1. Joas, Usaia na Josaia, nawal ende enam amin napam?

 NIM ngal kerei molo king kongan ere, Got alambem man kantawol endel mal buro pile! Nim namba kerma ende panda, konganem nalmal ere alamb kantawol endel? Ngal pende Juda tuwalto king monjup pane, Baibel yubol tonom. E, ga embe mal, Joas kongar 7-mom, Usaia kongar 16-mom, ala Josaia kongar 8-mom. Enjep king kongan enjip amin napanda pam mal buro pile! Weieri, amin napanda pamba, Johova na ga pende enjep pakerongo, kongan ere alamb tawol ka enjip.

2. Nalende Joas, Usaia na Josaia, kongan enjip bar, duwom er kanpol tonamen?

² Kenem king na kwin kongan nasmen, ba, ga talende kongan enjip Baibel yubol tonom bar, enjep bunuman ka na kes ai kongan enjip bar kenem wal kerma pende duwom enamen. Enjep wal enjip mal omukro kane, nalende tapka alamb bol tapro, molmene mem karkar ere ala Johova bol pake sinamen mal kanamen.

3. King Joas, Jeoiada Pris Molse Ngimba pum pilsinda yu nengom bar, nal erim?

³ Joas erim mal bunuman ka karkar endel. King Joas ngal dongal mom kunum, bunuman ka karkar erim. Joas ye gal mom kunum olom dam gom ba, Joiada Pris Molse Ngimba pum ye, olom ersi min tu, Johova ye nalmal duwom ka erngom. Pris e, Joas olom ngalem mal kangip ngom. Joas bunuman ka karkar ere, Johova konganem kumbol wei ngo ere olom lotu erngom, ala alamb pakerongo embe enjip eri. Joas, Johova tempol erka enamen pane kangip tom eri.—2 Sto. 24:​1, 2, 4, 13, 14.

4. Kenem Johova lo kakane karkar esmen, nalmal pakeronom? (Provep 2:​1, 10-12)

⁴ Nim danem manem mo, alamb ende Johova lo karkar era ne ngonijup dal, e, wal kawei ende nim ngom. (Provep 2:​1, 10-12  gere.) Nim danem manem wusngam jeljel karkar ere nim wal duwom er ngonam. Ambajen ende kangem Katiya dam olom nalmal pakerongo bunuman ka karkar erim mal kandpe. Kunum dingding ne, dam olom si sukul gar punal ne pum kunum, de tex yu omukro kankane enjil. “Ambel e, embe nim,” “kil embe enjil na pakerongo sukul gar ombun ende min wom, na wal pam mal ere ere erind.” Ba, nim danem, manem Baibel-yu karkar er lo ende paksam, nim piriari molo wal ende endel bar koltungum dal, nalende? Nawal nim pakerondo, nim pakeronam ne nim yu pilsi karkar endel? Ambajen ende kangem Anastasiaya buro pile embe nim, olom dam mam tal nalmem pange lo pakjil olom mane ne ngojil panim. “Lo pakjil na pakerongo enal pam wal erind, enjel lo ei mal pakle na wal pende enal bar koltunambel ne najil, na kanka kane tawol enambel ne lo pakjil.”

5. Nim mambnem pende endel bar, danem manem na Johova bol nal enda? (Provep 22:6; 23:​15, 24, 25)

⁵ Nim bunuman ka ngonda yu Baibel a yu meim nengom, pilsi karkar endel bar, danem manem kapisam. Ala wal kerma wei paim Got bol senonon mem, dongal pande olom nim bol kawei pisa. (Provep 22:6; 23:​15, 24, 25 gere.) Memka puli paim pile, Joas ngal dongal mol erim mambnem karkar endel.

6. Joas alamb namal kangip ngom pilsi karkar erim, embe erim bar nawal min wom? (2 Stori 24:​17, 18)

⁶ Joas bunuman ka karkar naere, wal erim bar duwom endel. Jeoiada gom kunum bulto, Joas bunuman kanapam alamb bol tapro mambnem kes erim. (2 Stori 24:​17, 18 gere.) Juda ga king gar kongan er monjup, Johova kanka nakanjip ga yu nijip, olom pilsi karkar erim. Nim embe ne pisel, Joas mambnem kes enjip ga e, bol tap naronange ba tom nepisel. (Prov. 1:10) Ala wal ende erim, olom ga-e, yu nijip pilsi karkar erim. Weieri, olom alla erim bar bepam Sekeraia yu ne er kun enal ne erim bar, ne kelnge to gonjup. (2 Sto. 24:​20, 21; Mat. 23:35) E, olom mambnem keswei erim! Joas nomolpa erim bar komna mambnem ka karkar erim, ba wandil wei bulto olom apostet ende molo alamb to gom. Bulto Joas kongan ga olom to gonjup eri. (2 Sto. 24:​22-25) Olom kanka kanjip ga yu nijip na, Johova yu karkar enange ne, ombun embe mal olom bol min nawonange! Joas yubol aiyem omukro kanmen bar, nim nawal duwom enen?

7. Nim alamb namal bol seno taprondol? (Piksa pra kane.)

⁷ Joas bunuman ka karkar narim bar, kenem wal kerma ende duwom esmen e, kenem—alamb Johova kanka kane er kerambe olom kapisa ne pisim alamb bol tapronamen. Ga embe bol tapronamen er kerambe kenem mambnem ka karkar enamen. Embe pile, kenem kongar dingmal meim ga bol mongse tapronamen ne nanamen, kongar kerma meim ga bol tapronamen eri. Pilkane endel Joas kongar pende menro molo,  senom ye Jeoiada ngom. Nim ga pende seno tapronal nepin dal, nenem ki embe ngondol: ‘Enjep na pakeronambe Johova bol pilgi nind mem dongal panda mo? Enjep yu ne na dongal ngonambe Johova lo karkar enal mo? Enjep Johova yuwei pende ne kem Baibel a meim yubol to pisim mo? Enjep Johova lo kem paim bar molmene kele karkar esim mo? Enjep na yu pile dongal sinal yu pende ne ngom mo? Mo enjep kumbol dongal pande na alla erind bar ne er kun esim mo?’ (Prov. 27:​5, 6, 17) Kenem pilkane esmen nim senon ga, Johova kanka nakanjip dal, nim enjep bol taprondol kun napaim. Ba, nim senon ga Johova kanka kanjip dal, nim enjep waknarondol—kunum kunum nim pakeronam.—Prov. 13:20.

8. Kenem intanet konganem enjin dal, nawal buro pisamen?

⁸ Yipe nim intanet konganem ka puli ere, pemili na senon ga bol yu ne pisim. Embe esmen, ba alamb puli intanet konganem ere, enjep esim wal er kerambe alamb ende kanam ne pisim. E, enjep wal kolnga ende toprom mo, enjep esim wal poto na vidio si kerambe alamb pal kanam ne esim. Nim intanet konganem erin pamdal, nim ki embe mal ngondol: ‘Na bunuman kerma paim wal er kelne alamb ende, na kanam nepis mo? Na wal ende er kelne alamb ende pakero dongal ngonda wal erind mo? Mo alamb ende na kangem kerma ngonam wal erind? Na kankere intanet konganem esim ga, na yu nind bar, buro pis bar, na mambnem erind bar, enjep mambnem karkar erind mo?’ Angjen Nathan Knorr, Gapneing Bodi ende mom, pilsinamen yu ne embe nim: “Nim alamb kapisam ne wal nandel, embe endel bar alamb ende er keli kanapisam. Nim er keli Johova kapim dal, alamb porpor Johova kanka kanim alamb kapisam eri.

9. Johova pakerongo Usaia nawal erim? (2 Stori 26:​1-5)

⁹ Usaia wal omuk karom mambnem karkar endel. Usaia King mom kunum molmene mem karkar erim. Ala olom molmene kele, Got wei kin kisal gom.” Olom kongar 68-poro kongan king erim, Johova olom pakerongo wal erim woka pum. (2 Stori 26:​1-5 gere.) Usaia opyem enjip kantri porpor tomene kele, Jerusalem kantawol kawei erim. (2 Sto. 26:​6-15) Usaia, Got pakerongo wal porpor erim bar, olom kawei wei pim.—Ekl. 3:​12, 13.

10. Usaia bol nawal min wom?

¹⁰ Usaia mambnem ka karkar narim bar duwom endel. King Usaia ga pende wal enam mal, yu ne ngongo karkar ere ere enjip. Mambnem embe erim, er kelnge olom kapim wal ere, Johova lo to kera mo? Kunum ende Usaia Johova tempola pu, murang karom paura gale alta opa enal ne erim. (2 Sto. 26:​16-18) Opa embe king walem enam pane napam, Molse Ngimba Pum Pris Asaria, Usaia alla erim bar yu ne erkun enal ne erim ba, Usaia popol keswei sim. Wandil wei, Usaia Johova kin kanamom pile, Johova er kelnge olom kes kalanj sim. (2 Sto. 26:​19-21) Olom molmene kele yu karkar enange, ombun embe mal olom kin min nawonange!

11. Nawal kenem pakerondo molmene mem sinamen? (Piksa pra kane.)

¹¹ Usaia pilkane erim olom dongal kerma pam kunum, Johova dongal kerma ngongo wal porpor pakerom erim woka pum ye bulngo, sangiyo nanim. Mambnem embe erim bar kenem nawal duwom esmen? Kenem pisamen, nomolpa esmen bar Johova wal kaka ngondo sino kapile meimen, na olom konganem esmen bar pra. Kenem kongan mo wal pende erpe woka pumdal, kenem kenem kangem ambil min nakeramen, Johova mongse kangem kerma ngonamen. b (1 Kor. 4:7) Pilkane enamen kenem pal sin nganja paim pile, molmene kele pilsinamen yu nengonam karkar enamen. Angjen ende kongar 60-poro mom embe nim: “Na alla erind ende pilkane enjip kunum na popol wamnam si, kumbol mul nasise erind. Na  kunum pende ne alla erind na pakero pilsinal yu ne ngojup kunum, alla erind wal er kun ere, Johova konganem kumbol wei ngo anjngo erind.” Kenem yu weieri ninamen, Johova yu dom molmene kele karkar enjin dal, nomolpa enamen bar mem kawei pande kapile moramen.—Prov. 22:4.

12. Josaia olom ngang barel mom kunum, Johova kin nalmal se mand pum? (2 Stori 34:​1-3)

¹² Josaia mambnem ka erim karkar endel. Josaia olom kongar 16 mom kunum, pulnombol Johova bol se mand pum. Johova olom ye namal duwom er kanpolto, Johova kapim mambnem karkar enal ne erim. Olom ngal molo King kongan embe enal ne erim bar amin napam. Kunum ele alamb puli got gend lotu er ngojup, embe pile Josaia kumbol dongal pande lotu gend to porninda pam. Olom kumbol dongal pange embe erim! Josaia olom kongar 20 namom ba yero, kulu ele tuwalto got gend lotu er momjup toporne sikem.—2 Stori 34:​1-3 gere.

13. Nim Johova bol yu dongal ne nol pandel panimen e, yu e nim kin mem nalmal paim?

¹³ Nim ngang ambel gal ende mon pamdal, Josaia mambnem erim mal karkar endel. Johova ye namal duwom er kanpolto, ala olom mambnem kawei meim duwom ere karkar endel. Nim wal embe endel bar pakerondo, Johova kin yu dongal ne nol pandel. Nim embe erin dal, kunum dingding ne nomolpa endel bar nim kin nawal min enda? Angjen Luk kongar 14 molo nol pam, embe nim, “Na pulnombol mol punal bar, Johova konganem si ngimba kel er kelne olom kapisa ne enal.” (Mak 12:30) Luk mambnem erim bar, nim embe ding mal enal ne pindal, wal ka nim bol min wonda eri!

14. Ngang ambel gal walem, King Josaia mambnem erim mal, karkar esim yubol to.

¹⁴ Ngang ambel gal, nim Johova konganem alamb ende meim bar, nal ombun ende kaundol? Joan, kongar 12 molo nol pam embe nim, sukul ding ga olom nengo nim tuwal wo, kin ir—no wal esmen bar, nim pra endel panijip. Joan olom akilgi ne ombun e, kaunda pam, nalerim, olom ir nonda bar nganj tokes mokso kes sinda pam pilkane erim, ala Johova kin sonom mem to kes moksa pam eri. Ambajen Resel kongar 14 mol nol pam, olom sukul gar ombun pende min wom, nawal pakerongo kelnge akilgi ne kauwum, ambajen e embe nim: “Ombun min wom kunum na  Baibel yu buro pile, Johova kapim mambnem buro pilpil erind. Ende embe mal, kombe wal enjip yubol Baibel a mom, na yu propet mom bar nawal duwom erind mal buro pilpile erind. Mo na sukul gar ga ende kin yu nind kunum, nal Baibel wes ka ende yu nengonal buro pilpile erind eri.” Nim ombun kaunon King Josaia ombun kauwum bol ding mal, napanda. Ba, nim bunuman ka karkar ere, Josaia, Got kin ka mom mal embe morol. Ngang ambel gal molo ombun kaundol pakerondo, bulto nal ombun ende wonda, er nombro molo akilgi nindel eri.

15. Nawal Josaia pakerongo kelnge kumbol pal ngo Johova konganem erim? (2 Stori 34:​14, 18-21)

¹⁵ Josaia kongar 25 molo King kongan erim kunum, tempol kes mol sem ala er kun enam panim. Kongan e enjip kunum, “Johova, Lo aiyem Mosis” wusngama ngom buk ala kansijip. Yuwom ele tuwal mom gerjip king pim kunum, olom enda pam wal wamnam ere, yu mom karkar erim. (2 Stori 34:​14, 18-21 gere.) Nim Baibel kunum kunum gerdel kapisen mo? Nim Baibel kunum kunum gerda geren mo? Gerin bar kapisen mo? Nim Baibel gerin bar, nal wes ende nemnem pakeronda bolmene keren mo? Angjen Luk, pane yero bol tonjin, olom Baibel gerim bar nal yu ende olom pake sinda pam, bolmene kem. Nim mambnem embe karkar erin dal, pakero kelde Baibel wes puli bua moro, ala duwom erin wal buro yem kel pisel eri. Nim Baibel yu puli meim kanpolto, Baibel kanka kandal, e pakero kelde nim Johova konganem kumbol ngo endel. Johova Yuwom pakerongo King Josaia enda pam wal erim, embe ding mal, nim pra pakerondo endel kun panda wal endel.

16. Nalerange Josaia alla kerma erim, embe erim bar kenem nawal duwom esmen?

¹⁶ Josaia mambnem kes erim bar duwom enamen. Josaia kongar 39 mom kunum, alla kerma ende erim bar er kelnge olom gom. Josaia olom olom dongal a pilgi ne, Johova ki si na kantawol era nanim. (2 Sto. 35:​20-25) Mambnem embe erim bar, kenem nawal duwom esmen? Kenem kongar nalnal yuwei a moramen, mo kongar puli Baibel yu duwom enjin, ba anjngo Johova Yuwom kanpol tonamen ne enamen. Embe endel e,  kunum kunum yane ne Johova ki si na kolta na nindel, kunum kunum Baibel yu duwom endel, ala Kristen ende pilgia dongal mora yu ninda, pilsi karkar endel. Embe enjin dal, pakero kelde alla kerma puli nanamen, kapile moramen eri.—Jems 1:25.

17. Juda king talende mambnem enjip bar, kenem nawal kerma pende enjep bol duwom esmen?

¹⁷ Nim ngang ambel gal men kunum, kolto kere kongan kaka puli endel. Joas, Usaia na Josaia yubol aijep meim taninde pilkane esmen, ngang ambel gal walem bunuman ka karkar ere, kongan ka enambe Johova kapisa eri. Weieri, kenem pilkane enjin king talende kunum kunum mambnem ka karkar najip. Embe najip ba, king kamben mambnem ka enjip mal karkar ere, mambnem kes enjip bul ngonamen. Embe endel bar nim pakerondo, nomolpa endel bar mem kawei pande, kapile morol.

18. Ga nal mambnem pende karkar enjip yu boljop Baibel a meim, nim nalmal pakerondo kapile morol? (Piksa pra kane.)

¹⁸ Ngang ambel gal pende Johova kin semand pujup mal, yu boljop Baibel a meim. Embe enjep bar Johova enjep kin kapim, ala nomolpa enjip bar mem kapange kapile monjup. Ngang ambel gal walem pane yubol tomon, yubol aijep Baibel a meim ende Depit. Depit ngang barel mom kunum Johova kin seno lotu erngom, bulto king kawei ende mom. Olom mambnem kawei embe erim ba, kunum pende ne alla erim, ba, Got olom mambnem dulto erim ye mal kanim. (1 Kin. 3:6; 9:​4, 5; 14:8) Nim Depit yu bolom Baibel a meim duwom er kanjil pakero dongal ngondo, Johova konganem kumbol pal ngo endel. Mo nim kunum pende ne, Mak na Timoti yubol aijil Baibel a meim, duwom er kanjil eri. Enjep ye gal wei monjup kunum kumbol pal ngo, Johova lotu er ngojup. Enjep wal omuk karo Johova lotu er ngojup bar, Johova kapim ala enjep pra kapinjip eri.

19. Nim nomolpa enen bar nalmal moral ne pisen?

¹⁹ Nim yipe nomolpa ere wal enen bar tanindel, mibulto nalmal morol tane penema keren. Nim Johova kin pilgi ne, nemnem kin pilgi nanindal, embe endel bar Johova nim pakerondo bunuman ka karkar ere, wal omuk karondol. (Prov. 20:24) Nim yipe nomolpa enen bar kapile molo, ala bulto topom ka sindel eri. Pilkane endel nim wal pi Johova kin enen, Johova pilauro ne nasikera. Nim nomolpa endel bar Danem Johova kanka mem sem ye, min epen meim konganem endel pase miro wei pu, kongan pende endel e, ngonom.