YU DUWOM 43
GOLANG 90 Ende Ende Kumbol Erdongal Enamen
Bunuman Tal Panda Nalmal Tomene Keramen
“Wal porpor omukro kun paim mo napaim kanamen.”—1 TES. 5:21.
DUWOM ENAMEN YU KERMA
Kenem Johova konganem esmen bar bunuman tal pamdal, wal pende ere bunuman dulto ambramen. E embe mal, kenem kenem alamb nalmal meimen nepisamen bar, alamb omuk ronamen bar, mo kenem kenem kongan na wal ende enamen nepismen bar.
1-2. (a) Johova konganem alamb nawal pende bol bunuman tal sinam? (b) Yipe yu duwom enamen bar, nawal omukro kanamen?
ALAMB porpor kongar jeljel meim, kunum pende ne bunuman tal ambsim eri. a Ende embe mal, Witnis yegal ende Johova na bol kapisem mo, nol panal kaple enem moma nepisa. Ende pisamen, angjen ende ye-gal mom kunum, Johova konganem kumbol weingo ere, mala alamb kumoni puli kannonam ne esim mal narim. Pi olom tuwa sem pemili aiyem bol ku apal eri seim, olom embe nepisa, yegal mond kunum bunuman ka karkar narind paim nepisa. Pi ambanjen tuwa ende dongal porninde mora mal buro pile. Olom kespisa nalenem, kongan komna ere ere erim mal enda kaple nanem. Kunum pende ne nenem ki embe mal ngondol: ‘Johova na mei weieri pilkane enem mo? Na Johova konganem kumbol weingo erind ka pisem mo? Na Johova konganem anjngo enal kaple enem mo?’
2 Kenem ki embe mal pundom nasinjin dal, Johova bol pilgi ne olom lotu erngonamen mem wakronamen. Yu duwom pi enamen bar, kenem bunuman tal pamdal, Baibel yu kerma pende meim, pakeronda mal omukro kanamen, (1) Johova kenem bol kapisem moma nepisamen kunum, (2) yero wal omuk kanaronjin nepisamen kunum, ala (3) na Johova konganem ka ende enal narind nepisamen kunum.
BUNUMAN TAL PANDA NALMAL ERKUN ENAMEN
3. Nal wusngam ende bunuman tal panda erkun enamen?
3 Wusngam ende kenem bunuman tal panda erkun enamen, Got Yuwom Baibela meim omukro kane ki panda pundom sinamen ne enamen. Kenem embe enjin dal, dongal kolsi erkun ermolo, “pilgia akilgi nemoramen.”—1 Kor. 16:13.
4. Kenem nalmal ere “wal porpor omukro kanpol tonamen”? (1 Tesalonaika 5:21)
4 1 Tesalonaika 5:21 gere. Pilkane endel Baibel kenem wal porpor “omukro kanpol toya dom.” Kenem nalmal embe enamen? Kenem pilgi nimen wal kun paim mo napaim nepinjin dal, Baibel nal padom omukro kanamen. Ende embe mal, yegal ende Johova dungola na alamb dulto mal kanem moma nepisa. Olom ki embe mal paim pile, Jehova olom kanka nakanem nepisa mo? Ma, embe napisa. “Olom wal porpor omuk karo,” Johova bunuman nalmal paim kanpol tonda.
5. Jehova kenem ki pundom ngonom, nalmal “pismen”?
5 Got Yuwom Baibela meim germen kunum, Jehova yu ne “kenem ngonom komol se pismen.” Kenem ki ende pamdal, Jehova bunuman nalmal paim kanamen nepinjin dal, Baibel mongse nagernamen, wal pende enamen eri. Kenem ki paim mal Baibel skripsa ende pundom kun ngonda kurkansi, duwom ka enjin dal, kenem pakeronda. (Prov. 2:3-6) Ala wusngam ende Johova okanaiseisen wusngama Baibel buk na nus meim, omukro kanamen pakeronda eri. Embe enamen kunum yane ne Johova ngopo pakerondo, ki paim pundom kurkane sinamen. Ala Baibel yu kerma pende omukro kanamen pakeronda, mo nomolpa esim bar konganem enamen eri. Wal ende, komna Baibel bonjup kunum, Got bol kamolo olom konganem enjip ga, kenem ombun kaumon mal ding mal kaujup yubol meim omukro kanamen, kenem pakeronda eri.
6. Kenem kongrikeisen make pumon nalmal pakerondo, bunuman tal paim tomene kesmen?
6 Kenem kongrikeisen make pumon bar, Jehova yu nengondo komol se pismen eri. Kenem make paim bar kunum kunum punjin dal, yu ende min wonda mo ende yu pundom ninam bar, kenem bunuman tal paim tomene keramen mal yu kun ende ninambe pisamen. (Prov. 27:17) Pi nawal kenem pakerondo ki pende panda, bunuman tal sinamen pundom sinamen mal kanamen.
JOHOVA NIM KAKANEM MOMA NE BUNUMAN TAL PANDA KUNUM
7. Ga pende nal ki ende ngonam?
7 Kunum pende ne, ‘Johova na weieri kakanem moma, nepilpile erin mo?’ Nenem wal ei mal kandal, kupul mal na wal poro Ersem Ye bol, senonal kaple nanem nepisel. King Depit bunuman embe ding mal sinda sim. Olom Johova alamb porpor kantawol enem nepile embe nim: “O Johova, alamb e nawal wei ne nim olom pilngonon, ala ye ngalem nawal ne nim olom kantawol enen?” (Sng. 144:3) Ki embe mal pundom nanja pu kansindel?
8. 1 Samuel 16:6, 7, 10-12, Johova alamb nalmal kane omukronom padom?
8 Baibela yubol pende meim duwom erkanmen, alamb ende kangem napaim nepismen alamb, Johova alamb embe mal pilkane enem. Ende embe mal, Johova Samuel ne kelnge Jessi gar pu olom ngangem ende bulto, Israil alamb king mora ye makronal nepum. Jessi ngangem 7-poro ninge wo Samuel kanjip, ba ngangem Depit nesi tuwal nakem. b Ba Johova, Depit bulto king mora nepim. (1 Samuel 16:6, 7, 10-12 gere.) Johova Depit kumbol tuwalto sem mal pilkane erim—ye kembis mom ba, pilgi wal si wal kerma wei pakim.
9. Nalende Johova nim bol weieri kapisem nepisel? (Piksa pra kane.)
9 Johova yero nim nalmal kakanim mem tanim mal pisel. Nim wal ende erkun endel bar, bunuman tal pam olom nim bunuman ka ngom. (Sng. 32:8) E, tadom olom nim yero kanpol weirom. (Sng. 139:1) Johova bunuman ka yu nengonom si konganem eri pakeronom kunum, Johova nim bol kakanem nepilgi don. (1 Sto. 28:9; Apo. 17:26, 27) Nim ombol wei ere olom konganem ere yuwom karkar enal ne enen pilkane enem. Ala nim mambnem ka pende paim olom pra kane nim bol senonal nepisem. (Jer. 17:10) Embe pile nim olom bol Senon dal, nim bol kawei pisa.—1 Jon 4:19.
“Nim anjngo olom [Johova] kurun dal, erkelde olom kansindel.” 1 Sto. 28:9 (Paragrap 9 kane) c
WAL PENDE YERO OMUKRO ERIN BU TAL PAMDAL NAL ENDEL?
10. Kenem yero wal pende omukronjin bar buro pinjin dal, nal ki pende min wonda?
10 Alamb pende kol meim bar wal pende yero omukronjin kun paim moma ne, bunuman tal sim. Ende embe mal, enjep ku kongan ka ende enjip wakronjup mo bisnis ende enamen nepinjip pra wakronjup eri. Johova konganem kunum kunum enjip kongar puli wopunom. Ba pilkane esim, ga pende ku kongan kumbol ngo enjip ga ku puli seim, ala nomolpa esim bar wose kawei wei punom. Wal embe mal omukro kane enjep bunuman talsi embe nepisam: ‘Na Johova konganem kunum kunum enal panind, bunuman ka karkar erind moma nepisam. Mo wal kaka sinal wal nasind nepisam.’
11. Nalernge Buk Song 73 bom ye, bunuman dulto nasim?
11 Ki ding mal nim bol min wom dal, Buk Song 73 bom ye nal panim omukro kanjel. Olom kanim Johova lotu ernangonjup alamb keswos nasinjip, wal puli kanno, ombun napam-mal monjup. (Sng. 73:3-5, 12) Alamb ermonjup mal olom omukro kanim kunum, Johova konganem kunum kunum enal ne erind mem kanapam nepim. Olom bunuman embe sim bar, “kunum kunum kinimba Got na erkun erim” panim. (Sng. 73:13, 14) Olom bunuman embe mal pam, nalerim?
12. Buk Song 73:16-18, bom ye bunuman tal pam, nalmal erkun erim padom?
12 Buk Song 73 :16-18 gere. Buk Song bom ye Johova garwom kol kumbol amin sembar pum. Ele pumbar olom bunuman dulto sim. Yipe nomolpa esim bar kapil meim ba-mibulto enjep bol wal ka ende min wonda ne kui nasim. Pilkane erim erkelnge olom kumbol na bunuman amin senge, Johova kongan si ngimba kel erim e, wal kawei ende erim pam. Ala olom dongal kolnga si Johova konganem anjngo erpunal nepim.—Sng. 73:23-28.
13. Nim wal komna ende erin bar kanapin pamdal, nalmal ere kumbol amin sindel? (Piksa pra kane.)
13 Got Yuwom meim nim pakerondo, kumbol na bunuman amin sindel. Nim nalmal pakeronda? Johova wal kaka nim ngonom mal buro pisel, ala olom konganem nare lotu ernangom alamb enjep pake naronda, enjep wal kaka pi kannom bar mongse sengse meim, wal ka ende bulto min wonda ne kui nasim. Ba nim wal kaka yipe eri sinal nenapisel, Johova yu dongal ne mibulto wal kaka puli keswei ngonal padom. (Sng. 145:16) Ala wal ende buro pisamen: Nim wal omuk jel mal to Johova konganem nanange, yipe nalmal morange mal buro pile. Ala wal ende kenem weieri pilkane esmen: Alamb kanka kane Johova konganem si ngimba kesim ga, wal ka ende tambem wei nanem.
Johova wal kaka mibulto kenem ngonal padom bar kanamen (Paragrap 13 kane) d
JOHOVA NIM BOL KAPISEM MOMA NEPISEL KUNUM
14. Ga pende bol nawal min wonom, ala nal ki ende erkelde bunuman tal sinam?
14 Johova konganem alamb pende tuwa seim, keswos nganja paim, mo nganj tambem pende ombun paim eri. Wal embe mal erkelde Johova dungola ka nameimen nepisam. Enjep ki embe ngonam, ‘Na Johova konganem pende enal kaple enem mo?’
15. Buk Song 71 bom ye, nawal ende pilkane erim?
15 Buk Song 71 bom ye pra pilkane erim, olom dongal pornim. Olom yane embe nim: “Na dongal porninda kunum nim, na bulnangoi.” (Sng. 71:9, 18) Weieri, olom dongal pornim ba, Johova konganem anjngo enda, olom pakero dongal ngonda pam pilkane erim. Buk Song bom ye duwom ere pilkane erim, alamb ende dongal porninda ba, ombol ere olom konganem esim Johova enjep bol kapisem.—Sng. 37:23-25.
16. Tuwa sem ga nawal pende ere Johova bol kameim? (Buk Song 92:12-15)
16 Nim tuwa ende mondal, Johova nim bol nalmal pisen pilkane endel. Nim nganj dongal porninda ba olom nim pakerondo, pilgi wal dongal morol. (Buk Song 92:12-15 gere.) Nim endel kaple nanem wal bunuman puli nakerel, endel kaple enem wal kumbol ngo endel. Ende embe mal, nim pilgia dongal molo wal pende endel bar ga pende pakerondol. Johova nim kongar puli tuwalto kantawol enem, ala wal kaka mibulto enal paninde kui enen mal, yubol to alamb ende ngondol. Ala wal ende pilkane endel, alamb ende pakera ne yane ne Johova ngonon, dongal kerma paim eri. (1 Pita 3:12) Ala kenem porpor tuwa senamen mo ombun jeljel ende min wonda ba, kenem wal ende erkelpe Johova kapisa, ala alamb ende pakeronamen eri.
17. Nalende kenem kenem alamb ende bol omuk naronamen?
17 Nim Johova konganem puli enal kaple nanem nepin dal, weieri pilkane endel, kaple enem wal enen Johova kapisem. Ala nenem kongan enen alamb ende esim bol omukronal nepisel, ba bunuman embe mal sinen wakrondol! Nalende wakrondol? Nalenem, Johova omuk embe naronom. (Gal. 6:4) Ende embe mal, Maria kopong murang ku kerma bom tu Jises ngom. (Jon 12:3-5) Ala amb kangil ende wal puli kannanom tempola wo ku mongom kerei wei tal ende boksa kem. (Luk 21:1-4) Jises amb tal e omuk narom, olom kanim enjel pilgi pam mal taninjil. Jises mambnem embe erim, Dam mambnem karkar erim. Embe pile nim pilgi wei nindel, Johova kanka kane olom bol pilgi ne wal enen pilkane enem, olom konganem puli enal kaple nanem nepisen pra kanem.
18. Nawal pakerondo kenem bunuman tal paim tomene keramen? (Boksa “ Johova Yuwom Nim Pakerondo Bunuman Tal Paim Tomene Kerel,” pane paim kane.)
18 Kenem porpor kunum pende ne bunuman tal simen. Ba kenem yu duwom enjin bar pilkane esmen, Baibel yuwei kenem pakerondo, bunuman tal paim tomene keramen. Embe pile ombol ere ki panda pundom kansinal ne endel, embe endel pakerondo bunuman puli nakerel. Johova kenem dingding ne pilkane enem, nim olom si ngimba kele konganem enen pilkane enem. Ala yu dongal ne wal kaka ngonal padom weieri ngonda. Nim weieri pilkane endel, Johova kongan alamb olom bol kameim, olom enjep kakane dingding ne kantawol enem.
GOLANG 111 Kenem Ka Pismen Wal
a KANJIP PAIM YUMEM NE AUDOM: Yu duwom pi esmen bar, kenem bunuman tal si Johova kenem bol kapisem moma nepisamen mo, wal ende omukronjin bar bunuman ka karkar enjin moma nepisamen kunum, nalmal enamen mal omukromon. Bunuman tal simen panimen e, Johova na olom wal kaka mibulto enal pane yu dongal nim pilgi nimen e pilnanimen.
b Depit kongar nalnal molngo Johova olom king mora pane makrom, Baibel nandom, olom ngang barel wei mora mom.—Septemba 1, 2011, Wastaua, p. 29, par. 2 kanjel.
