KOMNA Israil ga nomolpa enjip bar musik enjep bol wal kerma wei pam. Baibel yubol tondo pilkane esmen, komna ga monjup musik tonam wal pende konganem er golang kelkele enjip. Baibela yubol puli molndo pilkane esmen, golang kenjip mal yubol tonom, ende embe mal, Buk Song, Song bilong Solomon, na Buk Krai golang kenjip mal yubol boll kenjip meim. Ala buk ende kangem, Music in Biblical Life pane paim embe dom, “ga komna musik ermokjup mal ga yipe pende mambnem ding mal karkar er-musik ertuwal kesim.”

Nomolpa enjip bar kunum kunum musik tonjup. Israil ga enjep nalmal pinjip mal musik tonjup bar taninjip. (Ais. 30:29) Ende embe mal, king kolnga ende makronjup kunum, mo ami ga opnganmal enjip karom kunum, na Johova lotu erngonjup make kerma ende pam kunum, ambra kom kapile tabarin to golang kele dens toro enjip. (Het. 11:34; 1 Sml. 18:​6, 7; 1 Kin. 1:​39, 40) Israil alamb ende gonjup kunum, enjep keswei pile ga golang ere ere enjip eri. (2 Sto. 35:25) McClintock na Strong’s Cyclopedia, embe nim, “Ibru ga golang pisim kunum kawei wei pile enjip,” embe enjip alla ende napam.

Komna king ga musik pisam ka pilpile enjip. Israil ga monjup musik pisam kapile enjip, ende King Sol. Depit wirondo olom garem kol wo musik tondo pilpile erim. (1 Sml. 16:​18, 23) Ala bulto Depit olom king mom kunum, musik tonam wal erkun ermoklo, ala golang kawei pende bol tuwal kele, Johova tempol gara golang keram ga makro mokulngo, golang kelkele enjip. (2 Sto. 7:6; Amo. 6:5) King Solomon pra yira ambra golang kelkele enjip ga, makro mokulngo olom palesa molo golang kelkele enjip.—Ekl. 2:8.

Musik konganem er Johova lotu erngonjup. Wal kerma pam, Israil ga musik konganem er Johova lotu erngongo enjip. Ala yira, 4,000-poro makro mokulngo, Jerusalem tempola molo musik toro enjip. (1 Sto. 23:5) Musik tonjup wal embe mal konganem enjip, dram, gita, harp, na trambet kongnamen ere enjip. (2 Sto. 5:12) Ga yira e mongse musikro Johova lotu ernangonjup. Israil ga puli Jerusalem make kerma pambar punam newonjup kunum, golang kelkele enjip eri. (Sng. 120-134) Ala Juda yujopa Israil ga Kerma mokun nonam ne enjip kunum, Buk song a golang Hallel a kelkele enjip.

Yipe Got alambem man bol musik wal kerma paim. (Jems 5:13) Kenem golang kesmen e, Johova lotu erngomon mambnem ende. (Efe. 5:19) Kenem golang kesmen kunum, angjen ambanjen man, na Johova bol semand pumon. (Kol. 3:16) Ala kenem ombun simen kunum dongal ngondo kenem Johova bol pilgi nimen na olom kanka kanmen mem tanimen. (Apo. 16:25).