ALAMB puli kangem panda kongan erpe kenjen bol molmene kele kapisim mal erngonam nepisim, pilkane enen mo? Enjep wal puli seim ba, kol sinamen eri nepisim. Alamb mambnem embe karkar esim, enjep enjep nepile seim wal bol kapil sangiyo mem tananim. Baibel, kunum porninda kunum alamb mambnem embe karkar enam padom.—2 Tim. 3:2.

Weieri, alamb enjep enjep nepisim e mambnem kol ma. Adam na Iv tal mambnem embe karkar enjil, kes na kapam mambnem enjel enjel kapinjil mal karkar enambel ne enjil bar, yipe kenem porpor ombun kaumon. Kongar andet bulto Juda King Usia pim, na king mei kangem kerma paim pile tempola pu murang tom paura gale opa enal kun paim nepim, ba e olom alla kerma wei erim. (2 Sto. 26:​18, 19) Embe dingmal, Parasi na Sadyusi ga pinjip kenjen Abram ngal kopam man meimen, embe pile Got kin mongse kanka kane semiro pu alamb pende kanem e, ngonda nepinjip.—Mat. 3:9.

Alamb enjep enjep nepile molsino alamb ende ngomon nepisim meim bar kenem tuwal meimen, embe pile kenem pra bu embe sinamen eri. (Gal. 5:26) Nawal pakero kelde enjep mambnem karkar nanamen? Mambnem embe karkar enamen Johova nal nepisem omukro kanamen. Baibel kolta yu tal paibel kenem pakerondo embe enamen.

Johova eiya dom mambnem karkar enamen. Mambnem pende enamen mal omukro kandpe.

• Pemili tuwalto wal ende enam e, Johova kapisem amb andam bol molmene kera, ala ye ambiyem  kanka kanja wal kerma paim. (Efe. 5:33) Andam ambiyem enjel enjel mongse kanka kanambel padom. Ye na amb jel ende kanka nakanambel ma padom. (1 Kor. 7:3) Ngal danjep manjep ngaljep nengo kin yu ninamen pilsi karkar enam panim kun paim, ala danjep manjep ngaljep bol kanka mem tane ambsik panda wal ngo kantawol enam.—2 Kor. 12:14; Efe. 6:2.

• Kongrikeisena tuwalto elda walem kongan pesil esim bar kenem molmene kele enjep pilngonamen wal kerma paim. (1 Tes. 5:12) Ba elda walem pilgi ding angjen ambanjen man wal embe embe eiya ninam kun napaim.—1 Pita 5:​2, 3.

• Ya mala gapman Got kem meim, embe pile enjep kongan esim bar kenem molmene kele teks ngoya ninam karkar erngonamen.—Rom 13:​1, 6, 7.

Johova kenem kanka kane wal ngonom pase minro pu, kenem kenem sinamen nekapismen e ngonom. Nalenem, kenem Adam sin sinjin pile goramen kun paim. (Rom 6:23) Embe paim ba, Johova kenem kanka kane wal kaka puli ngonom. (Sng. 103:​10, 11) Wal kaka mongse nangonom wal pende ngonom eri, kenem wal embe ngonda kun pam mal ngonom nenapisamen ma, nalenem, kenem kanka kane mambnem kawei weieri tane ne walka embe ngonom.—Rom 12:​6-8; Efe. 2:8.

Seten mal tawol enem alamb mambnem esim tuironamen. Kanpol naronjin dal, pulnombolo kenem wal puli si alamb ende ngonamen nepisamen. Jises kongan enjip ga pane yu ekin erim kenem bunuman embe sinamen onom paim. Kongan ga pende kunum pel kel anj dom bar ku denarius dingeri sinamen ne kongan enjip. Kongan pengem erim ye bulto ga pende singe wo wan auwa mongse kongan enjip eri. Kunum pel kele kongan enjip ga na wan auwa mongse kele enjip ga ponim bar topum mo ku dingmal sinjip. Ba kenem pilkane esim kongan kinimba enjip ga ku kerma si, wan auwa mongse enjip ga ngonam, nalerim, enjep kongan kinimba ermol pungo ponim. (Mat. 20:​1-16) Jises yu ekin e erim bar tanim, olom karkar esim ga Got kapil ngonda wal sinam nepilnim.

Kapil sangiyo nindel, alamb ende wal ngonam eri nenapisel. (1 Tes. 5:18) Aposol Pol erim  mambnem karkar endel, olom pilgi ding angam ambam man Korin monjup ki si, nomolpa enal bar wal ngo pakeroya ninda kun pamba embe nanim. (1 Kor. 9:​11-14) Alamb kenem wal ngom bar kapil sangiyo ninamen, ba wal ngonam eri nepismen bu tuironamen.

Molmene mem sindel. Ende olom olom ne mongse pisem alamb, wal seim sikele puli sinal eri nepisem. Molmene mem erkelde bunuman kes embe mal nasinamen ombol ertuironamen.

Molmene mem sinamen mal propet Daniel ta kawei nim. Olom pemili bol nomolpa erim bar kasem, olom ye kawei mom, sape pam, ala wal pende enda kaple erim, embe pile alamb na kangem ambil min keram nepisange. (Dan. 1:​3, 4, 19, 20) Embe pamba Daniel molmene kem erkelnge, Johova dungola wal kawei wei ende mal mom.—Dan. 2:30; 10:​11, 12.

Yipe kunum mala alamb enjep enjep nepisim na mol sinomon nepisim mem tuironamen. Wal kerma paim, Johova kanka mem tane wal kaka puli ngonom bar kapisamen.