1-2. Nalende Samson yu bolom paim, kenem kapile mane omukro kanamen wal kerma paim?

 NIM kangem Samson pisen kunum, nawal bua min wonom? Olom dongal kerma wei pam ye, nepisa pisen. E, weieri. Ba, olom bunuman ka karkar nare, wal omuk kanarom bar, ombun kauwo nganj ngimbil sim eri. Embe erim ba, olom wal ka pende ere Johova konganem erim bar, olom pilngom. Olom mambnem ka erim kenem pakeronda ne Johova, Samson yu bolom kem Baibel a paim.

² Johova, Samson wusngama wal omblombol pende ere alambem man Israil, pakeronal ne erim. Kongar andet puli bulto, Johova murmulom dongal wusngama aposol Pol bu ngongo, pilgi dongal pam ga kangjep bom bar Samson kangem pra bom eri. (Hib. 11:​32-34) Samson wal pende erim bar kenem dongal sinamen eri. Olom ombun kerma pende kauwum kunum, Johova pakeronda nepim. Yu duwom pi enamen bar, Samson mambnem pende erim mal duwom er kane, ala olom mambnem aiyem kenem nalmal pakerondo wal pende enamen mal kanamen eri.

3. Samson nal kongan ende sim?

³ Pilistia ga Israil alamb kantawol ere mambnem kes er ngonjup kunum, Samson kangjip. (Het. 13:1) Israil alamb ombun puli kes wei kaujup nalerim, Pilistia alamb enjep kantawol kananjip.  Johova, Samson makro “nim se ngimba pu Israil ga, Pilistia alamb angela siyem kerel panim.” (Het 13:5) Johova, Samson pesil wei pam kongan ngom! Samson kongan e, er kaple enal nepim dal, olom Johova bol pilgi ninda pam.

4. Johova, Samson nalmal pakerongo, olom kanto sip Pilistia alamb ngonam ne enjip bar sikele wo sepim? (Hetman 15:​14-16)

⁴ Samson, Johova bol pilgi nim bar, olom pakerom mal omukro kandpe. Kunum ende Pilistia ami, Juda wo kulu ende kangem Leii sembar Samson to kantonam ne enjip. Juda ga kisal kes golo, Samson to kanto sip opyem ga angela keram ne enjip. Samson alambem man baklain kolnga tal si olom to kanto, sip Pilistia ami angela keram ne enjip. (Het. 15:​9-13) Ba, “Johova murmulom dongal Samson dongal kerma ngongo” baklain kolnga to tuprap ne sikele, “kong dongi ye ngal ende gom kanan napum paunam omblom pam kansi,” Pilistia ga 1,000-poro toporo nim!—Hetman 15:​14-16 gere.

5. Samson kong dongi paunam si alamb tom e, Johova bol pilgi nim mem nalmal tanim?

⁵ Nalernge, Samson kong dongi paunam si nganmal ngo alamb tom? Wal embe mal si nganmal ngo, alamb naroro enjip wal! Ba kenem pilkane esmen Samson, Johova bol pilgi wei nim. Nal op kulang si alamb tonda wal kerma napam. Weieri, pilgi dongal pam ye e, mand sem wal si konganem ere, Johova kapim mal er kaple erim. Samson ami puli kes tomene kem nalerim, olom Johova pakeronda ne pilgi wei nim!

6. Kenem tiokretik kongan jeljel esmen bar, Samson yu bolom paim nawal duwom esmen?

⁶ Kenem pra Johova dongal ngondo, ngonom kongan porpor er kaple enamen. Pende pesil pande er kaple nanamen ne pismen kongan pra. Ala wusngam pende Got kenem pakeronda bar, kane malmal enamen eri. Johova nim pakeronda ne olom bol pilgi nin dal, Samson pakero dongal ngom mal, nim pra pakeronda eri.—Prov. 16:3.

7. Nawal ende min wom bar tadom, Johova kol taninda ne kui enamen wal kerma paim?

⁷ Kenem pilgi ding angjen ambajen man puli, konstraksen kongan ere, kenem Johova lotu er ngonamen gar tau wanim ga, Johova bol  pilgi nijip mem tanijip. Komna angjen man, Kingdom Gar na gar pende kolnga disain er tautau enjip. Ba alamb puli se tuwal Johova okanaiseisena wo, nol panambe okanaiseisen wose kerma punom kunum, mambnem kol karkar enam panijip. Embe pile, angjen man molse ngimbro pu kongan esim ga, yane ne Johova ngo pakeroi wusngam kol e, karkar enamen panim. E embe mal, alamb gar tau mokjup topro si ala kes meim wal erka esim. Angjen Robet, yipe kongar pende tuwalto mal yemyem gar tau wanim bar kongan puli er wanim embe nim, “wusngam kol karkar enam panijip kunum, ga pende karkar enam pesil pam.” Olom yu pende embe nim: “Kin kongan pi enamen jel mal wei, kongar puli kongan er wonjin bol ding mal napam. Ba, angjen man puli kapile mambnem kol e, karkar ere kongan er kaple enjip nalerim, Johova pakerom.” Johova alambem man wusngam puli pakerondo olom kapisem kongan er kaple esim. Wusngam ende pi yubol tomon. Kunum pende ne kenem kenem ki embe ngonamen, ‘Na Johova konganem erind bar wusngam kolnga ende karkar eiya dom, na kapile erind mo?’

8. Wal ende min wom kunum, Samson nol nonda numun asip weirom kunum nal erim?

⁸ Nim Samson wal omblombol pende erim mal, yubol Baibel a meim ger kanja kanen. Ende embe mal, olom olom mongse laion ende to golo, ala Pilistia ye 30-poro taun Asklon tuwalto to gom. (Het. 14:​5, 6, 19) Samson pilkane erim, Johova pake naronange wal embe mal nanange. Kunum ende, Samson Pilistia ami 1,000-poro to gom kunum, olom nol nonda numun asip weirom. Olom nal erim? Olom olom nol ende kansi nonange, ba embe narim. Johova na pakera ne ki sim.—Het. 15:18.  

9. Samson Johova pakera ne yane nim kunum, Johova nal erim? (Hetman 15:19 na Putnot)

⁹ Johova, Samson ke nim pile, jep wusngama er kelnge nol ende min wom. Samson nol e nom kunum, olom dongal aiyem ala siyem nim.” (Hetman 15:19 gere na putnot.) Bulto propet Samuel, buk Etman bom kunum nol e, pra pamom. Israil ga nol e, tang wo pupam kanjip kunum, pilkane enjip Johova bol pilgi ne lotu erngom ga pake, sinam ambsik panda kunum enjep pakeronda ne pilgi nijip.  

10. Johova kenem pakeronda ne nawal pende enamen? (Piksa pra kane.)

¹⁰ Kenem sape panda mo kongan ende enamen kaple enda, ba, kunum kunum Johova pakerondo er kaple wei enamen ne pilgi ninamen. Kenem molmene kele pilgi wei ninamen, wal porpor enamen bar Johova pakerondo, wose ka punda ne pisamen. Johova nol erkem wom Samson no, dongal kol sim. Embe ding mal, Johova kenem pilgi er dongal enal ne wal porpor ngonom sinjin dal, pakero kelde olom bol ka moramen.—Mat. 11:28.

11. Kenem nalmal erpe Johova pake kawei tonda? Wal ende min wom mal yubol to.

¹¹ Pilgi ding angjen ende Rasia meim, kangem Aleksi olom to erkes wei enjip kunum, akilgi ne molo ombun kauwum mal omukro kanamen. Nawal olom pakerongo, ombun kes embe min wom kunum akilgi nim? Olom ambiyem bol Baibel kunum kunum gere, pilgi wal dongal monjil. Olom embe nim: “Na pilgi wal dongal moral ne, nanam Baibel yu duwom ere, kunum kunum Baibel gerind. Kunum dingding ne kinimba, na ambina bol de tex kane, yane ne Johova ngongo enjil.” Embe enjil bar kenem nawal duwom esmen? Kenem kenem bol pilgi naninamen, Johova kenem pakeronda ne pisamen. Nalmal pakeronda? Kenem pilgi dongal panda ne pinjin dal, kunum kunum Baibel yu duwom enamen, yane ninamen, kongrikeisen  make punamen, ala Baibel yu neori keramen eri. Kenem ombol ere embe anjngo enjin dal, Johova topom ka puli ngonda. Got, Samson dongal ngom pile, kenem pra dongal ngonda kaple wei enem.

12. (a) Samson nawal omuk kanarom? (b) Dilaila senom bar nawal jel mal min wom?

¹² Samson kenem bol ding mal, sin nganja pam embe pile, kunum pende ne wal erim bar bunuman ka karkar narim. Wal ding ende omuk kanaro erim bar, olom ombun kerma wei sim. Samson kongan pengem ere alamb tawol erim, kunum pende wopungo bulto, “olom tupam sem kulu Sorek amb ende kanka kanim, kangem Dilaila.” (Het. 16:4) Yero, Samson Pilistia amb ende sinda pane mak enjip. “Johova bu ngongo” Samson embe erim nalerim, “olom wusngam ende kansi Pilistia alamb bol nganmal enal nepim.” Bulto, Samson pu Pilistia, taun Gasa, amb pasdia ende garem kol mom. Ele pu mom bar Johova olom pakero dongal ngondo, Pilistia ga bol nganmal enda kol apis kem. (Het. 14:​1-4; 16:​1-3) Dilaila, Israil amb ende moramom. Embe pile, Samson sinda si kol tokere Pilistia ga bol nganmal enda napam.  

13. Dilaila, nawal er kelnge Samson ombun kauwum?

¹³ Dilaila, Pilistia ga bol ku kerma ende si, Samson er sip enjep angela keral ne erim. Samson, amb Dilaila bol pilgi ne—kankawei kanim pile—olom si opyem ga angela keral ne erim pilkane erim mo? Pilkane erim mo narim kenem nakamen, Dilaila, Samson anjngo ki si, nawal er kelde nim dongal kerma paim ne na nga nim, bulto ne neori kel ngom. Wandil wei, Samson yu neori kem alla erim pile, olom dongal kerma paim wakrom ala Johova olom bol kanapim eri.—Het. 16:​16-20.

14. Samson, amb Dilaila bol pilgi nim bar, nal ombun ende olom bol min wom?

 ¹⁴ Samson, Dilaila bol pilgi ne, Johova bulngom bar ombun kes mal kauwo nganj ngimbil sim. Pilistia ga wo olom tosi, sip dunglom to bou nijip dunglom emil erim. Olom tosip kulu Gasa karpos kenjip pam, kulu ele komna Samson alamb to erkes ere, taun duwa tal to bou nim. Ala alamb er kenjip olom molmene kele, kongan nip ye molo wit nganjem toko tororo enjip kongan karpos gar tuwalto erim. Bulto, Pilistia ga make kerma ende to, kapile monjup bar olom ne tunambe wal napaim mal ere kisal sinde, enjep towul enam ne tujup. Enjep opa ere Got gend Dagon ngojup nalerim, olom pakerongo Samson to sinjin panijip. Enjep Samson karpos gar pam si pati pambar tu, yu kulo wal pende er kelde kapile “tuwul enam” —ne tujup.—Het. 16:​21-25.

15. Samson, Johova olom ala pakeronda ne, pilgi nim mem nalmal tanim? (Hetman 16:​28-30) (Garwom oriro ngimba piksa.)

¹⁵ Samson alla kerma erim ba, olom Got konganem erim mem wimuk ne nasikem. Olom wusngam ende kansi, Got-Pilistia ga bol wal endel panim kongan er kaple enal nepim. (Hetman 16:​28-30 gere.) Samson, Johova ki si embe nim: “Na pakero dongal ngoi Pilistia ga na mambnem kes erngom, erngo yem keral.” Got wei Samson yane nim pile, jep wusngama olom dongal kerma jel mal ala ngo yem kem. Dongal kerma embe ngom Samson pakerongo, Pilistia ga make ele to monjup bar, puli keswei to golo seminro pu, yero goipom e, ngom.

16. Samson alla erim bar, kenem nawal duwom esmen?

¹⁶ Samson alla erim bar ombun kauwo nganj ngimbil sim ba, olom Johova konganem erim waknarom. Kenem pra alla ende erpe yu ne er kun enam, mo kongan ende ambramen wakronamen ba, Johova konganem esmen wimuk ne nasikeramen. Pilkane enamen kenem alla esmen Johova wakronda erkun er meim (Sng. 103:​8-10) Kenem alla enamen, ba Johova, Samson bol erim mal dongal kerma ngondo olom konganem er kaple enamen.

17-18. Angjen Maikel bol wal min wom bar, kenem nalmal dongal ngonom? (Piksa pra kane.)

¹⁷ Angjen yegal Maikel bol wal min wom mal omukro kanamen. Olom Johova konganem puli erim, kongrikeisen sepent ende molo painia oltaim erim. Wandil wei, olom alla ende erim er kelnge, kongrikeisena kongan ka erim wakrom. “Olom embe nim,” na Johova konganem kumbol wei ngo erind, ba, wamnam na pilkane erind, “Johova konganem ka erind ala nanal  pam. Johova na bulngo sikera nepinj, na olom bol senond mem ala dongal panda mo ne bu puli kend. Ala olom kongrikeisen tuwalto yero ere ere erind, ala enal mo ma ne pinj eri.”

¹⁸ Maikel wal ka ende erim, olom Johova konganem erim bar wimuk ne wakronasikem. Olom embe nim: “Na Johova bol senond mem ala er dongal enal ne ombol erind, e, kumbola sem wal yane wusngama ne Johova ngond, ala Baibel yu kunum kunum erind, duwom erind wal buro yem kel pinj.” Kunum pende wopungo, Maikel kongan ka kongrikeisena ere ere erim, ala ngo yem kenjip. Yipe olom kongrikeisen elda ende molo, kongan painia oltaim enem. Olom yu pende eri embe nim: “Kongrikeisen elda walem na pakero, dongal sinal yu ne ngojup er kelnge pilkane erind, Johova anjngo na kanka kanim. Na yipe kongrikeisena kongan er mei kumbol yu napaim. Wal embe min wombar na pilkane erind, alamb ende alla enam ba, kumbol toak weironam Johova enjep alla wakronda.” Kenem pilgi wei ninamen alla enamen ba, ombol ere wakro sikenjin dal, kenem kongan kaka ngondo enamen ala topum ka ngonda eri. Embe pile kenem enamen kaple ende wal porpor ere, olom pakeronda ne pisamen.—Sng. 86:5; Prov. 28:13.

19. Samson yu bolom omukrojin bar, kenem nalmal dongal ngonom?

¹⁹ Yipe yu duwom esmen bar, Samson mambnem aiyem ka pende pam mal duwom er kanmen. Olom sin nganja pam embe pile, naninda yu ne Dilaila ngongo ombun min wom ba, Johova konganem erim bar ombol ere waknarom. Ala Johova olom bulngo nasikem eri. Got ala Samson dongal kerma wei ngom, Johova olom pilgi dongal wei pam ye mal kane, Ibru sapta 11 a, pilgi dongal pam ga kangjep meim bar, olom kangem pra bol kem paim eri. Kanka mem sem ye Danjen min epen meim, olom konganem esmen ombun duwom wonom kunum pakero dongal ngonom. Embe pile, Samson erim mal ombun duwom wonda Johova ki si pakera ninamen. Embe ninamen: “Kaple ende na pilngo, ala kaple ende na dongal ngo.”—Het. 16:28.