Ye Kol Tal Gapening Bodi Meibel
JENWARI 18 2023, Trinde kunum, yu mulom kawei ende jw.org a neori kenjip e Angjen tal, Gage Fleegle na Jeffrey Winder Johova Witnis ga, Gapening Bodi kongan enambel pane makronjup. Angjen talai kumbol ngo Johova konganem kanan er wonjil.
Gage Fleegle ambiyem Nadia kin meibel
Angjen Fleegle dam mam Got-bol ka monjil ye amb tal, westen Pennsylvania U.S.A., molo olom er simin tunjil. Olom ngang barel mom kunum, dam mam bol se taun kerei ende, pablisa yu neori keram tambem erim bar punjup. Ele pu monjup kanan napum, Novemba 20, 1988, kunum olom nol pam.
Angjen Fleegle dam mam tal, kunum kunum yu ne dongal ngonamble Johova konganem kunum kunum enda nepinjil. Kunum puli seket tawol ga, na Betel kongan enjip ga wiro si gara kelkel enjil. Embe enjil bar Angjen Fleegle, kongan embe enjip angjen ambajen man nalmal kapil monjup pilkane erim. Olom nol pam kanan napungo—Septemba 1, 1989 kunum, kongan painia pulnombol erim. Kongar tal bulto, kongar 12—mom kunum, kongan ende enal ne kapim kongan sim, se Betel pum. Oktomba 1991 kunum, olom Brooklyn Betel kongan pulnombol erim.
Angjen Fleegle kongar 8-poro Betel buk na nus er kerambe si boks a kesim bar erim. Bulto se Sevis Dipatmen pu kongan enda paninjip. Kunum ele Rasia yu nijip kongrikeisen sembar kongar pende erim. Kongar 2006 kunum, Nadia bol bolsi Betel kongan ai enjil. Enjel aima Potugul alamb monjup bar kongan enjil, ala kongar 10-poro Spenis yu nijip alamb monjup bar enjil. Sevis Dipatmen kongar puli kongan er molngo bulto, Angjen Fleegle Tising Komiti Opis kongan enda paninjip, ala bulto Sevis Komiti Opis kongan erim. Kongar 2022 Mas kunum, Gapening Bodi Sevis Komiti kongan pakero enda pane makronjup.
Jeffrey Winder ambiyem Angela kin meibel
Angjen Winder kulu Murrieta, California, U.S.A. molo yaumin wom. Olom dam mam tal yuwei a molo er simin tunjil. Kongar 1986 Mas 29 kunum nol pam. Oll bulto painia hap taim erim, olom kapil kongan e anjngo er punal panim. Oktomba 1, 1986 kunum, olom kongan painia pulnombol erim e, oll pende bulto.
Angjen Winder ngang barel mom kunum, angam komna tal Betel kongan er monjil bar pu kanim. Kanim er kelnge Betel kongan enda kapim. Kongar 1990 Mei kunum, Wallkill wo Betel kongan enda pane wirojup.
Angjen Winder Betel pum Dipatmen jeljel kongan erim, pende embe mal, Kilining Dipatmen, Pam Dipatmen na Betel Opis. Kongar 1997 kunum, ambiyem Agela kin bolsi Betel kongan ai ermol wonjil piwombol. Kongar 2014 kunum se Warwik punjil, Angjen Winder konstraksen kongan ere wol etkota taujup bar pakerom. Kongar 2016 kunum enjel se Wastaua Educational Center sembar, Patterson punjil. Angjen Winder Audio mo Vidio enjip bar kongan erim. Kongar 4-poro wopungo ala seyem Warwik wonjil, Angjen Winder Pesnol Komiti Opis kongan enda panijip. Kongar 2022 Mas kunum, Gapening Bodi Pesnol Komiti kongan pakero enda pane makronjup.
Ye tal e “wal ka ende” Johova kenem ngonom bar, yane ne Johova ngopo pakerondo Kingdom kongan kumbol ngo enambel.—Efe. 4:8.
