Gerim Ga Ki Aijep
Israil ga kulu mal kulman ere ei sembar wonjup kunum, mana na ka mongse nonjup mo mokun pende pra nonjup?
Kongar 40 tuwalto Israil ga, kulu mal kulman ere ei sembar wonjup kunum, mokun ende kunum kunum nonjup e, mana. (Kis. 16:35) Ala kunum tal, Johova ka kem to gal nonjup. (Kis. 16:12, 13; Nam. 11:31) Israil ga mokun jel apal pende nonjup eri.
Ende embe mal, Johova alambem man sip kelnge, “kulu-ende mol kapilsi” punam ne monjup bar, mokun pende ambsik pam ngongo si nonjup eri. (Nam. 10:33) Dumam ende pu mol kapil sinam ne enjip, kulu kangem Elim, “kulu ele nol tupo 12-poro mom, ala ond pam 70-poro bol mom”—mom ond mongom pra nonjup eri. (Kis. 15:27) Buk ende kangem, Plants of the Bible nim, ond deit pam kulu kulman er sembar bol molmolo erim, “alamb kulu kulman ere ei sembar punjup kunum, ond deit pam e konganem puli pam, . . . mongom nonjup, oil enjip, ala alamb millien puli gar tau papa enjip eri.”
Ala pilkane esmen, Israil ga pu kulu Wandi Pren, nol tupo kerma mom bar pra mol kapilsinda sinjip. Kulu e, yipe kangem Pren panim. a Ala kulu e, tupam erim bar nol pam, “[130 km] mal tang pum. Kulu Sinai tuwalto e, kulu kawei wei ende kulu kanan keswei sembar tang wopum,” alamb puli nol e, pam pilkane enjip. Buk ende kangem, Discovering the World of the Bible, bol tomon yu e, neori kerem. Buk e, yu pende eri ne embe dom: “Alamb ende nol e, pu apnol tulpo tonom bar molo, se nol pengema wonal newonda [45 km] mal wonda pam. Nol e, apnol sikele simin wom [610 m] poro, ala olwal [4.8 km] poro. Kulu ele, ond pam puli keswei bol mom, kulu kawei wei sem, embe pile kulu Iden mal panijip. Kongar tausen puli tuwalto, komna alamb monjup ele wonjup nalerim, ond deit pam puli mom mongom nonam ne wonjup.”
Ond deit pam mom ala Nol Daram sem eri
Israil ga Isip sikele seori wonjup kunum, plawa, garam dis na oil, si wonjup. Ba, kenem pilkane esmen tunjup wal kunum, kanan nanonjup. Ala wal ende, enjep “kong sipsip, meme na bulmakau puli si wonjup.” (Kis 12:34-39) Enjep mal kulman ersem bar kanan wonjup pile, tunjup wal pende gonjup, kong sipsip na wal tunjup pende tokoi nonjup, pende opa ngonjup, ala pende got gend opa erngonjup eri. b (Apo 7:39-43) Ala Israil ga, sipsip, meme na bulmakau tunjup, pende ngalem kujup eri. Ba, Israil ga Johova yu to kenjip kunum, olom yu embe ne enjep ngom: “Enem ngangjep man kulu ei mal kulu man er seim bar, kong sipsip, meme na bulmakau, kongar 40-por astonam panim.” (Nam. 14:33) Embe pile, enjep astojup wal, kong kau amnolom si milk er nonjup, ala yu ende pambar tokoi nonjup eri. Embe enjip ba, enjep alamb puli kes tri milien wonjup pile, kongar 40 tuwalto embe er nonjup kaple narim. c
Enjep bulmakau, sipsip na astojup wal, mokun na nol najabar si nonjup? d Kunum ele komb puli tonda tom, ala mal kulman ere ei sembar kul na wal pende bol mom eri. Buk Insight on the Scriptures, Volume 1, embe nim, kongar 3,500 wopunom, “kulu Arabia tuwalto Israil ga punjup bar, nol puli keswei molmol erim, yipe embe nameim. Kenem embe nimen nalenem, komna nol papa erim bar wei semene pu, kulu tupam ersem kanmen tadom.” Embe paim ba, alamb pu kulu kulman ere ei sembar, alamb pu moram kaple nanem. (Lo 8:14-16) Johova jep wusngama Israil ga nol ngom nangonage, enjep tukong aijep bol gol porinange.—Kis. 15:22-25; 17:1-6; Nam. 20:2, 11.
Mosis, Israil ga Johova enjep mana nonam nengom panim. Got embe erim “[enem] bret mongse no kol namoram ma, enem yu porpor Got kin wonom karkar enam.”—Lo 8:3.
a Yu pende kanal nepin dal, Mei 1, 1992, Wastaua, p. 24-25 a paim kanjel.
b Israil ga mal kulman ere ei sembar punjup kunum, kunum tal sipsip na meme to opa ere Johova ngojup Baibel yubol tonom. Ngimba opa enjip e, pris kongan enam ne makrojup kunum, ala ende Pasopa kunum enjip. Opa talaima kongar 1512 B.C.E. enjip, Israil ga kulu Isip sikele seori wonjup kongar ding wopungo bulto enjip.—Wkp. 8:14–9:24; Nam. 9:1-5.
c Mal kulman erim bar mol wonjup kongar 40 porninda mand erim kunum, Israil ga alamb nganmal ngo to win enjip bar, kong sipsip na bulmakau andet tausen pulikes to sinjip. (Nam. 31:32-34) Embe enjip ba, mana anjngo nopu se Got Ngonal Pane Yu Dongal Nim Mal tuwal punjup.—Jos. 5:10-12.
d Kong sipsip, meme na bulmakau mana nonjup pane yu ende pande nakanmen, nalenem, Israil ga kunum dingding ne mana nalnal nonam mal Johova kun ngom.—Kis. 16:15, 16.
