kun ngo na erdongal erim. (Mat. 24:45) Buk na nusa yu embe mal mom siding kel moklo omukro kanj na pakerongo, kunum pende wopungo emilpal wur pand bar wurkumbanj mal ere, opnganmal pambar wal kesmal min wom buro-pile nganj purpur nine erim pornim.

Pol embe nim: Ombun min wom erkelnge kil Liberia sikele seori wonjil, ba ala seyem punambel kawei pinjil. Kongar 2004, min wom kil misinari kongan erwanjip kongar 20-punda mand wei erim. Opnganmal Liberia pam pornim. Brens gulgar erkun enam mal yu ninjip. Ba kanan napungo kil kongan kol ende enambel paninjip.

E kongan kerma wei ende enambel pam. Kil pilgi ding angjen ambanjen man bol tap kaweiro monjin—embe pile kil nal enambel nepinjil. Pemili aijel wakro sikele se sukul Giliet punjil kunum, Johova wal ka  ngo nalmal pakerom pilkane enjil. Embe pile kongan ngonjup enambel paninjil. Kil se Gana kantri ende mand sembar pu kongan enambel paninjip.

Enni embe nim: Kil Liberia wakronjil kunum ke puli ninjil. Elda ende kombe mom bunuman kapam kangem Prank yu ende ne kilngo embe nim: “Elep kin nenapisambel!” Yu embe nim ne aune embe nim: “Kin pilkane esmen elep kin bol auro wei naninda, ba kongan kol ngom kumbol weingo enambel. Kongan e Johova ngonom, embe pile punambel bar angjen ambanjen man moram pake karonambel.” Ombun mal pamba yu embe nim kil dongal ngongo, kulu kol pu kanjil alamb puli namonjup bar kongan pulnombol enjil.

Pol embe nim: Embe pamba kanan napungo, pilgi ding angjen ambanjen man Gana monjup enjep kanka kanjil pemili mal monjin. Kulu ele Witnis alamb pulikes wei monjup! Enjep pilgi wal dongal monjup bar kil wal puli duwom enjil, kin senonjin mem wose dongal wei pum. Kil Gana kongan ermonjil kongar 13-wopungo, yu kolnga ende ninjip pil malmal enjil. Kil ki si, elep se Kenia pu Is Aprika brens opis kongan enambel paninjip. Ye kongan ermonjil bar seno kapile monjin ga wakronjil bar keswei pinjil. Ba kanan napum, pilgi ding angjen ambanjen man Kenia monjup bol senonjin. Ala Liberia na Gana enjin mal, Kenia Baibel yu neori keramen kongan puli pam eri.

Enni embe nim: Na Johova konganem erwanj bar ombun kes mal puli min wom kanj, kunum pende ne kisal wei gond eri. Kunum wose keswei pungo ombun pambar kongan erwanjin kunum, e erkelnge kin kes mal tom, ala kisal golo bunuman puli kenjin eri. Johova jep mal ere kin pakenarom. Opgan ende tobul ninambe na pis kunum, kumbol beinema kes mal tonom angel olup enal napaim. Ba Johova kenem dongal ngondo akilgi ninamen mal na duwom ere pilkane erind, ala pilgi ding angjen ambanjen man pra pakeronjup eri. Ala wal ende na pilkane erind pilgi wal kunum kunum enamen bar, Johova kenem pakerondo ngonom kongan anjngo enamen pam. E kongrikeisen make punamen, Baibel yu duwom enamen, Baibel yu neori keramen, ala yane ninamen eri.

Pol embe nim: Ga pende ki embe ngom, “Nim kongan enen bar kapisen mo?” Kantri pende kulu ka senda, ba alamb kanameim ombun min wonda eri. Embe pile kenem nawal kankawei kane kantri kanka kanmen e ngomon? Pilgi ding angjen ambanjen man kenem pemili aijen mal meim kankawei kanmen. Kenem molmin wo nomolpa esmen bar ding mal naseim, ba bunuman ding mal wei ambismen. Kil pu enjep erdongal enambel ne pumbol nepinjil, ba wal weieri pam enjep kil erdongal enjip.

Kil se kulu kol ende punjil kunum-jep mal ende kanjil e: pemili aijen kulu jeljel mol punjup eri. Kil se kongrikeisen ende tuwal pu monjil bar, pemili aijel monjup, garjel sem eri. Kil pilkane enjil Johova bol anjngo sengse monjil dal, kil erdongal enda ala ambsik pam wal ngonda pam eri.—Fili. 4:13.