1. Nalende Johova Kolta dom bar karkar enamen? Yu ekin ende bolto.

 BU embe to pisel, nim ond mampin ende pu sitai punon seori wondol wusngam nakanen. Nim erkes enda wal puli meim: tu kong simbil meim, nim kes ngonam jembom pende meim, wal pende nim keswos ngonam wal boll meim, ala tupo seim bar nakan pu semene pundol eri. Ba kulu ele seim bar ende kanpol weiro, ombun wonda paim bar kanem alamb kolta nim punjil dal, kawei wei pisel! Yipe mala ond mampin embe tuwalto moramen mal meimen. Wal puli erkelde Got bol kanamoramen wal meim. Ba kenem Kolta ninda ye kawei ende meim—e Jehova. Olom kenem kolta ka ninde, ombun ngonda paim wal tuiro punamen nepisimen bar puori punamen—e, kunum kol senda bar tuwal pu kol aimanj mem sinamen.

2. Johova kenem kolta nalmal dom?

² Johova kenem kolta nalmal dom? Wusngam kerma ende kolta dom e, olom Yuwom Baibel a meim bar, ala mala alamb pende wusngam a tadom eri. E embe mal, “bunuman kapaim kongan ga wusngam a” pilgi mokun ngondo kenem bunuman ka karkar ere wal omuk karomon. (Mat. 24:45) Ala ga pende wusngam a kenem kolta dom eri. Ende embe mal, seket tawol ye na kongrikeisen-elda walem wusngam a yu ne kenem dongal ngo, ala ombun wonda kunum wal enamen mal nengondo karkar ere ka meimen. Yipe kunum porninal ne erim kunum, mambnem kes pikronom bar, Jehova kenem kolta kawei dom  bar sangiyo nimen! Embe enem kenem pakerondo, Johova bol pi kamolo mibulto kol aimanj mem sinamen eri.

3. Yipe yu duwom enamen bar nawal omukro kanamen?

³ Kunum pende ne Johova, sin nganja paim alamb wusngam a kenem kolta ninda yu nengonom, karkar enamen pesil panda. Nalende pesil panda? Angjen man pilsi karkar enamen yu nengonam, kunum pende ne kapisamen, kunum pende ne kanapisamen. Mo, ninam yu kun napaim, Johova bol nawonom nepisamen. Bu embe mal sinamen kunum, pilgi dongal pande Johova olom alambem man kantawol ere kolta dom, yu dom pilsinamen bar wal ka min wonda nepisamen. Yipe yu duwom enamen bar, wal talende kenem pakero pilgi er dongal enda kanamen (1) komna Baibel bonjup kunum Johova alambem man nalmal kolta nim, (2) yipe kenem kunum nalmal kolta dom? (3) olom kolta dom yu karkar kunum kunum enjin dal, nalmal kenem pakeronda.

JOHOVA ISRAIL ALAMB NALMAL KOLTA NIM

4-5. Johova, Mosis wusngam a Israil ga kolta nim, nalmal tane penem kem? (Garwom oriro piksa ngimba kane.)

⁴ Johova, Mosis makro Israil alamb Isip karpos monjup si seori tundol panim. Mosis wusngam a enjep kantawol erim, wal pende erim bar taninge pilkane enjip. E embe mal, tangaling Johova kombkupo a tuwalto molo enjep kolta nim, ala emilpal dop a tuwalto molo enjep kolta nim. (Kis. 13:21) Mosis, kombkupo e pumbar karkar er pum, Israil ga nesinge pu Apnol Bang pambar tuwal punjup. Enjep pu kanjip Apnol Bang yem pange yemto Isip ami walem enjep sikero sipjip kunum, kisal keswei golo gosmon ne pinjip. Mosis bol yu puli ne, nim alla ere kin nesi Apnol Bang pambar tuwal tun panijip. Ba Mosis alla narim. Johova olom alambem man Mosis wusngam a, nesi ele pum. (Kis. 14:2) Wusngam jel mal karkar ere enjep pakero singe, malmal enjip.—Kis. 14:​26-28.

⁵ Kongar 40 tuwalto Mosis kombkupo pumbar karkar ere, Got alambem man, kulu kulman ere ei sembar kantawol er sipim. a Kunum pende ne Mosis sell gar tau pambar, kombkupo wo min pange Israil ga porpor kankane enjip. (Kis. 33:​7, 9, 10) Johova kombkupo a molo, olom alambem man wal enam mal yu nengongo Mosis sip nengongo erim. (Sng. 99:7) Israil ga Johova wal puli pende erim bar kanpol weironjup, olom Mosis wusngam a enjep kolta nesipim pam.

6. Johova Israil ga kolta nim bar, enjep nal nepinjip? (Namba 14:​2,10,11) (Piksa pra kane.)

⁶ Wandil wei Israil ga puli, Johova, Mosis wusngam a enjep kolta nim, wal puli erim bar tanim ba enjep yu to kenjip. (Namba 14:​2, 10, 11 gere.) Kunum puli Mosis kongan erim bar, Johova ngondo enem ne napinjip. Israil ga mambnem embe enjip bar, Got Ngonal Pane Yu Dongal Nim Mal tuwal napunjip.—Nam. 14:30.

7. Johova kolta nim karkar enjip ga pende yubol to. (Namba 14:24) (Piksa pra kane.)

⁷ Israil ga pende Johova kolta nim karkar enjip. Ende Kelep, Johova kane embe nim: “Kelep . . . kumbol pal ngo na yu karkar enem.” (Namba 14:24 gere.) Embe pile, Johova Kelep wal ka ende ngom e, yu dongal nengonal nim mal, nim kapisel bar yero sanim. (Jos. 14:​12-14) Israil ga bulto min wonjup, Johova kolta nim yu karkar ka enjip eri. Mosis kongan pengem erim porninge, Josua lida molo Israil ga kantawol erim kunum, “kolmom kunum pal olom bol molmene wei  kenjip.” (Jos. 4:14) Embe enjip bar Johova enjep topum ka ende ngom e, yu dongal nengonal nim mal weieri ngom.—Jos. 21:​43, 44.

8. King monjup kunum Johova alambem man, nalmal kolta nim mal yubol to. (Piksa pra kane.)

⁸ Kongar pende bulto, Johova alamb pende makro mokulngo olom alambem man kolta nijip. Bulto king monjup kunum, propet walem makro mokulngo alambem man kolta nijip. Got kin ka monjup king, propet yu nijip karkar enjip. Pende embe mal, King Depit alla erim bar propet Natan pilsinda yu nim, molmene kele pim. (2 Sml. 12:​7, 13; 1 Sto. 17:​3, 4) King Jeosapat kolta yu propet Jasel bol si Got alambem man yu ne dongal ngo, [Got] “propet walem bol pilgi niya nim.” (2 Sto. 20:​14, 15, 20) King Esekaia ombun kauwo kumbol ombun kerma sim kunum, propet Aisaia bol pake sim. (Ais. 37:​1-6) King monjup, Johova kolta nim yu karkar enjip kunum, wal ka min wom, Got alambem man kantawol ka enjip. (2 Sto. 20:​29, 30; 32:22) Penem a wei pam alamb pilkane enjip, propet walem wusngam a Johova alambem man kolta nim. Ba Israil ga na king pende, Johova propet yu nijip bul ngonjup.—Jer. 35:​12-15.

KOMNA KRISTEN JOHOVA NALMAL KOLTA NIM

9. Komna Kristen monjup, Johova namal wusngam a enjep kolta nim? (Piksa pra kane.)

⁹ Komna kongar 33 C.E. kunum, Johova kongrikeisen Kristen simin kem. Kristen monjup olom nalmal kolta nim? Johova, Jises makro kongrikeisen Kristen pengem endel panim. (Efe. 5:23) Ba Jises, disaipol dingding ne kongan enam mal kun nenangom. Olom aposol walem na elda walem Jerusalem monjup, kongan pengem enam panim. (Aposel 15:​1, 2) Ala elda walem makro, kongrikeisen dingding ne kolta ninam panim.—1 Tes. 5:12; Tai 1:5.

10. (a) Komna-Kristen monjup, kolta yu nengonjup bar nal enjip? (Aposel 15:​30, 31) (b) Komna Baibel bonjup kunum, nalernge ga pende Johova makro mokum, kolta yu nijip karkar nanjip? (Boks a yu pengem “ Nalernge Johova Makro Mokum Alamb Pilkane Enjip ba, Yu Nijip Karkar Nanjip,” pane paim kane.)

¹⁰ Komna aposol-kunum kol taninam yu nengojup, Kristen karkar enjip mo? Kristen puli nengojup yu karkar enam kawei pinjip. Weieri, “enjep er dongal enda yu ne ngonjup bar kawei wei pinjip”. (Aposel 15:​30, 31 gere.) Yipe kenem kunum Johova alambem man, nalmal kolta dom?

 JOHOVA YIPE KENEM NALMAL KOLTA DOM

11. Yipe kenem kunum mol ngimba kele kolta nim ga, Johova nalmal enjep kolta dom yubol to.

¹¹ Johova, alambem man yipe meim anjngo kolta dom. E, Yuwom Baibel a meim na Ngangem Jises kongrikeisen pengem enem bar kolta dom. Yipe kenem kunum, Johova alamb makro moklo, anjngo kolta dom pilkane esmen mo? Pilkane esmen. Wal pende kongar 1800 tuwalto min wom mal omukro kandpe. Charles Taze Russell, na olom tap ga wal pende omukro kanjip, kongar 1914 wal kerma ende min wom, e Got Kingdom mo Gapman pulnombol kongan erim. (Dan. 4:​25, 26) Enjep yu embe nijip nalerim, Baibel yu propet mom mane omukro pilgi nijip, weieri mongom tom. Baibel a yu mom omukronjup, Johova enjep pakero kolta nim mo? Weieri, kolta nim. Kongar 1914 kunum, mala wal pende min wombar tanim, Got Kingdom mo Gapman pulnombol kongan erim. Wol Wo I wongo bulto, kes kanem kanem wom, kombkopo pulirom, ala mokun também erim eri. (Luk 21:​10, 11) Baibel yu omuk karonjup Kristen angjen man wusngam a, Johova alambem man pakerom.

12-13. Mol ngimba kenjip angjen man Wol Wo II min wom kunum, nawal pende erkun ernge, Baibel yu neori kenjip kongan wose kerma pum?

¹² Wol Wo ll kunum, wal pende min wom mal pra omukro kandpe. Angjen man wol etkota monjup, Revelesen 17:8 yu pam omukro kanjip, Wol Wo ll min wom erkelde Amagedon min wonda napam, ba kunum ka ende sende Baibel yu neori kenjip kongan ersi kerma keram pam. Kenem pisamen opnganmal pam, wal embe mal enam kaple nanda nepisamen. Angjen man mol ngimba kenjip ga, Sukul Geliet simin kele, misinari walem Baibel yu duwom erngonambe, pu mal tambem yemyem yu Baibel neori keram ne enjip. Wol Wo ll pam kunum misinari walem kenjip kantri jeljel punjup eri. Ala wal ende, bunuman kapam kongan ga, kongrikeisen yemyem sepum bar, Tiokretik Sukul b simin kele pablisa walem duwom erngonambe Baibel yu neori kele duwom er alamb ngonam bar, tisa kamoram ne enjip. Embe enjip bar, Got alambem man kongan bulto min wonda enam bar, ernomb tonjup.

 ¹³ Yipe kenem pilkane esmen, ombun kerma min wom kunum, Johova alambem man kolta nim. Wol Wo ll kunum, Johova alambem man yemyem mol punjup, Baibel yu neori kele, kumbol amin senge kapil monjup. Yu weieri ninamen, kongan enjip wo kerma pundo, Johova ye nalmal, alamb puli pilkane esim.

14. Johova okanaiseisen a yu nengom na elda walem makro kem meim, wal enamen mal yu nengom, nalende pilgi ninamen? (Revelesen 2:1) (Piksa pra kane.)

¹⁴ Yipe, Gapening Bodi angjen man Krais kolta dom bar anjngo karkar esim. Angjen man wal enam mal enjep yu nengom, min epen wonom ne pilkane enam nepisim. Seket tawol ga na elda walem, nengom yu si kongrikeisen c wal enam mal nengom. Got oiro sim elda walem, Krais “angel weiro” meim. (Revelesen 2:1 gere.) Pilkane esmen elda walem sin nganja paim, kunum pende ne alla esim eri. Mosis, Josua na ga aposol walem alla enjip eri. (Nam. 20:12; Jos. 9:​14, 15; Rom 3:23) Bunuman kapam kongan ga na elda walem makro kenjip meim, Krais anjngo kolta ne sipnde, “porninda kunum punda.” (Mat. 28:20) Embe pile, mem kapande, angjen man makrom ngimba molo, kolta nim ga bol kenem pilgi ninamen.

JOHOVA KOLTA DOM ANJNGO KARKAR ESMEN BAR PAKE SIMEN

15-16. Ga pende Johova kolta nim karkar enjip yu boljop meim bar, nim nawal duwom enen?

¹⁵ Johova kolta dom karkar anjngo esmen bar, yipe wal ka simen eri. Ende, Endi na Robin bunuman kapam kongan ga yu nijip karkar ere wal puli kannonambel nepinjil. (Matyu 6:22 Stadi not a kanjel.) Embe enjil wusngam apis kelnge, kapile tiokretik konstraksen kongan enjil. Robin embe nim: “Kil panjil gar kerei wei sem, mokun gal nonambel dumam nasem. Ala na piksa si kakankane erind kemra na wal puli ku bond bar kespile kenind eri. Ba, Abram ambiyem Sara erim mal, na wal sikend bar kumbol ombun nasind, Johova konganem enal bar kapinj.” (Hib. 11:15) Adam ambiyem tal wal embe enjil bar, nawal kamin wom? Robin yu ende embe nim: “Kil yipe kawei wei pisbel nalenem, kannonjil wal porpor Johova ngonjil. Kil tiokretik kongan esbel kunum, kunum kol senda bar nalmal moramen buro pisbel.” Endi kumbol ding senge embe nim: “Kil yipe dongal na anj dunglom pal Johova ngo Kingdom kongan esbel bar kapisbel.”

 ¹⁶ Johova kol tadom karkar esmen, nal wusngam pake simen? Ambajen Masia sukul ne pornim kunum bulto, kongan painia yubol tonjup bar dongal si, Johova konganem enal nepim. (Mat. 6:33; Rom 12:11) Olom embe nim: “Na skolasip ende ngo, yuniwesti pu, kongar 4-poro sukul nindel panijip. Ba na Johova konganem puli enal kapinj. Embe pile, na teknikel sukul ende pu, kongan ende duwom erkane er ku sinal, kongan painia enal pakeronda nepinj. Na bunuman embe karkar erind, wal kawei wei ende erind pam. Yipe kongan painia ere, Betel pu kongan ere pakerond, ala kol apis kerem kunum Johova kongan pende er kapis eri.”

17. Johova kolta dom karkar esmen, nawal ka pende simen eri? (Aisaia 48:​17, 18)

¹⁷ Johova okanaiseisen wusngam a kenem pilsinamen yu nengonom pakerondo, ku kakane, nganj wal puli kanon, wal pende ere Got lo to keramen bar kantawol ka enem. Johova kolta yu dom karkar esmen bar wal kawei min wonom. Kenem kumbol yu napande ombun puli tuiromon. (1 Tim. 6:​9, 10) Embe pile, olom konganem kumbol ngo enamen bar, kumbol amin sende kawei pilmoramen.—Aisaia 48:​17, 18 gere.

18. Nalende nim bunuman dongal pande, Johova kolta dom yu anjngo karkar endel?

¹⁸ Kenem bunuman tal napaim, Johova anjngo mala alamb makro kem meim bar kenem kolta nesip ombun kerma wei min wonda bar, setuwal pundo tuiro, se Jises Kongar Wan Tausen mal tawol enda bar tuwal punamen. (Sng. 45:16) Kunum ele kenem kenem kapismen wal enamen kunum, olom kolta dom yu anjngo karkar enamen. Johova kolta yu yipe dom karkar ka enjin dal, kunum ele enamen onom panda. Embe pile, Johova makrom ga kongan ere kenem kantawol enam ne kem meim ga, kolta yu nengonam kunum kunum karkar enamen. (Ais. 32:​1, 2; Hib. 13:17) Kenem Kolta Ye Johova bol pilgi ninamen mem kapaim, pakerondo pilgi wal ende to kes moksa panda kane tuiro, punamen newomon bar puori punamen—e kunum kol senda bar kol aimanj mem sinamen.