Na kongar 1934 kunum kangjip, dana mana tal Swislend wo Timmen maining toro enjip taun ende Ontario Kenenda sem bar monjil. Kongar 1939 kunum, na mana pulnombolo Wastaua gere Johova Witnis ga make pambar pupo erim. Olom pum bar kin ngalem man sikis poro mojin si pupo erim. Kanan na pungo olom, Johova Witnis ende mom.

Mana embe erim bar dana kanapim, ba mana yuwei kanka kane ambilgi nim. Kongar 1940 kunum, Johova Witnis ga kongan kulu Kenenda enjip tokol tungjup kunum, olom anjngo yuwei ambilgi nemom. Na dana olom yu keswei ngongo erim, ba olom molmene kele dana bol mambnem ka ere erim. Mana mambnem ka embe erim erkelnge, kin ngalem man pra yuwei sinjin eri. Ala na, Dana yu kes nene erim sikele pemili bol yu kane mambnem amin erim.

Kongar 1950 tuwalto kunum ende akandom kunum, taun kerma Nu Yok tuwalto Kibung ende kangem Theocracy’s Increase pane pam bar pund. Pilgi ding angjen ambanjen man mal tambem yemyem jeljel molpunjup wonjup yu ninjin, ala Sukul Giliet punjup ga ki ngongo yu pundom ninjip pinj erkelnge Johova konganem puli keswei enal nepinj! Ala seyem gara pund kunum, wamnam painia enal pane pepe kend. Ba Kenenda brens opis pepe bol na ngo, nim nol pa bulto painia endel paninjip. Ninjip yu na karkar ere Oktomba 1, 1950 kunum nol pand. Oll ding ende bulto na kongan painia erind, aIa se Kapukasi kongan endel paninjip. Taun e kolbar weise na mond kulu ngom.

Kongar 1951 kunum brens opis Witnis ga ende Prens yu pile ninam ga se Propins Kuibek pu  Prens yu nim alamb meim bar kongan enam paninjip. Kulu ele pablisa puli namonjup pakeronam ambsik pam. Na Prens yu na Inglis ai pinj pile punal panind, embe pile kulu ende kangem, Rouyn pane sembar kenjip. Na kanj alamb ende ele wei namonjup. Yero yu nind mal, kanal paninjip kulu mongse kanj. Ba wal woka pum, kongar 4-poro kil Masol bol seno tapkaro kuibek kongan enjil, kanan napungo painia salim kongan enjil.

Kuibek mond kunum vero Sukul Giliet klas namba 26 Nu Yok tuwalto South Lansing panda bar pundol paninjip kawei pinj. Pepwari 12,1956 kunum sukul Gretweit enjin, nase Gana West Aprika pundol paninjip. b Ba yero na seyem Kenenda pu “wakan pende“ kui ermolo, se kulu jel punal pepe erkun enam pam.

Na oll 7-poro kulu Toronto molo pepe erkun enam ne kui erind. Kui ermond kunum Kripps pemili mambnem ka ere na gar kulu ngonjup, ala na enjel ambiljel Sila, mom kansinge kil ende ende kanka kane senonjil. Ala kil bolsinambel paninal mand wei erim kunum, na wisa kui erind wom. Kil Sila bol yane omblombol nepakil bulto napu kongan ngonjup enal panind. Ba kil yune yemyem ermol pu bulto nal kunum ende bolsinambel ne pisambel paninjil. Wal embe enambel amin napam ba bulto kil pilkane enjil omuk karonjil pam.

Oll ende tuwalto na treina pund, kako sipa pund ala balusa pu se Akra Gana pund. Ele pund bar distrik tawol kongan erind. Gana tuwalto kulu porpor sembar pund, ala kulu ende mand sem Iwari Kost (yipe Côte d’Ivoire) panim sembar pund, ala kulu ende Togolend pund. Kunum puli na brens kar kerei jip ngonjup siwanj. Kongan ele erwanj bar kunum dingding ne kawei pinj!

Wakan kunum seket kibung paim bar pu yu nine erind. Ba kin Make tonamen Gar nasese erim. Embe pile angjen man ond mungal toru gar tauwo, illma aulom tau paksambe anj nadonamen ne ere ere enjip. Ala mokun tuwal kel mokil  nonamen pris napam, angjen man kibung panal ne erim kunum astonjup wal togal to kibung wonjup ga ngongo enjip.

Ala kibung enjip bar kapisamen yubol pende tonjup eri. Kunum ende Herb Jennings, c na misinari kongan ding ye yu ende ne mom kunum wal tu mokul togal alamb ngonjup bar kongkau ende tu pakjip kepu sepnal newopum. Pletpom yemto sem, alamb yemto yu pilmonjup, tuwale mukune wopum. Angjen Herb yune mom wakrongo kongkau wopuda bar ngenim. Ba angjen 4-poro ombol ere ala to siyem mokjup bar punjup, yu pilmonjup alamb porpor kapile angel tarojup.

Kibung panda wakan kunum pende tuwalto, na piksa The New World Society in Action pane pam kulu pende mand sembar kelkel erind. Piksa keral ne erind kunum, ond yemyem bol pakle sel kuru ende sip tuwal kankol pakle kelkel erind. Kulu ele monjup alamb piksa kane kawei wei kankane enjip! Alamb puli piksa embe mal nakankane enjip, komna kunum mal kanjip. Piksa kanjip alamb nol panjip kunum, enjep kawei wei pile angel ta kerma tonjup. Piksa e kanjip ga pakerongo Johova witnis ga mal tambem yemyem molpum kumbol ding sende meim ne pilkane enjip.

Na Aprika mond kongar tal wopungo, bulto 1958 kunum kibung intaneisnol ende Nu Yok taun kerma pam pund bar kawei wei pinj. Sila pra painia salim Kuibek ermolo mene wom kanj bar kawei pinj. Kil kunum puli pepe bollo yemyem ere monjil ba piwo wei kansi yu ninjil. Na olom kisi bolsinabel panid, olom kaple panim. Embe pile na angjen Knorr d kisi kaple ende Sila sukul Giliet pu bulto wondo kil Aprika kongan ai enambel kaple manind. Olom kaple panim. Bulto Sila se Gana wom. Kongar 1959 Oktomba 3 kunum, kil kulu Akra pane sembar bolsinjil. Kil Johova si ngimba kenjil bar wal kaka ngom weieri pilkane enjil.

Kongar 1961 kunum, kil kongan pu kantri Kemeron enambel paninjip. Kil kisi pakeronamble brens opis kol ende simin keramen paninjip, na kongan puli keswei mom. Na brens opis kongan kol erind pile, duwom enal wal puli keswei mom. Ala kongar 1965 kunum, pilkane enjil Sila ngal kumbola mom. Na yu weieri ninal, kil ngal danjep manjep mal embe morambel amin napam. Kil ala seyem Kenenda punambel ne erkun ere, kongan  kolmal ende minwom nalmal enambel ne yune pilmonjil kunum, wal kesmal ende min wongo keswei pinjil.

Sila ombun kesmal ende kauwum, ngal kumbola mom nakangim yero gom. Dokta kil nengo, kumbol tuwalto mol gom ngal yengal panim. Wal embe mal min wom kongar 50 wopunom, ba kil auro wei nadom. Weieri wal embe mal min wom bar kil kes pinjil, ba se kulu jel pu Johova konganem kapil enjil mem waknaronjil.

Pilgi ding angjen man Kemeron monjup polotik tuwal napunjup bar kunum puli alamb enjep to erkes ere ere enjip. President vot tonam ne enjip kunum, enjep bol ombun kerma wei pam. Kongar 1970 Mei 13 kunum, ombun kesmal ende min wom e, kulu ele Johova Witnis ga kongan enjip gapman tokol tung sikem. Ala brens opis kawei kil tuwal punjul, oll 5-woyem pum pra tosinjip eri. Wakan dingeri tuwalto misinari—porpor ele monjup kil—Sila bol pra kantri e wakro seori pu sepya ninjip. Pilgi ding angjen ambanjen man wakronamen amin napam, kin enjep kanka wei kanjin pile bulto ombun kerma enjep bol min wondo peine pil keswei pinjin.

Kin oll 6-poro Prens brens opis monjin. Ele monjin kunum na enal—pam wal porpor ere angjen ambanjen man Kemeron monjup pakeronal ne erind. Ding kongar Disemba kunum kil se Nigeria brens pu kongan enambel paninjip. Kil kongan pulnombol enjil kunum, Kemeron kongan enjip kantawol enjil eri. Pilgi ding angjen ambanjen Nigeria monjup kil punjil kawei pane singe kongar pende kongan ai enjin.

Kongar 1973 kunum kil omukro wal ende enambel amin napam wal enjil. Sila kes kerma pende tongo ombun mal pam. Kil Nu Yok kibung ende pam pu monjil kunum, olom wei tomene kelnge na nengo embe nim, “Na Johova konganem pende erpunal kaple nanem! Na kes kunum puli tom pile na wei tomene kerem.” Olom na pakerongo Wes Aprika kongar 14-poro kongan ai enjil. Olom pilgi dongal pange kongan ka erim bar na kapinj, ba kil nomolpa enjil bar wal pende erkun enambel pam. Kil yane ollwal omblombol ne yu pende nepil pakle, ala seyem Kenenda pu olom kes tom marasin si pake sinda nepinjil. Ba misinari molo Johova konganem kunum kunum enjil wakronambel amin napam keswei pinjil.

Kil se Kenenda punjul kunum na kombe senond ye ende, not Toronto mom kar mokungo alamb wo ku ngo sise enjip bar kongan ngom erind. Kil Sila bol gar kulo ende rent ere teipol na ye konganem enjip wal mom toprosi gal kenjil. Embe pile kil bol dina ende napam. Kil nomolpa enjil bar wal ipal kannonambel nepinjil. Ala kunum ende seyem pu Johova konganem kunum kunum ala enambel nepinjil. Kil malmal wei enjil, enambel nepinjil kongan wamnam na sinambel nepinjil mal min wom.

Na pulnumbolo kibung gar ende Ontario tuwalto kulu ende kangem Norval pane sem taujup bar, kunum kunum Sare pakam pu pakeroro erind. Kunum pende wopungo kibung gar taujup  na kongan kantawol endel paninjip. Sila kes tom pornim, embe pile kongan kol enda kaple erim. Kongar 1974 Jun kunum, kil se kibung dumam sembar tuwal pu, gar ende sembar panjil. Johova konganem kunum kunum enambel ne seyem punjil bar kapinjil!

Kil sangiyo wei ninjil, Sila kes nganja pam porwei ne sikera mal pam. Kongar tal bulto seket tawol kongan ngonjup kil si enambel kaple erim. Kenenda tuwalto Propins ende kangem Manetopa pane sembar kil molo kongan enambel pam. Kulu ele bi keswei ere ere erim. Ba pilgi ding angjen ambanjen man ele monjup kanka mem tanine enjip. Kenem kongan nal kulu ende mol enamen, wal kerma ma—Johova konganem anjngo erpunamen wal kerma paim.

Kil seket tawol kongan kongar pende erbilnge bulto 1978 kunum, kil wiro Kenenda Betel kongan enambel paninjip. Kanan napungo na wal ende duwom erind, ngimbil ngom ba wal kerma pam eri. Na kongan ende ngonjup anj dunglom 1auwa 30 minit kele make kerma ende Montriel pambar Prens yua nindel paninjip. Wandil wie, na yu nind pinjip ga pilpol naronjup. Embe pile Sepis Dipatmen kongan erim angjen ende na pilsinal yu negom. Na yu kawei ninal kaple narim, yipe pilkane erind mal embe yero enange pamba, embe nare pilsinal yu nengom mane pilnasind. Kil yu ka ne napinjil na olom bol popol sind nalerim, olom yu omblombol ne na yuka pende nind bar kapa nadom nepinj. Olom wusngam pende karkar ere pilsinal yu nengom bar kanapile, nim yu pilnasind bar alla erind. Ala pilsinal yu nengom angjen bol bunuman dulto nambind.

Kunum apal pende bulto Brens Komiti ende wal minwom bar nabol yunim. Na olom nengo pilsinal yu nengom pilnasind bar wandil wei sind panind. Bulto pilsinal yu nengom angjen bol yu nind. Olom mambnem ka karkar ere na nim alla wakrond panim. Wal embe mal minwom bar na kenem mol mene keramen mal duwom kawei erind, awur ninda kaple na enem. (Prov. 16:18) Wal embe mal mine wonom bar na kunum puli yane ne Johova ngo ala ende pilsinal yune ngonam bar bunuman dulto ambral panind.

Na Kenenda Betel yipe kongar 40-poro mei, kongar 1985 kunum, pulnombol wo piwonom na Brens Komiti kongan erind. Kongar 2021, Pepwari kunum, na kanka kanj ambina Sila gom. Olom gom bar na ombun pende pam, ala nanam kes pende nganja pam eri. Ba Johova konganem kumbol ngo erind bar kapil mei, “kunum kamkam tang wopunom mal kanpol narond.” (Ekl. 5:20) Kunum pende ne Johova konganem erind bar ombun pende pam, ba kapinj mem ombun pam tomen kem. Nomolpa erind bar Johova si ngimba kele kongar 70 tuwalto olom konganem kunum kunum erind, embe erind bar topum ka pende ngom eri. Pilgi ding angjen ambanjen gal walem Johova konganem si ngimba keram naka pil yane nind, na weieri pilkane erind Johova konganem kunum kunum enam erkelde nomolpa esmen bar kawei pilmoram, ala wal kaka ngonda eri.