YU DUWOM 8
GOLANG 130 Ende Alla Wakrondol
Johova Alamb Alla Wakronom—Mambnem Nalmal Karkar Endel?
“Johova kapil enem alla wakronom, embe pile enem pra mambnem dingmal karkar enam.”—KOL. 3:13.
DUWOM ENAMEN KERMA
Yu duwom pi enamen bar ende kenem alla erngonam kunum, nal wusngam pende karkar ere alla wakronamen mal, omukro kanamen.
1-2. (a) Kunum pende ne nim alamb ende alla wakronal ne enen, pesil wei paim mo? (b) Denise alamb ende alla nalmal wakrom?
NIM ALAMB ende alla wakronal ne enen pesil paim mo? Kenem puli embe pismen, e alamb ende yunim mo wal ende erkerambe kenem kumbol ngimbil keswei simen kunum, alla wakronamen pesil wei paim. Weieri, ngimbil keswei sinamen ba, wal pende ombol wei ere alla wakronamen. Wal embe mal ambanjen Denise a kin minwom, olom ombun kesmal wei kauwum alla wakronda pesil wei pamba, alla wakrom mal omukro kanamen. Kongar 2017 kunum, ambanjen Denise pemili aiyem kin Johova Witnis Wol Etkota gar kol taujup kanwane, seyem gara punamen newonjup kunum, ye ende kar ambiltu enjep kar bambrom. Denise, kar tongo omb bunuman wulu pum. Ba bulto akil minwo kanim, ngalem man ombun keswei sinjip, ala adam Brain kar togom pam. Ombun kesmal minwom, Denise buro pile embe nim, “Na mundmong tundul nim enal wal pilpolnarond.” Ambanjen bulto omukro kanpoltom, simb angel kes mom ye ende kar ambil tum pam, embe pile yane ne Johova ngo na kumbol amin nganim.
2 Kar ambil tum ye to sel kele kot erngojup. Olom wal weieri min wom mal neori kemdal, karpos punda pam. Embe pile kot pinjip ga Denise nengo, nim yu nindel mal pile omukro karkar enamen paninjip. Denise embe nim: “Na pinj wal ende bond samap erpakjip bar ende purkam ne, ap boki pel toine tuwal kerambe ngimbil keswei sinal mal embe sind, embe pile na ngimbil keswei sind mal neori keral pam.” Wakan apal pende bulto Denise kot gar pu, ye erkelnge olom pemili ombun kerma wei si ngimbil sinjip mal neori keral nepum. Olom nal panim? Denise, jas ki si ye e, wandil golo alla wakra nim. b Olom embe nepornim kunum, jas pulnombol ke ne embe nim: “Na kongar 25-poro jas kongan erind, yu embe mal kot gar wei napilpile erind panim. Ombun sinjip pemili, ombun ngom ye alla wakra ninjip weinapilpile erind. Ala alamb ende yuka ne alla wakromon paninjip napilpile erind eri panim.”
3. Nawal erkelnge Denise alla wakrom?
3 Nawal pakerongo Denise alla wakrom? Olom Johova alamb alla wakrom mal buro yemkel pim. (Mai. 7:18) Johova kenem alla wakronom bar kapil sangiyo nimen mem, erkelde alamb ende kenem alla erngonam wakronamen eri.
4. Johova kenem nal enamen ne kapisem? (Efesus 4:32)
4 Johova kapil kenem alla wakrom mal, alamb ende alla wakronamen olom kapisem. (Efesus 4:32 gere.) Olom kapisem kenem erkun ermolo, alamb ende erkerambe kumbola ngimbil simen alla aijep wakronamen nepisem. (Sng. 86:5; Luk 17:4) Yu duwom pi enamen bar, wal talende kenem pakerondo alla weieri wakronamen mal, omukro kanamen.
WAL PENDE ERE KUMBOL OMBUN TOMENE KEREL
5. Provep 12:18 dom, ende kenem alla erngom kunum nalmal pismen?
5 Senomon ga mo pemili ding ende, mambnem kes erngonam kunum kumbola keswei pisamen. (Sng. 55:12-14) Kunum pende ne, je ende tonambe boll ngimbil keswei simen mal embe panda. (Provep 12:18 gere.) Kenem kumbola keswei pismen mal buro napisamen ne enamen. Embe esmen e, je ende bollo ngimbil keswei simen, ba wokrosi nakesmen kankelpe pameim bol dingmal paim. Embe dingmal, alamb ende erkerambe kumbola ngimbil wei sinamen, ba kansi kele wal ende nanjin dal kapil namoramen.
6. Ende erkerambe kenem kumbol ombun sinamen kunum, nal enamen?
6 Ende erkerambe kumbol ombun simen kunum, mambnem aijen ende paim e popol simen. Baibel neori kerem, kunum pende ne kenem kumbol mul sinamen padom. Ba kanpol tonamen yu dom eri, enem kumbol mul anjngo sinamoiya dom. (Sng. 4:4; Efe. 4:26) Nalende ende embe dom? Nalenem, kumbol mul anjngo si monjin dal, erkelde mambnem kes enamen. (Jems 1:20) Kenem alamb mambnem ende paim e, ende mambnem kes erngom popol si kumbol kantawol enamen kaple nanem, ba popol anjngo simoramen moma kenem kenem bol sem.
Mambnem ende esmen e popol simen, ba popol anjngo simoramen moma kenem kenem bol sem
7. Ende erkerambe kumbol ombun simen kunum, nawal pende pra min wonom eri?
7 Ende mambnem keswei erngom kunum, kenem keswei pile ngimbil sinamen. Pilgi ding ambanjen Enn bol ombun embe minwom, olom embe nim: “Na ngal mond kunum dana na mana sikele, na kantawol erse molmolo erim amb e sim. Enjel ngang ambel tal kanjil kunum, na dumam sinjil dana na kanka nakanja nepinj.” Ambanjen ende kangem Geroti, andam olom kin kanamom nalmal pim yubol to embe nim: “Kil ngal kerei monjil kunum pulnombol senonjil, ala bulto kongan painia ai enjil! Embe pile na mundmong tundul nim.” Pilgi ding ambanjen Naomi embe nim: “Na adana erkelde kumbol ombun wei nasinal nepilpile erind. Embe pinj ba, olom piksa kes ponograpi okul erkanj pane penem kem kunum, na kin kanamom nepinj ala olom alla erim bar kumbol ombun si keswei pinj.”
8. (a) Nalmem pende pande kenem alamb ende alla wakronamen? (b) Alla wakromon bar nawal kamin wonom? (“ Alamb Ende Erkerambe Kumbol Ombun Sinamen Kunum Nal Enamena?” ne yu boksa paim kane.)
8 Alamb ende kenem bol yunim mo mambnem pende esim, naeiya ninamen kaple nanem, ba nal mambnem eryem keramen kanpol tonamen kaple enem. Mambnem ka ende kunum kumum enamen e, alla erngonam wakronamen. Nalende embe enamen? Nalenem, kenem Johova kanka kanmen, embe pile olom kapisem kenem alamb ende alla erngonam wakroya dom. Kenem popol anjngo si alla waknaronjin dal, bunuman ka karkar nasmen ala kenem kumbol na bunuman kes mora eri. (Prov. 14:17, 29, 30) Ambanjen ende kangem Kristin bol wal minwom mal omukro kanamen. Olom embe nim: “Alamb ende na erkes erngonambe popol sind kunum, ngumbdal arngan nanem, mokun kanangond ala wur kanapai eri. Kumbol na bunuman kantawol enal pesil paim, e erkelde adana na alamb ende bol mambnem kanarind eri.”
9. Kenem popol anjngo nasi nalende alla wakronamen?
9 Ende kenem alla erngondo kumbol ombun simoramen, ba wandil sind pananinda kunum kenem ombol er alla wakronamen ne wal pende enamen. Nalmal embe enamen? Ambanjen Geroti, yero yubol tonjin embe nim: “Kunum pende wopungo, ye andna-kin popol si mond alla wakro si kend, embe erind kunum na kumbol amin kerma wei sind.” Kumbol ombun si kes pismen mem, alamb ende mambnem erngomon bar situwal napunamen. Mambnem embe esmen bar kenem kenem bol wal ka pende min wonom—e erkelde ombun min wonom bar buro napile, nomolpa esmen bar ala kapil meimen. (Prov. 11:17) Ba ende nim alla erngonambe wakrondol kaple narim dal, nal endel?
KUMBOL OMBUN SINEN MEM NALMAL TOMENE KEREL?
10. Nalende kenem kankelpe kunum pende wopundo, popol simen mem tomene keramen? (Piksa meim pra kane.)
10 Nawal nim pakerondo popol sikes kes pismen mem tomene kerel? Wusngam ende, embe endel e kankeli kunum pende wopunda. Alamb ende wal kerma nganja bollo ausik punom, ba kunum pende wopundo wal borom bar ala tokol sinem. Embe dingmal, kunum pende wopundo ernombro molo alla erngonambe kumbola ngimbil simeimen, alla wakronamen kaple enem.—Ekl. 3:3; 1 Pita 1:22.
Kenem wal ende nganja bosmon kunum pende wopundo ala to kolsinem, embe dingmal, ende erkerambe kumbol na bunuman kes meim kunum pende wopundo ala kaple enda (Paragrap 10 kane)
11. (a) Yane nindel nim pakerondo alla erngonam nalmal wakrondol? (b) Alla erngonam wakrondol mal vidio pende mom kanbar, nawal duwom enen?
11 Yane ne Johova ngo ki si, pakeroi alla erngonam wakronal panindel. c Ambanjen Enn yero yubol tonjin, yane nim olom nalmal pakerom mal yubol to embe nim: “Na Johova ki si pemili kin dingding ne alla, mo wal napaim mal ende enjin wakra nind. Bulto na pepe bollo dana amb kolsim kin ngo elep alla enjil wakrond panind.” Enn, embe erind amin napaim panim. Ba yu pende embe nim: “Na Johova alamb alla wakronom mem karkar ere embe enal bar, dana ambiyem kol kin Johova ye nalmal duwom erkanpol tonambel nepinj.”
12. Nalende Johova bol pilgi ne kenem kenem bunuman paim mal, karkar nanamen? (Provep 3:5, 6)
12 Johova kin pilgi ne nenem kin pilgi nanindel. (Provep 3:5, 6 gere.) Johova kunum kunum walka kenem bol min wonda pilkane enem. (Ais. 55:8, 9) Embe pile, wal ende kenem erkes enda panda wal eiya nadom. Ende alla erngonam wakroya dom yu pilgi ne karkar enamen bar, walka min wonda. (Sng. 40:4; Ais. 48:17, 18) Embe paim ba kenem kenem bol pilgi ninjin dal, ende alla erngonam wakronamen pesil wei panda. (Prov. 14:12; Jer. 17:9) Naomi, yero yubol tonjin ambanjen embe nim: “Yero na adana, piksa kes ponograpi kanim bar kanapile olom alla waknaronal nepinj. Ba olom erkem na ngimbil sind auro nesikele, ala erkelde ngimbil sinal bar kanapile kisal gond eri. Na nalmal pinj Johova pilkane erim, olom na bunuman dulto ambrin pananim. Kunum pende wopundo popol nasi kumbol amin sinal pam, pilkane erind. Ba na alla wakronal Johova kapim.” d
BUNUMAN DULTO NALMAL SINDEL?
13. Rom 12:18-21 dom, kenem nawal enamen ambsik paim?
13 Ende erkerambe kespile kumbol ngimbil sinamen, ba enjep alla wakronjin dal alla erngonam mal yubol anjngo naronamen. Kristen pilgi ding angjen mo ambanjen ende erkelde kumbol ombun sinjin dal, kenem kumbol amin mem taninamen wal kerma paim. (Mat. 5:23, 24) Kumbol mul sinamen sikela ne, wandil mem tane alla wakronamen. (Rom 12:18-21 gere; 1 Pita 3:9.) Nawal kenem pakerondo mambnem embe enamen?
14. Kenem ombol wei ere nawal ende enamen, ala nalende embe enamen?
14 Johova alamb mambnem ka esim bar mongse kanem, embe pile kenem olom mambnem karkar alamb mambnem kapaim mal mongse buro pile, alla erngonam buro napisamen. (2 Sto. 16:9; Sng. 130:3) Kenem alamb mambnem aijen ende paim e, kunum kunum alamb ende mambnem kes enem kanamen ne esmen—embe dingmal, kunum kunum ombol ere mambnem ka esim mongse kanjin dal, alla erngonam wakronamen onom panda. Angjen ende kangem Jarot, embe nim, “Pilgi ding angna ende mambnem ka puli erim mal buro pinj pakerongo, olom kanka kane alla wakronal onom paim.”
15. Ende alla erngom dal, nalende alla wakromon pane ngonamen kapaim?
15 Ende alla erngonda, nalende alla wakromon pane ngonamen wal kerma paim mal omukro kanamen. Nalende alla wakronamen? Naomi, yero yubol tonjin ambanjen embe nim: “Andana, na ki si, ‘Nim, na alla wakronon mo nim?’ ‘Na gup apise alla wakrond paninal ne, erind kaple wei narim.’ Pilkane erind olom alla weieri waknarond. Kunum pende wopungo, yu talende dongal kerma pam yu, ‘Nim alla wakrond, paninal kaple erim.’ Na alla wakrond panind kunum, andana dungol-ga pikrom, embe nind kunum olom kapim ala nam kumbol amin sind eri. Bulto, na olom bol pilgi ninge tap karonjil mem ala dongal pam.”
16. Ende alla erngonam wakrondol pane yu duwom esmen bar, nawal duwom enen?
16 Johova kapisem kenem alamb ende alla wakronamen. (Kol. 3:13) Kunum pende ne embe enamen pesil panda, ba ombol ere enamen. Popol nasi, ende alla wakronamen ne ombol enamen. Embe enjin dal, kenem bunuman dulto sinamen.—Boksa yu “ Wusngam Talende Karkar ere Alla Wakronamen,” pane paim kane.
ALLA WAKROI WALKA MIN WONDA MAL BURO PISEL
17. Alla wakromon bar nawal ka kenem bol min wonom?
17 Kenem alamb alla erngonam wakronamen mem puli paim. Pende omukro kanamen. (1) Danjen Johova, alamb wandil sinem mem karkar esim bar olom kapisem. (Luk 6:36) (2) Johova, kenem alla weieri wakronom bar, kapil sangiyo nimen mem taninamen. (Mat. 6:12) Ala (3) kenem keswos nasinamen, ala ende bol senomon mem anjngo dongal panda.
18-19. Ende alla erngonam wakronamen bar nawal kamin wonda?
18 Ende alla erngonam wakronjin dal, wal kaka pilkane nasmen wal kenem bol min wonda. Denise, yero yubol tonjin ambanjen, olom bol wal minwom mal omukro kandpe. Ye ende kar ambiltu olom pemili aiyem bambrom, ye e kot pu bulto olom olom kilkabaning togoral nepim, ambanjen Denise pilkane narim. Ba ambanjen e, ye alla wakrom erkelnge pulnombol Johova Witnis ga bol Baibel yu duwom erim.
19 Ambanjen Denise kin ombun kesmal wei minwom mal, kenem kin ombun embe min womdal, alamb ende alla wakronamen pesil wei panda. Ba ombol ere alla wakronamen bar wal kawei min wonda eri. (Mat. 5:7) Embe pile kenem enamen panda wal porpor ere, ombol wei ere Johova alamb alla wakronom mambnem karkar enamen.
SONG 125 “Wandil Mem Seim Alamb, Enjep Kapisam!”
a Kangjep wei ma, jel.
b Ombun embe mal min wonda kunum, Kristen dingding ne alla wakronam moma enjep enjep bunuman panda mal karkar enam.
c Jw.org apu golang originol, “Forgive One Another,” “Forgive Freely,” na “Friends Again,” vidio na golang ai kel kenjip meim kanjel.
d Bolsibel ye mo amb ende piksa ponograpi kanim dal, e sin keswei enem pile ende ngimbil kerma sinda, ba bolsibel mem kelip tonambel moma Baibel yu kun neori nakerem.
