1. Johova alamb porpor nal enam nepisem?

 JOHOVA kenem alamb ersem kunum, kenem kenem kapismen mal wal enamen mem ngom. Kenem kunum kunum wal kerei mo kerma ende enamen paim, kapismen mal omukro esmen. Wal kerma wei ende alamb omukronda e, yane wusngama Johova bol yu dongal ne se Johova pemili kerma meim bar tuwal wonda. Johova alamb porpor embe enam kapisem. Nalende embe pisem? Nalenem, olom alamb kanka kanim pile embe enam bar pake sinam nepisem. Johova kapisem kenem olom bol seno ala aimanj aimanj mol punamen nepisem.—Lo 30:​19, 20; Gal. 6:​7, 8.

2. Ende sin kerma wei ere kumbol to aknaronom kunum, Johova olom bol nal nepisem? (1 Jon 2:1)

² Ende embe mal, Johova nipnape ne olom lotu erngoya nandom. Olom kankelde kenem dingding ne kapismen mal esmen. Nol pa sikenjip Kristen ende Got lo tokele sin kerma erim dal, elda walem nal enam? Olom kumbol to narom dal, kongrikeisena toori keram. (1 Kor. 5:13) Ba sin kerma ende toori kesim alamb, bulto ala sin erim bar wandil golo Johova bol senonom mem erdongal ere siyem wonda, Johova kapisem. Embe pile mem kerma pange olom ngalem kelnge wo gom bar—sin esim  alamb kumbol to akronam kunum, enjep alla weieri wakronda. (1 Jon 2:1 gere.) Johova kanka mem seim Got, embe pile sin esim ga kumbol to akronam nepisem.—Sek. 1:3; Rom 2:4; Jems 4:8.

3. Yu duwom pi enamen bar nawal omukro kanamen?

³ Johova sin kin nalmal pisem na sin esim alamb, olom bunuman nalmal ambrem nengond kenem pilkane ere, alamb embe mal kin olom bunuman ambrem mal, kenem ding mal embe pisamen nepisem. Yu duwom pi enamen bar mambnem embe karkar enamen mal omukro kanamen. Ala nim atikel e gerdel kunum (1) komna-kongrikeisen Korin monjup ende sin kerma wei erim kunum, nalmal erkun enjip, (2) ende sin kerma erim kumbol to akrom bar Pol nal enam panim, ala (3) Kristen ende sin kerma wei enem kunum, Johova enjep bol nalmal pisem mal duwom enamen.

ANGJEN ENDE KONGRIKEISENA SIN KERMA WEI ERIM KUNUM NAWAL MIN WOM

4. Komna-kongrikeisen Korin kongar andet tuwalto monjup, nal ombun ende min wom? (1 Korin 5:​1, 2)

⁴ 1 Korin 5:​1, 2 gere. Pol misinari kongan kunum namba tri erpum kunum, kongrikeisen Korin kol sembar wal kes mal ende min wom mal yubol to olom ngonjup. E angjen ende kongrikeisena, dam ambiyem ende kin pasdia enjil. E sin kerma wei erim, nalenem, “Got kin pilgi nanim alamb mambnem embe nasim”! Ombun embe pamba, kongrikeisen ga angjen mambnem embe erim kongrikeisena tuwal moram kun paim nepinjip. Ga pende kongrikeisena pinjip Johova sin paim alamb, wandil gorom mem dingmal karkar esmen nepinjip. Ba sin kerma wei enem alamb, Johova alambem man kin tuwal ai moram kanapisem. Nalenem, mambnem keswei erim bar Johova lotu ernangonjup alamb yubol e pile malmal wei ere, Johova alambem man kin yu keswei ninjip. Ala olom kongrikeisena mol pamom dal, Kristen pende olom mambnem kes karkar enam eri. Embe pile Pol kongrikeisen ga nengo, nal eiya nim?

5. Pol kongrikeisen ga nengo nal eiya nim, ala nalmem pange yu embe nim? (1 Korin 5:13) (Piksa pra kane.)

⁵ 1 Korin 5:13 gere. Johova, Pol bu ngongo pepe bollo kongrikeisen Korin ngo embe nim, ende sin ere kumbol to aknarom dal kongrikeisena toori keiya nim. Pilgi dongal pam Kristen olom bol nal mambnem enam? Pol enjep nengo olom “bol tap ainaroya” nim. Nalmem pange yu embe nim? Pol yune aune sin erim alamb bol nal mambnem pende enam mal nengo embe nim, “alamb embe mal kin mokun ainanonya” nim. (1 Kor. 5: 11) Nalenem, kenem alamb ende bol mokun aino meimen kunum, yu pende nepisamen ne esmen. Embe pile aposol Pol yu nim bar tadom, sin enem alamb bol tap ainaronamen mem kanapaim. Mambnem embe enamen bar pakero kelde kongrikeisen ka senda. (1 Kor. 5:​5-7) Wal ende sin erim alamb kin kolbar moramen bar, erkelde pilkane enda mambnem embe erim bar Johova keswei pisem nepisa. Embe pile olom sin erim bar wandil wei si, kumbol to akronal nepisa.

6. Pol pepe boll ngom bar kongrikeisen ga karkar enjip kunum, sin erim ye nal erim?

⁶ Pol pepe bollo Korin Kristen monjup ngom kunum, bulto enjep nal nepisam ne bu puli kem. Kanan napungo, wal ka min wom mal Taitus pu olom nengom kunum kapim. Pol pepe bollo ngom kongrikeisen Korin karkar ere, sin erim alamb toori kenjip. (2 Kor. 7:​6, 7) Pol pepe bollo ngom oll pende wopungo, sin erim alamb kumbol to akrom! Ala bulto olom bunuman  na mambnem aiyem wakro pulnombolo, Johova lo dulto karkar erim. (2 Kor. 7:​8-11) Pi, Pol kongrikeisen Kristen nengo nal eiya nim?

ENDE SIN ERE KUMBOL TO AKRONOM KUNUM KONGRIKEISEN NAL MAMBNEM ENAM

7. Sin kerma erim ye kongrikeisena toori kenjip bar, bulto olom nal erim? (2 Korin 2:​5-8)

⁷ 2 Korin 2:​5-8 gere. Pol pilkane erim “ga puli sin erim ye bol yu dongal ninjip [e] kun pam.” Ala yu ende ninamen, mem ende pange sin erim ye yune erkun enjip. Nal mem pange embe enjip? Mem e embe, sim erim ye kongrikeisena toori kenjip olom pilkane enda kumbol to akronda wal kerma wei pam. Olom kumbol to akrom dal, anjngo yune olom erkun enam kongan napanda.—Hib. 12:11.

8. Pol kongrikeisen Korin ga nengo nawal eiya nim?

⁸ Angjen e kumbol to akrom pile, Pol elda walem nengo embe nim: Olom kongrikeisena ala si tuwal keiya nim. Ala olom kin mambnem embe eiya nim, “olom alla wakro yune olom kumbol amin ngonam,” ala enem “olom kin kanka mem taninam” eri. Pol kapim pilgi ding angam man yune na mambnem enam bar, kumbol to akrom ye weieri olom alla wakrom na kanka kanim mem taniya nim. Enjep mambnem embe enam bar taninde, kumbol akrom ye pilkane enda, olom ala se kongrikeisena tuwal wom bar weieri pilngo mambnem ka tanim ne olom kawei pisa.

9. Nalende sin kerma wei erim angjen kumbol to akronom bar, ga pende olom alla wakronam pesil pam?

⁹ Sin kerma erim ye kumbol to akro kongrikeisena situwal kesmen panim kunum, ga pende olom jebenware nesinam nepisam pesil panda. Mambnem embe mal enamen pane Baibel kun nadom ba nalende ga pende embe esim? Nalenem, olom erkem kongrikeisena ombun min wombar ga pende popol sinjip. Ala pilgi ding angam ambam man sin erim bar, enjep ombun pra kauwo kes pinjip eri. Embe pile, kongkrikeisena ga pende Johova lo ombol wei ere karkar enjip. Embe pile sin kerma wei erim alamb kongrikeisena, ala tuwal wonda kunapaim mambnem kun nasim ne kanapisam. (Luk 15:​28-30 pra omukro kane.) Nalenem, olom sin kerma erim. Nalende kongrikeisen ga olom seyem wonom bar kanka mem tane angjep mal kanam wal kerma paim?

10-11. Ende sin ere kumbol to akronom ba kongrikeisen alla waknaronjup dal, nawal min wonda?

¹⁰ Ende kumbol toak weironda ba elda walem kongrikeisena situwal nakeram, mo ende siyem keram kunum angjen ambanjem man kanka mem tananinjip dal, nawal min wonda buro pile. Mambnem embe enam erkelde olom “kumbol ombun sinde olom tomene wei kere,” wal eimal ende mei nepisa. Embe enam bar olom Johova lotu ala erngonal kaple nanem nepisa. Ala Johova bol senom mem ombol ere, ala erdongal enal ne nanda eri.

¹¹ Sin kerma wei erim ye kumbol to akro sikem, ba angjen ambanjen man olom alla waknaronjup dal, nawal pende min wonda? Angjen ambanjen man Johova bol senom mem tokes moksam. Nalende embe nimen? Nalenem, sin ere kumbol to akronom alamb, Johova alla wakronom mambnem enjep karkar nasim. Enjep Seten mambnem omblombol ere alamb wandil nagorom ye, mem karkar esim. Enjep kankerambe Kipkes Seten konganem erkelde, alamb pakero kerambe Johova lotu nanda pisim.—2 Kor. 2:​10, 11; Efe. 4:27.

12. Johova mambnem enem mal kongrikeisen ga nalmal karkar enam?

¹² Kongrikeisen Korin ga nalmal Johova mambnem karkar ere, Seten mambnem karkar nanjip? Johova sin esim alamb bol mambnem enem mal karkar enjip. Baibel bonjup ga pende Johova mambnem pende enem mal yubol  tonjup, ende Depit, olom embe nim, “Johova nim ernombro molo kin alla wakronon.” (Sng. 86:5) Maika embe nim: “Got ende nim mal molo, alla wakronon mo?” (Mai. 7:18) Ala Aisaia embe nim: “Ye kes mambnem kes aiyem sikera, ala bunuman kes paim ye bunuman kes aiyem sikera; olom seyem Johova bol wonda, Johova olom wandil gora, olom seyem kenem Gotjon meim bar wonda, nalenem, olom sin porpor weieri wakro sikera.”—Ais. 55:7.

13. Nalende sin er kumbol to akrom alamb kongrikeisena siyem ninam? (Boksa yu pengem, “ Korin Ye Nal Kunum Siyem Ninjip?” a nepaim kane)

¹³ Kongrikeisen Korin Johova mambnem karkar ere sin erim ye kumbol to akrom, kanka mem tane ala jebenware nesinjip. Pol ende sin er kumbol to akronom ye bol nal mambnem enam mal nengom yu, kongrikeisen Korin ga “pilsi karkar kawei enjip.” (2 Kor. 2:9) Weieri, toori kenjip alamb oll apal eri wopum, ba pilsinda yu nengonjup karkar kawei erim pakerongo kumbol to akrom. Embe pile, elda walem olom kongrikeisena siyem wonda ne kui namonjup ma, olom ala seyem wom.

JOHOVA WANDIL MEM NA MEM DULTO NALMAL KARKAR ENAMEN

14-15. Kongrikeisen Korin ombun pende min wom bar, kenem nawal duwom esmen? (2 Pita 3:9) (Piksa pra kane.)

¹⁴ Kongrikeisen Korin wal min wom mal Baibela boll pakjip, “kenem duwom enamen” ne bonjup. (Rom 15:4) Yubol e paim bar pilkane  esmen, sin kerma wei esim alamb Johova alambem man kin tuwal moram kanapisem. Sin ere kumbol to aknarom alamb Johova enjep bol “wandil mem” tane, kankere olom alambem man pilgi dongal pande meim bol tapro aimoram kanapisem. Johova wandil mem kerma paim, ba mambnem kes kanem kanem esim kanapisem; ala olom mambnem kes na kapaim pane paim pane lo paksem mal kun pameim. (Jut 4) Sin esim alamb Johova kankere kongrikeisena tuwal monjup dal, e olom wandil mem tanadom pile, kongrikesisen tokes moksa.—Prov. 13:20; 1 Kor. 15:33.

¹⁵ Ba pilkane esmen, alamb kolmem wakro goram Johova kanapisem. Enjep kumbol to akro enam kaple enda wal enambe, Johova enjep siyem keral nepisem. Embe pile, kumbol akro Johova kapisem mambnem karkar esim alamb, Johova enjep kin wandil mem tadom. (Ese. 33:11; 2 Pita 3:9 gere.) Kongkrikeisen Korin sin erim ye kumbol to akrom kunum, Johova, Pol wusngama Kristen ga nengo olom alla wakro kongrikeisena ala siyem niya nim.

16. Kongrikeisen Korin ye ende sin erim bar olom bol mambnem enjip, nim nal nepisen?

¹⁶ Kongrikeisen Korin sin erim ye bol mambnem enjip bar pilkane esmen, Johova, kanka mem, mambnem dulto, na kot dulto enem mal tanim. (Sng. 33:5) Johova mambnem kapaim, pilkane esmen bar erkelde olom kangem min keramen kapismen. Weieri, kenem porpor sin paim—ba kenem sangiyo ninamen nalenem, olom kenem dingding ne wandil mem tane—sin wakronda kapisem. Kenem Johova sangiyo kerma wei nimen nalenem, olom ngangem dingeri kem wo golo kenem sin wakro sikem. Johova alambem man kanka kane, kamoram nepisem pilkane esmen erkelde kapismen!

17. Yu duwom miro enamen bar nawal omukro kanamen?

¹⁷ Yipe kunum ende sin kerma enda nalmal erkun enam? Ende sin kerma erim dal, elda walem kongrikeisena meim Johova mambnem karkar ere nalmal pakeronambe kumbol to akronda? Elda walem ende toori keram mo ende siyem ninam kunum, kongrikeisena ga meim nal mambnem enam? Ki embe mal yu duwom miro enamen bar omukro kanamen.