Embe pile, kenem wimuk nane, kui molpupo Johova wal enal ne enge erkem seim, kunum kun min wonda kapisem. Nalende kenem kui moramen nepisem? Nawal kenem pakerondo kapile kui moramen?

NALENDE JOHOVA KENEM KUI MORAMEN NEPISEM?

Baibel embe dom: “Johova kenem pake mem taninal ne kine kui meim, ala pulnombol wandil mem enem kin taninda. Nalenem, Johova kot dulto enem Got. Alamb olom kin kui esim alamb kapisam.” (Ais. 30:18) Aisaia yu e, ne bunuman dulto napam Juda ga ngom. (Ais. 30:1) Ba, Juda ga pende pilgi dongal pam monjup pile, yu e pilgi ne kui enjip. Johova konganem ga yipe olom bol kamolo, pilgi ne kui meim yu e enjep pakeronda eri.

Johova wimuk wanam nane kui mei pile, kenem pra wimuk wamnam nane kui moramen eri. Olom yipe mambnem kes paim to porninda enge erkem seim, ala kunum na anj dunglom kun min wonda kui enem. (Mat. 24:36) Min wonda kunum, Johova na olom alambem man, Kipkes Seten yu gend dom penem wondo alamb pilkane enam. Johova, Seten alambem man bol toporninda, ba Olom [kenem] bol “wandil mem taninda.”

Yipe kunum ombun duwom kaumon, Johova to pornaninda, ba kui moramen bar kapile moramen panda dom. Aisaia nim mal, wal ka bulto min wonda ne pilgi ne kui esmen bar kapil moramen. (Ais. 30:18) Kenem nalmal ere kapil moramen? Wusngam 4-poro karkar enamen kenem pakeronda.

KUI ESMEN BAR NALMAL KAPIL MORAMEN

Wal ka pende nim bol min wonom mal buro pisel. King Depit nomolpa erim bar mambnem kes puli min wom kanim. (Sng. 37:35) Ba, olom embe nim: “Johova dungola nim gupo koltungo, olom pakeronda ne kine molo kui endel. Ala alamb bunuman paim mal wal kanem kanem esim, nim wari nagorol.” (Sng. 37:7) Depit, Johova wal enal pane yu dongal nim bar pilgi ne, olom siyem ninda ne kui erim. Ala Johova wal ka porpor olom ngom mal buro pim eri. (Sng. 40:5) Kenem pra wal ka kenem bol min wonom mal buro pile, mambnem kes min wonom mal buro napinjin dal, Johova wal enda ne kui er moramen onom panda.

 Kongan puli ere Johova kangem ambil min kerel. Buk Song 71 bom ye Johova kin embe nim: “Kunum kunum na nim pakerondol ne kui enal, na nim kangnem ambil min wei keral.” (Sng. 71:14) Depit, Johova kangem nalmal ambil min kem? Johova ye nalmal yu ne alamb ngom, ala golang kele kangem ambil min kem eri. (Sng. 71:​16, 23) Depit erim mal, Johova wal enda ne kui esmen kunum, kapil moramen kaple enem. Wal embe pende ere olom kangem min keramen, e Baibel yu neori keramen bar, kunum dingding ne alamb bol yu nimen bar, na golang kele Johova kangem min keramen eri. Embe pile, nim Kingdom golang ende kerel kunum, yu mulom kawei neori kerem mane buro pile kapil morol.

Pilgi ding angnem ambanem man bol tapro dongal sindel. Depit ombun pende kauwum kunum, Johova bol embe nim: “Nim bol kameim alambnem bol dungola, nim kangnem pilgi nind mem taninal.” (Sng. 52:9) Kenem pra, Johova lotu erngo kameim ga, yu ne ende ende er dongal enamen, e kongrikeisen make punamen bar na Baibel yu neori keramen bar mongse ma, tapro wal pende er kapisamen ne enamen bar pra.—Rom 1:​11, 12.

Pilgi ne kui enen mem er dongal endel. Buk Song 62:5 embe dom: “Na kine molo Got dingeri bol pilgi ninal nalenem, na olom mongse bol pilgi ne kui erind.” Pilgi ne kui esmen wal er dongal enamen wal kerma paim—nalenem porninda kunum min wonda ne kui esmen penawom dal, pakerondo dongal moramen. Kenem kunum kanan mo ipal kui enamen, Johova yu dongal dom wal weieri min wonda. Kenem pilgi ne kui esmen wal er dongal enamen, Got Yuwom Baibel a meim duwom ka enamen—ala Baibel yu propet pende mongom tom buro pile, Baibel bonjup ga jeljel yu nijip woseding pum mal omukro kane, ala Johova ye nalmal wei neori kerem kanjel eri. (Sng. 1:​2, 3) Kenem kunum kunum “yane ne Johova murmulom dongal mo oli spirit” dongal ngoi, Johova bol seno kol aimanj mem ngonal pane yu dongal nim, min wonda kui esmen bar dongal moramen panindel.—Jut 20, 21.

King Depit erim mal, Johova bol pilgi ne wal enal panim enda ne kui meim alamb, Olom enjep bol kanka memka tane, kantawol enem. (Sng. 33:​18, 22) Johova wal kaka enal panim kui men anjngo molo, wal ka pende nem bol min wonom mal buro pisel, embe endel e, olom kangem ambil min kele, Pilgi Ding ga bol tapro dongal si, ala wal kawei pilgi ne kui enen mem erkeli dongal panda.