1. Aposol Pita gora kunum mand erim apal pende yero, Johova murmulom dongal olom pakerongo nal erim?

 APOSOL Pita pilkane erim olom gora kunum mand wom. Olom kongar puli Johova konganem kumbol ngo erim kunum, Jises bol kongan ai erim, dumam kol pende kansi Baibel yu neori kem, ala Gapening Bodi kongan pra erim eri. Ba, Pita kongan erim pornanim Johova olom kongan pende pra ngom. Kongar 62-64 C.E. kunum, Johova murmulom dongal olom bu ngongo pepe tal bom—e, Baibel buk 1Pita na 2 Pita. Olom pilgi nim, gora kunum bulto Kristen moram pakeronda nepim.—2 Pita 1:​12-15.

2. Pita pepe tal bom nalerange alamb kunum kun pakerom?

² Aposol Pita pepe tal e bom kunum, ombun kanem kanem min wo er kelnge olom pilgi ding ga “kumbol ombun sinjip.” (1 Pita 1:6) Mambnem kes enjip alamb yu gend duwom er alamb ngo, mambnem kes ersi kongrikeisen Kristena tuwal tunam ne enjip. (2 Pita 2:​1, 2, 14) Kristen ga Jerusalem tuwalto monjup bar, “wal porpor porninda kunum mand wom,”—e, Rom ami wo Juda ga wal porpor er mokjup na taun aijep tokes moksam kunum mand wom. (1 Pita 4:7) Kenem pilkane esmen, aposol Pita pepe tal bol ngom, Kristen ga pakerondo ombun e, min wonda kauwo akilgi ne, ala er nombro molo mibulto ombun wonda kaunam eri pam. b

3. Nalende kenem Pita pepe tal bol mane omukro kanamen?

³ Pita pepe tal e, bolom komna-Kristen monjup bar ngom, ba yu Johova Yuwom mom. Embe pile, pepe tal bom e, kenem pakeronda eri. (Rom 15:4) Mala alamb jengimb meim mambnem kanka kane esim bar kenem tuwal meimen, ala ombun pende min wonom er kelde Johova konganem kapile enamen bar amin napaim.  Embe paim ba, ombun kerma kes ende min wonda kunum mand enem, e, ombun kerma wei komna Juda ga bol min woipom bol ding mal ma. Pita pepe tal bom bar kenem kanpol tonamen yu kerma pende duwom esmen, yu meim kenem pakerondo Johova kun aiyem min wonda ne er kun er moramen, alamb kenem bol nawal enam kisal nagoramen, ala ende ende bol kanka mem taninamen eri. Pilsinamen yu meim elda walem pakerondo, kongrikeisena pilgi ding angjep ambajep man er kerambe dongal moram mal kanam eri.

4. 2 Pita 3:​3, 4 dom, nawal kenem pilgi er kanal ne enda?

⁴ Mibulto wal min wonda pane Baibel yu propet dom, pilgi nanijip alamb meim bar kenem tuwal meimen. Johova Witnis ga bol opyem esim alamb, kenem kongar puli porninda kunum mand wonom pane monjup, wei nawonom pane kenem yu kuram. Ala alamb pende porninda kunum wei min nawonda paninam. (2 Pita 3:​3, 4 gere.) Kenem yu embe mal, Baibel yu neori kel punamen bar, kongan ding ga, mo maiyam ding ende ninambe pinjin dal, kenem pilgi dongal napanda. Embe ninam kunum, nawal kenem pakeronda Pita nengom.

5. Nawal kenem pakerondo mambnem kes yipe paim, proninda kunum min wonda bar bunuman dulto amble kui enamen? (2 Pita 3:​8, 9)

⁵ Alamb pende mambnem kes yipe paim Johova kamkam to pornaninda ne pisim. Pita yu bol kem meim kenem pakerondo bunuman dulto ambramen, Johova kunum na kongar omukronom jel mal to, kenem alamb omukromon e ngonom (2 Pita 3:​8, 9 gere.) Johova kongar wan tausen kunum dingeri mal kanem. Olom wimuk kamkam nane kui er moro, alamb kumbol to akro ombun min wonda tuironam ne pisem. Johova kunum aiyem min wonda kunum, ya mala mambnem kes porpor paim porninda. Weieri, embe enem bar kunum pende sem pile, alamb mal yemyem papum Baibel yu ka neori kel ngopo pisam.

6. Kenem nalmal ere, “Johova kunum aiyem” min wonda ne kui enamen? (2 Pita 3:​11, 12)

⁶ Pita kenem nengo “Johova kunum aiyem” min wonda ne kui eiya dom. (2 Pita 3:​11, 12 gere.) Kenem kui nalmal enamen? Kaple erim dal, kunum kunum—kunum e, buro pile kui enamen—e, kunum kol senda kunum kolnga aimanj molo wal ka sinamen mal pisamen. Pop ka wondo pintondol, keswos nangonda mokun kaka nondol, kanka kanen alamb gosum paim akil wonambe jebenware ne sindel. Ala kombe kes gonjup alamb paim akil wonambe, Baibel yu propet ne mokum mongom tom mal duwom erngoi pilkane enam. Wal embe mal buro pisel nim pakero kelde, porninda kunum min wonda mand wei enem ne kui endel. Wal mibulto min wonda bar “yero pilkane esmen” kenem pakerondo alamb yu gend ne kenem ngonam bar “akilgi ne tuiro,” bonaronamen.—2 Pita 3:17.

7. Alamb bol kisal gonjin dal, kenem bol nal enda?

⁷ Kenem pilkane esmen Johova kunum aiyem mand wei wonom, embe pile, enamen kaple enda wal ere alamb porpor bol Baibel yu ka neori kel ngopo pilkane enam. Ba, kunum pende ne kenem kumbol dongal napande embe enamen bar kisal goramen. Nalende kisal goramen? Nalenem, alamb kenem er kes enam ne pisamen er kelde kisal goramen. Wal embe mal, aposol Pita bol min wom. Jises to goram ne enjip kunum emilpal, olom na Jises disaipol ende mei pane neori nakem nalerim, alamb bol kisal gom ala kunum puli Jises nakanj ye pane yu gend nim! (Mat. 26:​69-75) Bulto Pita kisal gom mem tomene kele yu embe nim: “Alamb kisal gosum wal nim kisal nagorol, ala bunuman puli nakerel.” (1 Pita 3:14) Pita yu embe nim bar, taninde pilkane esmen alamb bol kisal gosum mem tomene keramen kaple enem.

8. Nawal kenem pakerondo alamb bol kisal gosum mem tomene keramen? (1 Pita 3:15)

 ⁸ Nawal kenem pakerondo alamb bol kisal gosum mem tomene keramen? Pita kenem nengo embe nim: “Enem kumbola Kerma Krais kuru meim paneori keram.” (1 Pita 3:15 gere.) Kenem kunum kunum pilkane enamen, Kerma Krais Jises kenem King aijen olom dongal kerma paim. Nim alamb bol Baibel yu ka ne ngondol kol apis kera ba, kisal gondal King aijen e, buro pisel. Olom min epen kongan King enem bar enjol puli kes sipok er meim mal buro pisel. Kenem pilkane enamen olom embe nim “Got na min epen na . . . ya mala wal porpor kantawol endel pane namba ngom” ala “piya na enem bol kunum kunum mol puno porninda kunum min wonda.” (Mat. 28:​18-20) Pita kenem ne ngonom “kunum kunum er kun er molo,” pilgi nimen wal ambilgi ne neori keramen. Embe pile, nim kongan dumam, sukul gar mo kulu pende wanen bar, Baibel yu neori kerel nepisen mo? Nim embe enal nepin dal, neori kerel yu yero er kun endel. Ala Johova kin pilgi wei ne, yane ne olom ngo, na kumbol dongal ngoi alamb kin kisal goro mem tomene keral panindel.—Apo. 4:29.

9. Nawal ende min wom bar Pita kanka mem ta nanim?

⁹ Pita kanka mem nalmal taninda duwom erim. Olom pilmolngo Jises embe nim: “Na lo  kolnga ende enem ngond e, na enem kanka kanj mal enem ende ende kanka kanam.” (Jon 13:34) Embe nim ba, Pita bulto Juda Alamb Ma alamb jel, pilgi ding angam ambman bol mokun ai nonda kanapim, nalerim, Juda Kristen ga bol kisal gom. Aposol Pol nim Pita embe erim, mambnem “gend” erim panim. (Gal. 2:​11-14) Pita alla erim bar, Pol pilsinda yu pende nim bar wal pende duwom erim. Ala Pita olom pepe tal bom bar embe nim, kenem pilgi ding angjen ambajen man kanka mongse nakanamen, ba, kanka kanmen mem taninamen.

10. Nawal kenem pakero kelde “pilgi ding angjen man kanka kanamen,” embe enamen bar nawal min wonda? Yubol to. (1 Pita 1:22)

¹⁰ Pita kenem nengom “enem pilgi ding angjep ambajep man kongrikeisena tuwal meim kanka” kandya nim. (1 Pita 1:22 gere.) Kenem “yuwei karkar esmen er kelde kanka mem” tanimen. Ala pilkane esmen “Got alamb porpor bol mambnem ding mal enem.” (Apo. 10:​34, 35) Kongrikeisena kenem ga pende kanka kane, pende kanka nakanjin dal, Jises alamb ende kanka kandya, nim yu karkar nasmen. Ala Jises erim mal kunum pende ne, kenem ga pende bol tapkaro pende bol tap kanaronamen. (Jon 13:23; 20:2) Ba, Pita kenem pilsamen yu ende nengom “angjen ambajen man porpor kanka kanamen”—nalenem,—pemili ding ende meimen.—1 Pita 2:17.

11. Kenem nawal pende ere “ende ende kumbol pel ngo kanka” kanamen?

¹¹ Pita kenem “ende ende kumbol pel ngo kanka” kandya nim. Olom yu nim bar kenem pilkane esmen, pende kanka kanamen amin napanda ga ombol ere “kanka kanamen.” Ende embe mal, pilgi ding angjen ende er kelde kenem kumbol ombun sinjin dal nal enamen? Yero mambnem kes erngo yem kele, kanka mem tananinamen ne pisamen. Ba, Pita, Jises bol wal ende duwom erim e, mambnem kes erngo yem kesim alamb Got enjep bol kanapisem. (Jon 18:​10, 11) Pita embe nim: “Enem alamb ende alla erngonam, erngo yem nakeram. Ala ende enem yu kes ngonam, neyem nakeram ma, enem enjep bol mambnem ka karkar ere yu ninam, nalenem, Got enem mambnem embe karkar eiya dom, embe enam bar topom ka sinam.” (1 Pita 3:9) Nim kumbol pel ngo alamb kanka kanen mem er kelde, ende nim bol mambnem kes er ngonda alamb kanka kanjel eri.

12. (a) Kenem alamb ende kumbol pel ngo kanka kanamen er kelde, nawal ende enamen? (b) Vidio ende kangem, Preserve the Precious Gift of Unity, jw.org a, paim dom mal, nim ombol ere nal enal ne pisen?

¹² Aposol Pita pepe ngimba bom bar, “kumbol ngo ende ende kanka” kanjel panimen yu e, bom. Kanka mem embe mal pakerondo sin apal eri waknaronamen, ba, “sin puli” wakronamen eri padom. (1 Pita 4:8) Kongar puli pende yero Jises olom, Pita alamb ende sin erngonam wakrondol pane, duwom erngom mal buro yem kele pim. Kunum ele mambnem ka ere pilgi ding angam man, alla “kunum 7-poro” er ngonam wakronal kaple enem ne pilgi nim. Ba Jises, Pita nengom —“kunum 77-poro” wakrondol panim, ala kenem pra—karkar enamen eri. E, yu mem embe paim alla erngonam kunum kunum wakronamen. (Mat. 18:​21, 22) Pilsinamen yu nim, nim karkar endel amin napam dal, kes napisel ombol ere embe endel! Johova alambem man sin nganja paim pile, kunum pende ne alla wakronam ne pisim amin napaim. Embe pile, wal kerma wei paim e, nim endel kaple enda wal porpor ere, angnem ende alla er ngonda wakro sikeli kumbol amin morambel. c

13. Elda walem pilgi ding angjep ambajen man kantawol ka enam bar, nawal pende er kelde amin napanda?

¹³ Jises golo akil seyem wom kunum, yu ende ne aposol Pita ngom olom weieri aur nanim Jises embe nim, Na “sipsip aina kerei kerei  kantawol ere.” (Jon 21:16) Nim elda ende mondal, Jises ne Pita ngom yu nim karkar endel eri. Ba, elda walem kongan kerma ngom e, anj dunglom kele enam ne enam amin napanda. Elda walem yero enjep enjep pemili aijep nangj wal, kumbol na bunuman na pilgi wal si kamoram wal ngo kantawol enam. Ba, enjep kongan ende paim, Baibel yu neori kesim kongan se ngimbro pu ere, kongrikeisen maka yu min wonda er kun ertu ninam, ala kibung seket na riginol paim bar yu er kun ertu ninam eri. Elda walem pende Ospitol Liesen Komiti mo, Lokol Disain konstraksen Dipatment kongan pra esim eri. Weieri, elda walem kongan puli wei esim!

14. Nawal er kelde elda walem, Got sipsip aiyem kantawol kawei enam? (1 Pita 5:​1-4)

¹⁴ Pita olom kongan ding elda walem nengo embe nim, “enem Got sipsip aiyem man kantawol kawei enam.” (1 Pita 5:​1-4 gere.) Nim elda ende mondal, kin pilkane esmen pilgi ding angnem ambanem man kankawei kane, kantawol kawei enal nepisen. Embe enal nepisen ba kunum pende ne, endel kongan puli keswei mora mo nim wimuk ninda eri. Kongan e, enal kaple nanem ne pisel. Embe pindal nawal endel? Enjep pakeronal nepisen wal pel yane wusngama ne Johova ngondol. Pita embe nim: “Alamb ende Got Yuwom neori kera nepim dal, olom Got Yuwom kuru meim neori kera, ala alamb ende, ende pakeronal nepim dal, dongal Got bol wonom si, alamb ende pakeronda.” (1 Pita 4:11) Yipe kunum nim pilgi ding angnem ambanem man ombun pende kauwum, nim to porne sikerel kaple nanda ombun kauwum. Ba, enem pilkane enam, “sipsip tawol kongan mol ngimba kele enem ye,” Jises Krais enem pakerondo enam kaple nanem kongan enam. Olom enem yipe pakeronda ala kunum kolnga pra pakeronda eri. Got kapisem ga elda walem, pilgi ding angjep ambajep man kanka kane, tawol ka enam, ala “Got sipsip aiyem wal enam mal” enem ta kawei ninam.

15. Elda ende sipsip tawol kongan nalmal erim? (Piksa pra kane.)

¹⁵ Angjen Wiliem kongan elda kongar puli erim, sipsip tawol kongan enda wal kerma paim kanpol weirom. Kes COVID-19 pulnombol tom kunum, olom na elda pende, wakan dingding ne enjep grupa monjup ga yu ne dongal ngojup. Nalmem pange embe enjip, olom neori kele embe nim: “Pilgi ding angjen ambajen man puli enjep enjep gara monjup pile, bunuman kes wamnam sinam onom paim. Ala pilgi ding angam ambam man, ombun ende kauwo yu nijip,  Wiliem olom komol kase pilpile erim. Olom kenem websait a, buk nus na vidio pende mom, enjep pakeronda wal kun pam si, yu ne enjep dongal ngongo erim. Olom embe nim: “Yu ne ende er dongal enam kongan e, yipe wal kerma wei pa, komna enjip e, ngonom. Kin kongan ombol ere alamb pakeropo Johova ye nalmal kanpol tonam ne esmen, ala kin kongan embe ding mal ere Johova sipsip aiyem man pakeropo, yuwei a tuwal anjngo mol punam ne esmen.”

16. Pita pepe tal bom kenem duwom er kanmen, nal wusngam pende konganem enamen?

¹⁶ Got murmulom dongal bu ngongo pepe tal bom bar, kenem wal pende duwom er kanjin. Nimnem wal pende eri woka punda mal duwom er kanin. Pende embe mal, miro bulto kunum kolnga min wondo wal kaka sindel mal buro pisen mo? Nim Baibel yu neori kesim kongan, sukul gar, kongan dumam, mo nomolpa enen bar wusngam pende kansi neori keral nepisen mo? Nim wusngam pende kansi, pilgi ding angnem ambnem man kumbol pel ngo, kanka kanjel mem tadon mo? Enem elda walem Johova sipsip aiyem man kapile, kantawol enam bunuman kerma paim mo? Ki embe mal meim nim omukro-kanjel, wal pende er kaple narin panda, embe pamdal nim kumbol ombun nasindel. Enem pilkane enam, “Ye Kerma ye kawei meim” enem pakerondo wal enam wo kawei punda. (1 Pita 2:3) Pita kenem dongal ngonda yu ende embe nim: Kankerambe “Got enem duwom . . . erngo kaple enda. Enem pakero dongal ngondo, anjngo akilgi ne mol punam ala olom er kelde enem akilgi ninam.”—1 Pita 5:10.

17. Kenem Johova konganem esmen waknaro, kankelpe olom kenem anjngo duwom er sip kaple erim dal, nawal ka min wonda?

¹⁷ Pita yero nanam ye ka ende namei Got Ngalem bol wanal kaple nanem nepim. (Luk 5:8) Embe nepim ba, Johova na Jises kanka mem olom pakero kelnge, Pita, Got konganem waknaro Krais karkar kunum kunum erim. Pita mambnem ka embe erim bar, wal ka ende olom bol min wom e Johova, Pita kenem “Siyem Kera Ye Kerma Jises Karis, kunum kunum senda Gapman kongan enda bar olom tuwal mora panim.” (2 Pita 1:11) E, olom topum kawei jel mal ende sim! Pita, Johova konganem waknaro anjngo erim mal, nim pra kankeli Johova nim duwom erngo sip kaple erim dal, nim pra topom kawei ende sindel e, kol aimanj mem. Enem pilkane enam “pilgi aijep mem pa er kelde topum ka sinam, ala Got enem siyem kera eri.”—1 Pita 1:9.