Na Dana Mana tal lotu Katolik kin pilgi dongal wei pam. Ba enjel Baibela yu duwom ere Got kangem wei Johova pilkane enjil kunum, kapil Johova Witnis ende monjil. Na dana olom ondku si Jises piksa imis mal ere ere erim sikem. Olom kongan kapenta erim sape pam na konganem wal sip, kin garjen sembar dumam menro erka ere Kingdom Gar tauwum, e Pilipins taun kerma Manila sembar kulu kerei oriro ende kangem, San Juan del Monte pane sembar Kingdom Gar komna kunum wei tauwum.

Mana na kongar 1952 kunum kangim, enjel na angna man 4-poro na ambana man 3-poro Johova ye nalmal duwom kawei wei erngonjil pilkane enjip mal, na pra duwom erngonjil eri. Na yaumin wond kunum, na dana Baibel sapta ne kunum kunum gera nim, ala olom na kin Baibel buk na nus jeljel puli si na duwom erngongo erim. Kunum pende ne, na dana mana tal seket tawol kongan enjip ga na brens opis kongan enjip ga wirongo wo kin garjen kol papa enjip. Embe enjil bar erkelnge kin pemili porpor enjep kongan erwanjip mal yubol tonjup pinjin kin erdongal erim, ala erkelnge kin pemili porpor Johova konganem si wal kerma wei pakle kongan kumbol weingo enjin.

Na dana mana tal Johova kin pilgi ne kamonjil bar, na enjel kin wal puli duwom erind. Ba mana kes tongo gom kunum bulto, kongar 1971, na Dana kin kongan painia pulnombol enjil. Kil kongan enjil na kongar 20 mond kunum, na dana kongar 1973 pra gom eri. Dana mana talaima gonjil bar erkelnge nanam opinj mei nepinj. Ba Baibel wal “weieri min wonda mal yu dongal” mom pilgi nind na pakerongo, bunuman puli nakele Johova kin mand mond. (Hib. 6:19) Na dana gom kanan napungo, bulto na kongan painia salim se propins Palawan tuwalto ailen ende kangem Koron paninjip, tauna kolbar sembar pu kongan endel paninjip.

Na kongar 21 mond kunum ailen Koron pund. Na sitia molo yawund pile, ailen ele dop pawa, nol  nawom, ala kar puli nawanjip bar kane malmal erind. Angjen man apal pende monjup erkelnge kunum pende ne, ende kin kongan ai enal ga namonjup pile, nanam Baibel yu neori kelkele erind. Oll ngimba pulnombol kongan erind bar, na pemili aina na senond ga wakrond bar keswei pinj. Emil pambar kane min kupula kele kanjip monjup kanj kunum, ganolom dungola bernim. Na pinj kongan sikele segara wonal nepinj.

Wal embe na kin min wom kunum, nalmal pinj wal porpor ne Johova ngond. Wal ende erind e Baibel gerind, kenem buk na nusa wal mom gere buro pinj bar na erdongal erim. Buk Song 19:14 na bunumana wom na pilkane erind, “Johova na Komb Ku Kerma aina, na Siyem Kera Ye meim” nepinj, ala wal pende pra erkelne olom kapisa mal buro pinj e embe, olom konganem na mambnem aiyem pende buro pinj. Watchtower ende yu pengem “You Are Never Alone”  a pane pam na pake kerma weirom. Tawolgar e na kunum puliwei gerind. Nam opinj mond kunum Johova kin mei nepinj erkelnge na wal kaka pende erind, e yane nind, yu duwom erind ala duwom erind wal pra buro pinj eri.

Kulu Koron pund kanan wonapungo na makronjup elda ende mond. Embe pile, na pulnombol wakan tuwal make, Baibel Yu Neori Keramen Sukul, Kongrikeisen Pakeronda Yu, Kongrikeisen Baibel yu duwom, ala Tawolgar pra kantawol erind eri. Sande kunum alamb poro pisam yu kunum kunum nind. Angjen Angelito olom make kantawol ere kongrikeisena kongan puliwei erim erkelnge—opinj mei nenapim!

Koron kongan erind bar walka pende min wom—Baibel yu duwom erngond ga pende nol panjip erkelnge na kawei wei pinj. Ba ombun pende pra kawund eri. Kunum pende ne, Baibel yu neori keral bar kunum kele kolpupa molngo ponimbar tuwal pupo erind, ala pu najabar panal kanpolnarond. Kongrikeisen Baibel yu neori kelkele enjip bar ailen kerei puli sem. Na kunum pende ne apnol yunapim bar motobota pupo erind, ala wal ende na nolangelto nakanj! Na ombun pende puli kauwund ba Johova kantawol ere dongal ngom. Na pilkane erind, Johova na kongan kerma pende bulto ngondo ombun pende kaunal bar ernombrom pam.

Kongar 1978 kunum, Australia yemto not seim kulu Papua Nu Gini kongan endel paninjip. Papua Nu Gini kimbem puliwei mom kulu, e Spein kin pende dingmal seim. Kulu ele alamb tri millien monjup ala enjep yujop jeljel 800-poro pam, na kane malmal wei erind. Weieri, alamb puliwei Melenesen Pidgin mo kangem ende Tok Pisin ninjip.

Pot Mosbi kepitol siti sembar na Inglis kongrikeisen pu kongan apal pende endel paninjip. Ba bulto na Tok Pisin kongrikeisen ende kele, nim Tok Pisin duwom endel sukul nindel paninjip. Embe erind na pakerongo na yu duwom kamkam erkanj. Kanan napungo na alamb poro pisam yu Tok Pisina pulnombol nind. Papua Nu Gini wo kongan erind kongar pende bulto, na makro seket tawol kongan endel paninjip bar, malmal wei erind. Tok Pisin kongrikeisen sembar seket tawol kongan endel paninjip, Propins pende puli kongan erwanj.

Kongrikeisen pende kolbar wei sem pile, kibung seket puli pende min wonda pam erkelnge na kunum puli mala pu kibung panda dumam pupo  erind. Na kibung pund kunum na opinj mei nepinj, nalerim—kantri kol pund, alamb yujop na mambnem mo kastom aijep pra jeljel pam eri. Na kongrikeisen pende sembar punal kaple narim, nalerim, kimbem puli mom ala wusngam kanasem. Embe pile na wakan kunum, kunum kunum balusa pu kongrikeisen sembar kankane erind. Kunum pende ne nanam dingeri balus wan-enjina pupo erind, nalerim, kunum pende ne kulu kestangim komb mo kuprom. Embe pund erkelnge na bu-puli kele, bota ende wond nepinj!

Alamb apal pende telepon kannonjup, embe pile na kunum puli pepe bollo kongrikeisena ga ngongo erind, embe erind bar kongrikeisen kin yu nepinjin. Kunum puli, pepe bollo Johova Witnis ga ngonal ne, alamb maldam monjup bar ki sise erind. Na angna man kanj kunum, enjep kapil na kin sangiyo mem tane na jebenware ne sinjip. Enjep embe enjip kunum, nalmem pange na kongan ombol ere enjep pakeronal ne erind mal ala buro pinj. Wusngam puliwei Johova na pakerom pilkane erind, erkelnge olom kin semand wei pund.

Na ailen Bokonwil make komna pulnombol pund kunum, andam ambiyem tal ende towol ere na mond bar wo ki embe ngonjil: “Nim kil pilkane enen moma?” Na Pot Mosbi wond kunum andam ambiyem tal e kin Baibel yu neori kele, enjel pakerond mal ala buro pinj. Enjel talaima nol panjil! Na kongar 3-poro Papua Nu Gini kongan erind, Johova na pakerongo wal kaka puli minwom, e ende.

Kongar 1978 kunum, kulu Koron kongan erind bar ambanjen ende kolmem palngo-kongan kumbol weingo erim kangem Adel, na olom yero kanpolto pakle bulto sepind. Olom kongan painia ere ngalem tal Seli, Samuel, na mam amb tuwa pra kantawol erim eri. Kongar I981 Mei kunum, na Adel kin bosinambel ne se Pilipins pund. Kil bolsi bulto kongan painia aima ere, pemili pra kantawol enjil.

Na pemili monjup ba kongar 1983 kunum, ala painia salim kongan ngo Ailen Linapaken propins Palawan tuwalto, kongan endel paninjip. Kin pemili porpor taun sikele kolbar Witnis ga namonjup kulu punjin. Kongar pende bulto Adel mam gom. Ombun embe min womba, kil Baibel yu neori kenjip kongan kumbol weingo enjil bar kil erdongal ernge ombun kauwo kongan anjngo enjil. Kil alamb puliwei kin Baibel yu duwom enjil erwose dongal punjup pile, kulu Linapaken tuwalto kin Kingdom Gar kerei ende taunamen ambsik pam. Embe pile kin kenjen gar ende taujin. Kin pu kulu ele kongan ermonjin kongar 3-poro wopungo, alamb 110-poro Memoriel wonjup ala kin sewonjin kunum bulto, ga puli pra erwo nol panjip eri.

Kongar 1986 kunum, na ailen Kulion kongan endel paninjip, kulu ele kes kalanj tom ga mongse kulu ele monjup. Bulto Adel pra kongan painia salim endel paninjip. Alamb kes kalanj tom ga kin Baibel yu neori kel ngonambel kil pende kisal golo bu puli kenjil. Ba pilgi ding angjen ambanjen man kil negonjup kesrom ga enjep marasin sinjip pile, elep kes nasinambel paninjip. Kes kalanj tom ga pende ambanjen ende garem kol make pambar wonjup. Embe pile kil kawei pile Baibel yu neori kele alamb e ngonjil, nalerim, enjep pinjip Got na alamb ende kin kanka nakane bulngom nepinjip.  Ba kes tom alamb Baibel yu kawei duwom erkanjip, kunum ende kes porninde kawei wei moram pam pilkane enjip bar kawei wei pinjip.—Luk 5:​12, 13.

Kil ngaljel tal kulu Kulion nalmal monjil nepisen? Kil Adel kin ambel gal tal kulu Koron wirowo kil kolngonamble kongan ai enamen paninjil, erkelde ngaljel tal ambel tal kin tap kawei tonambel ne embe enjil. Samuel, Seli na ambel tal enjep Baibel yu neori kenjip kongan erkawei wei pinjip, nalerim, kil Adel kin ngal danjep manjep kin Baibel yu duwom erngonjil kunum, ngal komb enjep ngaljep man kin Baibel yu duwom erngongo enjip. Weieri, kunum ende kil pemili 11-poro Baibel yu duwom erngonjin. Baibel yu duwom erngonjin ga puli pilgi wal erwose dongal pu Johova kin semand punjup, embe pile kongrikeisen kol ende simin kenjin!

Na elda dingeri kulu ele mond. Embe pile, brens opis na ki si wakan tuwal make pabilsa 8-poro kulu Kulion monjup bar makero sikele, ala kulu kerei ende kangem Marile pablisa 9-poro monjup bar 3-auwa kele bota kulu ele pu pra wakan tuwalto makerondol eri paninjip. Make ersikenjin kunum bulto, auwa puli kele kimbema kolpu Baibel yu duwom enamen nepunjin kulu kerei e kangem, Alsei.

Kin kulu tal Marili na Alsei kongan enjin bar mongom karom pile, Kingdom Gar tal kulu ele taujin eri. Angjen man Ailen Linapaken monjup ga Kingdom Gar taunamen ne enjin bar kongan puliwei ere pakeronjup. Kingdom Gar kulu Marili sem alamb 200 mal moram kaple erim, embe pile kin pende tausi kerma kele seket make enamen ne enjin.

Kil ngal yauwo yeamb dongal enjil pile, kongar 1993 kunum kil Adel kin Pilipins seket tawol kongan pulnombol enjil. Ala kongar 2000 kunum, na Ministriel Trening Sukul pu, bulto sukul e panda bar nim tisa morol paninjip. Na tisa moral kaple nanem nepinj, ba Adel kunum kunum yune na dongal ngom. Olom na nengo Johova nim dongal ngondo kongan kol ngonom erkaple endel panim. (Fili. 4:13) Adel olom kesrom ba, Johova weieri olom nalmal pakerongo konganem erkaple erim mal yubol to na ngom.

 Kongar 2006 kunum na sukul e tisa mond kunum, Adel kes ende kangem Pakison paninjip sim. Kil kespile malmal wei enjil! Embe pile kelep kongan esbel wakro na nim kantawol enal panind kunum, Adel embe nim “Kaple ende nim dokta ende kansi na kesronom pakeronda, ala na pilkane erind Johova kelep pakerondo esbel kongan anjngo enambel.” Kongar 6-tuwalto Adel kesrom ba Johova konganem erim bar yu puli nanim. Olom kolwanja kaple narim, ba olom wilsia molo Baibel yu neori kem. Olom yu ninda kaple narim kunum, kongrikeisen make pambar yu pundom nimbar, yu tal mo dingeri mongse nine erim. Adel, pilgi ding angam ambam man, teks boll kenjip ala akilgi ne ombun kauwum enjep dongal sinjip mal olom kin yuka nengonjup eri. Olom kongar 2013 kunum gom. Na kankawei kanj ambina kongar 30-poro tapro kongan kawei ai enjil amb gom, na kumbol ombun si kes pinj na tomene wei kelnge nam opinj mei nepinj bu ala sind.

Adel, na erind kongan anjngo enal ne olom kapim, embe pile na embe erind. Na kongan puli erind pakero kelnge nanam opinj mei nepinj bu tomene kend. Kongar 2014 wose 2017 wom, kantri puli Takalok-yu ninjip kongrikeisen kongan to koltungjup, Johova konganem piriari mol nanjip bar pu endel paninjip. Embe pile Takalok kongrikeisen kantri embe mal pende sem pu kanj e, Taiwan, Yunaitet Steit na Kenenda. Kongar 2019 kunum, SKE sukul Tailen na India Inglisa-pambar tisa mond. Na kongan embe erind bar erkelnge na kawei wei pinj. Johova konganem puliwei ere kumbol wei ngond bar erkelnge kawei wei pilmond.

Kongan kol ende si erind bar pilgi ding angna ambana man kin seno, ende ende kin kanka mem dongal pam, embe pile enjep wakro sikele sewonal ne erind pesil pam. Wal embe mal min womba, Johova kin pilgi wei nind. Na embe erind bar weieri pilkane erind, Johova na pakerom pile kongan kol ende ngom kunum kumbol palngo kongan erind. Yipe na painia salim kongan kulu Pilipins erind. Na kongrikeisen aina kol tuwal meibar, kapil mei nalenem na pakero kantawol esim. Samuel na Seli enjel manjel pilgi pam mal karkar esbel bar, na kane kawei wei pis eri.—3 Jon 4.

Kunum pende ne na kin ombun min wonom, ende na ambina kes ombun kesmal wei kauwo gom na kanj. Na nomolpa erind bar wal koI puli na kin min womba, ombun aiyem kauwund. Na weieri pilkane erind, Johova “weieri kenem porpor dingding ne kin kolbar wei nameim.” (Apo. 17:27) Johova olom “anglem alamb pakeronda tambem nanem” ma, olom konganem alamb kulu kolbar meim pakero erdongal enem. (Ais. 59:1) Johova na Komb Ku aina, kunum kunum na kin mol pakerom bar na kapil sangiyo kerma wei nind. Nanam opinj namond.