1. Nalernge Babilon alamb propet Deniyel bol ka pinjip?

 PROPET Deniyel ngang barel mom kunum, Babilon ga wo nganmal ngo Jersualem tomene kele, Deniyel to karpos ere si kulu kolbar wei pujup. Ba, Deniyel er kelnge Babilon gapman kongan ga olom bol ka pinjip. Enjep “dungola [kane] omukrojip” “olom ye kawei wei mom”—ala pemili ka ende monjip bar tuwal min wom. (1 Sml. 16:7) Mem embe pange, olom Babilon king gar kongan enda, ne duwom er ngojup.—Dan. 1:3, 4, 6.

2. Johova, Deniyel bol nal ne pim? (Esekiel 14:14)

² Johova, Deniyel kankawei kanim, e, olom nganj kapam na king gar kongan erim bar kanakanim, ba, olom ye nalmal wei mom mal kanka kanim. Kunum ele Deniyel kongar 18 pu 21 mo ende mom. Noa na Jop kongar andet puli kele Johova konganem ka enjil yubol tom bar, Deniyel kangem dam eri. (Stt. 5:32; 6:9, 10; Jop 42:16, 17; Esekiel 14:14 gere.) Johova, Deniyel anjngo kanka kanim nalerim, olom kolmom pakam mambnem ka karkar erim Johova pilkane erim.—Dan. 10:11, 19.

3. Yipe yu duwom enamen bar nawal omukro kanamen?

³ Yipe yu duwom enamen bar Deniyel mambnem tal ende erim, Johova kankawei kanim mal omukro kanamen. Yero mambnem tal e yubol to, ala nal kunum tanim omukro kanamen eri. Ala ende nawal Deniyel pakerongo, mambnem embe mal erim duwom ere kanamen. Bulto kenem nalmal ere olom mambnem karkar enamen mal omukro kanamen eri. Yu duwom enamen ngang ambel gal pakeronda, ba, enjep mongse ma kenem porpor pakerondo Deniyel wal erim bar duwom enamen eri.

4. Deniyel kumbol dongal pam nalmal tanim? Yubol to.

⁴ Deniyel ngang barel mom ba, kumbol dongal wei pam. Kunum tal ende, olom kumbol dongal pam tanim omukro kanamen. (1) Bablion ga pu Jersulaem to kes mokjup kongar tal wopungo bulto, tanim. Babilon King Nebeketnesa wur kubanja imis kerma ende kane kisal wei gom. Olom bunuman kapam kongan ga, wur kubanj kanim yu mem neori nakele, nawal suse paim nanijip dal, enjep porpor to goral panim, Deniyel pra. (Dan. 2:3-5) Deniyel wal ende kamkam enda pam embe narim dal, alamb puli goram pam. “Embe pile, Deniyel king ki si kunum pende ngoi na wur kubanj e, mem neori keral panim.” (Dan. 2:16) E, tadom Deniyel kumbol na pilgi dongal panda pam. Baibel, Deniyel wur kubanj mem yero ende neori keipim panadom. Olom tapmon ga—Bablion ga kangjep ngo Sandrak, Misek na Abetniko panijip ki si—enem “yane ne Got min epen meim ngonambe, kenem wandil golo okul paim wal si penem kera paim.” (Dan. 2:18) Enjep yane nijip Johova pundom ngom. Weieri, Got pakerongo Denyiel, Nebeketnesa wur kubanj kanim mem neori kem. Embe erim bar Deniyel olom na tapmon ga to nagonjip.  

5. Nal kunum ende Deniyel kumbol dongal mem sinda pam?

⁵ Deniyel wur kubanj mem neori kem kunum pende wopungo bulto, wal ende ala min wo olom kumbol dongal wei paim mo ma er kanal ne erim. E, Nebeketnesa wur kubanj ende kane kisal keswei gom. Kanim ond kerma ende bol se epne kupula wei pum. Deniyel kumbol dongal keswei pange, wur kubanj e mem ne king ngom. Olom king nengo kunum pende nim peng kes moro kongan king nandel panim, king embe ne pisange Deniyel olom bol opyem ere, yu e dom ne pile to gorange. (Dan. 4:25) Ba, Deniyel kumbol dongal wei pange yu embe mal neori kem.

6. Nawal Deniyel pakerongo kumbol dongal mem sim?

⁶ Nawal Deniyel pakerongo kolmom kunum pel kumbol dongal pam? Kenem pilkane esmen Deniyel ngal mom kunum, dam mam bol duwom erim. Johova, Israil ngal danjep manjep nengo, Olom Lo duwom er ngaljep ngonam panim enjel karkar kawei enjil. (Lo 6:6-9) Deniyel, Johova Lo Ten poro ngom mongse pilkane  narim ba, Lo pende Israil ga ngom pilkane erim eri. b (Wkp. 11:4-8; Dan. 1:8, 11-13) Got alambem man komna monjip, Olom Lo pakim karkar najip kunum, nawal enjep bol min wom Deniyel duwom er pilkane erim. (Dan. 9:10, 11) Deniyel olom bol wal pende min wom bar pilkane erim, Johova na Olom enjol aiyem dongal kerma pam ga Daniyel pakerojip.—Dan. 2:19-24; 10:12, 18, 19.

7. Nawal pende Deniyel pakerongo kumbol dongal pam? (Piksa pra kane.)

⁷ Deniyel, Got yu propet nim bol mokjup duwom mane eri kanim, Jeremaiya yu propet ne mokum pra. Deniyel yu duwom mane ne erim bar pilkane erim, Juda ga Babilon karpos kanan pamonjup porninda mand erim. (Dan. 9:2) Ala yu propet Baibel a pam mongom tom Deniyel kanim kunum, olom Johova bol pilgi nim mem er dongal wei erim. Embe pile, Got bol pilgi wei nim ga kumbol dongal panda eri. (Rom 8:31, 32, 37-39 omukro kane.) Deniyel wal kerma wei ende erim e, Dam min epen mom bol yane kunum kunum nim. (Dan. 6:10) Olom alla pende erim na kumbola wal pende pim mal, Johova nengo pakera ne ki sim eri. (Dan. 9:4, 5, 19) Deniyel kenem alamb meimen bol ding mal, mam kum kunum kumbol dongal mem pange nawom. Ba, olom yu duwom ere, yane ne Johova bol pilgi nim bar kumbol dongal mem sim.

8. Kenem kumbol dongal mem nalmal er sinamen?

⁸ Kenem kumbol dongal panda ne pinjin dal, nawal pende enamen? Kenem danjen manjen kumbol dongal mem siya ninam, ba, enjep kumbol dongal paim si kenem ngonam kaple nanem. Kumbol dongal mem sinamen, wal kol ende duwom er kanamen ne esmen bol ding mal paim. Wusngam ende duwom ka enamen e, tisa aijen yu ne mambnem enem mal kane, karkar enamen. Embe ding mal, kenem kumbol dongal mem sinamen ne pinjin dal, ga pende kumbol dongal pande wal esim mal mane omukro kane, mambnem aijep karkar enamen. Embe pile, Deniyel bol kenem nawal duwom esmen? Olom erim mal, kenem Got Yuwom meim omuk manero kanpol tonamen. Ala Johova bol semand pu kumbola na bunumana pismen wal, olom bol yu kunum kunum ninamen. Olom kenem pakeronda ne pilgi wei ninamen. Embe enjin dal, wal ende min wo kenem pilgi er kanal ne enda kunum, kumbol dongal wei panda.

9. Kenem kumbol dongal mem karkar esmen bar, nawal ka min wonom?

⁹ Kumbol dongal mem karkar esmen bar, wal ka puli min wonom. Pilgi ding angjen Ben bol wal min wom mal omukro kand pe. Olom sukul ende Jemeni tuwalto sembar pum, sukul ding ga porpor epelusion pilgi nijip, Baibel Got wal porpor ersem padom kombe yubol gend panijip. Kunum ende Ben sukul ding ga monjup bar ngimba akil molo, nalende nim Got wal porpor ersem pane pilgi don yubol tondol panijip. Olom kumbol dongal wei pange pilgi nim wal neori kem. Embe erim bar nawal ka min wom? Ben embe nim, na nind yu “ tisa aina komol kawei se,” “pile, ala na buk na nus konganem erind wal, potokopi ersi klas ding ga porpor ngom” Ben sukul ding nim ga nal mambnem enjip? Ben embe nim,“ga puli na nind yu komol kase pile,” “na bol kawei-pinjip. ” Ben bol wal min wom tanind pilkane esmen, kumbol dongal pande wal esim bar, alamb ende enjep pilngom. Ala kumbol ka seim alamb pakeronambe Johova lotu erngom eri. Weieri, kenem kumbol dongal mem sinamen, mem ka puli paim.

10. Johova bol ka morol panimen yu mem nalmal paim?

¹⁰ Baibel a Ibru yu “ende bol ka” morol mo “ende kanka kane ka” morol panijip e, kunum puli Got olom konganem alamb bol kanka mem tadom e, pilnijip. Ala ding yu e, Got alambem man ende ende kanka kanjip e pilnijip eri. (2 Sml. 9:6, 7) Kunum pende wopundo ende bol ka meimen mem wose dongal punda. Propet Deniyel bol embe weieri min wom bar omukro kanamen.

11. Deniyel tuwa sem kunum, nal ombun ende min wo Got kin ka mom mem er kanal ne erim? (Garwom oriro piksa kane.)

¹¹ Deniyel nomolpa erim bar kunum puli wal pende min wo olom Johova bol ka mom mem er kanal ne erim. Ba, olom tuwa sem kongar 90 mom kunum, ombun omblombol ende min wo olom er kanal ne erim. Kunum ele Midiya Pesiya ga wo tauwun Babilon to sinjip. Darius King molo kantawol erim. Olom Gapman kongan ga Deniyel kanka nakane olom lotu erngom Got bol molmene nakenjip eri. Ala enjep yu ne ding kele Deniyel to goram ne pinjip. Enjep lo ende er pakjip king sainim erim. E, Deniyel Gotom bol ka mora mo king bol ka mora kanam ne enjip. Alamb porpor enjip mal, Deniyel king bol ka molo Johova bol yane nine erim kunum 30-poro wakro sikera ne enjip. Embe enjip ba, Deniyel, Johova bol ka mom mem wak wei narom. Mambnem embe erim bar, Deniyel sikro laiyon tupa monjip bar tuwal kenjip. Ba Johova, Deniyel olom bol ka mom bar pilkane ere topom ka ngom, olom kantawol ka ere laiyon gup aijep a siyem nim. (Dan. 6:12-15, 20-22) Deniyel, Johova bol ka mom mem kenem nalmal karkar enamen?

12. Deniyel nalmal er kelnge Johova bol ka mom mem dongal wei pam?

¹² Yero yubol tonjin mal, Johova kanka kanmen mem dongal pamdal olom bol ka moramen. Deniyel, Johova bol ka mom mem dongal pam nalerim, olom Dam min epen meim kankawei wei kanim. Kenem bunuman tal napaim. Deniyel Johova kankawei kanim nalerim, olom kunum kele Johova mambnem aiyem pam mal kanpol weiro ala mambnem aiyem tanim mal pilkane erim eri. (Dan. 9:4) Johova, Deniyel olom na olom alambem man bol mambnem ka porpor erim mal, Deniyel bu dongal to pilyem kel pile sangiyo nim eri.—Dan. 2:20-23; 9:15, 16.

13. (a) Nawal ende min wo ngang ambel gal Johova bol ka meim mem er kanal ne enem? Wal ende min wom mal yubol to. (Piksa pra kane.) (b) Vidio kanjin mal, alamb ende nim ki si Johova Witnis ga yeye na ambamb wurding paim kaple nepisim ma nijip dal, nim nal panindel?

 ¹³ Deniyel kunum enjip mal, ngang ambel gal yipe kenem bol meim, alamb Johova bol molmene nakele lo aiyem karkar nasim alamb meim bar tuwal meim. Alamb embe mal, kenem Got kanka kanmen panimen bar kanapisim. Ala pende kenem ngang ambel gal Johova bol ka meim bar yu kulo ne er kes enam. Angjen ngang barel Geremi Austrelia meim, olom bol wal min wom mal omukro kand pe. Olom ai sukul mom kunum ombun kes mal ende min wom. Tisa klas a monjup ga pel ki si, ende yeye na ambamb wurding paim mem na kakanj panim dal, enem nal enam a nim. Ala tisa enjep porpor nengo mambnem embe kapismen paninam ga, wose gar yemto akil morambe, kanapismen paninam ga wose gar yemto pu akil moya nim. Geremi embe nim, “Klas a monjup ga pel wose yemto yeye na ambamb wurding paim kapismen panijip bar punjup.” Na Witnis ende bol se yemto punjil. Embe nim kunum bulto wal ende min wom, Geremi, Johova bol ka mom mem weieri er kanal ne erim. Olom embe nim, “Kin anj dunglom kanan bulto klas a monjin, ngal porpor na tisa kil bol yu kulo yu kes nijip.” Na pilgi ambilgi ne akilgi ne molo mambnem amin ere enjep bol yu ka nind, ba, “nind yu ding ende komol se napinjip.” Wal embe min wom ba Geremi akilgi nim bar, olom nalmal pim? Olom embe nim, “Na bol yu kes nijip bar kanapinjip, ba pilgi ambilgi ne Johova bol ka mond bar kawei pinj.” c

14. Nal wusngam ende kenem Johova bol ka meimen mem er dongal wei enamen?

¹⁴ Deniyel erim mal, kenem Johova kankawei kanjin dal, olom bol ka meimen mem er dongal wei enamen. Ala Johova mambnem aiyem pende paim mal duwom kawei er kanjin dal, olom kanka kanmen mem wose kerma punda. Ende embe mal, olom wal porpor er kem meim duwom ka er kanamen. (Rom 1:20) Nim Johova kanka kane olom bol molmene keral nepin dal, nus kirap kunum kunum wonom bar yu pengem, “Ende Ersem Mo?” ne paim ger kanjel, mo vidio meim kanjel eri. Ala nim wal pende omukro kanal ne pindal, buklet tal e, Was Life Created? na The Origin of Life—Five Questions Worth Asking kanjel eri. Ambajen ambel gal ende kangem Esta, kulu Denmak meim, buklet tal e bol embe nim: “Buklet tal e kawei wei enjip. Nim pilgi nindel panandom. Yu weieri tuwal meim, nim pilgi nindel mo nanindel nenem omukrondol.” Ben, yero yubol tonjin angjen embe nim: “Yu bol mokjup pilgi er dongal weieri erim. Na omukro kanj Got kol meim wal porpor ersem.” Nim yu porpor ele meim duwom er kanpor nindel kunum, Baibel yu ende dom weieri panindel. Baibel embe dom: “Johova, Nim kin Gotjon, dongal kerma paim, kangem kerma sindel kun paim nalenem, wal porpor meim nim ersen.”—Rev. 4:11. d

15. Nal wusngam ende Johova bol seno ka meimen mem er dongal enamen?

¹⁵ Wusngam ende Johova kanka kanmen mem er dongal enam e, ngangem Jises wo mala mol nomolpa erim mal mane duwom er kanamen. Ambajen ambel gal ende kangem Samira, Jemeni meim Jises nomolpa erim mal mane omukro kanim. Olom embe nim: “Jises wal erim mal na duwom ka er kane, Johova kanpol tond.” Olom ngal mom kunum, Johova wal pile kane enem ne pilgi ninda kaple wei narim. Ba, Jises nalmal pim olom pilkane erim. Samira yu ende embe nim, “Na Jises kanka kanj nalerim,  olom ngal bol seno kanka kanim.” Olom Jises wal erim mal omuk karo kanpol tom er kelnge, dam Johova pra kanka kanim. Nalernge Johova kanka kanim? Olom embe nim: “Na omuk mane to kanj, Jises Dam mambnem pam mal kun karkar erim. Enjel wal puli ding mal enjil. Na pilkane erind mem embe pende pange, Johova ngangem Jises kem ya mala wom. Embe erim bar, mala alamb Johova ye nalmal kanpol tonjip.” (Jon 14:9) Nim Johova bol seno kamen mem er dongal enal ne pindal, anj dunglom puli kele Jises ye nalmal mane duwom er kanjel. Nim embe erin dal, Johova kanka kane olom bol kamen mem dongal wei panda.

16. Kenem Johova bol ka meimen bar pake nalmal simen? (Buk Song 18:25; Maika 6:8)

¹⁶ Kenem ende bol ka monjin dal, senomon mem kanan dongal papunda. (Rut 1:14-17) Weieri, Johova bol seno ka meim alamb kumbol amin moram mem ka paim. Nalende embe nimen? Nalenem Johova yu dongal ne olom bol ka meim alamb, olom enjep bol ka moral eri padom. (Buk Song 18:25; na Maika 6:8 gere.) Dongal kerma pange wal porpor Ersem Ye kenem kanka kane senonal padom bar —buro pile! Olom bol weieri senonjin dal, ombun nal ombun ende min wonda, alamb kenem bol opyem enam, mo gonjin dal, olom bol seno ka meimen mem er si jeljel kera kaple wei nanda. (Dan. 12:13; Luk 20:37, 38; Rom 8:38, 39) Embe pile, kenem Deniyel erim mambnem karkar ere Johova bol ka moramen wal kerma wei paim!

17-18. Deniyel bol nawal pende duwom enamen?

¹⁷ Yu duwom pi esmen bar, Deniyel mambnem aiyem tal omukro kanmen. Ba olom bol duwom enamen wal puli wei meim. Pende embe mal, Johova er kelnge Deniyel wal pende wur kubanj a kanim, ala pende wur kumbanj mal kanim eri. Olom dongal ngongo yu propet mom mem pra neori kem. Ala neori kem yu propet puli weieri mongom tom. Yu propet pende meim, bulto mala alamb porpor bol nawal min wonda mal neori kesim.

¹⁸ Ala yu duwom bulto enamen bar, Deniyel yu propet tal ende bol kem paim mane omukro kanamen. Omuk manero kanpol tonamen kenem porpor, tuwa na gal, yipe wal ende enamen ne pisamen bar pakero kelde bunuman ka karkar enamen. Yu propet meim kenem kumbol er dongal ende, wal pende min wo kenem pilgi er kanja kunum mand wei wonom bar er nombro molo, Johova bol ka meimen mem ambilgi wei ninamen.