YU DUWOM 41
GOLANG 13 Krais Kenem Ta, Kawei Nim
Jises Gora kunum 40-Pam Wal Erim mal Duwom Enamen
“Kunum 40-tuwalto olom kanjip kunum, Got Kingdom pane yubol to enjep ngom.”—APO. 1:3.
DUWOM ENAMEN YU KERMA
Jises gora mand erim, kunum 40-mongse pange ya mala wal pende erim mal omukro kanamen.
1-2. Jises disaipol tal Imenus punambel nepunjil bar, nawal min wom?
JISES DISAIPOL aiyem man Nisen 16, kongar 33 C.E. kunum, keswei pile, ga ere, kisal wei gonjup. Disaipol tal Jerusalem sikele se Imenus punambel nepunjil, Jerusalem molse kulu ele punambel 11-kilomita mal sem. Ye tal keswei pinjil nalerim, enjel Jises karkar enjil ye to gonjup. Embe pile, enjep Mesaia wusngama wal pende ere Juda ga siyem kera nepinjip ye gom. Ba napinjil wal ende min wom.
2 Enjel wusngam punjil bar, nakanjil ye ende wom kansinjil. Enjep yubol tonjup kunum, Jises bol wal kes mal ende min wom kanapinjil mal yubol tonjil. Ala nakanjil ye enjel bol yubol to ngom-pinjil yu auwur ninda kaple narim. “Olom yubol pulnombol tom bar Mosis na ga Propet pende,” nalende Mesaia ombun kauwo gora pane pam yumem ne aunim. Enjep wo Imenus monjup kunum, nakanjip ye ende wom—e Jises gom akil seyem wom pam! Kenem buro pisamen disaipol ga kawei wei pinjip, nalerim, Mesaia ala kolmom!—Luk 24:13-35.
3-4. Jises disaipol aiyem man bol nawal min wom, ala kenem yu duwom enamen bar nawal omukro kanamen? (Aposel 1:3)
3 Jises gol akle kunum 40-poro ya mala mom kunum, kunum puli disaipol aiyem monjup bar wom. (Aposel 1:3 gere.) Kunum ele olom disaipol aiyem man kespile, kisal-gol monjup yu ne erdongal erim. Enjep kawei wei pile, kumbol dongal wei pam nalerim, enjep Kingdom yu ka neori kele, tisa molo alamb ende duwom engonam pam. a
4 Jises ya mala mombar duwom erkanamen, nalmal pakerondo kapisamen. Yu duwom pi enamen bar, Jises anj dunglom nalmal konganem erim, omukro kanamen, (1) olom disaipol aiyem man yu ne erdongal erim, (2) pakerondo Skripsa yumem kanpol tonam ne erim, ala (3) duwom erngondo kongan kerma wei pende enam ne erim. Jises yu embe nim bar, kenem nalmal karkar enamen mal omukro kanamen.
ENDE ENDE ERDONGAL ENDEL
5. Nalende Jises disaipol aiyem man erdongal enda yu, sinam ambsik pam?
5 Jises disaipol aiyem man erdongal enda ambsik pam. Nalende embe enda? Nalerim, ga pende garjep wakronjup, pemili aijep na ku kongan enjip wakro sikele, Jises kunum kunum karkar enjip. (Mat. 19:27) Ala enjep wo Jises disaipol ende monjup bar, alamb enjep to erkes erngonjup. (Jon 9:22) Enjep kapinjip wal pende men kele, ala ombun kaujup eri. Embe enjip nalerim, enjep pilkane enjip Mesaia wonda pane pam, Jises wom. (Mat. 16:16) Ba Jises to gonjup kunum, enjep kumbol ombun si kanapile, kui esmen wal min nawonda nepinjip.
6. Jises gol akim kunum bulto nal erim?
6 Jises disaipol aiyem man ke ninjip bar olom bunuman tal nambim, ke ninjip bar pilgi wal dongal monjup taninjip, ba pilkane nanjip wal min wongo Jises gom bar keswei pinjip. Ba olom gol akim kunum, yero wo senom ga wamnam yu ne erdongal erim. Ende, Jises wo Maria Makdala olom kipkua pakjip bar kene mombar wom. (Jon 20:11, 16) Ala yero yubol tonjin mal, disaipol tal monjil bar pra wom. Bulto aposol Pita mombar pum eri. (Luk 24:34) Jises mambem erim bar kenem nawal duwom esmen? Olom gol akil ga monjup bar pum kunum, nganj nalmal pam omukro kanamen.
7. Jon 20:11-16 yubol tonom, Nisen 16, kinimba Jises pu kanim Maria nal ermom, ala Jises kanim erkelnge nalerim? (Piksa pra kane.)
7 Jon 20:11-16 gere. Nisen 16 kinimba ambra puli pende Jises gulto pakjip kanamen ne punjup. (Luk 24:1, 10) Ba amb ding ende kangem Maria Makdala, yubol aiyem omukro kanamen. Maria kipkua pu kanim, kipku ei sem. Embe pile olom pu Pita na Jon nengongo, enjep muko ne kipku kanam nepunjup. Enjep pu kanjip kipku ei sem kunum, yetal se gara punjil, ba Maria ke nemom. Apal pende molpim, Jises olom kanmom mal pam. Jises kanim pilgi pam amb olom pil, ke nemom. Embe pile, olom Maria mombar wo yu ne erdongal erim. Olom Maria bol yu ende ne kongan kerma ende ngom e—na akil seyem wond pane yu ka nesip angna man nga nim.—Jon 20:17, 18.
Jises mambnem erim mal karkar ere angjen ambanjen ende ombun kau moram, pakero mambnem ka ere yu ne erdongal enamen (Paragrap 7 kane)
8. Kenem nalmal Jises mambnem erim karkar enamen?
8 Kenem nalmal Jises mambnem erim karkar enamen? Kenem enamen kaple enda wal puli ere, angjen ambanjen man pende pakeropo Johova lotu anjngo erngonam. Embe enamen nepinjin dal, Jises erim mal, enjep ombun kaumoram pilkane ere wandil mem tane yu kawei nengonamen. Ambanjen ende kangem Joslin, olom bol wal ende min wom mal omukro kanamen. Olom ambam kar to gom, olom embe nim, “Na oll pende tuwalto, ke puli wei nind.” Embe pamba, anjgen ende ambiyem bol na wiro enjel gara wa ninjil, na nalmal pinj mal enjel nengond kunum, komol kase pile mambnem ka ere, ala Johova nim bol kapisem pane ngonjil eri. Joslin embe nim: “Na apnol yu napim bar tuwalto mond, simin laip bota kenjil mal pam. Enjel na pakeronjil bar na kapile Johova konganem ere erind mal anjngo erind.” Kenem pra enjep nalmal pisim mal neori keram kunum, komol kase pile, ala wandil mem tane yu ne yem keramen, wusngam embe kenem enjep pakeropo anjngo Johova lotu erngo moram.—Rom 12:15.
ENDE PAKEROI GOT YUWOM MEM KANPOLTONAM
9. Nal ombun ende Jises disaipol aiyem man kaujup, ala Jises nalmal enjep pakerom?
9 Jises disaipol aiyem man Got Yuwom pilkane enjip, ba Got Yuwom nomolpa enjip bar konganem enam pesil pam. (Jon 17:6) Ala wal ende, nalernge Jises kunumb kun ye mal to gonjup nepile, bunuman puli kenjip. Embe pinjip Jises pilkane ere olom disaipol aiyem man pakerondo, Skripsa yumem kanpol tonam ne erim. (Luk 9:44, 45; Jon 20:9) Enjep Skripsa yumem kanpoltonam ambsik pam. Olom enjep pakero, enem gerim yumem eri kanpol toya nim. Disaipol tal Imenus punambel nepunjil bar, Jises wusngam tambem wo enjel kin yunim mal omukro kanamen.
10. Jises nalmal taninge, disaipol aiyem man olom Mesaia wei ne pilkane enjip? (Luk 24:18-27)
10 Luk 24:18-27 gere. Pilkane esmen Jises olom ye namal enjep wamnam nenangom. Nengonal sekela ne, enjep ki ngom. Nalernge embe erim? Nalerim, enjep bunumana na kumbola sem wal neori keram ne embe erim. Weieri, enjep embe enjip. Enjep Jises nengo, nim kin Rom gapman angela siyem kerel paninjip. Embe ninjip kunum Jises Skripsa pende mom mongom tom mal konganem ere, enjep pakerondo min wom wal pilkane enam ne erim. b Bulto ponim kunum, disaipol aiyem man pende kansi yu propet pende mongom tom mal, yumem ne enjep ngom. (Luk 24:33-48) Yubol embe mal paim bar, kenem nalwal duwom esmen?
11-12. (a) Jises Baibel yuwei neori kembar, kenem nawal duwom enamen? (Piksa meim pra kane.) (b) Nortey, Baibel tisa aiyem olom nalmal pakerom?
11 Jises mambnem erim kenem nalmal karkar enamen? Kenem yero Baibel yu duwom erngomon alamb kin, enjep ki pende onom panda ngopo, enjep kumbola na bunumana seim wal neori keram. (Prov. 20:5) Ala bulto enjep nalmal pisim ne, nim ngonjup dal, enjep Baibel Skripsa pende nomolpa enam bar nalmal konganem enam mal nengondol eri. Bulto enjep wal pende enam mal kun nenangondol. Ba Baibel skripsa pende ki ngoni, enjep gerim yu nalmal konganem enam mal yu ne erdongal endel. Angjen ende Gana meim kangem Nortey, olom yubol aiyem omukro kanamen.
12 Nortey kongar 16-mom kunum, olom pulnombolo Baibel yu duwom erim. Kanan napungo, pemili aiyem olom kin opyem enjip. Nawal olom pakerongo anjngo Baibel yu duwom erim? Olom Baibel yu duwom erngom angjen, Matyu sapta 10 yubol to Kristen wei ende moral ne enda bar opyem ere erkes enam panim. “Pulnombolo olom bol opyem enjip kunum,” Nortey embe nim, “Na pilkane erind, yuwei kansind pam.” Ala olom Baibel yu duwom erngom angjen, Matyu 10:16 tane ngo kenem kanpol tonamen panim. Embe erim bar Nortey bulto pakerongo, olom pemili aiyem man pilngo, olom pilgi pam mal ne enjep ngom. Nol pasikem kunum bulto, Nortey painia enal nepim, ba olom dam kapim sukul yuniwesiti punda nepim. Baibel yu duwom erngom angjen, Nortey nim wal embe era nanim, olom ki pende ngo pakero kelde, Baibel Skripsa pende mo Baibel kolta yu pende mora konganem ere olom olom wal omuk karonda ne erim. Embe erim bar, nawal min wom? Nortey, olom Johova konganem kunum-kunum enal nepim. Embe enal ne erim bar, olom dam nim gar wakro sikele sepa nim. Ombun embe min wombar olom nalerim? Nortey embe nim, “Na pilkane erind, e yuwei sem pile, wal omuk karond.” Kenem ga pende pakeropo Skripsa yu kanpol tonjup dal, e pakero kelde enjep Johova kin pilgi nim wal dongal pande, olom konganem anjngo enam.—Efe. 3:16-19.
Jises mambnem erim karkar ere alamb ende pakeroni, Baibel Skripsa yumem kanpol tonam (Paragrap 11 kane) e
ANGJEN MAN PAKEROI “YIRA WAL KAWEI MAL” MORAM
13. Jises nalwal erkelnge olom Dam kongan anjngo erpunal nepim? (Efesus 4:8)
13 Jises ya mala mom kunum, kumbol ngo Dam era nim kongan erkaple erim. (Jon 17:4) Ba Jises dam kongan ngom ‘olom olom mongse kongan enal nenapim, Johova pakerondo ngom kongan erkaple enda pam.’ Jises kongar talende na oll 6-poro ya mala kongan erwanim kunum, olom ga pende duwom erngondo kongan enam ne erim. Jises ya mala mom kunum, olom disaipol aiyem man bol pilgi wei nim—embe pile Johova kanka kanjip ga e, Jises enjep kongan ngo enem molse ngimba pu yu molom ka duwom ere, neori kele alamb ngonam panim, disaipol pende kongar 20—mora monjup. (Efesus 4:8 gere.) Jises gol akil kunum 40-poro ya mala mom kunum, yira pende Johova bol yu dongal ne, kongan ombol enjip ga, Jises enjep nalmal duwom erngongo “ye ka mal” monjup?—Efesus. 4:8 stadi not kane.
14. Jises gol akil kunum 40-poro ya mala mom kunum, olom nalmal pakero kelde disaipol aiyem man pilgi wal dongal moram ne erim? (Piksa pra kane.)
14 Jises mambnem ka karkar ere, olom disaipol pilsinam ambsik pam yu ne enjep ngom. Ende embe, Jises gol akim bar pilgi naninjip, olom enjep pakero yuwei duwom erngondo gom akim ne pilkane enam ne erim. (Luk 24:25-27; Jon 20:27) Olom enjep nengo enem nomolpa enam bar, wal pende enam nepisim men kele, Johova konganem kumbol ngo eiya nim. (Jon 21:15) Jises enjep nengo enem kongan esim mal, alamb ende bol omuk naroya nim. (Jon 21:20-22) Ala enjep pakerondo bunuman dulto nambjip sikele, Got Kingdom yu ka anjngo neori keram ne erim. (Apo. 1:6-8) Jises mambnem erim bar elda walem nawal duwom enam?
Jises mambnem erim mal karkar ere angjen man duwom erngonambe, kongan pende mora enam (Paragrap 14 kane)
15-16. (a) Elda walem nalmal Jises mambnem karkar enam? Yubol to. (b) Patrik pilsinda yu nengonjup bar, nalmal pake sim?
15 Elda walem Jises mambnem nalmal karkar enam? Enjep angjen yegal walem pakeronambe, kongrikeisena kongan puli ere, ga ende pakeronam. c Elda walem angjen man duwom erngom, kunum kunum wal paim mal enam nenapisam. Ba enjep kunum kunum angjen yegal mane duwom erngo, pakeronambe molmene kele, alamb ende pakero kerambe kapil moram.—1 Tim. 3:1; 2 Tim. 2:2; 1 Pita 5:5.
16 Angjen ende kangem Patrik, pilsinda yu nengonjup nalmal pake sim mal, yubol aiyem omukro kanamen. Yegal mom kunum, olom alamb ende bol yu dongal ne mambnem ka tananine erim, ambanjen man bol pra embe ere erim. Elda ende kanim Patrik mambnem e wakro, mambnem kol sinda pam pile olom wusngam ka karkar ere pilsinda yu nengom. Patrik embe nim, “elda na nalmal ere mambnem pende erkun enal mal nim bar, na kawei pinj.” “Ala Patrik olom enal ne kapim kongan, angam man ende sinjip kunum, olom kanapim. Elda e, na pilsinal yu nengom na pakerongo, angna ambana man bol kanka mem tane namnam mongse kongan sinal nepinj bu wakrond.” Patrik mambnem embe mal pende karkar erim bar pakero kelnge, kongar 20-molse minpum kunum, kongan elda ngonjup erim.—Prov. 27:9.
17. Jises olom disaipol aiyem man bol pilgi nim mem, nalmal tanim?
17 Jises olom disaipol aiyem man kongan ngo enem Baibel yuwei neori mongse nakeram, alamb yu duwom pra erngonam panim. (Matyu 28:20 stadi not ende kangem “teaching them” pane paim kane.) Disaipol ga kongan e enamen kaple nanem nepinjip. Embe pinjip bar, Jises enjep kongan enam kaple nanem ne bunuman tal nambim. Olom enjep bol pilgi nim mem tane embe nim: “Dana na kem wond mal, na enem ker puya.”—Jon 20:21.
18. Elda walem Jises mambnem nalmal karkar enam?
18 Elda walem Jises mambnem nalmal karkar enam? Kongan erkanam elda, ga pende duwom erngonambe kongan esim. (Fili. 2:19-22) Ende embe mal, elda walem ngang ambel gal nengonambe Kingdom Gar mande ere, kes meim wal erkun esim. Ala angjen man kongan duwom erngonambe esim bar pakero kelde, enjep kin pilgi ne bulto kongan enam kaple enem nepisam. Angjen Meitu olom elda kol ende meim embe nim, kongan erkanjip elda walem, na kongrikeisen kongan ene woka punda mal wusngam jeljel pende duwom erngonjup, embe enjip bar na enjep bol kawei wei pinj. Meitu embe nim, “wal ende na pakerom e, alla erind bar duwom endel nepinjip na pakerongo, bulto wal erind woka pum.” d
19. Kenem nawal ende enamen ne bu dongal panda?
19 Jises gol akil kunum 40-poro ya mala mom kunum, olom alamb ende erdongal ere, duwom erngo, ala kongan nalmal enam mal tane ngom eri. Kenem bunuman dongal pande, olom mambnem erim mal kenem karkar kawei enamen. (1 Pita 2:21) Embe enamen bar kenem pra pakeronda. Bulto Jises enjep bol yu dongal ende ne, embe nim: “Na enem kin kunum kunum molpu, porninda kunum punal.”—Mat. 28:20.
GOLANG 15 Ja Ngangem Komna bol Kapisel!
a Jises gol akim mal yubol puli Baibel Matyu, Mak, Luk, na Jon a bol kenjip meim, kunum jeljel ga monjup bar wom: ende Maria Makdala (Jon 20:11-18); ambra pende monjup bar wom eri (Mat. 28:8-10; Luk 24:8-11); disaipol tal (Luk 24:13-15); aposol Pita (Luk 24:34); aposol monjup bar pum, ba Tomas namom (Jon 20:19-24); ala aposol monjup bar pum, Tomas pra mom (Jon 20:26); ga disaipol 7-poro monjup bar pum (Jon 21:1, 2); disaipol 500-molse minro monjup bar pum (Mat. 28:16; 1 Kor. 15:6); olom angam Jems mom bar pum (1 Kor. 15:7); ala aposol pal monjup bar pum (Apo. 1:4); aposol Betani mand sembar yemto monjup bar pum eri. (Luk 24:50-52) Ala ga pende monjup bar pum mal Baibela bol kenjip napaim.—Jon 21:25.
b Yu propet pende Mesaia pane meim, jw.org a pu atikol ende kangem, “Do Messianic Prophecies Prove That Jesus Was the Messiah?,” pane paim kanjel.
c Angjen yegal walem enjep kongar 20-molse-min-pum makronambe, seket tawol kongan enam. Embe moram nepinjip dal, yero elda kongan pende erkanam.
d Angjen yegal walem kongan embe enam ne pinjip dal, yu pende Ogus 2018 Wastaua, p. 11-12, par. 15-17, ala ende Eprel 15, 2015, p. 3-13 a paim ger omukro kane pake sinam.
e PIKSA YU BOLOM: Baibel yu duwom erngom angjen Baibel Skripsa yumem mane yubol to Baibel yu duwom erngom ye pakerondo, Krismas piksa na wal pende kun napam mokum sip rabis kerem.
